|
سمن ومنقاش وسكر مضرضر
|
صحن طلس ابيض كبيييير مخروم في الجنبة وفيه خيت دبارة... خاتنه في بنبر.. جردلين طلس فيهم ورود بالجنبات مليانات دقيق فينو.. بستلة مليانة سمن ريحتها مالية التُكل... خميرة بيرة في علبة لبن... كانون فيهو حلة فيها موية بتغلي... كمون اسود.. نشادر في كيس.. فتايل صغيرة فيها منكهات وسوائل... جردل طلس صغير (مناصص) سكر مسحون... طربيزة خشب فيها مفرمة مركب فيها قُمع.... خمسة صواني نضيفات ممسوحات بي سمنة وفي طرفن مكتوب بي مسمار (بت ابو دية)... علبة حلاوة فيها مناقيش وكباية كبيرة وواحدة صغيرة زيقن ممسوح بي زيت... صاج جنب الراكوبة في كانون كبير تحته اعواد مكبوب فيهن جاز من البابور حق النحاس والنار تطقطق في الاعواد وجنب الصاج طشت غسيل... عشرة بنابر تحت الراكوبة ورادي معلق في الشِعبة (وكيف قيلتوا)... حُقة صعوط في الطريزة وكبابي شاي... دقيق في نص الصحن وفاجنو وكبوا فوقه السمن وشوية موية سخنة معاها (بسم الله يا رازق يا كريم)... عجينة في صينية فاردنها بي كباية.. قطيع العجينة بالكباية والقالب... صواني خاتنها في الاوراك وينقشن فيها... جدادة حايمة بي سواسيوها.. صينية فوق الصاج وكفوا فيها الطشت وختوا فيهو جمر من فوق... سكر مسحون في حلة وجواهو خبيز يضرضروا فيهو... جرادل نضيفة ومنشفة من الموية وبي غتايات... الجردل وكتين يتملي يرفعوهوا في راس الفضية... مفرمة وبسكريت ورص في صينية... بنبر جنب الحيطة.. السمحة واقفة فيهو تتونس من فوق الحيطة.. طرحة يشيلها الهواء وخصل تتماشى مع الهمبريب.. عنقريب فيهو مخدة... قدامه طربيزة فيها صحن ألموني فيهو حنة.. رجل متنية بيواسوا في حنتها بي عود كبريت.. الاصابع الشمال مقمعة وفيها ريحة محلبية.. صحن فيهو نشادر في زيت.. صوت ضكر حمام (غووووووغ غوووووغ)... ود أبرق في راس التكل في خشمه شوية قطن وقشايتين.. عشوشة في جحر السبلوقة تناجي في أبرق (جيييييك سرررررررررج سرررررررررج جيييييك جييييييك).. شيالات كعك وحلاوة ريرة وبسكريت... ملايات مكوية ومطوية فوق مخدة ما فيها كيس وفيها خريطة من زيت الكركار.. ستارة فيها ركامة وفيها ترتر بالجنبات مدخلنها في ياي.... حوش مرشوش وفي الركن مقشاشة وجنبها صحن فيه وســـــخ مكبوب..
وتعود الايام...
انا لله ياخ
|
|
|
|
|
|
|
|
Re: سمن ومنقاش وسكر مضرضر (Re: طارق جبريل)
|
يا طارق جبريل
ياخي أنا برشحك لإ دارة متحف في الخرطوم. المتحف ده يكون مكتبك الرئيسي.
بعداك تفتح متحف مماثل في كل مدينة في السودان عشان تحفظ تراث وحكايات هذه السودان الجميل.
المتحف يكون منبر للحوار في قضايا التراث السودانى..
المتحف القاصدو بيقع في قاطع شارع الجامعة مع المك نمر.
ياخي إنت زوول متشرب بتفاصيل التراث السودانى الجميل..
كل سنة وإنت طيب.
| |
|
|
|
|
|
|
Re: سمن ومنقاش وسكر مضرضر (Re: سيف اليزل سعد عمر)
|
التحية لاجمل ناس .. واختص ابن عمتي طارق .
كل عام وانتم بالاف الخيرات .. واسركم الجميلة . ربنا يديكم الفي مرادكم جميعآ .
واتفضلوا مسافة اجيب ليكم الشاي المنعنع . ههههههه والمافي شنو ؟
| |
|
|
|
|
|
|
Re: سمن ومنقاش وسكر مضرضر (Re: مني عمسيب)
|
Quote: التحية لاجمل ناس .. واختص ابن عمتي طارق .
كل عام وانتم بالاف الخيرات .. واسركم الجميلة . ربنا يديكم الفي مرادكم جميعآ .
واتفضلوا مسافة اجيب ليكم الشاي المنعنع . ههههههه والمافي شنو ؟
|
يا سلام يا بت عمي ياخ كل سنة وانت بالف خير يا رب
| |
|
|
|
|
|
|
Re: سمن ومنقاش وسكر مضرضر (Re: سيف اليزل سعد عمر)
|
Quote: يا طارق جبريل
ياخي أنا برشحك لإ دارة متحف في الخرطوم. المتحف ده يكون مكتبك الرئيسي.
بعداك تفتح متحف مماثل في كل مدينة في السودان عشان تحفظ تراث وحكايات هذه السودان الجميل.
المتحف يكون منبر للحوار في قضايا التراث السودانى..
المتحف القاصدو بيقع في قاطع شارع الجامعة مع المك نمر.
ياخي إنت زوول متشرب بتفاصيل التراث السودانى الجميل..
كل سنة وإنت طيب.
|
يجبر بي خاطرك يا حبيب هذا البلد العجيب ملئ بما هو جميل ياخ
| |
|
|
|
|
|
|
|