حتى لا نفقد مزيد من الأمهات والأباء في الحرم المكي

Quote: أرى من الأهمية بمكان ربط حزام يدوي من النوع الجيد الغير قابل للنزع في الزحام على يد المرافق ( أم كانت أو أب أو طفل )، ويكتب عليه أرقام الهاتف لأقرب الناس ، يوجه بصورة صارمة لأن يطلب المساعدة بالإتصال على هذه الأرقام في حال الفقدان ، ويمكن طلب المساعدة من رجال الشرطة وبالعدم من أي شخض عادي ، بأن يطلب منه الإتصال على أحد الأرقام المربوطة على المعصم

Quote: تزويدهم بجوال من النوع التقليدي الرخيص . لأنه يعمل ببطارية فائقة .. ولعدة أيام مع الالتزام بتزويدهم أيضا بأرقام الهواتف في ورقة منفصلة تحسبا لضياع الجوال اهمية أفهامهم أن شباب الكشافة وشباب مكة ... وشرطة الحرم هم في خدمة الجميع ولا خوف من الاستعانة بهم ... اللهم احفظ كبارنا وصغارنا وجميعنا الشغيل

Quote: صديقي اتى بوالده هنا وحجينا سوياً والده 80 سنة ولم يطلع من القرية الا للحج هذا الشخص مسخ علينا الحج والعيد والاجازة وكل شيء 20 مرة الاحرام بتاعو كان قاعد ينصل ونشيل ونربط ليه وهو يقول لينا 00 انا ماقلت ليكم ما بدورو ؟؟ يقصد يعني ماعاوز الاحرام عشان قاعد ينصل الراجل اظنه عاوز يلبس جنز من محلات ماكس قال مابدورو قال !!! الروحة حصلت وين ؟؟؟؟ في الحمامات ولده قال ليهو يا ابوي هداك الحمام وصار الولد منتظر وعمك تاريهو مفتكر الشغلانية جايطة زينا قوم خلي حمامات الرجال وتووووووووووووووووووش ادخل حمامات النسوان هذه اللحظات البسيطة كلفتنا 15 يوم من البحث ومئات الأيام من المعاناة والآلام والأوجاع طفش وين 00 الله ورسوله اعلم يشهد الله من حمامات النسوان مرق في { ينبع } اخذه مجموعة من السودانيين معهم وتعبوا كثيرا لأجله واتصلوا على السودان حين توفرت لهم معلومات قريته ومن ثم تم الاتصال على ابنه هنا بالسعودية وبرضو اتى الينا بدون سروال 00 قلنا ليه حرقت اعصابنا مشكلتنا اننا نتعامل بعفوية في مثل هذه الأمور ولابد للإنسان هنا ان يحتاط انا وابنائي بجانب كل ذلك نضع لنا تلفون مشترك ثاابت ليتم التواصل في مثل هذه الظروف الموضوع يحتاج الى توعية ولابد من التصرف قبل الدخول للحرم او الذهاب للمدينة المنورة طيب لنترك الذين ياتون من السودان حتى بعض السودانيين هنا يتيهون وهذا نتاج سوء تصرف يعني أحكي ليك موقف بسيط حدث معنا قبل فترة وكنا عائلتين دخلنا في البلد محل يسمى عمالقة التوفير وتم الشراء بشراهة شديدة جدا النسوان معنا لايشترن بالحوجة بل بالعين !!!! المهم خمخمنا كل شيء وطلعنا وقلنا نمشي نتعشى في مطعم البيك لوحة كبيرة وواضحة حتى الأعمى يشوفها انا وست النفر وابو القدح التاني والأطفال كنا ماشين قدام زولتنا التانية تهبش في الأكياس ماكلاها يدها وهي ماشة ورانا بعد وصلنا مطعم البيك عليك امان الله ولا ريحتا مافي !!! اول تصرف طبعا هو الاتصال على الموبايل الخاص بها نتفاجأ بان ابنتها الصغيرة قالت امها قالت ليها خلي الموبايل دا معاك عليكم الله في بلاهة أكتر من كده ؟؟؟؟ بعدها تركنا الأطفال في البيك وبدأنا نبحث عن الكنز الضائع والله العظيم ساعة كاملة من البحث في النهاية نشوف ليك زولتك زي النسوان الببيعن العدة خاتا اكياسها ومتفنجخة في الرصيف عارفين الحصل شنو لمن شافتنا قعدت تكورك فينا وتقول لينا انتوا رايحين ليكم ساعة كاملة وانا افتش ليكم بالله دي مش زولة ظريفة 00 طلعنا نحن الرايحين !!!!!

Quote: في أحد المواسم شاهدت طفلا كتب رقم جوال في ملابسه بصورة ظاهرة مش فكرة جيدة

Quote: 1- المظهر : مظهر الحاج السودانى يكاد يكون اسوأ مظهر من جميع معتمرى و حجاج الدول الاخرى فالحاج السودانى كثير ما نلقاهو لابس جلابية و سخانة او عراقى ابيض تحول لبنى من ال###### و عمة ######انة

Quote: التحية للاخ محمد البصير فعلا موضوع يستحق الاهتمام سيما و اهلنا الكبار يؤدون عمرة هذا العام الزحام و ضخامة المكان كبيرة جدا بحيث لم يألفوا مثل هذا المكان من قبل لذلك تجدهم في حالة ذهول دائما ربنا يديهم و يدينا العافية و هنا تكمن اهمية المرافق الذي هو غالبا ما يكون شاب او شابة في معيتهم نسأل الله ان يتقبل منا و منكم و منهم صالح الاعمال غير ان هنالك بعض الكلمات لم تعجبني في اقتباس لرد احدهم من الفيس بوك Quote: 1- المظهر : مظهر الحاج السودانى يكاد يكون اسوأ مظهر من جميع معتمرى و حجاج الدول الاخرى فالحاج السودانى كثير ما نلقاهو لابس جلابية و سخانة او عراقى ابيض تحول لبنى من ال###### و عمة ######انة ما لنا و حجاج الدول الاخرى ؟ نحن ناس الله و واطات الله دي و ناسنا ديل جايين من وين انت قايل ؟ ديل مزارعين و رعاة و عمال ارتبطوا بالارض و التراب و بالمناسبة دايما المغتربين بيشتكو من المظاهر بتاعت الوافدين السودانيين ،، و نحن نفخر بي العراقي الملطخ بي العرق و التراب ده و نعشقو للمعلومية و لو ضاقت بك الدنيا من جراء مشاهدة مثل هذه المظاهر فااااا بالله عليك اخدو على اقرب محل و اشتريلو عراقي و جلابية لنج هي حاجات زي دي بتكلف كم ؟؟؟؟ نحن النظافة عندنا في الدواخل و لك العتبى ان اثقلت عليك و لك التحية على باقي كلامك

Quote: الأخ الفاضل \ ود البصير .. تحياتي وتقديري .. وليك فقدة . يا ود البصير يا خوي انا نفسي اعرف كيف الناس بتضييع في بلد في مثل هذه المواسم ملئية برجال الأمن والمتطوعيين ؟ وان شاء الله ربنا يجمع بهذه الأم الحبيبة لاسرتها . ولي قدام ..

Quote: الشريط اليدوي الذي يحتوي علي المعلومات الضرورية هام جداً قبل عدة سنوات كنا مجموعة من جنيف في الحج وإذا بامرأة مسنة من غينيا بيساو تمسك تمسك بكلتا يديها بأحد الأخوة وهي لا تتحدث الفرنسية او الاسبانية او اي لغة اخري غير لغة قومها ومن خلال المعلومات المكتوبة في الشريط استطعنا ان نأخذها الي مقر أقامتها وعندما شاهدت أهلها خارت قواها وأجهشت بالبكاء وعلمنا انها لم تتذوق طعام لمدة 3 ايام وكادت ان تفقد عقلها من شدة الخوف نسال الله السلامة لكل المسلمين

Quote: الأخ/ محمد علي البصير .. تشكر على طرح هذا الموضوع الهام ويجب تدبيج الحاج أو المعتمر بكل ما يمكن من معلومات كرت الفندق الذي ينزل به وكافة بياناته شريط يدوي به كافة التفاصيل وأرقام الهواتف معلومات الأبن أو الأبنة والشركة التي يعمل بها .. الاتفاق على الالتقاء عند باب محدد بالحرم في حال حدوث أي افتراق أو توهان .. في الحج السابق قابلت إحدى الحاجات السودانيات بمدينة جده لدى قريبها يراجع بها إحدى العيادات النفسية وعندما سألت عن السبب كان تعرضها لضياع طيلة ايام الحج حتى قبل الوصول إلى عرفات ومن ثم دخولها في حالة نفسية. ومن أطرف المواقف أخي ود البصير والذي حدث معي شخصياً ذهبت قبل أسبوعين أي الأسبوع الأول من رمضان إلى الحرم المدني وبرفقتي الوالدة وزوجتي وأبنائي محمد عمره سنه ومنيب عمره أربع سنوات وكنت حريص جداً على تحميلهم بكل وسائل الاتصال ما عدا منيب الذي كان يحفظ رقم هاتفي تماماً وصادف أن تاه منا في الحرم المدني ونحن لا ندري حيث توقعت والدته أنه معي وتوقعت أنا أنه مع والدته ثم يرن هاتفي والمتصل أحد أفراد الأمن السعودي بالحرم المدني ويسألني أنت فلان الفلاني وأجيبه نعم، لك أبن أسمه منيب وأجيبه نعم ثم يردف هو معنا الآن عند الباب الخارجي 23 نأمل منك الحضور لاستلامه والأطرف في الموضوع أنه عندما استلمته ضحك رجل الأمن السعودي وقال لي ياخي طيب خليه يحفظ الرقم بالعربي لو طاح أبنك في بدوي لما وجدته إلى الحين. الظاهر الولد شبكم ليك زيرو دبل فايف فور..الخ. أتمنى أن يحفظ الله الجميع.

Quote: صاحب البوست والزوار الكرام السلام عليكم ورحمة الله ... عملت في أحد المواسم في العمرة في مكة وهو عمل بالجد شاق وتنظيم المعتمرين والحجاج بالجد عملية شاقة جدا ... الفندق الفيه السودانيين كان عدد العاملين فيه قرابة 20 شخص لأنه لا يوجد تنظيم ابتداء من السودان وبالتالي الفوضى ح تنتقل إلى جدة ومكة والمدينة ... شركة العمرة كان عندها معتمرين تونسيين ... مخصصيين ليهم شخص في كل من المطار وجدة ومكة والمدينة ... المعتمرين التونسيين بتحركوا من تونس دفعة واحدة كل دفعة حوالي 50 شخص وعندهم أمير واحد ونائبه بجي الامير في مكة وبقول معاه مثلا 40 شخص بقوم الشخص في مكة بديهم مفاتيح الغرف حسب عددهم ... وهكذا الامر في بقية المدن وهم بتحركوا من تونس ولغاية ما يرجعوا ككتلة واحدة ... المعتمرين السودانيين كل واحد بجي براه من السودان ولو حاولت تنظمهم وتحركهم من جدة كدفعة واحدة ح تحصل واحد يقول عندي اخوي في جدة داير اخاد منه مصاريف وهكذا ... فوضى شديدة وربنا يعين بس ... بتذكر في معتمرة سودانية راحت من أخوها شهر كامل وهي قاعدة في الحرم والزمن داك ما كان في جوالات ولما لقوها بعد شهر حصلوها مريضة نفسيا ... عندنا واحد برضو فقد خالته لمدة شهر في الحج يوميا بعد الدوام في جدة بمشي مكة ويفتش وفي الاخير حصلوها في الترحيل ... في سوداني برضو كان فقد ولده الصغير وما حصله اعتقد لمدة سنة وما عارف حصله الان وما حصله واعتقد انه ما لقاه إلى الان ... من النصائح المهمة بالاضافة للنصائح الفوق دي ... هي تنبيه المعتمرين على التماسك بقوة وكتابة ارقام التلفونات على المعصم لأن المعتمر أو الحاج ح يتفاجأ بالاعداد الضخمة من المعتمرين والحجاج ... كان معاي قبل أيام اختي ومعاه حاجات كبار في السن كتبت ليهم ارقام التلفونات لكل واحدة ونبهتهم على التماسك مع بعض تماسك شديد وبعد انتهاء العمرة قالوا لي لو ما نبهتنا كان ضعنا ... مع العلم انه ما في زول استقبلهم في المطار ... على الزوار التركيز شديد على عدم ضياع مرافقك معك لأنه لو ضاع ح يفقدك ويفقد صوابه وح تنقلب الرحلة إلى كابوس ... معليش طولت في الكلام ... واكرر .... الانتباه لعدم ضياع مرافقك بالامساك به جيدا بالذات في رمضان والحج ... لأن أي غلطة صغيرة ح تكلفك مجهود انت محتاج ليه لتكملة المناسك ... وفي الاخير تقبل الله من الجميع العمرة والحج ....

Quote: النصائح أعلاه جيدة للذين في عافية وصحة جيدة وما كبار في السن ، السلبية الكبيرة في إرسال كبار السن مع رفقة أو مع شركات الحج والعمرة هذا إستهتار وقد يبشع بحال الحاج أو المعتمر الفلوس لحالها غير كافية في هذا الموقف ، لازم وجود الإبن لأنه قد يصاب كبير السن - بعدم الإستطاعة على حبس البول -لا يستطيع التحرك من إجهاد أداء الحج أو العمرة - بعد الثمانين قد يصاب بالزهايمر - الإحرام لكبار السن محتاج مراقبة شديدة وقد ينصل وقد يتسخ في الحج لذا من الضروري وجود الإبن أو المحرم الحقيقي للمعتمر لأن الإجهاد بالحج درس قوي للاصحاء في لم أنفسهم ، فمن الصعب أن يهتم بغيره ,وإذا إهتمة ما إهتمام كافي ، إلا العليهو كامل المسئولية

Quote: سلام يغشاك يا بصير وضيوفك ... من الأشياء المهمة كذلك عند أداء العمرة أو الحج وكان معك أكتر من شخص (أمك وأبوك مثلا) من الضروري أن يكون معك مرافق آخر خصوصا لو كانوا كبار في السن ... المرافق يتولى أمر ابوك مثلا وانت تتولى أمر والدتك وتكون ممسك به أو بها وهم قدامك طوال فترة الطواف التي تتراوح مدتها بين (نصف ساعة في حال لم يكن هناك زحام) إلى ساعة ونصف لو كان الزحام شديد ... ثم الانتقال إلى السعي بين الصفا والمروة وهناك الزحام أخف شوية واحتمال ان يفرتق الرفقاء ضعيف مع وجوب الحرص الشديد كذلك ... ومدة السعي تتراوح بين ساعة واحدة (في حال عدم وجود زحام) إلى ساعتين (عند الزحام) يعني العمرة بتكلف المعتمر زمن قدره في المتوسط حوالي 2 إلى 3 ساعات ... وهنا يجب الانتباه والحرص على عدم الغفلة من مرافقك ... الكلام دا كله للزول العاوز يعمل عمرة أو حج لأول مرة ... وفي حال ضاع منك مرافقك لا سمح الله وكان معاه تلفون من الصعب العثور عليه وح يكلفك العثور عليه في أحسن الاحوال ساعات كتير ة انت محتاج للراحة فيها ... ولو كان الانسان المرافق لك يمكن الاتفاق معه على أنه في حال الافتراق اثناء الطواف أو السعي على الالتقاء في معلم بارز خارج الحرم المكي أو في الفندق النازلين فيه زي ما قال دكتور سيف النصر ... الكلام الفوق دا كله للناس الجايين مكة المكرمة ... بالنسبة للمدينة المنورة فهناك اعتقد ما توهان كتير لأنه ما في طواف ولا سعي مع الحرص الشديد كذلك ... وعمرة مقبولة وحجا مبرورا ان شاء الله .

Quote: أخونا محمد علي البصير السلام عليّك ورحمة الله تعالي وبركاته. Quote: وحتى لا نسمع عن حالات فقدان جديدة ، أرجو أن نخصص هذا البوست لتقديم مقترحات من شأنها التقليل من حالات الفقدان الحج ركُن من أركان الإسلام ويجب علي المستطيع وفي العمر مرّه واحده! بحكم وجودنا بالمنطقه وماشاهدناه من معانات الحجيج بصفه عامه والمُسنين والنساء والأطفال بصفه خاصه شيئ مُتعب لدرجة خارجه عن التصور.. يبدو ليّ من ضمن الحلول التي طرحها الإخوه سأضيف عليّها عدم الأتيان بالعجزه والمسنين إلي الحج إلا للضروره القصوي! وأن يقنن ذلك وبأمر رسمي من الجهات المعنيه (كفتوه، او قانون) ! .. أولي بهدر طاقات هؤلاء المسنين ومرافقينهم وكُل أموالهم الوطن لا بلاد آل سعود! أي علينا إستغلالها في البلد.. طبعاً هنالك جهات حكوميّه ومنظمات مدنيّه(وكالات السفر، أُمراء الحج والعمرّه) وحتي السعوديّه لديها مصالح وهي حتماً حتشجع هذا المسلك لأنها بتستفيد من هذه الطاقات المهدوره كـ(منافع لهم) .. يبقي حقو نحنُ أيضاً نقنن الشغلانه ونستفيّد من هذه الطاقات وعدم تبديدها وبإسم الله! عبادة الله مفروض لو مابقت بالمجان والساهل مامفروض تكون باهظة التكلفه علي المستوي المادي والروحي للشخص العابد! يجب أن تكون مُيسره وليست مُعسره! ويهذا المسلك يكون وفرنا حلول لهذه المشكله. وهنالك جانب آخر يخص الأنا سأتركه لوقته المناسب .

Quote: الأخ الحبيب \ ود البصير .. وضيوفكم الافاضل .. التحية والتقدير لكم .. وان شاء الله امنا الحاجة الاتوفت في الحج وهنيالها ربنا يرحمها ويسكنها فسيح جناته . والله كانت حقيقة شاغلني بالتفكير لكن لما عرفتها اتوفت والموت حق علينا حزنت لكن برضو كنت فرحانة عشان لقوها واطمأنوا عليها واهو حال الدنيا . لقد ياود البصير يا خوي معقول تكون متوفية 19 يوم والسلطات السعودية ما تجيبها في الاعلام والتلفزيون بالتحديد للتعرف عليها ؟ تسلم يا ود البصير .. ولي قدام .

Quote: شكرا الأخ محمد البصير فعلا موضوع حيوي وهام وتتكرر الحوادث كل عام في أول عمرة لأسرتي معي وكان ذلك قبل التلفونات ضاع أبني وكان عمره حينها 3 سنوات وأمضينا ساعتين كانتا أطول من كل عمري الذي عشته في البحث عنه ونحمد الله عثرت عليه داخل الحرم المكي ومن حينها كل عمرة نحرص على عدم التفرق وعندما كبروا الأولاد أخذنا نحدد معلم خارج الحرم للالتقاء فيه بعد أداء العمرة الحج طبعا أكثر زحمة وأطول مدة زمنية وأذكر في أحد مواسم الحج وفي آخر يوم عرفات أن أرى بالصدفة صديق عزيز للوالد وكان عمره حينها لا يقل عن خمسة وسبعين سنة وكان ضائعا وحالته مزرية ويبدو أنه لم يتذوق الطعام منذ صباح ذلك اليوم وفوق ذلك كان مصابا بالسكري ولا يستحضر الكثير من التفاصيل وكان كل مرة يذكر أسماء مختلفة للمجموعة التي أتى معها وبفضل الله وبعد اتصالات كثيرة ألحقته بالحملة التي أتى فيها وفي أحد المرات ونحن ننتظر للصلاة في ساحة الحرم بعد أداء العمرة لاحظت زوجتي وجود حاجة سودانية ويبدو عليها الاجهاد والتعب فاقتربت منها وبعد تجاذب أطراف الحديث علمت أنها ضائعة من رفقتها والتي كان من ضمنها زوجها ومن خلال السوار الخاص اتصلنا بالرقم الموجود عليه ودلنا صاحب الرقم على رقم آخر وموقع الفندق واصطحبناها إليه ومن المفارقة أننا وجدنا رفقتها وبما فيهم الزوج نائمين ولم يفعلوا أي شيء تجاه ما حدث لها بل كالوا لها عبارات التأنيب !!!! والقصص لا شك كثيرة ويحتاج الموضوع إلى عمل دؤوب من الجهات المسؤولة فالملاحظ أن الخدمات التي تقدم للحجاج السودانيين ضعيفة جدا وتفتقر للتنظيم فحتى الصلوات في المسجد الحرام لا تحرص الشركات على تيسير آداءها على الحجاج أما حكاية المظهر فاستغرب لمن يرى أن المغتربين يبالغون في الحديث عنها فالحاج والمعتمر زائر إلى بيت الله الحرام وإلى مسجد النبي صلى الله عليه وسلم وحري به أن يتزين بأطيب ما عنده ويحرص على نظافة بدنه وثوبه ... فأغلب الحجاج الأسيويين هم من الفقراء ويبدو عليهم ذلك ولكنهم حريصون على زي موحد نظيف في أغلب الأحيان وبالتأكيد كل شخص يعكس صورة عن وطنه وحضارته لذلك لا يرضينا أن يكون الحاج السوداني يلبس عراقي وسفنجة

Quote: سلام ودالبصير والجميع ورمضان كريم غايتو يا ودالبصير لو كنت قريب من العمره السودانية ولا إشتقلت معاهم حاتشوف مأسي . الملاحظ فى عمرة للناس الجايين من السودان تحدديداً مع شركات العمره. نسبة المعتمرين كبار السن اكثر من 70% نسبة عدد المعتمرين كبار السن بدون مرافقين أكثر من 50% وديل فى الغالب بتتعمل ليهم إجراءت العمره وهم قاعدين فى البيت لاعارفين إسم الوكالة السودانية ولا الوكيل السعودي. شركة العمرة الوكالة السودانيه دوره إنها تعمل ليك إجرات السفر وتستقبلك وترحلك وتسكنك فقط. مناسك العمره دى مسؤلية المعتمر عشان كده أغلب المعتمرين كبار السن ماقاعدين يأدوا عمرتهم بطريقة صحيحه. وأحتمال زاتو ما يعملوا عمره لانهم ما بيعرفوا كيف ومن وين تتم المناسك. عشان كده بنصح أي زول مرسل امه ولا أبوه للعمره لو ما متاكد من وعيه وإدراكه لكيفية عمل العمره ما تضيع قروشك فى الفاضي . العمره ما إجراءت ونركبهم الطياره ولا الباخره وخلاص. الناس قاعده تجي من مناطق صغيره ومحفوظه بالنسبه ليهم لمدينة كبيره مزدحمة بالبشر والمباني المتشابهة. الواحد يطلع بدون ما يحفظ إسم المكان النازل فيهو ولا إسم الشارع مفتكرين المساله بسيطه . ويتفاجأ لما يضيع أنه ما عارف أي حاجه . التوعية لازم تبدأ من البيت لازم المعتمر أو الحاج يطلع مع مرافقين واعيين وعارفين للبلد . لازم المعتمر والحاج يكون عارف على الاقل إسم الفندق والشارع . لازم المعتمر والحاج يكون معاهو أرقام تلفونات لمكان سكنه وأحد معارفه. في حال ضياع المعتمر والحاج عليه أن يذهب لاقرب مكتب شرطة أوأحد مكاتب التأئهين وهى منتشرة حول الحرم .