|
|
 ام حجل - هاشم صديق
|
جديدة
للشاعر هاشم صديق
عَشَه .. ( ام حِجِل )
_____________
قرقُوشة
يا عَشّه
أم حِجِل
مغموسة
في شاي الصباح .
شاياً مسيخ
أحمر
تقول قارصاك
عقرب
والوجع ولَعَ
وناح .
يا حليل
زمن كانوا العقارِب
في الجحور
حسه العقارب
في القصور
والنِعيم
وأزهي الرياش
مكتوبة
بي ءاسم الصقور .
.................
................
أحمر مسيخ
شاييك
ﻻ سُكر
لبن
وقرقوشة
من زمن المسيح
الدنيا حسع
ناشفة
ياعشة ام حِجِل
ماشين
علي آخر شهر
وشن كمان
طعم الشهر ؟
يتماص يفوت
بي حالو
زي لمح البصر .
.............
.............
يا حليل
زمن آخْر الشهور
ما احترنا
في شاي اللبن
ما دُخنا
لي حق المُﻼح
ما جُعنا
في وكت الفطور
ما غِبنا
من رُز السحو ر
حسع نِشِف
حتي البحر
واﻷَرِض
وقفت تَدْور
اللمة واللُقمة
وطعم خير
الصواني
ما بجينا تاني
زمانو راح
حسع زمن
مضغ الجراح
................
خلينا
من شاي اللبن
وكت الصباح .
..............
..............
عشة أم حِجِل
حِملِك تِقِل
عَشمك كِمل
وأصبح تِفل
تسعين حزب
شايلين همومك
بالكضب
ما دقّ زول
بابِك سأل
وﻻ حتي
زول
جابو الدرِب
وسبعين جريدة
كتيرة
زي هم القلب
ما جابو ليك
أحﻼم جديدة
ما زادوا فهمك
غير غباش
وحيكومة واقعة
علي الطناش .
................
................
عشة أم حِجِل
همك تِقل
راجلك مَرَق
يوماً صرف
حق المعاش
في السكة
ءاتنشل ءانسرق
بالمغسة داخ
زي التقول
قلبو انحرق
وقبال يصل
ويحكي الحصل
في الحال وقع
صابو اﻷجل .
...............
...............
خَﻼّ ليك
يا عشة
بس عالم غباش
وحق المعاش
وتسعين حزب
شايلين همومك
بالكضب
وحيكومة
مجنونة وطناش
تِتشكّ
زي ورق اللعب
سعرانة
زي خشم ال######
شقت جنوبنا
من الشمال
حرقت قلوب
ناس الغرب
سلختنا
بي موس
الكﻼم
دبغتنا
بي وجع الضرِب
................
...............
عشة أم حِجِل
حِملِك تقل
السوق جفل
رمضان وصل
ملوة بصل
وسُكر رطل
دايرات بطل .
بين المساكين
والرفوف
انتهي وودّع
زمان
شهر العسل .
...............
...............
تسعين حزب
يا عشة
سمونا ( الغﻼبة )
ﻻكونا
بي ضروس
الخطابة
هتفوا
( شان الشعب
بنخوض الحرابة )
غشونا
ﻻ غَدّونا
ﻻ عَشّونا
بس سوونا
مُركب
والسﻼم
باعونا
في سوق الكﻼم
( سوونا طُسة )
جدعونا
بس ( طُرة )
و ( كتابة ) .
...............
...............
يا عشة
بس قولي
السﻼمة
شايفة كيف
جاية القيامة ؟!
قدامنا زي
مليون عﻼمة .
..............
..............
عشة أم حِجِل
قالوا السؤال
بعدو الجواب
حسه السؤال
بعدو السؤال
وقالوا الحﻼل
ما صار حرام
حسه الحرام
أصبح حﻼل
جاطونا
ما سابونا
نفهم أو نشوف
عجنونا
في طين الظروف
لخمونا ما خلونا
نفرز
لي يمينّا
من الشمال .
..............
..............
تسعين حزب
رافعين يفط
ثورة ونضال
ما جابو شمساً
أو جواب
أو حتي تمرات
في جُراب
أو حلوا لُغزاً
في كتاب
ءاﻻ الكﻼم
بعدو الكﻼم
ءاﻻ الخﻼف
بعدو الكتال
ءاﻻ السؤال
بعدو السؤال .
..............
..............
وانتي
ياعشة أم حِجِل
حِلمِك بسيط
قُراصة
بي ( دمعة عِجِل )
ومعاها بس
رُبطة فِجِل .
.............
آآآآه يا عشة
لو صبرك كِمِل
بيتك عِدِم
حتي النمل
دُخريك بس
هذا الحِجِل
لسع معنكش
في الرِجِل
|
|
 
|
|
|
|
ملهم كردفان
خالد العبيد
فيس بوك
تويتر
انستقرام
يوتيوب
بنتيريست