|
|
 حكاية الأم والابن والعسكري الفراق تراجيديا إنسانية
|
حكاية الأم والإبن والعسكري الفراق
تراجيديا إنسانية من فصل واحد وثلاثة مشاهد
الممثلون
صوت (1) السجين
صوت (2) المغني
صوت (3) المؤدي "إلقاء شعري"
الأم : مريم
الكورس : جوقة المغنيين
قبل فتح الستار
الكورس :
يا شعبنا يا والد احبنا
يا من وهبت قلبنا ثباتك الأصيل
اليك هذه الرسالة القصيرة الطويلة
اليك من زنزانة تخاصم الفصول
اليك رغم انف كل بندقية
وكلمة شقية وحقد بربرية
إليك الحب والسلام والتحية
يفتح الستار
المشهد الأول
ظلام .. ليل ... زنزانة على الجانب الأيمن من المسرح ضوء خافض ينبعث من كوة الزنزانة يسلط على شخص جالس على الأرض ...
الكورس :
الإنسان الكلمة بوعي
الإنسان الفعل الحي
في الزنزانة صامد زي
عبد الخالق يبسم لي
صوت (3) متبادل مع الكورس
شعبي نبيل ..
بسيط وذكي
حياته رسالة
زي أي نبي
سكن الثورة
والثورة جواه أهي
الكورس :
إنسان عفيف
إنسان شريف
كلما يضيق الحال
والأطفال يجدعوا بالحجار
يجو ياخدوه
وجوه السجن سنين يرموه
إنسان عفيف
إنسان شريف
صوت (3)
لأنه
مؤمن بالأطفال
وبالجايين السه صغار
وقلبه مليان أشعار أشعار
الكورس :
إنسان عفيف
إنسان شريف
المشهد الثاني
الركن الثاني من المسرح ، الضوء يسلط على أم تجلس على طرف عنقريب تهدهد دمية طفل وتحضنها في حنان بالغ:
الأم :
يا طالع الشدرة
جيب لي معاك بقرة
حلاّبة العشرة
تحلب تعشّيني
بي كورة الصيني
الكورة إنكسرت
أنا مين بيربّيني
الطفل يضحك ببراءة والأم تواصل هدهدتها
مشيت لبيت الله
لقيت حبيب الله
قاعدلو فى بنبر
ياكل حمام أخدر
قال لى كان ضوقتى وحات النبى الزرتى
وياريتنى كان ضوقتو وحات النبى الزرتو
....
تتواصل ضحكات الطفل
الكورس:
يا أم أحمد
دقى المحلب
فى توب أحمد
أحمد غايب
فى الراكايب
جانا ######
سنونو صفر
حلب الناقة
فى الشنقاقة
( إظلام الجانب الأيسر من المسرح وعودة الضوء إلى الجانب الأيمن - الزنزانة )
صوت (1) السجين
ياوالدة يا مريم ... يا عامرة حنية
أنا عندي زيك كم ... يا طيبة النية
بشتاق وما بندم ... اتصبري شوية
اتصبري شوية... اتصبري شوية
يا والدة يا مريم
الكورس
ما هو الوليد العاق ... لا خان ولا سراق
والعسكري الفراق ... بين قلبك الساساق
وبينو هو البندم ... والدايرو ما بنتم
يا والدة يا مريم
صوت (1) السجين
عارف حنانك ليّ راجلا تلوليني
دايماً تقيليني وفى العين تشيليني
ألقاه عز الليل قلبك يدفيني
ضلك عليَّ مشرور قيلت فى سنيني
أنا لو تعرفيني لو تعرفي الفيني
أنا كم بحبك كم
والعسكري الفراق بين قلبك الساساق
وبيني هو البندم ... والدايرو ما بنتم
يا والدة يا مريم
طول النهار والليل فى عيني شايلك شيل
لكني شادّي الحيل لا خوف عليَّ لا هم
هاك قلبي ليك منديل الدمعة لما تسيل
قشيها يا مريم
الكورس:
ما بركب السرجين وما هو زول وشين
يا والدة دينك كم دين الوطن كمين
صوت رقم (1) السجين
يا والدة يا مريم
ما تقولي شن سويت ما تبكي ما سويت
غير البطمن ناس بى همهم حسيت
فارس مع الفرسان حارس بلدنا البيت
أخواني علو السور أنا طوبة ما ختيت
ديل من زمن تاتيت لامن كتبتَّ قريت
عرقنا ياما يدر يمه اللبن والزيت
الكسرة والكراس لى قشة الكبريت
تقولي جيداً جيت راجع مع الفرسان
فايت الحدود واسيت
وتغني يا مريم لينا وتجري النم
والعسكري الفراق بين قلبك الساساق
وبيني هو البندم ... والدايرو ما بنتم
يا والدة يا مريم
( إظلام الجانب الأيمن وعودة الضوء إلى الجانب الأيسر – الأم )
الأم :
تهدهد الدمية
النوم النوم
النوم تعال سكِّت الجُهال
النوم النوم بكريك بالدّوم
( ترفع الطفل وتقبله وتواصل الهدهدة)
الليلة أظنك محموم
هاك الشربات
أتغطى ونوم
النوم النوم
الليلة أظنك محموم
أحي يا جناي
أحي يا ود حشاي
( إظلام الجانب الأيسر من المسرح وعودة الضوء إلى الجانب الأيمن - الزنزانة )
الكورس:
يا أم أحمد
دقى المحلب
فى توب أحمد
أحمد غايب
فى الراكايب
جانا ك ل ب
سنونو صفر
حلب الناقة
فى الشنقاقة
صوت (1) السجين
ياوالدة يا مريم ... يا عامرة حنية
أنا عندي زيك كم ... يا طيبة النية
بشتاق وما بندم ... اتصبري شوية
اتصبري شوية ... اتصبري شوية
اتصبري شوية ... اتصبري شوية
يا والدة يا مريم
صوت (2) المغني
ياوالدة يا مريم ... يا عامرة حنية
أنا عندي زيك كم ... يا طيبة النية
بشتاق وما بندم ... اتصبري شوية
اتصبري شوية ... اتصبري شوية
اتصبري شوية ... اتصبري شوية
يا والدة يا مريم
الكورس :
إنسان عفيف
إنسان شريف
سجنوه كتير أسروه كتير
سجنوه كتير أسروه كتير
صوت (2) المغني
ورغم السجن والأسوار
ورغم السمكي والأخطار
صوت (3)
كانت دايما قصايده بتطلع
من الزنزانه مقطع مقطع
الكورس يردد على حوار مع الصوت (3):
في ورق الدخان بتطلع
في جيب السجان بتطلع
من بين الأحزان بتطلع
من جوه الوجدان بتطلع
صوت (3)
والناس تقرأ وتسمع وتعرف
مين البسرق ومين البنهب
ومين الصامد في وجه المدفع
يدافع عن أحلام الشعب
المشهد الثاني
الحلم
صوت (2) المغني
يمة شفتك فى المنام
وانتِ بين سربين حمام
نازله سكّه وادى أخضر
شايله سلّة ورد أحمر
وحزمتين أحلى الكلام
يتبعوك طفلين حلاوه
طاروا عصفورين علىَّ
ركّوا فى اسود عينىّ
ورحت في غمرة ندواه
كنتَ مُجْهد
قلبي فَرْهد
ورشّ أيامى الغمام
صحيت وقفت
مشيت أعاين
القى بينى وبين عيونك
كم ضواحى
وكم مداين
وانطوت كل الجناين
فى غيابك
وفى الظلام
المشهد الثالث
" أصوات إيقاعات مختلفة ضجيج وحركة على خشبة المسرح .. وإضاءة ساطعة ..ثم ظلام تام ....صمت تليه صرخة مدوية .. ثم موسيقى جنائزية حزينة والضوء يسلط على نعش محمول على عنقريب .. يمضي النعش بجوار الزنزانة.. السجين يمد يده محاولا الأمساك بطرف النعش قبل أن يختفي خلف كواليس المسرح ... يتداخل الصوت (1) والصوت (3)
صوت (1) السجين
مريم محمود راحت شقيش
صوت (3)
مجنون
مجنون مجنون
مجنون مجنون مجنون
صوت (1) السجين
مريم محمود راحت شقيش
صوت (3)
مجنون مجنون مجنون مجنون
مجنون مجنون مجنون
صوت (1) السجين
مريم محمود راحت شقيش
صوت (3)
مجنون مجنون مجنون
مجنون الحزن المسجون
بارود الحزن المسحون
صوت (1) السجين
جوااااي انا شافع محزون
عن امو بفتش فتيش
الكورس
فتش فتيش هبش هبيش
دقش دقيش
صوت (1)
ياناااااااس
مريم محمود راحت شقيش
ياناااااااس
مريم محمود راحت شقيش
ياناااااااس
مريم محمود راحت شقيش
صوت (3)
في زنك اللحمة وفي الزحمة
صوت (1)
مريم محمود راحت شقيش
صوت(3)
في منحنيات الاسواق
صوت (1)
مريم محمود راحت شقيش
ولا آه يا مريم محمود
آآه يامريم محمود
آآآه يامريم محمود
آآآآه يامريم محمود
آآآآآه يامريم محمود
ياذات الضل الممدود
ياذات القلب الساساق
حتلت جواي الاشواك
حتلت جواك الاشواك
وكنت الولد المفقود
لا هجراً ليك ولا عاق
لا هجراً ليك ولا عاق
حبيتك ذي ما حبيت
الوالد
الوطن
البيت
منك خطفوني تماسيح
كم مرة وخلو التباريح
كم جيتك راجع مسحور
بذات الوجه المغرور
البيني وبينك عصفور
علي قلبومنشن صياد
علي قلبومنشن صياد
علي قلبومنشن صياد
ظلموك يامريم ظلموك
حرموك يامريم حرموك
خلوك الدمعة تفصد خدك في الاعياد
خلوك الدمعة تفصد خدك في الاعياد
خلوك الدمعة تفصد خدك في الاعياد
مشوك في الشوك علي حد السيف
اتعلمتي الشك في الغربا
وكنتي ملاذ الشتا والصيف
للضيف
اتعلمتي الشك في الغربا
وكنتي ملاذ الشتا والصيف
للضيف
صوت (2) المغني
سرقو امانك وإطمئنانك
قلبك كل ما باب الشارع دق يدق
قلبك كل ما باب الشارع دق يدق
يدك ترجف في الصقاطة
وشك شاحب ربنا يستر يمكن هم
وشك شاحب ربنا يستر يمكن هم
وشك شاحب ربنا يستر يمكن هم
تفرحي فرحاً قدر الدنيا
تفرحي فرحاً قدر الدنيا
تفرحي فرحاً قدر الدنيا
إذا ما كان الطارق صاحب
وحالا نارك بالهبابة لهيبا يبق
حالا نارك بالهبابة لهيبا يبق
حالا نارك بالهبابة لهيبا يبق
"انتهت"
عاطف عبد الله
أبوظبي مارس 2006
|
|
  
|
|
|
|
عاطف عبدالله
فيس بوك
تويتر
انستقرام
يوتيوب
بنتيريست