دقيقة يا حسين يا خوجلي أدوني نضارتي يا شباب الأضان تقلت والسمع بقي في تلتلة ... "ذاتها قلة الأدب في بلدك دي جزء من الكرامة !!!!!!......."
"مخلين البلد دي لمنو ؟؟؟؟ " مخلينها ليكم طبعا ... هل بتفتكر انه مرقنا مبسوطين وبخاطرنا ؟؟ انت براك بتقول الناس مارقها الشديد القوى يا ربي انت حاسي بالانحنا حاسين بيه ؟؟؟
"اكرم لي أقعد شحاد وما اهاجر!!!!" سعادتك ما شحاد وإنت لو فقران وتعبان ما بتقول كلامك دا .. الزيك دا بشحد كمان ؟؟ الزيك دا بخم في البلد وبنافق وبس ... الزيك مستفيد ومبسوط وخارب البلد ......
"وإنت برا البلد الإحساس بأنك مواطن درجة عاشرة أصله ما يغادرك !!!!"...
انت فاكرنا في السودان ذيكم ؟؟ نحنا درجة عشرين يا حسين يا خوجلي .. وعشان نعيش بس ... بنضطر تنافق وبنضطر للانكسار البتقوله دا
"الناس المهاجرين برا البلد بتنافق الخ. .."
ولعلمك الجوة البلد ذاتهم بنافقوا. .. كان ما كلهم معظمهم مذلولين رغم انفهم .. ومؤدبين رغم انفهم هسة جنس سواتك دي ما النفاق ذاته ... وكان ما سويت جنس نفاقك دا !! بتقدر تعيش؟؟؟ هل يوم واحد فتحت جاعورتك دي وتناولت فساد البشير وآل البشير ؟؟؟ ما بتقدر لأنك منافق ولازم تنافق عشان تقعد في وضعك دا في البلد ... قال أقعد شحاد قال .....
"قلة الأدب في بلدك جزء من الكرامة ؟؟؟" أقل عامل ممكن يقل أدبه علي مديره !!!! أقل عامل ممكن يقل أدبه علي الدكتور !!!
حسين داير يدينا محاضرة في أدب قلة الأدب!
قول اقنعتنا بثقافة وفقه ممارسة قلة الأدب داخل البلد !!!!!! هل كلامك دا صحي وهل بنقدر نقل ادبنا علي وزير ولي مدير ؟؟ يعني نبطل الهجرة عشان نقعد نقل أدبنا براحتنا في بلدنا
هل يا حسين يا خوجلي دا موضوعنا وسبب هجرتنا ولي قعادنا في البلد ؟؟؟
يا حسين أولويات خروجنا والقاسم المشترك اللامينا كمهاجرين .. 1. الأكل والشراب والمعيشة أولا .....
2. التعليم لينا ولابنائنا 3. الصحة والعلاج 4. حقوق الإنسان 5. القضاء 6. طاحونة الفساد المدوريننا بيها . 7. الغياب الكامل لهيبة الدولة 8. حرية الرأي والتعبير
يا حسين موظفين الأراضي الأطلعوا الصحف علي فساد: . وكيل وزارة العدل . وأخوان البشير اعتقلوهم وقفلوا الصحف النشرت فساد الأراضي الموثق برقم ومساحة أي قطعة أرض منهوبة ... دا كله ووزير العدل السيسي قاعد صورة
يا حسين يا خوجلي الصادق المهدي وابراهيم الشيخ إستفسروا عن ماهي حقيقة قوات الدعم السريع .. حشروهم في السجن ...
لكن انت الوحيد البتقدر تتكلم عن فقه قلة الأدب وما شابه ذلك... من غير ما يسألك اي زول لأنك جزء من النظام بمكنة معارض !!! معارض مهرج بيشغل الناس مسلسل تركي طويل وممل
10. للصباح ..........
"ياخي الله يلعن أبو دي لقمة عيش".. المهاجرين هناك مؤدبين بقوة الأمر !!!!! وفي السودان مؤدبين بشنو يا ربي ؟؟؟؟ مش مؤدبين وبس مقهورين وعينهم مكسورة .....
"عندنا الخير في السودان لو زرعت ليك عيدان خدرة في حوش بيتك وربيت ليك غنمايتين بتعيش" "أي قرية لو قعدت في الواطة وختت العندها وعند أولادها في المدن والمهجر !!!! براحة ممكن يعملوا ليهم مشروع مش يكفيهم بل ممكن يصدروا منه لخارج السودان"
يا حسين يا أخوي انتو وحكومتكم ساكين ستات الشاي وأطفال الدرداقات هلكتوهم ايجار ورسوم وجباية ... دايرنا نربي ليكم غنمايتين !!!!! ياخي كدي النقدرنربي أولادنا اول الغنم هينين ....
"عندنا في السودان البتشاكلوا ويتضاربوا ويقلوا أدبهم ديل ذاتهم ناس كويسين جدا جدا !!!!! "
والله انا برا الشبكة يا حسين ما عارف اقول ليك شنو !!!!@!
المهاجرين البرجعوا السودان تفل تفل ، مكسورين الخاطر وبقايا انسان ... أختشي في وصفك ليهم دا ديل أشرف من مليون كوز مقدود ذيك إنتو السبب في مرقتهم وهجرتهم .... إنتو السرقتوا عرقهم وطردتوهم وخليتهوهم بقوا ذي التفل ..
سعادتكم اهتموا بيهم وهم تفل ما دام اهملتوهم في عز شبابهم ... خليهم يعيشوا بباقي عزة نفسهم ويقلوا ادبهم بكرامة في بلدهم ذيكم....... عشان يقضوا باقي عمرهم قلة أدب من الداخل..
هذا أول أيام الشهر الفضيل .. أعاده الله على الجميع بالخير واليمن والبركات .. وكنت أمني النفس بيوم هاديء .. بدون أن ( تعكير سياسي ) .. كنت أخطط له في هذا الشهر ..
ولكن يأبى هذا ( الخوجلي ) .. أن يترك ( المغتربين والمهاجرين .. في حالهم ) .. فهاهو يلحقهم ( بسياط النقد والتأديب ) .. سبحان الله .. سبحان الله ..
أنت يا ( حسين خوجلي ) الذي تتسائل لم هاجر السودانيون وتركوا أهلهم وأوطانهم وبيوتهم وذكرياتهم وحياتهم !!
أنت الذي تريد منا أن ( نرعى غنمايتين ونزرع جرجير وبصل ) !!!
أنت الذي ( تملك قناة تلفزيونية وجرائد وإذاعة ) .. تريد من المهاجرين العودة من بلدان .. ( نحن مؤدبون فيها نفاقاً !!!! ) .. يا سبحان الله .. يا سبحان ..
أعتقد أنني يجب أن أستغفر الله .. وأصلي ركعتين .. لعل هذا الغضب الذي يكاد أن ( يكسر راسي من صداعه ) .. يتعافى ..
وأعتقد أنني يجب أن أخرج من هذه البوست بأسرع ما يمكن .. لأنني والله لو واصلت .. ( لفقدت أدبي ) الذي تعلمته في ( السودان ) .. قبل أن أتأدب ( نفاقاً ) ..
وأسمعته ما لم يخطر له على بال ..
أنا متأسف جداً للإنفعال ..
وكل سنة وإنتوا طيبين ..
06-29-2014, 08:37 AM
أحمد التجانى حمودى أحمد التجانى حمودى
تاريخ التسجيل: 08-21-2012
مجموع المشاركات: 482
تسلمي علي مرورك د.اخلاص المشرف كل سنة وانتي وجميع الاهل بخير وربنا يحقق الأماني ..... أخى محمد الشيخ تسلم علي مرورك الكريم ولك جل اعتذاري لفتح مثل البوست المستفز للغاية في هذا اليوم الكريم ، ويعلم الله وحده بأنني لم اقوي علي تجنب الرد عل مثل هذه اقوال ولكن سماحة العارف بالله حسين خوجلي يفرض علينا نفسه ويهين اشرف وانبل شرائح مجتمعنا الكريم واصفا لهم بالتفل !!! وينصح الجميع بالعودة لزراعة الخدرة والطماطم وتربية الأغنام لأنها اكرم في نظره من الإحساس بانك مواطن درجة عاشرة ... وينصح أبناء كل قرية أن يقعدوا في الواطة مع أبنائهم في المدن وفي بلاد المهجر لبجمعوا ما لديهم من مال كي يبنوا به مشروعا يضمن هو نجاحه ويبشر بأنهم سوف يتمكنوا حتي من تصدير منتجات هذا المشروع لخارج السودان !!!!! سماحته ينال القروض المجزية من بنك الثروة الحيوانية لتشييد إمبراطورية الإعلامية وقناة الفضائية وينصحنا بالعودة لزراعة الخدرة في سدر بيوتنا وتربية الاغنام !!!!!! حتي ولا اجرح صيامي مع أقوال آية الله الخوجلي الحسيني ... سوف الحق بك اخي محمد الشيخ واصلي ركعتين طالبا المغفرة واتخارج لوهلة من البوست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أحمد التجانى حمودى
Mohamed El Sheik
فيس بوك
تويتر
انستقرام
يوتيوب
بنتيريست