|
|
 بتـــريــد اللطــام
|
أغنيـــة(بتـــريــد اللطــام) قصيدة حماسية للشاعرة (رقيــــة ....أخــت ود حبـــوبــــة)
بتريد اللطام أسد الكداد الزام
هزيت البلد من اليمن للشام
سيفك للفقر قلام
*********
ديّم في التقر انصارو منزربين
بالصفا واليقين حقيقة أنصار دين
بالحرب أم طبائق قابلوا المرتيين
في وش المكن رقدوا التقول نايمين
***********
ديّم في التقر انصارو زاربنو
بعهدوا القبيل بعيسى تاهمنوا
اتلموا العمد ليهم نقر سنوا
الهوج والشرق طار المنام منوا
**********
ديّم في التقر قال العمير للسوم
القوى والضعيف من عينو طار النوم
الكفرة النجوس مابختوا من اللوم
حجرت الدرب خليت جمالهم تحوم
*********
الأسد النتر وقال الدين منصور
لمولوا الاورط جابوهم بالبابور
العمد الكبار كلامهم بقى مدحور
كم فقشت مدير وكرمت بالمأمور
***********
الأسد النتر بى جيهة الأبقار
لمولو الاورط شايلين سلاح النار
ود حبوبة قام ورتب الأنصار
في كتفيه ديك كم شبعن صقار
***********
الإعلان صدر واتلمت المخلوق
بى عيني بشوف أب رسوة طامح فوق
كان جات بالمراد واليمين مطلوق
ما كان بنشنق ود أب كريق في السوق
***********
الإعلان صدر واتلمت الحلال
نصبولو السلاح واتكرنف الخيال
قدر الله الحصل و الزمان ميال
منسول من أبوك ماك ود حرام دجال
***********
بتكلم بقول بوريك شن حسبوا
نايبو السنين منّو الرجال حسبو
كل الخاصموك في الآخرة ما كسبوا
التبعوك جنود لله ما انتسبوا
***********
رضوان الإله تملأ الضريح كافور
مسك الرحمه لاح منو يلوح النور
اغفر سيئات كل من يجيك زور
في الفردوس هناك يتمنى مهما يدور
يتبـــع توثيق الدكتـــور (أحمد قرشي):
سنحاول شرح بعض كلمات هذه الأغنية مستصحبا معي قاموس اللهجة العامية في السودان للبروفسور عون الشريف قاسم
الكــداد : شجر بعينه مشهور بشوكه ولعلها القتاد ومن ذلك قولهم شوك الكداد
قالت إحدى النساء ( اخوانى إخوان الكداده ، أسياد المهره أم قلاده ، أسياد
القرعه أم جماده ) وقال آخر ( أنا ود الحي يابس كداده ... ضفر الديك وقدوم
الجداده ).
التقر : نبات خلوي ترعاه الإبل وتقصد بها الشاعرة منطقة بالحلاويين
المرتين :اسم بندقية قديمة
المكن : تقصد به الرشاش
العمير للسوم : سوم اى باع ووهب وعرض للبيع ، قال الشايقى .. عِلّ (إلا) أنا أب روحا سايما يا غرق يا جيت حازما
كتفيه : قرية بمنطقة الحلاويين
بعيسى تاهمنو : بعض أعداء ود حبوبه اتهموه زورا وبهتانا بأنه ادعى
العيسويه وانه عيسى بن مريم خاصة وانه في تلك الفترة ادعى أكثر من رجل انه
عيسى بن مريم ولقد إعدام كل من ادعى ذلك
منقول
بقلم د/احمد القرشي .... منقـــول (4) والشكر للأستاذ (أبوبكر الرازي) بمنتديات (كبوشية) والذي إستعرنا منه هذا الموضوع:
[
أغنية الآلاف درجن قيلت في الشيخ الأمين ود مسمار ولقد الفتها رقية أخت
الشيخ الأمين عندما انتصر في واقعة الهلالية والتي كانت بين الهمج
والعبدلاب ويقال إن الشيخ الأمين هوى بسيفه على أبكر بن وحش( احد كبار
الفونج والذي أوكل إليه ناصر ابن محمد أبى اللكيلك قيادة الجيش الذي عبر
النيل إلى الهلالية) فشطره نصفين وحام به فرسه بهذه الصورة المروعة فكان
ذلك من أسباب الرعب الذي ملأ قلوب الأعداء ولقد صورت لنا الشاعرة هذه
الواقعة حيث قالت ...
من قومة الجهل ما خوفوك باخ
تور بقر الجواميس الرقادن لخ
نقروبو أم هبك الدرباخنه تضخ
قرنك بفتح الهامه وبمرق المخ
، فحاقت بالهمج أبشع هزيمة (كتاب مشيخة العبدلاب صفحة 326) أما نعوم شقير
في كتابه جغرافية وتاريخ السودان فلقد قال إن الشيخ رجب ابن الشيخ محمد
أبى اللكيلك احد وزراء الفونج أرسل أخاه ناصر إلى الجزيرة ومعه نحو 700
فارس لمحاربة الشيخ الأمين الذي كان مقيما بالهلالية ولم يكن مع الشيخ
الأمين حين مقابلته لهم إلا 16 فارسا من أولاده وعبيده ولقد ذكرت لنا رقية
بنت مسمار هذا العدد في أغنيتها قائلة ...
غنى وشكري يا اختو يا ريا
تمساح الكوانى الضارب الليه
سمعنالن خبرا في الهلالية
خمستاشر جواد سكن سبعمائه
فهزم ناصر الأمين ود مسمار وولى أخاه بادي بن مسمار مشيخة قرّى بدله وذلك
سنة 1198 هجرية 1784 م (جغرافية وتاريخ السودان ص 400) ... وبغض النظر عن
من انتصر في هذه المعركة ( هذه مهمة المؤرخين) فما يهمنا بعد هنا هو إن
الشيخ الأمين ود مسمار قد استبسل في هذه المعركة واستطاع بعدد قليل من
الرجال لا يتجاوز 15 فارس أن يقاتل جيشا فاق عدده 700 فارس فكتبت أخته
رقية هذه القصيدة تمدح شجاعته وبسالته..
غنيـــة (الآلاف درجن) كلمات الشاعرة (رقية بنت مسمار)
الآلاف درجن ولدا نجيض ماك ني
البجرجر فى ام صقير وحدي
********
غنى وشكري يا اختو يا ريا
تمساح الكوانى الضارب الليه
سمعنالن خبرا في الهلالية
خمستاشر جواد سكن سبعمائة
*******
من قومة الجهل ما خوفوك باخ
تور بقر الجواميس الرقادن لخ
نقرولو أم هبك الضربخانه يدخ
قرنك بفتح الهامه وبمرق المخ
*******
أنا قولي ليك صحيح
ياركاب على شلق بنات الريح
ياجدرى النزيله الدم كرف في القيح
ادر صاقعة التلوي المقابله السيح
*******
ما بحركو الكشكيش
والقلب ان رجف ما بنفع الحريش
الجنيات براك في الحلة آفة عيش
ود المقدره البيعزم على المافيش
هنالك اختلاف في بعض الكلمات بين مغنى وآخر حيث غنى هذه الأغنية الفنان
خلف الله حمد ومبارك حسن بركات والراحل بادي محمد الطيب.. ولقد أوردت
ترتيب الأبيات حسب ما تغنى بها الفنان مبارك حسن بركات .. أما كلمات
الأبيات فكما تغنى بها الفنان بادي محمد الطيب .. حيث هنالك بعض الاختلاف
حيث يقول مبارك ( غنى وشكري الليلة يا بنية) .. أما خلف الله حمد فلقد
استبدل كلمة ما خوفوك ب( ما بخوفوك باخ) وكلمة نقرولوا ب(ضربولو أم هبك )
وبدلا من ما بحركوا ب ( ما بخوفوا الكشكيش )والقلب إن رجف ب( القلب إن
طفش) أما مبارك حسن بركات فلقد تغنى ب (القلب إن ثبت ) وهنا لا يستقيم
المعنى .. وايضا خلف الله حمد يقول ( ود المك دا راجلا بيعزم) بدلا من ود
المقدرةالبيعزم ........
شرح كلمات الالاف درجن :
تمساح الكوانى : الكوانى جمع كونيه وهى حفرة في النهر تزلق فيها القدم ويغرق فيها الانسان قالت الجعلية ...
بشير ود الكوانى .... أب كرقا بانى
الضارب الليه : الليه ما التوى من النهر قال احد الشعراء
صقور الميتره اخوانك دوابى الليه
اللخ : نبات للعلف وتصنع منه أسرة البدو المعروفه بالسديب، رباعة لخ هي العجلة الرباعية
أم هبك : الدلوكه ، هبّك : صوت نقرات الطار والدلوكه قال حاج الماحي ( تاب
لي الله ودق الطار هبّك) وهبك الدلوكه ضرب عليها براحة اليد اليمنى واليد
اليسرى وكوعها معا في تناوب .
شلق بنات الريح : الخيول السريعه
الجدري النزيله : الذي ينزل على الناس ( ياجدرى النزيله اللي جلود رشاح) وقالت بت مسيمس ...
ياجدرى النزيله الفرزولك بيت
كرف .. شمّ ..كرف أيضا بمعنى قرف والقرف عند العرب هو العدوى والوباء
القيح : الجرح أو المدة البيضاء الخاثرة التي لايخالطها الدم
ادر: الأسد وتعنى القاتل وأيضا التمساح قال الشاعر الشايقي ( يا ادر أم سيوف الراقد الهبدة) ادر كوجه لقب حمد العبدلابى
التلوى : المطر الذي يأتي في أخر الخريف
السيح : هو الخلا وأيضا الأودية التي تسيح
استعنت في شرح الكلمات بقاموس اللغة العامية في السودان للبروفيسور عون الشريف قاسم
بقلم د/احمد القرشي .... منقـــول (5) والشكر للأستاذ (أبوبكر الرازي) بمنتديات (كبوشية) والذي إستعرنا منه هذا الموضوع:
أغنية الواعي ما بوصو من كلمات بت مسيمس وهى حكامة وشاعرة الزبير باشا
ولقد عاصرت ود حبوبه وثورته واسمها الحقيقي رقية أيضا وهى من منطقة
المسلمية .. ولقد تحصلت على ثلاث نصوص لهذه الأغنية منها نصا مكتوبا
وتختلف هذه النصوص عن بعضها البعض قليلا... استمعت لها من الفنان بادي
محمد الطيب والفنان بابكر ودنوبه وهو من منطقة بارا ... ونص ودنوبه لا
يختلف كثيرا عن النص الذي أورده الأستاذ صديق محمد احمد البادي في كتابه
لمحات من حياة ود حبوبه ... ولحن الأغنية الحالي لبادي محمد الطيب ، حيث
ذكر لي الفنان بادي محمد الطيب إنها كانت تغنى في شكل مناحة وكذلك أغنية
بتريد اللطام ..
أغنيـــة ... منــاحــة (الواعي ما بوصــو) كلمات (بت مسيمس) القصيدة برواية الفنان (بادي محمد الطيب)
الواعي ما بوصـو
من أمس الضحى
تورى أب زنود ساقو
يا مقنع ولياتو
********
تور بقر الجواميس العليك الرك
يا عقد الحديد للحلبي ما بتنفك
تورك يا أم رشوم في الحلق عشرق
دقيت الجسر وحاجر مشارع الحق
*********
غنيت وجبت مسدار
المكنه بتكاكى وجنن مدافع النار
لفوك يا رحل الكحل دلوك ما بتندار
أمانة يا صقر ما تفرشت ليك برجال
********
غنيت وجبت نمك
بجر القول عليك يا مقنع الكاشفات
أسد الخلا الحجر اليويات
ساقوك لي الشنق
يا أبو أمنه حوبتك جات
*******
غنى وشكري يا خضرة الجٌم
طلع لي عشارى الليله مسكو يفوح
ما خطف البدينقه وما جفل مجروح
سيفو بياخد الخوده ومعاها الروح
********
أمك ولدتك ما ولدتم أتنين
تسلم لي يا تلبى البكيل العين
حالف يمين ما بكون بين البين
دقيت الجسر لي متعة الحيين
*********
غنيلو يا بنيه
من قومة الجهل ما قاملو بى نيه
وكت الشوف أشوف وقفولو سلطيه
تعدى وركز قال اخوكى يا رقيه
************************************************** ****************
منـــاحـــة (الواعي ما بوصـوه) شــاعرتها (بت مسيمس) رواية ثانية لكلمات الأغنية :
الواعي ما بوصوه من أمس الضحى
تورى أب قرون ساقوه يا مقنع ولياتو
الواعي ما بوصوه الفتح الدرب خلى العريب يمشوه
************
غنيت بجيب مسدار
المكنه بتكاكى جنك مدافع النار
يا قصر الرجال اللي الفقر عصار
يا قصر الفراسه اللي الضلع كسار
يا نار الزبل الما بندركلك حال
يا رحل الكحل لا بتنزاح ولا بتندار
عوج الطنضبه الما بتعدلو النار
درعولو أم خريز العسكر الزنهار
مأمن بالقماحه اتقدلت ليك برجال
***********
الليله عليك غنيت
بلع الألف كلو قال ولا استكفيت
يوم جوك للحرب لا سخيت ولا ضليت
صامت بالقماحه أتفرشت واتغطيت
دا تور الجواميس العليهو الرك
دا عقد الحديد لى الحلبى ما بنفك
دا سم الغدور الفى الحلق عشرق
منو غيرك دق فى الحراجه مدافع الحق
***********
الليله عليك غنيت يا مطرق الجراح
قلت ليهم عشارى مسكو يفوح
ما ختف البدينقا وما جفل مجروح
بلع الألف كلو درب الجبين مطروح
جابوك بى أم خريز الزدخانه تفوح
سيفك بشيل الفقر ومعاها ملاح المخ
***********
من كوجه وكجيج لي عند بلاد العين
جابونا الضحى في مركز الكامنين
الأهبل يقول أدوه عشره سنين
والعاقل يقول حكموا عليهو بسنتين
وكتا جانا الجنا الطبق الجنيه في أتنين
كملت العمد والمشايخه وحلانين
********
ابشر يا صقر ما تكتر الحلقان
تأكل ليك مطايبا ما لحم سخلان
تأكل في المطايب ما لحم عيران
تأكل في المطايب فوق ضهر سلطان
تتغدى وتفوت كبده وكلا ومصران
شن منك نقول لامات عقيد مرجان
********
تكلم يا لساني تكلم المنطوق
عن مدافع الحق الفى مشيها بروق
قال قاسم اليمين كان اليمين مطلوق
زى كاسر الأسود ما بشنقوه في السوق
شـــرح للكلمــات :
يا نار الزبل الما بندركلك حال
نار الزبالة حيث أنها لاتنطفئ بسهولة وتكون متقدة لفترة طويلة
يا رحل الكحل لا بتنزاح ولا بتندار
الرحل هو ما يحمل على ظهر البعير من قفاف وغيرها أو هو مكيال حمل جمل ....
والكحل وزنه ثقيل جد ويصعب رفعه عل ظهر البعير إذا امتلا به الرحل
قالت الشاعرة ...
الليلة الأسد الجاي من جبال الفيل ...... بشمشم بيكوس بيسأل من العنتيل
يا رحل الكحل الديمه وزنو تقيل ...... يا جدري الشمومه الزول تشقو عديل
عوج الطُنضبه الما بتعدلو النار
طنضب هو الطندب وهو شجر أعواده قوية .... ودائما تعرض الأعواد المعوجه إلى
النار لتعديلها حتى تكون مستوية ولكن عوج الطندب لا تؤثر فيه النار
درعولو أم خريز بأم عسكرا زنهار
أم خريز هى حبل المشنقة وزنهار اى منتبه وواقف زنهار اى واقف انتباه ... قال المغنى ... واقف زنهار ياعلى ... فارس حار يا على
وتقصد بت مسيمس إن من نصب المشنقة هم العسكر المنظمين
يا جدري النزيله الفرزولو البيت
جدري النزيلة : النزيلة هي التي تنزل بالناس قال احدهم ... يا جدري النزيله اللي جلود رشاح
الفرزولو البيت : قديما كان كل من يصاب بالجدري يعزل في بيت بعيد عن
القرية حتى لا تنتقل منه العدوى للآخرين .. ولقد وصف الرحالة لويس
بوركهارت عزل المصابين بالجدري في بيوت بعيدة عن قرى النيل في شمال
السودان وكان ذلك إبان زيارته سنة 1812 م
الحراجه : سوق الحراج أو سوق المزاد والدلالة قال الشكرى ... الما اتلتلت
في سوق الحراج مجلوبه ... الجدير بالذكر إن ود حبوبه شنق في السوق .
قلت ليهم عشارى مسكو يفوح
ما ختف البدينقا وما جفل مجروح
العشارى : هو التمساح
بدينقه : نوع من حراب الصيد يستعمله صائدو التماسيح يربط طرفه بحبل أو خيط
قوى قال احدهم ( نفسك مسك الخطف البدينقه وفات ) والخطف البدينقه كناية عن
التمساح .. وتقول بت مسيمس إن ود حبوبه أقوى من التمساح حيث انه لم يخطف
البدينقه ويهرب
منقول من النيل الازرق لهم التحيه و الاحترام
|
|
  
|
|
|
|
|
|
|
|
Re: بتـــريــد اللطــام (Re: ايهاب نميري)
|
سلامات اخي النميري
بوست جميل جدا نسمع كثير من الاغاني
الحماسية ولكن لانعرف في من قيلت
ولا الاسباب التي قيلت فيها اتمني
ان تواصل في هذا المجال والتحية
عبرك للقامة احمد القرشي وللاخوة
في منتديات النيل الازرق
تسلم
| |
|
|
|
|
|
|
|
|
|
Re: بتـــريــد اللطــام (Re: سليمان القرشي)
|
الحبيب الاستاذ ايهاب نميري كل عام وانت والاسرة الكريمه بالف خير وربنا يحقق امانيك ...
بوست تفوح منه رائحة التراث والشهامة وغنانا الرصين في الزمن الجميل وده غنانا القمنا عليه نحن في العيلفون وهنالك امثلة عديدة عندنا من غنا الجاغريو وود الرضي وكمان ما ننسى عمتنا زينب بت البخيت التي قالت ... ((اتباشرو بي بلاكم واركزو زينب وراكم)) ويا ريت استاذنا احمد القرشي يزور هذا البوست ويتحفنا بالروائع امثال رائعة الجاغريو التي قيلت في العمدة محمد بركات عمدة العيلفون (( الظايط ما بنقدر سيل الوادي المنحدر )) او رائعة زينب بت البخيت ايضا (( منايا ليك ما وقف اتمنيت انا تكبر تشيل بي ردف مو لقاط طرف )) والتي قيلت في جدنا الخليفه بركات خليفة الشيخ ادريس ود الارباب راجل العيلفون والولي الصالح المعروف ...
على العموم اشكرك على هذا البوست الجميل الذي ينعش الذاكرة ويريح النفس .. وعبرك احي استاذنا احمد القرشي ونحن في انتظار المزيد ...
تحياتي : ياسر العيلفون
| |
|
|
|
|
|
|
|
|
|
Re: بتـــريــد اللطــام (Re: ايهاب نميري)
|
الكلس \ ايهاب ..
لك التحية والتقدير .. ولضيوفك الاكارم ..
يسلم صالونك العامر .. بوست موفق وعامر بالتراث وسودانا الاصيل ..
ودمت وسلمت .. وتااااااابع ومتابعييين اكتر منك .
ولي قدام .
| |
|
|
|
|
|
|
| |
ايهاب نميري
سليمان القرشي
ياسر السر
ismeil abbas
مني عمسيب
عزالدين عباس الفحل
فيس بوك
تويتر
انستقرام
يوتيوب
بنتيريست