|
|
 Re: ما هي حقيقة مستحضر التإنسان رخيص فيا أناناس/ VIA ANANAS (Re: محمد عبد الله الحسين)
|
محمد عبد الله الحسين
الشغلات دي يا أخوي بيع وهم سااااكت والناس ما عندها شغله وهم ينطبق عليهم مثلنا القائل سيد الرايحه فتح خشم البقرة والزمن ده الرايح ليهو قندول عيش ريف ما بلقاهو في خشم البقرة ولا في إمعائها الغليظة لأن النمط الإستهلاكي حتى للبقر تغير.
الناس بتفتش على أي حاجة والرقابة نايمة والمحتالين كثر ، أها مثلث الجن ده بخليك تبيع الهوا وأونلاين كمان لا أكياس ولا قزاز ، في مرة من المرات جابني الدرب أو جيت بالدرب شاقي ميدان جاكسون الشهير فوجدت واحد فاتح ليهو ضهرية عربية ومتلمين حوله كمية من الناس يبدو من مظهرهم أنهم موظفين مستوري الحال إن لم يكن ميسوريه أها الراجل الوهم دا شايل ليهو مايكرفون وزي حكاية الدلالة كوراك وكلام ونشرات مكتوبة على أوراق رخيصة بطباعة رخيصة تروج للمنتج ، الغريب المنتج أشبه بعصا موسى عليه السلام تعمل العمل والعمل المضاد له يعني على سبيل المثال تكبر الأرداف وتصغير الأرداف ، وكذا الحال بالنسبة للصدر والشفايف وهلم ، عدا عن أن ذات المنتج السحري يقوم بتبييض البشرة وتبييض الأسنان وتطويل الشعر وشد البطن وإزالة النمش والكلف وحب الشباب وأيضاً من خلاله تستطيع أن تقول وداعاً للشيب والتساقط والصلع والعجز الجنسي وإنقاص الوزن وزيادة الوزن برضو يعني الضعيفة تبقي سمينة والسمين يخس ويبقى رياضي. الغريب هذا المفعول السحري لم تتم تجربته في أهم الأمراض المستوطنة الملاريا فلو أستطاع هذا العقار العجيب من تطبيب الملاريا لأنتعش السوق وأصبح جاكسون قبل سودانا فووووووق. وما يدفع الناس لشراء هذا الوهم هو سعره عطفاً على الفائدة المرجوة منه بحسب الدعاية والنشرة فعبوة الوهم لا تكلف أكثر من جنيهات معدودات يعني بالعربي كده لو ما جابت نتيجه حا تطنش وما حا تمشي تفتش للمحتال دا إذا أصلا لقيتو هنا ولم يغير إسم المنتج ولون العربية الفيستو "أداة الترويج للمنتج" .
المصيبة الأكبر أن كل تلك المنتجات مجهولة المصدر يتم الترويج لها عبر القنوات الرسمية من تلفزيون وصحف وهلم ، وأنها تؤدي في الغالب إلى الكثير من المضاعفات والمشاكل الصحية وأن الناس بحاجة أأولاً إلى التوعية بخطورتها ومحاربة المروجين لها. منتج فيا أناناس واحد من تلك الألاعيب والخدع ويبقى شأنه شأن حبة البركة وزيت النملة وكريم الجراد في ميدان جاكسون مع إختلاف طريقة التعبئة والعرض.
قريبن لينا إشترالو شاي تإنسان رخيص وحاول أول يوم وتاني يوم منتظر النتيجة أها عاين في المرايا وقبل ما يقول ليها كلميني يا مرايا عرف الحكاية بايظه فضرب للشركة وقال ليهم كيف تضحكوا على وتقول الشاي بخسس أنا لغاية هسي شربت يجي 23 كباية وعلى الريق وما نقصت ولا كيلو ، فرد عليهو الموظف وقال ليهو يا ود عمي كان الناس بنتقص بالشاي ما كان في داعي للجري والتمارين الرياضية وعلى فكرة الناس البتشوفهم في الدعايات ديل أبطال كمال أجسام الواحد فيهم بتمرن بالميت 4 ساعات في اليوم تقول لي شاي.
|
|
  
|
|
|
|
|
| |
almulaomar
فيس بوك
تويتر
انستقرام
يوتيوب
بنتيريست