|
|
 بنت الجيران هي البنت التي يسبقها حيائها لفتح باب الشارع (آيات مبارك النور)
|
بنت الجيران هي البنت التي يسبقها حيائها لفتح باب الشارع وعينيها على الأرض وفي كل دقيقة وثانية بتعدل في طرف توبها ومن كانت صغيرة بتلعب مع أولاد الحلة دسوسية وجريناكم وبوليس وحرامية وبعد داك بينفصل الفريق فتلعب البنات الحجلة وعروس وعروس .. وبيت بيت وذلك المطبخ الملئ بي كيزان الصلصة ... ويلعب الأولاد الكورة والبلي ولما يتلموا الفريقين بيلعبوا الكمبلت ..
وتمر الأيام ويهدأ اللعب ويبدأ تبادل الكتب والنكت وحل الألغاز بالليل لما الكهربة تقطع ... ويستمر هذا المنوال إلى أن يصل الجميع الصف السادس وبعد داك بتبدأ حسابات بت وولد .. والبنت أخوها بحميها تطلع الشارع وأمها مابترسلها الدكان الإ مع زول .. ومن هنا بحس ود الجيران إنو فقد زول مهم كان معاهو ... ولما يلاقيها مابترفع راسها تعاين ليهو .. !! الإ بالسرقة وفي كل يوم بيكتشف إنا كبرت وزادت حلا وبعد داك بيظهر أجرأ ولد وبت في الحلة وبتبدأ القصص .. فلان وفلانة بتلاقو في الميدان وفلان بقيف لفلانة جنب الدكان أو العمود وجنب باب المدرسة .. وديل غالباً ماتصبح قصصهم مثار تساؤلات الجميع وبعد داك بكمل المجتمع بقية القصة والحوار من خيالو .. ويصبح شغلهم الشاغل ولا حديث لهم سوى ذلك الحب الطافي على السطح .
وطبعاً حاجة زي دي مابتندسة وإمكن البت أخوها يعرف بالصدفة أو واحد يلبس ثوب الناصح ويكلموا أو يتشاكل مع أولاد الحلة .. واحد يقوم ينبذوا بي أختو ..
ويجي البيت يضربها ويحميها تطلع .. ومرات الواحدة بتعرف أخوها لمن تجي تغسل هدومو وتلفي الجواب في جيب البنطلون ..
وهناك البت الجميلة جداً وأولاد الحلة ( فارشين فيها صيوان ... أي باكين فيها ) وكلهم معجبين بيها وبقيفوا في الشارع البتمشي بيهو .. ويكون واحد من دون الناس ديل ماعندو شغلة غيرها .. لدرجة إنها ممكن تدمر مستقبله .. وهي طبعاً أكيد عارفة وحاسه خصوصاً لمن تجي ماشة في وسط صاحباته وأرجلها بتتلخبط في المشي من الخجل .. ويقوم واحد يدي صاحبته جواب .. وهي ياتعمل فيها فارسة وتقيلة وتجي وتشرطه ليه في وشه... ياتكون منتظره الجواب ده من زمان وتلمه في أبعد مكان في البيت ..
وتدي الرد لي أخوها الصغير وتقيف ليه جنب الباب وحبيبها يكون واقف جنب العمود لمن تكشح الموية أو تتاوق بي قد الباب .. عشان تشوفوا لمن يجي ماشي وتشم ريحتو البتريح بيها وهي جوة البيت أو تعمل نفسها عاوزة تنادي أخوها الصغير .. وقدام باب المدرسة الثانوية تلقى الأولاد منتظرين حبيباتهم وكل واحد يقدم حبيبتو ويمشوا بالشوارع الجانبية إلى أن يكتمل الحديث و بعد داك بتمشي الحلة براه ومرات البت بتشوف حبيبها لما تطلع لي بتاع اللبن وهو بكون بلعب في كورة ( العصر) .
وبنت الجيران بتكون معتنية بي نفسها شديد لأنو كل ماتخرج إمكن تلاقيهو وبتحرص على نفسها شديد وهي طالعة .
وغالباً مابتكون مواسم الحب في الأعراس وما إلى ذلك .. تلقى بنت الجيران بتعمل في الشاي وكاسرة رقبته وحبيبها واقف جنبها شغال توزيع شديد وأصحابو بي غادي بكونوا بفتشوا ليه مالاقينوا وهو ( كاسر رُكب بي هنا ) ولاداري ولاواعي وطبعاً صاحبتنا تعبانة تعب شديد .
ولمن ما تلقى طريقة تتكلم معاه تقول ليه : (تعال أكشح لينا الموية دي عليك الله )وكل واحد برسل لي حبيبتو عشان يتكلم معاها ويشوف ليه أي موضوع إنشاء الله يقول ليها نادي لي أمي )
اما في بيت البكا (انسوا بس !!) فالونسه عندها وقع خاص وبتكون في أقرب بيت او بمجرد ماالشارع يبقى فاضي وخصوصاً في وجبة العشاء تلقى الشباب كلوا مجتمع والبنات الشابات بعملوا في العشاء ولامكان للأطفال وكبار السن ،وطبعاً الواحدة لمن تحب ود الجيران غالباً ماتكون مصاحبة أختو وبتفرح لما أمها ترسلها ليهم وبتمشي ليهم كل يوم ... وتلقاها بتتحسس حاجاتو وتعاين ليها وتحس إنها قريبة منو .. .. وموقفو من ناس بيتهم شنو ؟؟ وخصوصاً إذا كان عاجب أمو وأخواتو وكلمتو مسموعة وشايل بيتهم والناس عاملين ليه شنة ورنة ولما تكون أم حبيبها عيانة بتمشي تعمل ليهم الأكل وتنظف ليهم .
اما في الوقت الحالي بنات الحله لمن تجي حفلة بمجرد مايغنوا( بله يابله دق الرقم جلى .. بله ود عشة السايق الركشه دق الرقم طشه .. بله ود عايد دق الرقم زايد )البنات كلهم برفعوا أياديهم تعبيراً عن الغبطة عارفين ليه لأنو بنات العالي معظمهم بحبوا بتاعين الركشات بالمناسبة ديل الاولاد الزمانك كانوا بقيفوا جنب العمود في الحله وبالمناسبه الملاقاه بقت ساهله شديد . مسكول واحد .. معناه انا في طرف الشارع ....
بعد داك بت الجيران بتكبر والطرفين بعرسوا بعض ومرات الواحد بعمل تجربة واحدة في الحلة وإذا فشلت بشوف مجتمع تاني وممكن الولد يخلي حبيبتو يغترب لمن يجي .. عرس واحدة صغيرة جداً وتختلف طريقة القصص والتجارب وفي بعض الدول البت بتلاقي ود الجيران في الاسانسير وفي المشربيه والبلكونه ونحن (بي قد الباب – او من فوق عتبة باب الشارع) و وتبقى في النهاية عبارة عن ذرات ذكرى على زجاج نافذة المنزل .
ولكل تجربة وقصة تأثير واقع على كيان المجتمع وتحولاته وتكون الأغاني أجمل توثيق لتلك الفترة :
ياجارتنا وبت حارتنا بنريدة .. سمحة سمحة الصيدة
ويابت انا ود الحلة عاشق وحياة الله
جاري وانا جارو وبتعذب بي نارو .. مالك مجافي الناس عايش براك في غربة .. أنحنا ناس جيرانك البينا عشرة وصحبة ... السمحة يانوارة فريقنا والسمحة قالوا مرحلة بعدك الفريق أصبح خلا ..ودي أيضاً لي بت الجيران
بخاف اسأل عليك الناس وسر الريدة بينا يذيع واخاف اكتر كمان يا غالي من ايديا انت تضيع واعيش بعدك حياتي جفاف مواسم بينها ما في ربيع
بَهـِم000لو صدفه لاقيتك
درب حِـِلـِّتنا00جابك يوم
وتأتي بت الجيران معبرة عن دواخلها وهي تقول
الفريق الوراني حرمان علي تاني والجكس شراني
وقابلتو في السكة كبيت معاه النقة من ستة لي ستة لاجُعتة لاعطشته
ومطرة من الله تكسر الحلة ونجكس بي برة ودي ظاهر عليها مجكسة عند ناس صاحبته وعينه قوية ... أبويَّ دقاني.. المَرقهَ خليته بقابلو بالحيطة.. ودي قريبة شديد ( ود جيرانهم بالحيطة ) وجن تلاتة بنات بي شارع الثورات قالوا لي حبيبك مات قلبي إشتغل مكنات .. والبي العصُر مرورو ... وبيتهم الناصية فوقو عنبة متواسية .. صدقني ماناسية ظروف بيتنا بس قاسية
ياجاري وحسيسي يالبتفهم حديثي أديه سيسي في سيسي من وريدي من الرئيسي وهكذا تحكي الأيام ...
آيات مبارك النور
|
|
 
|
|
|
|
|
|
|
|
Re: بنت الجيران هي البنت التي يسبقها حيائها لفتح باب الشارع (آيات مبارك النور) (Re: عبدالحفيظ ابوسن)
|
كلام جميل ووصف اجمل لزمن جميل عشناه بكل تفاصيله الحلوة الراسخه في ازهاننا حتى الان ,, وهيهات يعود الكان ولى وما اظنو يعود الكان ولى .. والله ايام يا زمان .. ذاك الزمن السمح والناس السمحين غايتو الما عاش الزمن ده حياتو كلوووولها ضايعه والله جد .. يا سلاااام ذكريات جميلة ما زالت تؤرقنا وشوق لتلك الايام الخوالي والعشرة الجميلة والعاطفة النبيلة ... غايتو البوست ده جميل لكن موجع ...
تحياتي : ياسر العيلفون
| |
|
|
|
|
|
|
| |
باسط المكي
عبدالحفيظ ابوسن
ياسر السر
فيس بوك
تويتر
انستقرام
يوتيوب
بنتيريست