|
Re: عاطف خيري يقرأ .. واشنطن الكبرى.. اكتوبر 19 (Re: Red Sea)
|
قصيدة الخرطوم كلمات: الشاعر عاطف خيري يا السامعين .. الواقف فيكم و القاعدين .. أسئلو مرة .. سايق بيجو و يحرق ساكت في البنزين سايق مرتو ..طالع فسحة معاهو ولية و جمبو عيالو الشبعانين هل جربت طلعت الشارع و شفت العالم كيف عايشين؟ و شفت الشفع في الطرقات ؟ البيغسلو في العربات؟ تلقى الواحد لابس هدمو نصو مشرط و نص رقعات عامل ورنيش شافع يادوب ما ربى الريش شايل باغتو و راصي الفيش كش كش ورنيش ورنيش .. كش كش ورنيش ورنيش .. علشان إيه؟ .. علشان ما يعيش ناس بتمسح قعر الجزمة و ناس تتمردغ فوق النعمة و ناس سنتين ماضاقو اللحمة و ناس ضايعين مابين الزحمة أسأل ديل .. كيف .. كيف عايشين؟ ديل الفطو ... فطور الجمعة شان ما ... شان ما يكلو غدا الأثنين .. يعني الواحد في بطن أمو مكتوب ليهو يعيش مسكين ؟ يعني هو ربو وربك مختلفين ؟ يعني الحظ وأداك .. ما بديهو ولو بالدين ؟ يا إنسان بين الماضي وحتى الآن قصة طويلة بدون عنوان .. قصة كتبت فصولها زمان لمن بنيت عليت بنيان .. لمن سرقت حقوق الناس .. وأتعاليت وبقيت تغيان .. فكر .. فكر .. قلب أمرك .. فكر يوم في ظلمك .. قدرك كيف ترتاح .. شبعان في قصرك .. وراقد تحتك زول جيعان .. يمه أظن كترت عليك .. وكنت بوصفلك أكتر وأكتر الخرطوم الماضي الأسواء الخرطوم مستقبل أكبر وشايفك تسألي عن سكانه وغايتو وحاتك ما بتتشكر ناس خرطوم ما جال في بالهم لسع معشعش شبح العسكر واي رئيس تنتخبو الأمة شايل برضو طباع من جعفر يمه دعاك بس كترو منو ويمه جناك ما تسألي عنو ماني براي الضايع وهامي كل الناس الجنبي يأنو وفي الخرطوم الحاله تبكي وما فيش زول في فرحه أظنو .. كتاحة
| |
|
|
|
|
|
|
Re: عاطف خيري يقرأ .. واشنطن الكبرى.. اكتوبر 19 (Re: Red Sea)
|
أقراك مرّة صاح
عكس إحتشادك فى الحضور
هل غاب معاك وعى الطريق
.. أم بيكى زكـّانى الزمن
ماشيك .. وعارفك يا حريق ..
فى يوم غماماتك .. بجن
فرهد غيابك .. أغنيات
ظلت أراضى اللقيا بور
بلقاكى يا كل الطيور ..
مسجونة والحرية .. سور
وبلقاكى بيناتنا الثبات
وبيناتنا شمس البكرة فى لحظة .. مخاض
*******
طول الوجع رشـّح مواطن العافية .. فيك
خلانى أرجع وأبتديك
وأقراكى من كل الجهات
ومابين أقابلك .. ومشتهيك .. كان حلمك الأول
.. ترفْ
وكنتى الصبية الغايبة
فى زحمة حجا .. وكلمة شرف
كنتى الزوايا الميتة .. فى متحف خزف
كنتى الوصايا العشرة .. واللون الشحيح
*********
سميت مساحاتتك حكر
.. كل البيحلمو ا بى الشمس
هجـّرت من واقعك .. عبث
سكـّنت فيك ..ضد السكون
كل اللى كان ممكن .. يكون
وطارت ضفيرتك ليل غنا
جدلة صبُر .. وطولة نفس
*******
ومابين أقابلك وجيت عليك
كان عندى ليك بس نحنّ .. والجرح الثرى
وخيبة أمل أم الشهيد
فى الكلمة .. والوجه الجديد
وكان إحتقان نبض الزمن
نومة طفل .. فوق الدّمن
... يا صاحية بى الحاصل علىْ
يا نايمة عن فقرى ال بليد
سميت منافيك الوطن
.. صبحت مناحاتك ..
... نشيد
| |
|
|
|
|
|
|
|