يستضيف المنتدى الفكرى بالنادى السودانى ابوظبى غدا الخميس 22 /5/2014 الزميل الفاتح جبرا الكاتب الساخر المعروف عن تجربته فى الكتابة الساخرة بالسودان والدعوة موجهة لكافة ابناء الجالية بالحضور والمشاركة كما يستضيف المنتدى الكاتب الاماراتى المعروف الاستاذ على ابوالريش فى الاسبوع التالى .. اخر اعمال الفاتح جبرا
أعمل رايح 05-21-2014 10:14 AM
• إذا تمت محاكمة (الجماعة) بقانون (التحلل) ثم تم إلغاء الحكم وتتم محاكمتهم الأن بالقانون الجنائي .. ما تسأل هل أخوانا القانونيين ما فاهمين القانون ولا شنو يعني ؟ ما تسال وأعمل رايح وبس !
• إذا كنت تسير بعربتك فى أحد شوارع العاصمة الرئيسية وأنت تود اللحاق بموعد مهم وسمعت أصوات العربات ويويويويويوي وتوقفت الحركة حتى يمر موكب أحد المسئولين ما تتكلم وأعمل رايح وبس ح تعمل أيه يعنى ! مش لازم المسئول يوصل مكتبو بى سرعة عشان يطلع ليهو قرار (خطأ) بى سرعة ؟ • إذا كنت صاحب (دكان) صغير فى أحد الأحياء وجاءك موظف الضرائب وعاين للمحل والرفوف الفاضية وصنقر ودنقر وكتب ليك ضرائب عشرة مليون .. ما تتكلم معاهو ولا تناقشوا عشان بعد شوية يفتح ليك بلاغ أعتراض عمل موظف .. أعمل رايح وبس وأرفع إيدينك للسماء ! • لما تشوف الناس المتكالبه على (المال الحرام) ما تحرق دمك .. الناس دي غبيانه ساكت هو (المال الحلال) بقي ممحوق .. ما تقيف في المسألة دي .. وما تحرق أعصابك أعمل رايح وبس • رغم الوعود التى وعدتك بها الجهات المسئولة بثبات (سعر الدولار) على الأقل بعد الوديعة القطرية (المليارية) إلا أن سعر الدولار (تجاوز العشرة جنيهات) ولسه ماشي .. ما تسأل يه الوديعه م (وقفتو) عشان ما ح تلاقي أي إجابه .. أنسي الموضوع وأعمل رايح .. قال أيه لو ما جينا كان حصل إطناشر جنيه ! • إذا كان قائد العربة القدامك (ماشى على أقل من مهلو) وعندما تخطيته وجدت أنه يتحدث بالموبايل وهو يرتدى الزى العسكرى يعنى ح تقول ليهو شنو؟ الإلتزام بالقانون ده ليك إنتا إنتا عاوز تغلط (الحكومة) أسكت وبس وما تودى نفسك فى داهية ! • إذا طالبك متحصل النفايات برسوم زائده قائلاً (الرسوم زادوها) فلا تسأله عن (الضمير) فى زادوها عائد لمنو؟ لأنو أساسا ديل ناس ماعندهم ضمير وبيزيدوا على كيفهم ولو ما دفعتا ح يودوك (نيابة التفايات عشان كده أعمل رايح وأدفع وبس • لما تشاهد برنامج حواري فى التلفزيون والمذيع قاعد يتكلم أكتر من الضيف ذاتو ويسأل الضيف ويجاوب على السؤال قبلو اقفل التلفزيون على طول بدل ما يجيك ضغط دم وتمشى الدكتور تلاقى قيمة الكشف مية جنيه .. أعمل رايح وأقفل على طول منها توفر ليك شوية كهرباء • لما تلاقي الواحد شايل ليهو سبحة وعلامة الصلاة تتوسط جبهتو وكل ما تجى (مرا) ماشة يعاين ويدنقر فى الواطة تسكت .. أعمل رايح وما شايفو .. مش (شيخ حسبو) قال الراجل (مصمم) لأكتر من مرا واحده • • إذا كانت لديك قضية تنظرها المحاكم ولاحظت أن القاضى يأتى إلى المحكمة متأخراً (بعد ما يفطر في بيتو) بينما المتخاصمون يأتون من (صباح الرحمن) فأعمل رايح وما تسأل ليه؟ فى زول كمان بيسال القاضى؟ • إذا توقفت أمام إشارة المرور وأمامك عربة (بدون لوحات) تجاوزها رجل المرور وجاء ليسألك عن أوراق (عربيتك) ما تندهش وأعمل رايح وما تودى روحك في داهية لأنو أكيد بيكون هو عارف العربية البدون لوحات دى تابعة لمنو! • إذا عانيت من الأرق وعدم القدرة على النوم والساعة قد تجاوزت الحادية عشر مساء بينما مايكرفونات (الشيخ فلان) تبث على الهواء (حلقة الذكر) الاسبوعى التى يقيمها .. ما تضجر مش (السلطات) سامعة وفايت أضانا .. أبلع ليك (حبه منومة) وأعمل رايح ! • إذا كنت ممكن يعانون من مرض الفشل الكلوى وتعاني من رداءة الأجهزة وعدم وجود المحليل فلا تشكو ولا تسأل (علماء الأمة) عن دور الحاكم فى (توفير العلاج) لأنهم سوف يقولون لك أن الحديث يقول (إذا عثرت بغلة بالعراق) وليس إذا مات (مريض بالفشل الكلوى) .. أعمل رايح وبس!
كسرة :
إذا مقالنا بقي كوووولو (واوات) .. ما تسأل ليه الموضوع ده (غاتس كده) و (المغتسوا شنو) أعمل رايح هو وزير العدل يلاقيها من وين وللا من وين؟ • كسرة ثابتة (قديمة) : أخبار ملف خط هيثرو العند النائب العام شنو(وووو وووو وووو وووو وووو وووو وووو)+و+و؟ كسرة ثابتة (جديدة) : أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و+و؟
الفاتح جبرا ..ناقد ساخر يملك قدرات ثقافية عالية تجعله مواكبا لكل الاحداث بقلمه الساخر فقد استطاع توثيق حياة السودانيين فى اسوا فترة من تاريخ السودان وهى الفترة التى يحكم فيها الاخوان المسلمين ويسيطرون على كل مفاصل الدولة محتكرين لكل شىء ابتداءا من السلطة والمال والاعلام والخدمة المدنية والاقتصاد والتجارة انتهاءا بمنابر المساجد ووصل بهم الحال الى التدخل فى عقائد الناس وقتل من يختلف معهم فى العقيدة .. الفاتح جبرا اليوم بالنادى السودانى ابوظبى مرحبا به
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
الكيك
فيس بوك
تويتر
انستقرام
يوتيوب
بنتيريست