|
هل فعلا الشايقية حريصين وبخلاء؟!
|
خالى متزوج شايقية وهى من اكرم النساء. كثير من الزملاء الشوايقة الذين قابلتهم مثلهم مثل غيرهم فيهم الكريم وفيهم البخيل وفيهم ما بين ذلك. اذا لماذا رمى الشوايقة بهذه الصفات...العندو معلومة يجى يختلها لينا هنا.
|
|
|
|
|
|
|
|
Re: هل فعلا الشايقية حريصين وبخلاء؟! (Re: maman)
|
أخي عبد العظيم
الشوايقة ناس سمحين شديد...بحكم احتكاكي معهم منذ سنوات الطفولة في مدينه شندي ..وكان معظهم عساكر في البوليس او الجيش..و وليداتهم معانا في المدارس.
وجدت فيهم الشهامة والكرم والضكرنة ...أبدا ما شفت لي شايقي بخيل الا في هذه الغربة اللعينة..مش الشوايقة بس (معظم) السودانيون اصبحو بخلاء ومستنكحين كمان.
تخريمة: قالو في شايقية دايرة تمشي الحج قالوا ليها الحج ب عشرة مليون...قالت ليهم في شان شنو؟ أنا ذاتي ما عندي ذنوب قدر كدى.ههههههه
تحياتي واحترامي لك و للشوايقة من خلال بوستك الجميل
حسين الجعلي
| |
|
|
|
|
|
|
Re: هل فعلا الشايقية حريصين وبخلاء؟! (Re: عبدالعظيم مكى)
|
اذا لماذا رمى الشوايقة بهذه الصفات...العندو معلومة يجى يختلها لينا هنا.
الأخ / عبد العظيم مكي .. بحكم أنني شايقي لك التحية وأنت تطرح هذا السؤال الذي كثيراً ما تبادر إلى ذهني ولم أجد له أي إجابة ..؟؟؟؟
لكن أخي عبد العظيم أعتقد أن لهذا الهجوم والتهكم الصارخ على الشايقية علاقة بالعدد الكبير من المسئولين الذين تعج بهم حكومة الكيزان ، فربما نكاية وكرهاً في هؤلاء المسئولين تم هذا الهجوم الكاسح على الشايقية جميعهم هذا مجرد اجتهاد ليس إلا والله أعلم ..
| |
|
|
|
|
|
|
Re: هل فعلا الشايقية حريصين وبخلاء؟! (Re: Othman Al-Hasan Babikir)
|
تحياتي عبد العظيم دا من انواع التنميط السخيف الذي يذكي نار الفرقة و القبلية و الذي ساهمت النكات و الكاريكاتيرات في نشره بحسن نية او بغير ودورنا كجيل توفر له من الوعي ما لم يتوفر لمن سبقه ان ننبذ مثل هذه الأشياء, ايرادك يا عبد العظيم لهذه النكات رغم حسن مقصدك منها فهو في النهاية يساعد في نشر هذا التنميط المعيب بغير قصد منك
| |
|
|
|
|
|
|
Re: هل فعلا الشايقية حريصين وبخلاء؟! (Re: Othman Al-Hasan Babikir)
|
السودانييون يعتمدون في تلقى اخبارهم عن طريق المشافهة يصر احدهم على رأي سمعه من صديقه او من قريب لديه حتى و لو علم بالحقيقة و لكن تجده متمسك بخرافاته اكثر من يصف الشايقية بالبخل و ذميم الصفات هم اجناس هلامية لا يستطيعون ان يقفو امام الدارة و يتنبرو و يفصحو عن اصلهم لا يوجد هناك اي خلاف ما بين الشايقية و الجعلية بل هي تخرصات و افتراءات تساق في الغالب لاظهار المفارقة ما بين حدة و تسرع الجعلي و هدؤ و حكمة الشايقي
الشايقية محسودون على ما حباهم الله من نعم و كل ذي نعمة محسود
كيف يعقل ان يوصفو بالبخل و هم الوحيدون الذين لهم مدينة تسمى باسم الكرم .................. : ك ر ي م ة كريمة كيف غاب عن هؤلاء هذا الاسم
...
| |
|
|
|
|
|
|
Re: هل فعلا الشايقية حريصين وبخلاء؟! (Re: خالد المبارك)
|
Quote: كيف يعقل ان يوصفو بالبخل و هم الوحيدون الذين لهم مدينة تسمى باسم الكرم .................. : ك ر ي م ة كريمة كيف غاب عن هؤلاء هذا الاسم |
خالد المبارك لا اعرف تاريخ مدينة كريمة حتى نربطه بهذا الاسم العربى , لكن من اين لك التاكيد بان الاسم اتى من الكرم ؟ مش ممكن يكون معناه الابنة ؟ بمعنى كريمة فلان هى ابنة فلان , وحتى فى نكات الشايقية مع الرباطاب .. لما الشايقى سال الرباطى , شنو يعنى ابوحمد رد عليه الرباطابى ابوحمد راجلا لكريمة!
| |
|
|
|
|
|
|
Re: هل فعلا الشايقية حريصين وبخلاء؟! (Re: السر البشير)
|
Quote:
كيفنها ؟ أقرأ واضحك عليك الله . وتعال لكل المجالات : اعظم الساسة اعظم الشعراء اعظم الفنانين اعظم الاطباء اعظم المهندسين والله تعمل احصائية تحتار يا عبد العظيم الحمد لله من قبل ومن بعد
وهاك القليل : احمد خير الفريق عبود محمد احمد محجوب عبد الخالق المحجوب هاشم العطا محمد احمد ابو رنات الطيب صالح عبد الرحمن الريح اسماعيل حسن عثمان حسين حمـــــــــيد ابو العائلة قاقرين مصطفى سيداحمد
محمد علي بليلو وامه الحمراء بت عبود .
العمدة احمد ود بليلو .
احمد ود عبود وامه بت كرتي من السوراب الكفونجة .
العمدة ود بادي عمدة شندي من العكوداب .
من عكوداب القرير المربي الاستاذ الدكتور سيد احمد عبد الهادي .
قتل الشيخ محمد ود عبود في موقعة كولمبو بالحدود الحبشية .
خُرُسِن ود عبود استشهد في موقعة كورتي وأسرته بقندتو .
الزراقنة بحجر العسل والقرير والعكوداب من شجرة وصيف .
|
نسيت عبدالرحمن بلاص
والله ان قعدت تحسب لي باكر
بخيلين بخيلين
هههههههههههها
عامل اسمك النصو شايقي ونصو جعلي ده
| |
|
|
|
|
|
|
Re: هل فعلا الشايقية حريصين وبخلاء؟! (Re: usama Babiker)
|
لالالا الشوايقة نساءهم أجمل نساء.. ورجالهم أكرم رجال.. الحكاية اللصقوها فيهم الناس.. دي قديمة موش من الآن ولا من البارح هي زي حكاية نكات الرباطاب.. البقوا يبنوا عليها الناس.. وفرق الكوميديا الآن تنسج عليها.. ........ الشوايقة أذكياء.. وبي يعرفوا يرتبوا المسائل.. موش بخل هو.. ترتيب مسائل بفكر.. مثلا انتشرت هجرة الشوايقة من قبل الاستعمار.. لقلة الدخل هناك معظمهم هاجروا.. كسلا.. الأبيض.. العاصمة.. شندي. حجر الطير.. حجر العسل... عطبرة.. رفاعة.. القضارف.. مشوا موارد الانتاج والكثرة العددية من السودانيين. حتى البلد الفيها كثرة عددية قدروا يفتحوا فيها دكاكين في الأحياء.. التى عجز أصحاب البلد المعينة عن استدرار دخل فيها.. والتاجر والتجارة عموما تتطلب بعض الحرص.. عشان كدا من أهل المنطقة المعينة.. يصدر مثل هذا التهكم على الشوايقة. شئ غبطة. شئ غيرة.. شئ حسد.. بالعكس التعامل مع الشايقية ممتع جدا.. نحن جيرانهم المناصير نعرفهم كويس.. وإن كان لما نطلع برة المنطقة كلنا يطلقوا علينا شوايقة. لأن اللهجة واحدة تماما.. والتراث واحد تماما.. وكل شئ قريب من قريب.. مع بعض الاختلافات البسيطة جدا البي يعرفها الإنسان البي يعيش في تلك المنقطة.. يقدر يعرف دا.. شايقي. دا منصوري.. دا بديري.. دا أماري.. دا حامدابي.. لكن كل المجاميع ديل يحق أن يطلق عليهم اسم واحد.. مع بعض الامتيازات طبعا.. الحقيقة يتفرد الشوايقة بالحنية الزائدة والعاطفة الجياشة التى قل أن توجد في اي قبيلة تانية في السودان.. وحده ساكت عروس كان رحلوها من قرية الى قرية تلقى كل الحلة طلعت ودعتا.. وكل الحلة تبكي.. دا ناهيك عن إنو واحدة رحلوها كريمة من قراهم.. أو عطبرة أو الخرطوم..دي صعب يستحملوا فراقا خالص.. مرة كنا في مهمة.. في القرير.. بعدين معاي ناس من ناس الجزيرة.. لما جاء البص. القرير دي يكاد يكون كلها جات تبكي وسكليب شديد جنب البص.. الزول المعاي دا استغرب وقام سألني. الجماعة ديل ماشين الخرطوم.. أصحاب البكاء منو فيهم. خلينا نعزيهم قبل ما يركبوا البص نشيل معاهم الفاتحة... ضحكت شديد.. قلت ليهو القال ليك منو في بكاء وفي زول مات؟ قال لى ما ياهو ظاهر.. دي دايرة ليها كلام كمان؟ قلت ليهو أيوه دايرة ليها كلام كمان.. الشئ دا ما موت دي عروس مرحلنها من هنا الى العاصمة.. وجيرانا وأهلا ما قادرين منها؟ قال لي أول مرة أشوف حالة زي دي في حياتي.. طيب العريس دا ما يبقى ود ناس يخليها ليهم شوية. لامن يهدوا شوية ويبلوا شوقهم فيها؟ قلت ليهو حا يبلوه لى متين عاد. الشئ دا كل مرة راح يتكرر حتى لو خلاها ليهم طول العمر؟ وفي النهاية العريس عايز عروسو؟ مافي طريقة هذه المشاهد هي موجودة بصورة أو بأخرى في سوداننا الحبيب.. لكن في ديار شايق طعمها غير. ومكثفة ومركزة جدا.. وواضح الفراق والسفر والغربة في أشعارهم من زمان شوف مثلا الشاعر حمّيد لما قال قصيدتو ( شن طعم الدروس ما دام مكانا مشى القطر.. كيفن ذاتا ترتاح النفوس تقبل قراية في سفر) السفر دا ما كان السعودية ولا الخليج ولا لندن.. كان قبلوا الشاعر حميد في الثانوي في عطبرة الهجرة بس كانت لى عطبرة. والغياب بس حا يكون فترة الدراسة ويرجع لى قريتو بعد شهرين . الفترة الدراسية.... الشوايقة ما بخلاء. لكن جيدي التدبير للمادة بفكرهم.... .... صديق عبد الله ( منصوري)
| |
|
|
|
|
|
|
Re: هل فعلا الشايقية حريصين وبخلاء؟! (Re: Osman Musa)
|
Quote: دا من انواع التنميط السخيف الذي يذكي نار الفرقة و القبلية و الذي ساهمت النكات و الكاريكاتيرات في نشره بحسن نية او بغير ودورنا كجيل توفر له من الوعي ما لم يتوفر لمن سبقه |
توفير الوعى بمثل هذه المنشورات اخى الكريم
سوف اقوم بعرض منشور اخر عن ما يسمى بحماقة الجعليين والجعليون عن الحماقة براء كبراءة الذئب من دم بن يعقوب. ويعقبها مناشير عن تنميط عدد من القبائل بصفات محددة. هذه الفكرة اسجلها براءة هنا ومن يريد استخدامها الاستئزان منى أولا.
| |
|
|
|
|
|
|
Re: هل فعلا الشايقية حريصين وبخلاء؟! (Re: عبدالعظيم مكى)
|
Quote: العالم كلو يعرف كرم وفراسة و طيبة وسماحة الشايقية |
أخى عثمان انا اعرف هذه الحقيقة وقد يكون اكثر منك فقد عاشرتهم سنوات طويلة. وصفة البخل لا تنطبق عليهم فهم مثلهم مثل غيرهم كما زكرت فى مداخلة سابقة فيهم الكريم وفيهم البخيل وفيهم ما بين ذلك. وهذا المنشور من المفروض ان يرفع عاليا وخصوصا من قبل الشايقية حتى يتم توضيح حقائق قد تكون غائبة عن كثيرين. أنا لو فى محل الشايقية المنشور دا يسوى ليه جائزة.
| |
|
|
|
|
|
|
Re: هل فعلا الشايقية حريصين وبخلاء؟! (Re: عبدالعظيم مكى)
|
سبحان الله فى سنة سته و هى سنة المجاعة ذهب الناس شمال
فكان حضن اهلنا الشوايقة الكبير ، اكرموا الناس و ما قصروا
سماحة اهلنا الشوايقة و طيبتهم ربما غرت الناس بالتطاول عليهم
الحنان اهل الحنان ، انعم بهم من ابناء عمومة و انساب.
| |
|
|
|
|
|
|
Re: هل فعلا الشايقية حريصين وبخلاء؟! (Re: عماد احمد عباس)
|
والله العظيم أي نكتة عن بخل الشوايقة ما بتضحكني ولا تسعدني بقدر ما إنها بتحزنني دا بهتان عظيم لأني أعرفهم ، ومعظم أصدقائنا شوايقة لا علاقة لهم بالبخل الأهم من ذلك ناس حقانيين جداً لا يميلون لظلم الناس وناس عمار وخدار، عمر الصول وحدو زرع ما لا يقل عن 4000 شدرة في أمبدة
| |
|
|
|
|
|
|
Re: هل فعلا الشايقية حريصين وبخلاء؟! (Re: عبدالعظيم مكى)
|
يا جماعة الموضوع ما موضوع بخل ، عموما اهل الضفاف و الحضر عندهم عادات تخزين الطعام و غيرها من الحاجيات لانو الانتاج موسمي و متقلب و اهل الصحراء و التضاريس التانية و الرحل عادة ما بستهلكو كل مخزون طعامهم و حاجياتهم لصعوبة تخزينها الا الماء و ده ما بشغل هم اهل الضفاف و الحضر الشايقية ما استثناء من القاعدة دي لكن ذي ما قال واحد من المتداخلين مجموعة من النكات و القفشات في اطار طرف و ملائح القبايل و الاسر و موجودة في كل العالم الانجليز بقولو عن الايرلندين انهم اغبياء جدا لدرجة انك ممكن تحرق وش ايرلندين لو ضربتليهو تلفون و هو شايل المكوة و الايرلندين بقولو عن الانجليز انهم اغبي بشر لانو الانجليزي ما بقدر يمشي و هو بلوك اللبانة
ناهيتو
الما عرس شايقية عزابي
| |
|
|
|
|
|
|
Re: هل فعلا الشايقية حريصين وبخلاء؟! (Re: جعفر محمد امام)
|
. . سلام صاحب البوست و المتداخلين... . . الكلام عن بخل الشوايقة عبارة عن انتقال لعقلية المشافهة و التنميط ال Typical سودانية...... . .كل الأجناس فيها و فيها...لكن بالإحصائيات و بالتجربة الشخصية....الشوايقة قوم أذكياء...فطنون...سريعي البديهة..لهم احساس عميق بالإنتماء لأشيائهم - الأرض... الأسرة...المكان....الخ- . . في تقديري الشخصي البسيط.....مشكلة الشايقية الوحيدة إنو تفكيرهم نحو المدنية و التحضر في العصر الحديث-أعني من التركية و لي جاي- سبق باقي الأجناس السودانية في مجتمع تسوده البداوة...لذلك تصيدتهم الألسن باعتبارهم خالفوا القديم..... . . لكن في الحقيقة ما فعله الشوايقة قبل 100 سنة نفعله نحن الآن- الزوجة الواحدة....التركيز على الاسرة الضيقة تحديدآ الزوجة و الأبناء....الاهتمام بقضاء معظم الوقت في المنزل....التخطيط لمستقبل الأولاد......الخ..... . .
في مجتمع البداوة زمان....الراجل الما بيعمل الحاجات دي و الما بيقضي اليوم كلو في "الديوان" مع الرجال.. و طوالي"لافي عمتو" و حايم....ما بيعتبروهو راجل شهم و أخو أخوان.... . فشئ طبيعي إنو الشايقي "القابع" في بيتو يباشر شئون اسرته الصغيرة يكون ظاهرة شاذة....لكن نتيجة الامتحان بتظهر بعد سنين لمّن الفرق يظهر بين اولاد الشايقي و اولاد الآخرين.... . . اقول هذا الكلام و أنا ضد القبلية و الشعوبية ....و ليست لي أي علاقة عرقية تربطني بالشوايقة سوى المصاهرة..... . .و أنتهز هذه الفرصة للتعبير عن عظيم حبي و شكري و امتناني لزوجتي و شريكتي و رفيقة دربي ذات الاصول الشايقية التي ثبت لي بما لا يدع مجالآ للشك أن الله قد حباها بقدر من الكرم و المرؤة و الشهامة و النخوة و العاطفة التي لو وزعت على سكان الارض لكفتهم و زادت... . . أحييها و أفخر بها و هي منغمسة في تطبيب آلام و جراح الآخرين و إعطائهم الأمل.... و أشد من أزرها و هي تكافح لتوفق بين مهنتها الانسانية و حياتها كزوجة و صديقة و أخت و أم للعبد لله... في زمن عز فيه الخل الوفي... . . . . مودتي... . . ود حطب الله
| |
|
|
|
|
|
|
Re: هل فعلا الشايقية حريصين وبخلاء؟! (Re: محمد عبدالله حمدنا الله)
|
قمت بطرح الموضوع بمنتدى القرير، وهذه ردود لبعض الاخوان، سأوردها تباعا: عبد المنعم حضيري
Quote: مامان
أسعد الله مسائك
ردك جميل فيه إشارة قوية لهم لو كانوا يفهمون فالعمدة ود بليلو شايقي ضرب مثلاً في الكرم لم يسبقه عليه أحد ويكفي أن مدحه معظم شعراء زمانه ورثاه الشريف الهندي والأهم في هذه الرسالة الصاروخية التي وجهتها لهم أنه العمدة الشايقي في قلب دار جعل..... فلله درك يا مامان
مرثية الشريف زين العابدين الهندي للعمدة ود بليلو
عِماد الحكم عماد السجايا * عميد المجد معمود الخلودِ عوان المسنين فى البرايا * معين الناس معوان الكنودِ سراج الساهرين على الليالي * سياج المعوذين من البرودِ سليل العز سلال الرزايا * مسيل الخير سيال الجهود ذراع الفخر زراع العطايا * مسيل الخير سيال الجهود مُخِيف الخوفِ حقار المنايا * مُذيق الموت موتاً ذى شهود يواعدك الملاك الى لقاءٍ * فتسرع فى اشتياقك للصعود وتمضى كالنسيم بلا عناءٍ * شفيف الروح كالبطل الشهيد عجلت مودعاً وتركت جُرحاً * نوازفه كذبحك للوقود وادمعه تبلل كل ارض * كما ابتلت صحافك بالثريد تضيق بها جفان كالجوابى * تزيد على زيادة مستزيد وتشبعهم بشاشة ذى سماحٍ * تسمح سمحة عبر العهود وفقدك لا يعالجة أناس * ولا صبر يفي هذى الحشود فإنك أمة ودليل قومٍ * تعود محكم القول السديد تركت مآثرا جلى وحمدا * يشير الى الزعامة فى اللحودِ لقد أوفيت إذ مارست صعباً * يتيه به الوفاء على العهودِ وأنت الآن عند الله ضيف * عزيز القدر موفور السعودِ عليك الرحمة الكبرى فإنا * وحق الله في كرب شديد
|
كتب زهير سليمان :
Quote: والله يا مامان انا صلا ما بدي التنكيت ده أي اهتمام نهائي .. لانه عارفه طالع من احساس مهزوم لدي البعض تجاه الشايقية .. الناس المتداخلين في البوست بتاع سودانيات ديل كلهم ناس فيهم سطحية واقلامهم ########ة .. وفيهم الإسمو ابوبكر عباس ده .. انا بعرفو كويس لانه مسجل في سودانيات بإسم بابكر عباس وعايش في الامارات اذا ما كنت غلطان ... اكثر واحد حاقد علي الشايقية وكتابته كلها جهوية .. وفي ذات مرة اتكسارنا في سودانيات وقلت ليهو انت قادينا (الشوايقة الشوايقة) .. الشايقية ديل مدنك واطة تزرع فيها !! اشارة لمؤسس سودانيات المرحوم خالد الحاج .. لسانو طويل وما عندو التكتح .. ما عارف غايتو ياهو وللا انا غلطان .. وممكن عكود اباذر او عوض عبد الله يصححوني .. نحن ما عايزين نتكلم عن روحنا كتير .. زي البلاك بيري والأيفون .. الشركات كلها تكورك وتسوي دعايات والشركتين ديل ساكتات ساااااكت .. لانه العارف عزو مستريح .. خليهم يبلبطو .. وبعدين مفهوم الكرم عندهم نحن بنعتبره سفه وطيش وعوارة بمقياس شرع الله والعرف والاخلاق .. هم ذاتن البتكلموا ديل متين لقوا وكان عندهم عشان يعرفوهم كرماء وللا بخلاء .. الله يخلي الفيتريتي والملح والتركين والكجيك .. قوليهم غيرونا بالله ..
|
| |
|
|
|
|
|
|
Re: هل فعلا الشايقية حريصين وبخلاء؟! (Re: maman)
|
كتب المهندس فتح الرحمن أجمد ( عضو نشط بمنتدى القرير ومن خارج مناطق الشايقية):
Quote: اعجبتني كلمتك استاذ زهير عن مفهوم الكرم الذي يتفاخر به البعض وهل هو حقيقة كرم وما هوالكرم اصلا و قبل مدة طويلة اردت ان اكتب عن هذا المفهوم الذي في ظني انه يحتاج الي تصحيح كثير لنعود به الي اصله ونعرف معني الكرم الذي حض عليه الاسلام ............................ اما الرد علي امثال هؤلاء بالاضافة الي ما ذكرتم من الصفات الجميلة والحميدة التي تمتاز بها قبيلة الشايقية والي النماذج الحية قديما وحديثا والي الماثر التي عرفت عن هذه القبيلة العريقة .....فاود ان الفت الانتباه الي جانب مهم يغفل عنه من ينشرون هذه النكات ويسئون الي الفبائل والافراد والشعوب وهو جانب حكم مثل هذه النكات في الاسلام وفي هذا الصدد انقل كلام مهما جدا عن حكم هذه النكات تلخيصا من مقال جميل في هذا الموضوع فاقول (( إن ما تقوم به بعض الفِرق التي تقوم بالتنكيت والضحك.. هو من المنكر الذي يجب إنكاره في كل زمان أو مكان ... هل علم المقدِّمون للنكات والمتاجرون بها والمرتزقون من كسبها والمتفرغون لأجلها، هل علموا بهذا الحديث: قال الرسول ــ صلى الله عليه وسلم ــ : «ويل لمن يحدث فيكذب ليضحك القوم ويل له، ويل له» (حديث صحيح ) فهذا خبر من النبي عليه الصلاة والسلام يُخبر فيه بالويل لمن يكذبون ليضحكون الناس.. وهذا الكذب هو الذي تقوم عليه هذه النكات التي للأسف باتت تقدَّم بعد الإفطار وفي وقت العشاء والتراويح!!! فيقولون واحد... عمل.. وواحد أخذ.. ويدخلون على القبائل ويخترعون عليها ويفترون عليها بالكذب لإضحاك القوم كما سيأتي بيانه.. فهل سمعوا بهذا الوعيد؟!!! وهل علموا هذا التحذير النبوي؟!!!قال الصنعاني في «سبل السلام»: الحديث دليل على تحريم الكذب لإضحاك القوم، وهذا تحريم خاص. ويحرم على السامعين سماعه إذا علموه كذبًا؛ لأنه إقرار على المنكر بل يجب عليهم النكير أو القيام من الموقف، وقد عد الكذب من الكبائر. اهـ. وقال الشيخ ابن باز: التفكه بالكلام والتنكيت إذا كان بحق وصدق فلا بأس به، ولا سيما مع عدم الإكثار من ذلك، وقد كان النبي صلى الله عليه وسلم يمزح ولا يقول إلا حقًا صلى الله عليه وسلم، أما ما كان بالكذب فلا يجوز؛ لقول النبي صلى الله عليه وسلم: «ويل للذي يحدث فيكذب ليضحك به القوم ويل له ثم ويل له» أخرجه أبو داود والترمذي والنسائي بإسناد جيد. اهـ.
فجانب الكذب الذي تقوم عليه هذه النكات واضح وهو مناط التحريم في أكثرها، لأنها قصص ملفّقة مختلقة لا حقيقة لها في الواقع.. ولم تقتصر النكات التي باتت تقدم في شهر رمضان بعد الإفطارات الجماعية وتزاحم وقت صلاة العشاء والتراويح.. لم تقتصر على الكذب بل تضمّنت أموراً أخرى عديدة أبرزها ما يلي:
** الدعوة لإحياء العنصرية القبلية ونحن في بلد هو من ضحايا إثارة العنصريات القبلية والجهوية، إذ يقلِّد بعض أصحاب هذه النكات بعض زملائهم وأصبح الكثير من نكاتهم إنما هو في القبائل.. فيرددون: واحد جنوبي واحد شايقي واحد أدروب واحد عربي واحد غرباوي ورباطابي وشايقي وجعلي واحد من الجزيرة واحد دنقلاوي... وغير ذلك
بل بتكرارهم ذلك وتواترهم عليه أصبح لما يصفون به تلك القبائل التأثير الواضح في انطباع الناس عنهم وحصل بذلك ويحصل الظلم العظيم للمنتسبين لتلك القبائل.. فقبيلة ينعتونها بالبخل وأخرى باللا مبالاة.. وثالثة بالفوضى.. ورابعة بالهمجية والرعونة وخامسة بالحماقة.. فأصبحت هذه النكات بوقاً ينفخ به في نار الفرقة التي تعاني منها بلادنا.. فالعنصرية القبلية هي مما لا يخفى من أكبر مهددات الأمن في بلادنا في هذه الفترة، وقد استغلها أعداؤنا لإثارة الفتن والحروب.. فهذه النكات تناقض دعوة الإسلام الذي حرص على وضع العنصريات القبلية تحت الأقدام. وقد قطع الله تعالى دابر هذا البلاء الذي تقطع به الصلات وتمتلئ به القلوب بالشحناء والبغضاء.. ويزداد الغل بسببه إلى أن يبلغ القتل والدمار والخراب.. «إن أكرمكم عند الله أتقاكم»، «لا يسخر قوم من قوم» «ولا تلمزوا أنفسكم ولا تنابزوا بالألقاب» «خلقكم من نفس واحدة»... وقال عليه الصلاة والسلام: «.. ومن دعا بدعوى الجاهلية فهو من جثاء جهنم». والدعوة للعصبية هي من الدعوات الجاهلية كما جاء في حديث «ما بال دعوى الجاهلية ؟!» ................ فالعنصريات القبلية سمة واضحة تدعو إليها هذه النكات، ومع عظم هذا المنكر فإنها تضيف إليه أنها تُصوِّر حال القبيلة عموماً بما يكررونه في وصفهم، وهذا والله من الظلم العظيم الذي يبقى في أذهان كثيرين وهو من الكذب والافتراء المشين)))) ( منقول بتصرف من مقال بعنوان ( المُتَاجِرُونَ بِالنُكَتِ.. وَمَنْ أصْغَى إليْهِم) للدكتور عارف الركابي |
| |
|
|
|
|
|
|
Re: هل فعلا الشايقية حريصين وبخلاء؟! (Re: maman)
|
كتب صديق الحسين، رئيس اللجنة الثقافية بجمعية القرير بالرياض :
Quote: أعـــتقـــد أن المعــنى المــراد واضـــح ... لـــمن يقــــول :
الشــــايقيـــــــة كــــريمــــة ... والشـــايقـــــى بخـــيـــل ...!!
فهـــن لايخلــــفــن ميـــــعــــادا ــ حسب زعمـــه!!
الحملـــة بــرمتهـــا تــدل على الشـــرخ الذى حدث فــى الوحـــدة الوطنيـــة ... عندما أختزلـــت الــدولـــة فــى حــزب ــ وأخــتزل الحــزب فـــى حكـــومـــة ... وأختزلــت الحكومة فــى اجهزة أمنيـــة ... وأختزل الأمن فـــى أفـــراد ... عندهــــا حلـــت الطامـــة وتحــركـــت الأحـــن حتى بين الأخ واخيـــه للتفاوت الغير مبرر الذى أحدثه اللصوص فجأة ... وبــدأت من هنا نواة المجتمع فى التحلل ... ومكونات الشعب فى مهب الريــح ...!!
الشـــوايقــــة زيهــن وزى باقــى الســـودانيين ــ وكلهــم فــى ميزان الشعـــوب ... صـــفـــر ...!!
والتنـــــبــر ... والفــــخـــر لـــن يحـــل المعضلــــة ... فقط أمامــكم دســـتور تتراضـــون عليـــه... وحكومة منتخبـــــة ... وللعــــدم ــ الطــــوفـــان ... الذى تســـتحقـــه الشـــعــوب الغــافلـــــــة ...!!
وأدنبــــرا مـــثـــال للــــوعــــى ... كـــما الســــودان مثال للغبــــاء ...!!
تحيـــاتـــى ...!!
|
كتب أحمد عبد الله جقلاب، رئيس جمعية القرير بالدمام :
Quote: عزيزى مامان.. تحية طيبة مباركة
هؤلاء قــوم قـد حار بهم الدليــل ..
ولقــد بلغ بهم الفــراغ والجــدة أى مبــلغ..
أليس هنــاك فى الســاحة السودانية قضــايا تشغلهم غير هذه القضايا ال########ة والسخيفة ؟
ألا يعلمـون ما يحيط السودان من مخاطر داخلية وخارجية فى كل منحنى ؟
وهذا الشعب الذى تتقاذفه الفتن والإحن والمحن .. ألا يهمهم أمره ؟
أرجـو أن يعيـد هؤلاء قـراءة تأريخ القبائل بالسودان حتى ينتفى جهلهم بما يتمتع به هذا الشعب بجميع قبائله ، وخاصـة قبيلة الشايقية، من خصائص وأخلاق ما شـهد به حتى قادة الإنجليز قبل غيرهم .!!!
إن المتداخلين قبلى قد كفوا ووفوا...
وأذكر أصحاب هذه المنتديات بهذا الهدى النبوى : جاء في صحيح البخاري: أن رجلين من المهاجرين والأنصار تشاجرا فَقَالَ الأَنْصَارِى ُّيَا لَلأَنْصَارِ. وَقَالَ الْمُهَاجِرِى ُّيَا لَلْمُهَاجِرِينَ. فَسَمِعَ ذَاكَ رَسُولُ اللَّه صلى الله عليه وسلم فَقَالَ: مَابَالُ دَعْوَى جَاهِلِيَّةٍ قَالُوا يَا رَسُولَ اللَّهِ كَسَعَ رَجُلٌ مِنَ الْمُهَاجِرِينَ رَجُلاً مِنَ الأَنْصَارِ. فَقَالَ دَعُوهَا فَإِنَّهَا مُنْتِنَةٌ
إن التفاخر والتكبر على الآخر بالحسب أو النسب أو الجنسية أو القومية أو الانتماء هي من دعاوي الجاهلية التي أبطلها الإسلام قبل 14 قرنا!
|
| |
|
|
|
|
|
|
Re: هل فعلا الشايقية حريصين وبخلاء؟! (Re: maman)
|
أجمل ايام العمر قضيتها في نوري الثانوية العامة .. أجمل ناس واظرف ناس في السودان هم أهلي الشوايقة واليكم هذه الخواطر ..
ذكرياتي .. في ديار أهلي الشايقية (1)
اذكر ذلك اليوم الذي جمعنا فيه ناظر المدرسة واخبرنا بوصول الشيخ الكاروري واننا بصدد زيارته وكان قد أفرج عنه بعد اعتقاله لفترة طويلة من قبل امن حكومة مايو .. وقمنا جميعاً بالواجب ووجدناه في حالة صحية سيئة من جراء ما تعرض له اثناء اعتقاله .. وكنت شخصياً اكثر الناس حرجاً لأن في تلك الايام كانت شعبية الرئيس نميري متدنية بين اخواننا في منطقة الشايقية لاسباب كثيرة اهمها نقل العاصمة الى دنقلا وامدادها بالكهرباء والارسال التلفزيوني بالاضافة الى نقل جميع الدوائر الحكومية مما جعل اخواننا هناك يشعرون بنوع من الغبن .. وكان ذلك محور الحديث بيني وبين اخواني المعلمين في المكتب والسكن .. نتحدث فيها مع بعضنا على سبيل المناكفات والسجالات المحببة الى النفس وكانت الغلبة لهم لأنهم حاضري البديهة بالفطرة وفصيحي اللسان بلغة منغمة وسلسلة .. وكان مبتاغي الاخير ان اتباهى أمام الزملاء بأنني شاهدت في دنقلا كأس العالم على هواء مباشرة وكأني في المكسيك .. ولكن الحقيقة انني اكتشفت اصالة ورقة وجمال ذلك القوم بعد معايشتهم ومن اراد ان يعرف اخواننا الشايقية على طبيعتهم وبدون اي رتوش او اضافات فليذهب الى نوري حيث الطبيعة الصادقة والارض المعطاءه والكرام من الناس .. وأجزم عن قناعة انهم نوبة استعربوا ولا فرق بيننا إلا أن لسانهم عربي مبين ولكن السرعة وادغام الكلمات والتعابير واذكر ذلك اليوم عندما جاء إلي في المكتب وكنت مرشد الصف الاول وقذف في وجهي بعبارة غريبة جداً ومنغمة ( استاذ .. ألوفتولي – كسرة على الياء – جمع كراسات الحساب ) ويقصد ان ( الفة سنة أولى هو الذي جمع الكراسات ) ولا تدخل زميلي الشايقي في المكتب وشرح لي الامر لما فهمت شيئاً .. كيف يتم دمج ثلاثة كلمات في كلمة واحد ( الفة سنة اولى _ ألفوتولي ) وهم سريعي الحركة اكثر من اهلنا وقد لاحظت حتى حميرهم اسرع خطى من حميرنا ولا اعرف سبباً لذلك ولكن ربما لأن النيل في كريمة نوري يجرى عكس الاتجاه .. ولكن البشر هي نفس الصفات ونفس الملامح ونفس العادات والتقاليد بل نفس الطعام ولكن من ناحية الجمال والنضارة وتقاطيع الوجه والوسامة فلهم القدح المعلى .. وسبحان الخالق .. وفي منطقة مثل نوري كانت وسيلة الاعلام الوحيدة هي المذياع ولكن لحظي العاثر كنت اقتني مسجل من نوع ( ناشونال) لم يهدأ يوماً منذ ان وطأت قدمي ارض نوري .. ودائماً ما كان بحوزة عمنا فضل السيد غفير المدرسة والذي دائماً ما كان يستهجن أن اسمع فقط نشرات البي بي سي ولا اسمع الاغاني ولا اعيش الجمال والروعة من خلال صوت الكروان كرم الله وجبارة وهذا الثنائي كان قد ملأ البر والبحر نغماً وطرباً في ذلك الزمان .. وقد لاحظت ان عمنا فضل السيد كان لا يعترف بمقدرات الفنان صديق الدبة مع ان الاخير كان في بداياته ويتلمس طريقه بين عمالقة الطرب والشجن والصوت الجميل .. لقد تعدى عمنا فضل السيد بجهاز التسجيل حدود ميز المدرسين الى رحاب اوسع لاحياء نوري وسمعت من احد المنافسين لفضل السيد في مجال الوجاهة والظهور انه شاهد الرجل يتباهى به في حفلات الاعراس والمناسبات وكأن الجهاز ملكه ولكن رغم وشاية هذا المنافس تركت الأمر لفضل السيد ليشبع بعض رغباته الجامحة .. وعمنا هذا رغم اميته إلا انه نموذج حي لأهلنا الشايقية فهو ذكي ولماح يقرض الشعر بلغة كانت بالنسبة لي كالطلاسم بالاضافة الى انه راوية من الطراز الاول .. فهؤلاء القوم خبروا كل دروب الشعر حتى اصعب انواعه وهو الشعر الفكاهي او الهزلي .. وقد روى لي فضل السيد قصة الرجل الذي نظم قصيدة هزلية يهجو بها افراد من شرطة مروي .. ووصمهم بالشراهة وحب الاكل الذي كاد ان يقودهم الى الهلاك .. وحسب الرواية فقد اختلط عليهم الامر واعمى الجشع والنهم الى الاكل ابصارهم .. وذلك عند مرور جذع شجرة موزة مع فورة مياه النيل خيل لهم ان الامر سمكة جديرة بصيدها وتجهيزها كمائدة دسمة : موزة من موزات نوري الكبار .. حضروله دقة وشمار العساكر ملصوا اللبس .. قالوا دايرين لحم الدبس .. والله ياموزة كلامي ليك .. دي المصيبة الوقعت عليك .. يا موزة كلامي ليك .. وهذا مطلع لملحمة شعرية بها من التهكم والسخرية الكثير .. وكنت استمتع اكثر عندما يكون معنا العمدة مهدي كنيش ( عمدة الشبشة ) حيث كان عمنا فضل السيد يتألق كثيراً في حضرة هذا السيد الكريم وفي حضور العمدة أنواع اللحم والشواء والجلسة الجميلة داخل حوش ميز المدرسين .. رحم الله ذلك الزمان ومازال صدى صوت فضل السيد يأتيني من اعماق ذاكرة ما .. وسقى الله تلك البلاد الجميلة خيراً .. ونوري هي جنة الله في الارض .. وأهلها اجمل خلق الله .. وللحديث بقية ..
| |
|
|
|
|
|
|
Re: هل فعلا الشايقية حريصين وبخلاء؟! (Re: maman)
|
سلام استاذ مامان اعجبتني مداخلة المهندس فتح الرحمن و الزاوية التي تناول بها موضوع التنكيت على القبائل و ما يثيره من إحن هذا غير المخالفات الشرعية التي به من كذب وخلافه له ولك ولأعضاء منتداكم التحية
| |
|
|
|
|
|
|
Re: هل فعلا الشايقية حريصين وبخلاء؟! (Re: محمد البشرى الخضر)
|
شكرا يا بريمة على الفيديو الذى عطر سماء البوست لكن ارجوك افرز بين البديرى والشايقى وما تنزل ساكت مع انهم جيران ! البديرية من الشمال والمناصير من الجنوب فنانى الشايقية على قفا من يشيل وفقط على سبيل المثال مرغنى النجار, عبدالرحيم البركل , جعفر السقيد , محمد النصرى , عبدالقيوم الشريف
| |
|
|
|
|
|
|
Re: هل فعلا الشايقية حريصين وبخلاء؟! (Re: Al-Shaygi)
|
Quote: عامل اسمك النصو شايقي ونصو جعلي ده..,,
...............................
الحبيب عمر عثمان عبد الوهاب.... يا خي ما قادرة اقيف من الضحك من تعليقك الظريف ده... انتو بتجيبو ها من وين... كل واحدة من زميلاتي تجي تقرأ التعليق تموت من الضحك . اها ومنهن واحدة شايقية .. ضحكت لامن العبرة خنقتها..
ثانيا انا عاوزة أؤكد ليك ان الشايقية من أكرم وانبل قبائل السودان.. وانا ما شايقية لكني عايشتهم وزاملتهم في عطبرة وهنا في امريكا ووجدت فيهم العادات السودانية السمحة والتقاليد المحبوبة .. ولمن تعيش معاهم يا دوبك تقول وا حسرتي ويا اسفي ويا ذلي لو ما كنت سوداني... وانا ما عارفة حكاية البخل ده جات من وين ولصقوها في الشايقية لأن هذه الصفة موجودة في جميع قبائل السودان سواء من الشمال او الجنوب او الغرب او الشرق.. واساسا البخل ده ما عادات السودانيين ولكن لكل قاعدة شواذ.. والقبائل السودانية كلها عموما مشهورة بالكرم والمروءة والشهامة .. على الرغم من قسموة الحياة العامة الآن في السودان,, ودمت بخير وصحة وعافية
| |
|
|
|
|
|
|
Re: هل فعلا الشايقية حريصين وبخلاء؟! (Re: اميرة السيد)
|
تحية
والله تكفي المعاني التي صاغها المتداخلون ...لنقفز الي براحات السمو الانساني الباذخ...نترك وراءنا سيناريوهات القبح وتاجيج نيران التفرقة والشتات بين ابناء السودان...ونضحك علي احابيل من ظنوا اننا سنقع في مستنقع العنصرية وقبحها المستدام...
يكفي النيل ابونا والجنس سوداني...
وسلام علي اهلنا في منحني النيل يرفدون وجداننا بالسخاء والعطاء والنور...
| |
|
|
|
|
|
|
Re: هل فعلا الشايقية حريصين وبخلاء؟! (Re: محمد الكامل عبد الحليم)
|
Quote: والله تكفي المعاني التي صاغها المتداخلون ...لنقفز الي براحات السمو الانساني الباذخ... نترك وراءنا سيناريوهات القبح وتاجيج نيران التفرقة والشتات بين ابناء السودان...ونضحك علي احابيل من ظنوا اننا سنقع في مستنقع العنصرية وقبحها المستدام. |
كفيت ووفيت محمد الكامل زادك الله كمالا ورفعة. ما ذكرته جزء من هدف هذا المنشور وقد تحقق بفضل الله.
| |
|
|
|
|
|
|
| |