صباحك يا خرطومنا خير ونهارك ضو ليلك مجرتق بالنجوم وعليك المحبة والسلام ريحتك صندل العز الكبير عطَّر ترانيم الكلام محلق وماشى مالى الجو حالق وماشى شايل الريد الكتير حفيان يقالد فى الدروب فرحان يطايب فى الشدر نشوان يقسم فى الوئام وعليك المحبة والسلام
صباحك يا خرطومنا خير الله عليك يا ريده سكنت فى المسام يا نيل نبيل يا قيف مكحل بالخدار يا ليل جميل يا قمرا بتوصى الحمام قول للشمس اغشى البيوت قبل الزحام وعليك المحبة والسلام
صباحك يا خرطومنا خير ونهارك نور بالتفاصيل الأنيقة و كل مواقيت الحبور وكل فجه تقول حديقة والأغانى تبقى سور كل كلمة تكون حقيقة والحروف موكب زهور وعليك المحبة و السلام
صباحك يا خرطومنا خير يا نشوة فى روح النشيد يا حجوه فى مغرب فرحنا يا نمه فى مسدار مشينا الجاى ليك حتما اكيد يا حلمة سمحه قاعده فى عز المنام يا حب شديد عليك المودة والمعزة والمحبة والسلام
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة