صور من حفل افتتاح المونديال

Quote: الاشتراك في المحطات التلفزيونية البتنقل الكاس بقى غالي خلاس.. قالو تلاتة مليون تشوفك المباريات كلهن.. ثلاثة مليون لمدة شهر.. يعني اليوم بمئة ألف.. الحكومة جزاها الله خير قالت الشعب دا تعبان، الأكل في تلتلة.. نساعدو يشوف كاس العالم وبعدين الأكل ملحوق.. معتمد الخرطوم قال عندو عشرين شاشة كبيرة ح ينشرها.. في مناطق عامة.. واي زول داير يتفرج يجي يتفرج.. ويدعو لينا.. أها قامت المعارضة اتلافت النضم.. وقالت نحن كمان زاتنا نسوي شاشات.. وبدوها ناس الحزب الشيوعي بشاشة في الجريف.. والبلد ح تتملي شاشات.. من الحكومة ومن المعارضة.. والفرجة بي ساكت والزراعها الله في الحجر تقوم.. ..... " اووووووووووووو عثمان" "اهلاااااا يا فردة.. بالله شفت المباراة بتاعة البرازيل وكرواتيا دي حارة كيف؟ لكن يا أخي 3/صفر شوية) " يا زول 3/ صفر شنو؟.. المباراة انتهت 9/صفر" "انت شفتها كلها؟" "أي لحدي النهاية.. في الشاشة البهناك ديك" "لا حولاااااااا ديك شاشة المؤتمر الوطني.. أنا شفتها كلها في شاشة الشيوعي.. وانتهت 3/صفر" "دقيقة بس لؤي داك جا نسالو....... يا لؤي شفت الماتش؟" (ايوا) " انتهى كم؟" "تعادل صفر صفر" "؟ انت شفتها وين يا لؤي" "شفتها في الشاشة الفي النادي الفي الحلة" "ايوااااااااااااااا.. دي شاشة ناس الاتحادي ياخ" "دقيقة دقيقة ما نتغالط ساكت!.. داك فتاح جاي.. يا فتاح أكيد شفت المبارة.. أها انتهت كم؟" "كم شنو يا أخ.. المباراة اتلغت.. والجماهير كسرت اللستاد" "انت شفتها وين؟" "شفتها بهنووووك في الشاشة الفي ميدان المولد" " الكتراااابة.. دي شاشة أنصار السنة" *اللهم احفظ بلادي.. وساسة بلادي لصواطة بلادي.. وشعب بلادي الطيب..