|
|
 محمد النصري ..نورس الفرح
|
هؤلاء المحملون على جناح الوسامة 00المضمخون بالعطر ..الذين يرسمون الفرح في دروبنا .. نحملهم كأزهار الربيع بنفسجا يضوع طيبا ، هم الذين نلجآ الي أصواتهم التي تحمل في جنباتها معاني السلام .. الشجن .. الحنين ..لسان حالنا في كثير من الأحيان ، بل جل التعابير والمفردات العصية التي تأبي أن تنسلخ عن جلد الأشياء .
النصري .. أحد هؤلاء في صوته مفردة الحنين والشجن ، نجده في عدة نصوص يلبس عباءة التجلي يأخذنا لدنياوات محفوفة بأطر المعاني التي أراد شعراؤها أن نكوف فيها .
سكة رحيل .. غيبي ياشمسي .. لونت الزمن .. يازول يا جميل .. يسوقني الشوق .. النصيب .. سلامك .. عطور الإلفة .. النسائم .. أماني .. أم الحسن .. ست الدار .. في غيابك .. شادية .. كان شوقي ومناي .. ابو الهدهد .. عبر الآثير ..سكن في عمق هذه النصوص ..عاش مفرداتها كلمة وعطر أعطاها من روحه نفحات فخرج اللحن شجيا يزغرد كعرس الأماني ، بهيا .. أنيقا في مضمونه وروعة إدائه .
سكة رحيل
هادنت أطيافك دموع
شديت يقيني ..سرقت خيل
خيمت من تال الآسف
شداني للأحزان صهيل
كحادي الرواة .. متفردا يحتلب اللحون الخضر من ثدي الأوتار فتسري كعناق الفجر للأرض البتول ..تستعصي كما السؤال العسير وتتواضع لتحف كل الوجود غناء عذبا ودواخل حنينة .
سلامك
سلامك ما هو قلبك
سلام زولا علي مجبور
ليه القمرة تقسي عليّ
ومن دنياي تشيل النور
أنا أجيك مشتاق .. أجيك ولهان
يفيض الشوق بحور و بحور
أتمني التلاقي معاك وجبر الخاطر المكسور
النسائم
ما غشت النسائم روضنا لا فتحت الأزهار
لا حام الفراش في صباحو لا غازل النوار
لا عادت ليالي غرامنا لا غنت الا طيار
يالحظة عشقنا السامي وينك يا صفاء الأنهار
النصري
درة الشمال وبرق الوطن اللامع ..يقف هنالك علي التلة تلوح له أذرع النخيل وتحمله علي صدر الريح .. تركض الأنجم تطارد صوته الحنين فيزدان في بريق الليل .. يتسع كالحكايا .. يصير هجعة مسافر وإتكاة غريب .
أماني
كلمات : عثمان عوض ضرار
زي لون الفرح زي نسمة
زي طعم السعادة أماني
من عينيها أول نظرة
ذوبت العناد في كياني
أحلي من الأمل والله
أحلي من الربيع وأزهاره
لا محدود ولا متناهي
نورها الفيني أشعل نارو
دون إحساس وقفت أمامها
دقيت لهواي أوتاره
وغنيت في جمالها أغاني
من وحي الغرام وأشعاره
أرتديت بعد ما توبت من قوله بريد وبعاني
حتي شقاي يوم ودعتو عارف نفسو راجع تاني
عارف أنو في أيامي بعض العذاب راجاني
وأشواق ما بتخف تتضاري بالامه تتحداني
سلمت ورضيت بالقسمه برافة فؤادي وحالو
باشواق عيوني الساهرة لطيف الحبيب وخيالو
عارف ما بقاوم حسنو يهزمني الجمال في دلالو
تاسرني النداوة الفيه الرقة وبشاشة إستقبالو
خايف من ظروفي تعيدني لآسف العواطف تاني
وأرحل في دروب ودارة وأغرق في بحر أحزاني
أتناسيت زمان المرة حتي زمانها إتناسني
كيف أنسي الملكني هواه وكيف تنسي الأماني ..أماني
في عينيك تبين الروعة وأروع ما حواه زماني
تتوهج تشع زي فكرة .. زي نجم الصباح الداني
أفسحي لي فيها مكانة خليها تكون عنواني
ما دام فيها لي تجلي قدرة ربي يا إيماني
يا كعبة طواف إحساسي يا مرسي الجمال ومداره
جيتك والأمل سايقني لورد الخدود ونضاره
أفتحي لي باب في الجنة لهمسة هواك وأسراره
وأسقيني الفرح وإستني أعرفي قلبي أيه أخباره
هكذا صدح النصري ولا يزال يملأء الدنا من حولنا نغمات تفيض بالمعاني ..تحكي عن أسرار العشق .. الأحلام المكسورة.. الفرح المجبول والبوح الساكن في عمقنا.. فله التحية ..بعض من عشق وكل الأمنيات..
أدم العشا
|
|
 
|
|
|
|
|
|
|
|
Re: محمد النصري ..نورس الفرح (Re: Adam D.El-Asha)
|
الأخ آدم
تحية طيبة
شكراً لطاقة الإبداع هذه ، الفنان محمد النصرى موهوب صوتاً وإبداعاً تطريبياً وعزفاً بارعاً على الطمبور
إضافة للكلمات المعبرة والحنينة لأغانيه الرائعة
special request أسمعنا رائعته أم الحسن
(سلامى أنا ليك مطرز للبنات والبنين .. ولو الأرض يا ولدى تنشال فى الإدين كت برسلا ليك فى لورى الخزين)
| |
|
|
|
|
|
|
|
|
|
Re: محمد النصري ..نورس الفرح (Re: Adam D.El-Asha)
|
أخي الكريم نادر
لك ودي
النصري شعاع براق يضوي بالحنين .. يعيش اللحن ويتفاعل معه يجعلك تخطو معه لوهلة وبعدها تسرع الخطو لتدرك من الذي يرقد خلف التلة ..
لك معزتي وشكرا لمرورك الأنيق
آدم العشا
| |
|
|
|
|
|
|
|
|
|
Re: محمد النصري ..نورس الفرح (Re: سامى عبد المطلب)
|
سلامات يا زول يا آدم
و التحية لضيوفك
من اروع ما غنى هذه الكلمات و هي تحكي عن رسالة ام لولدها المغترب
الزمن يا ولدي ماحقاهو السنين
البعيش في الدنيا ما بعيش مرتين
العمير فاضل لي بس منو اليقين
وانت طوّل في البنادر يا الحبيب لا متين
تعال اوريك حق ابوك الجم حقيق حاج اللمين
... ان عرفتو بلا عمار يقولو ولداً عندو طين
العلاج لا تنسي رسلو لي دحين
العوينات يا جناي شوفن ضنين
سلامي أنا ليك مطرز للبنيات والبنين
ولو الاض ي ولدي بتنشال في الايدين
انا كنت برسلها ليك في لوري الخزين
| |
|
|
|
|
|
|
|
|
|
Re: محمد النصري ..نورس الفرح (Re: خالد المبارك)
|
Quote: الزمن يا ولدي ماحقاهو السنين
البعيش في الدنيا ما بعيش مرتين
العمير فاضل لي بس منو اليقين
وانت طوّل في البنادر يا الحبيب لا متين
تعال اوريك حق ابوك الجم حقيق حاج اللمين
... ان عرفتو بلا عمار يقولو ولداً عندو طين
العلاج لا تنسي رسلو لي دحين
العوينات يا جناي شوفن ضنين
سلامي أنا ليك مطرز للبنيات والبنين
ولو الاض ي ولدي بتنشال في الايدين
انا كنت برسلها ليك في لوري الخزين |
أغنية أم الحسن أصلها جزء من خطاب رسلوا الشاعر خالد شقوري للاخ أسامة حمزة
وللاسف ضاع النص والنصري بالصدفة تحصل علي الجزء المغني من القصيدة وتفنن في اللحن والاداء
شكرا أدم العشا والضيوف الكرام علي النافذة الجميله
| |
|
|
|
|
|
|
|
|
|
Re: محمد النصري ..نورس الفرح (Re: Adam D.El-Asha)
|
خالد المبارك
تحية وإعزاز
أغنية أم الحسن إحدي الروائع التي تغني بها النصري ..وهي من كلمات خالد شقوري وكما ذكر الأخ سيد أحمد شامي بأنها جزء من رسالة موجهة أسامة حمزة ولا ملك خلفية لهذه الرواية .
سلامي ليك والبنين والبنات
آدم العشا
| |
|
|
|
|
|
|
| |
Adam D.El-Asha
نادر الفضلى
سامى عبد المطلب
خالد المبارك
saidahmed shami
فيس بوك
تويتر
انستقرام
يوتيوب
بنتيريست