بورتسودان المدينه التى احببت .. بوست ذكريات واشواااااق مدفقه !1

Quote: عزيزى الأستاذ حسين ما أجمل الذكريات وخاصة تلك المرحلة المهمة من حياتنا حينما كنا نتلمس العلم ومعرفة الحياة. أخوك أحمد عبدالمنعم حسن القاضى دفعة سنة كم وسبعين لما وسط المدينة كانت مساق واحد يمتد من الشرق للغرب ويتوسطه مكتب الناظر جريس. تخرجت من وسط المدينة سنة 1976 وكنت تانى المدرسة وسابع مديرية البحر الأحمر.. وأذكر من دفعتنا الأخوان ربنا يطراهم بالخير: أول الدفعة أحمد مهدى , و امير زروق الفاتح الياس, بدر مبارك الجاك, خليفة بابور, وواحد كان لقبه كراع الجمل صراحة ما متذكر اسمو, أشرف سيداحمد الحسين (الكاردينال , عصام عبدالحميد, وليد مبارك الجاك. بتذكر الأيام ديك كانت قمة المتعة وكان معظم الأخوان كذلك بيلعبو فى فريقين كانت المنافسة بينهم رهيبة وهم أشبال سانتوس و التذكار من بيوت 14. وأولاد التذكار ديل كان عندهم لاعب دايما بيكون السبب فى هزيمة سانتوس على ما اذكر كان لقبه جوكر.. طبعا كان فى وسط المدينة نظام صارم للتدريس يشرف عليه الناظر جريس. برضو كان معانا هشام جريس ود الناظر. لكن الناظر نفسه كان بيعتبر الجميع اولاده وما بفرق فى العقاب . بعدما امتحنا كانت احلامنا الألتحاق بالمدرسة الأميرية وذلك ما كان. برجع ليكم تانى بذكريات حوش المدرسة ودرس العصر والسباحة فى الهاوية فى الكبرى القديم والجلد فى طابور الصباح وتوزيع الحليب والساردين والتونا على الطلبة. لنا عودة لاكمال الونسة.. وشكرا اخى حسين على هذا البوست الجميل المفيد. أحمد عبدالمنعم حسن قطر