|
مكوة وكورية «ألموني» وكاسيت و«مرحبا يا شوق»//
|
نفسي اجيب الطربيزة الكبيرة واختها في نص البرندة وافرش فيها بطانية حمرا وملاية المكوة واولع الفحم في المنقد واشيل الجمر بالماشة واملأ المكوة وارفعها اديها هزة وانفخها بالجنبات محل الفتحات واختها في حافة الطربيزة في حيمورة المكوة واجيب المسجل ابو باب مافي داك والشريط بيطلع منه زي تفة التمباك وادخل سلكين المسجل في الكُبس المقَلدَم داك وسلكه جايي نازل من جحر من الاوضة واشغل شريط ابراهيم عوض الفيهو اغنية من قساك واخت جنبه شريط وردي مرحبا يا شوق ومحمد ميرغني ما بتقدر تتوب يا قلبي المودر وعثمان حسين ليه تقول ايامنا راحت وانتهينا واردم الهدوم العايز اكويها في العنقريب الفي الزقاق وامي تجيب لي عراريق وجلاليب ابوي عشان اكويهن معاي.. واشم ريحة السخينة حقت الفطور العاملاها لينا امي وهي بتعوس في الكسرة والفطير واقعد ادندن مع المسجل واكوي ومرة اديها صفارة كدة مع مزيكة مرحبا يا شوق... واقلب المسجل رادي وحقيبة الفن و(الجرحو نوسر بي ولع فيني جمرو الحي) ميرغني المامون واحمد حسن جمعة.... وارجع اشغل المسجل تاني لمن اصل جلاليب ابوي وعثمان حسين: ما بصدقكم... ويجي عوض كريمة ناطي من بيتهم بالحيطة الفي الزقاق ولابس جلابيته المسهوكة ديك ويرقد جنب الهدوم المكويات ويرفع رجلينه المكلوجات في حيطة الزقاق ماسك ليه مقص بيقص في بنطلون قديم عايز يعمله ردا للدافوزي... وامي تجيب لينا القنقروشة في صينية الشاي وتختها في طرف العنقريب وعوض يشاغلها: احب فطيرك انا يا الشايقية.. ويقوم عوض يدخل التكل ويقطع ليه بصلة في صحن الطلس ومعاها طماطماية ويشيل ليه طرقتين كسرة من المعراكة ويلخبت معاهم البصل والطماطم ويعجنهم ويكب فيهم زيت من الباغة وشوية شمار وشطوط ويجي جنبي يلوغد فيهن: احب بت ابو دية دي ياخ عندها كِسرة بنت لبون ياخ.. ونخرينو تكون جارية من الشطوط ويمسح فيها بي كم جلابيته.. ويمشي الماسورة الجنب الباب يغسل يده ويتقرع ويديها كوز موية من الزير التحت النيمة.. ويجي ويطلع ليه شريط من جيبه ويخته في المسجل: زيدني من دلك شوية وكتر الاشواق عليا ويمسك أكمام الجلابية ويديها خجة وكشفة كدة وامي تقول ليه: والله انت كان نفعتة شنب جبرين يقوم في امك كريمة يقوم يضحك ويقول ليها: بنفع يا عشوش ياخ هسي بتشوفي
إنا لله ياخ
|
|
|
|
|
|
|
|
Re: مكوة وكورية «ألموني» وكاسيت و«مرحبا يا شوق»// (Re: Osman Musa)
|
عالم أصلها ما بتتطور. قال طربيزة مكوة في الزقاق وكسرة بي بصل وطماطماية وكمان شطة يا مفتري! خدرا ولّ حمرا هاك الجلابيتين ديل أكويهم معاك، جني وجن كوي الجلاليب والكَسره فوق الكَسره والكلام الما جايب همو داك
ازيك يا مان، عامل شنو مع رمضان. يخيل لي الستوت ح تصومها في المستشفى تتداوى من الجروح، عامل بلدكم الكلو أمواس ناسيت داك
| |
|
|
|
|
|
|
Re: مكوة وكورية «ألموني» وكاسيت و«مرحبا يا شوق»// (Re: معاوية الزبير)
|
Quote: عالم أصلها ما بتتطور. قال طربيزة مكوة في الزقاق وكسرة بي بصل وطماطماية وكمان شطة يا مفتري! خدرا ولّ حمرا هاك الجلابيتين ديل أكويهم معاك، جني وجن كوي الجلاليب والكَسره فوق الكَسره والكلام الما جايب همو داك
ازيك يا مان، عامل شنو مع رمضان. يخيل لي الستوت ح تصومها في المستشفى تتداوى من الجروح، عامل بلدكم الكلو أمواس ناسيت داك
|
حبيبنا الذي بالدوحة كيفنك ياخ وكل سنة وانت طيب نموت في النوستالجيا ياخ
| |
|
|
|
|
|
|
Re: مكوة وكورية «ألموني» وكاسيت و«مرحبا يا شوق»// (Re: معاوية المدير)
|
Quote: نفسي اجيب الطربيزة الكبيرة واختها في نص البرندة وافرش فيها بطانية حمرا وملاية المكوة واولع الفحم في المنقد واشيل الجمر بالماشة واملأ المكوة وارفعها اديها هزة وانفخها بالجنبات محل الفتحات واختها في حافة الطربيزة في حيمورة المكوة |
كضاااب ... شكلك ما مسكت مكوة فحم في حياتك و لا كويت !!!
لو كان ( كذلك ) ...
لما نسيت كوز الموية عشان تجغُم منو و ( تبُخْ ) الهدوم دي ...
امال حتنطرح كيف ؟
ولا مكوة فحمكم كان فيها زرار موية ؟
وكمان لازم كورية طلس فوقها ( نشا ) لزوم السيف و هدوم الكديت ...
| |
|
|
|
|
|
|
Re: مكوة وكورية «ألموني» وكاسيت و«مرحبا يا شوق»// (Re: يحي قباني)
|
Quote: كضاااب ... شكلك ما مسكت مكوة فحم في حياتك و لا كويت !!!
لو كان ( كذلك ) ...
لما نسيت كوز الموية عشان تجغُم منو و ( تبُخْ ) الهدوم دي ...
امال حتنطرح كيف ؟
ولا مكوة فحمكم كان فيها زرار موية ؟
وكمان لازم كورية طلس فوقها ( نشا ) لزوم السيف و هدوم الكديت ...
|
نحن ما كان عندنا كوز كانت كورية ألموني ياخ
| |
|
|
|
|
|
|
Re: مكوة وكورية «ألموني» وكاسيت و«مرحبا يا شوق»// (Re: garjah)
|
Quote: ود جبرين
كوكيييييفك يا صاحب
مااااااااااافي ليك الحكاية راجعة ورا شدييييييد
داك زمان لا عودة له
ربي عيالك واستعد لقيامتك
|
اوووووووووووووووه قرجة يا حبيبنا كل سنة وانت طيب ياخ وحاتك عايشين علي ذكرياتنا دي ومانا حارلنا شي كن بالف خير يا جميل
| |
|
|
|
|
|
|
Re: مكوة وكورية «ألموني» وكاسيت و«مرحبا يا شوق»// (Re: طارق جبريل)
|
طارق ود جبرين...تحية رمضانية برائحة الحلو مر وطعمها الحلو ومزاجها الماضي التليد...مالك منقطع النظير..
حروفك تصلح قصيدة غنائية...دون ان يتاح لفنانين الزمن دا بتلحينها أو غنائها...وطبعا هم مشغولين بالسكن العشوائي في اغاني غيرهم..
لذلك صدق شاعرنا التليد( الطاهر ابراهيم)حين قال( لم يجذبني فنان من الجيل الحالي لذا أوصي بدفن قصائدي معي)..
هم يسكنون في ابداع غيرهم ونحن نسكن في( ماضي الذكريات..)
| |
|
|
|
|
|
|
Re: مكوة وكورية «ألموني» وكاسيت و«مرحبا يا شوق»// (Re: محمد الكامل عبد الحليم)
|
Quote: طارق ود جبرين...تحية رمضانية برائحة الحلو مر وطعمها الحلو ومزاجها الماضي التليد...مالك منقطع النظير..
حروفك تصلح قصيدة غنائية...دون ان يتاح لفنانين الزمن دا بتلحينها أو غنائها...وطبعا هم مشغولين بالسكن العشوائي في اغاني غيرهم..
لذلك صدق شاعرنا التليد( الطاهر ابراهيم)حين قال( لم يجذبني فنان من الجيل الحالي لذا أوصي بدفن قصائدي معي)..
هم يسكنون في ابداع غيرهم ونحن نسكن في( ماضي الذكريات..)
|
حبيبنا الذي هناك ياخي كيفنك وكل سنة وانت طيب
| |
|
|
|
|
|
|
Re: مكوة وكورية «ألموني» وكاسيت و«مرحبا يا شوق»// (Re: طارق جبريل)
|
التحية لك طارق جبريل .. رسم جميل وصور حية .. انت رائع حقيقة ..
بالأمس اشاهد برنامج المشاء في قناة الجزيرة لقيت ودجبريل يبدو انه الاخ طلحة .. وهو يقدم الفيتوري بصورة مبدعة جداً وأجمل جملة قالها ( نحن عندما نعرف السودان للاخرين نقول من بلد الطيب صالح والفيتوري .. فنحن الشعب الوحيد الذي يقدم نفسه عن طريق الادباء والشعراء ) يا اخي ده كلام جميل .. التحية لال جبريل لهذا الابداع المنقطع النظير ..
| |
|
|
|
|
|
|
Re: مكوة وكورية «ألموني» وكاسيت و«مرحبا يا شوق»// (Re: علي عبدالوهاب عثمان)
|
Quote: التحية لك طارق جبريل .. رسم جميل وصور حية .. انت رائع حقيقة ..
بالأمس اشاهد برنامج المشاء في قناة الجزيرة لقيت ودجبريل يبدو انه الاخ طلحة .. وهو يقدم الفيتوري بصورة مبدعة جداً وأجمل جملة قالها ( نحن عندما نعرف السودان للاخرين نقول من بلد الطيب صالح والفيتوري .. فنحن الشعب الوحيد الذي يقدم نفسه عن طريق الادباء والشعراء ) يا اخي ده كلام جميل .. التحية لال جبريل لهذا الابداع المنقطع النظير ..
|
حبيبنا علي عبد الوهاب ياخي كيفنك ونعلك طيب وكل سنة وانت طيب
الفيتوري يستحق ياخ
| |
|
|
|
|
|
|
|