|
|
 Re: تـــــحـــــــــــــرش (Re: د.محمد حسن)
|
ماكان لقانا على هدب القدر صدفة
كان ارتجا اللحظة الذهول
وضربت رملي على بختك واقول
سالت بي كل اندهاش
هل كان ما كان
في حكم زولا
بغامر جوة في حاجة
بتحير للعقول؟
كان اقتحام هذا التوقع
حاجة زي اسطورة ما معقولة بس
مقبولة
في روعة جمال
زي اغني الساقية
والليل منقسم
والقاك شادن عمري
ويسكرني في ريدك طرب
والقاها عرصات الفؤاد
نبض الحنين بي روعتك مأهول
تاهت سفاين شوقي
في بحر التوجس والنهايات الوهم
النوارس غايبة تسال في الغمامات
وانا في عوالم دهشتك
بترقب العشم الوصول
عافت حسايسي انفاس المنافي
وكرهت الوان المرافي
وشعرت بي وحشة وجوى
لمن لقيت كانت مافي
نورت مصباح الحقيقة
ضاوي في وضح النهار
وبديت افتش
عن مفاتيح الدخول
يازولة تملا الروح ثقة
يابنية من ريحة شوارع امدر
ومن نفس الضفاف الشاربة من النيل صبوح
جيتك علي
كل العنت
ختيت حمولي على عصب الكلام والمفردات
وتعبت من سفرا بطول
وريني بس
ما بين عيونك وسكة السفر البعيشو
اشواق وخوف
وعصب مستف بالحنين
يازول حنين
ونبد نسال
ديل منو
وعايزين شنو
وجونا من وين؟
ياغيمة السعد الهوى
وطلاسم الشوق الجوى
وخريطة تاهت فيها
في لحظة المعالم
وحرامي في الجامع بدرس
ويدي للناس الدروس
ويا الله عالم
وتقولي لي اسكت كفاك
خليه قول
عايزاك ترجع لي
يا احلا زول
وريني بس
كيف السكات
والناس بتمشي في الشوارع
جواها تصرخ في السكات
لا عارفة انها عايشة زي كل الخلوق
لا في الممات
اعفيني يا زولة
بتوج جواي كما العصافير
في الخريف
انا من ضراع النيل
الازرق
او الابيض
كنت اتغذيت بكل الانتما
وشربت من موية دميرته العاكرة
احلا من الزلال
اعفيني ما بقدر اصم
يا حليوة في جواي قول
عشان بريدك
وبشوف حروفي تتاتي ليك
مزيونة بي كل الحلاة
لانو في عيونك شعاع البهجى
يا ست الغلا
من نور بسيمك كان بغير لصف البرق
ومن نور عيوني كان بكون مدخل
ظنوني اليك والخاطر
بروض في عنادك
اصلو طبعك زول جفول
بكتب خطاويني اليك
في صفحة الليل الندي
وتقولي لي افصح شديد
وافصح معاك يفضحني حرفي
الما بخاف
لكني جد
حضرتك انا زول خجول
وبس
|
|
 
|
|
|
|
|
| العنوان |
الكاتب |
Date |
| تـــــحـــــــــــــرش | د.محمد حسن | 05-28-14, 04:49 PM |
| Re: تـــــحـــــــــــــرش | عادل البراري | 05-28-14, 05:41 PM |
| Re: تـــــحـــــــــــــرش | اخلاص عبدالرحمن المشرف | 05-29-14, 09:40 AM |
| Re: تـــــحـــــــــــــرش | اخلاص عبدالرحمن المشرف | 05-29-14, 10:01 AM |
| Re: تـــــحـــــــــــــرش | د.محمد حسن | 05-30-14, 08:10 AM |
| Re: تـــــحـــــــــــــرش | د.محمد حسن | 06-03-14, 00:22 AM |
| Re: تـــــحـــــــــــــرش | د.محمد حسن | 06-04-14, 11:04 AM |
| Re: تـــــحـــــــــــــرش | د.محمد حسن | 06-05-14, 02:51 PM |
| Re: تـــــحـــــــــــــرش | د.محمد حسن | 06-08-14, 01:27 PM |
| Re: تـــــحـــــــــــــرش | د.محمد حسن | 06-10-14, 10:22 AM |
|
| |
د.محمد حسن
فيس بوك
تويتر
انستقرام
يوتيوب
بنتيريست