|
|
 في رثاء محمدية .. أمير الوجدان السوداني ( بسمة وبصمة ) ..
|
" /> ">
أمير الوجدان السوداني ..
محمدية ...
( بسمة و بصمة ) ...
ـــــــــــــــــــــــــــــــــــــــــــــــــــــــــ
كيف اصبحته اليوم في علاك
وكيف اصبح قوسك في سماك
كيف اصبحتة ..
وكيف اصبح بسمك من دونك
وكيف اصبح نغمك وبهاك
وكيف اصبح عيدك ونشيدك
وكيف اصبح دنّك وغناك
اكيد لاقيت حبانك وردي
وابوعفان وخليل عزّانا
وابوداؤد والتاج والذري
وود القرشي الحلموا سبانا
عميد الفن والكاشف وجابري
وعاقب الصفا ظمآن لقيانا
اكيد لاقيت زيدان والخالدي
وبرعي القوم عوّاد سودانّا
اكيد لاقيتة هناك بت موسي
وبت الحاج ومعاها منانا
اكيد لاقيتو عميري ونادر
والمحمود حواتي غنانا
اكيد واحشنك إحنا ودارك
وانتة كمان واحش دنيانا
أديتنا جمالك ماقصرتة
وياما الروح طربت نشوانة
رغم الجرح الساكن فينا
ورغم الحال المر حولينا
ببقي رحيقك ساكن جووه
وشدو كمانك قافية حزينة
ونهر بسيمك فضلو علينا
يظل تاريخك ابيض ناصع
وعفة نفسك بتواسينا
والحيشان تشهد جولاتك
والصالات و"كمان" نادينا
ستديو خليل وكرومة بنادو
وبرضو المسرح بي احفادو
ينادي عليك نسيم الطابية
وركن الهادي الكنتةعمادو
تغني عليك ايامي الحلوة
وامير الحسن واهواك ومرايا
ينادي عليك فراش القاش
ومديح البرعيوصولو شجن
وملام وحكاية
غنيت ومليت كل الساحات
لا كليت ولا مليت لا رفعتة الراية ..
رحلته بجسدك بس يا ابونا
إلا رويحتك حاضرة وباقية
و كل بصماتك ساحرة وشافية
هي الغنوات الحانية الراقية
وهي الشاشاي ونحيب الساقية ...
وكيف أصبحته اليوم في علاك
وكيف اصبح قوسك في سماك
كيف اصبحته
وكيف اصبح بسمك من دونك
وكيف اصبح نغمك وبهاك
وكيف اصبح عيدك ونشيدك
وكيف اصبح دنّك وغناك
وكيف اصبح دنّك وغناك
وكيف اصبح دنّك وغناك
ـــــــــــــ.....
( بريقع ) ..
رحم الله محمدية الانسان الفنان العفيف ..
|
|
 
|
|
|
|
|
| |
سيف الدولة ختم بريقع
فيس بوك
تويتر
انستقرام
يوتيوب
بنتيريست