|
روحك كالحمامة, بترفرف هنااااااك .. وداعاً محجوب شريف
|
روحك كالحمامة, بترفرف هنااااااك ..
لو ركنَا لهذا الحزن الرهيبِ لأنفطرنا .. ولو سكتت منًا الأقلام لأنتحبت المحابر .. ولكن كيف الدخول اليك سيدي محجوب وهذه الدروب تباعدت وتباعدت ثم تباعدت ما بيننا وكونك الفسيح .. الروح المصادمة .. والوش المريح .. ياااا ألف رحمة ونور .. يا واضح القسمات يا حي الشعور .. تمجد إسمك في لوحنا المحفوظ وتعالى فينا ذكرك .. بوركت يا ضمير هذا الشعب .. يا هتافنا المصادم والمجاهر بالحق في زمن الخنوع .. يا نبضنا المسموع .. ياااا حبال الصوت المجدولة فينا من سعف النخيل .. شِعْرُ الخليل ..هدير النيل .. صهيل الخَيْلِ وأمْدُرمانُ تعرفهُ .. والخرطومُ والمردومُ والشاشاي والدوبيت والنًمٌ .. ياااا ود مريوم .. و ود مليون .. و ود ملين و ود راشد ..و ود الشعب وعم الشعب وخال الشعب .. منك فيهو مليون ميل و وُد ممدود على خاطراً سمح بالحيييل,, على عهد النضال ظليت كما عهدك.. وكم وفيت وكم كفيت وما إدليت .. ولا من قطر النضال نطيت .. ولا فد مره انذليت, لغير مشيئة السودان .. لا هاجرت لا سافرت لا فزيت .. لا هادنت في الطاغوت .. لا اتلبدت في الاحزان.. بل صادمت حتى الموت .. وقفت ركزت للعسكر كما الفرسان .. شمخت على الطريق العام خمسين عام.. وبين الثورة والالهام .. تقيد نار النضال الوعي .. تنادي على الخلوق مارين .. وهم عارفين, وهم هامين ومهمومين ومجبولين على فطرة وداد الارضِ بس خايفين .. اذا ما فاتهم الرصاصُ .. داسَهُمُوا العًساكِرْ .. وأنت كما أنت سيدي محجوب .. صامدُ الحرفِ مُشتعلُ الدفاتر.. رافع تمام الوطن حاضر .. تحاضر فينا بالجملة .. في عشق التراب, ما فاتتك جمله!! .. وجمالك فاض وكم فياض وكم فضفاض .. وسع كل الكلام الزين .. ما شفتو ود الزين؟! .. الكان وحيد امو .. وماليلا كان العين !!.. شفناهو يا محجوب .. قابلتو اول شيء .. طالع من الدفتر .. ماسك علم أحمر .. أسمر مهيب الروح .. بمشي كما الابطال .. وشيوعي على السكين .. و قابلتو كل ما أعيد .. مقطع من الديوان .. العودو خاتي الشق .. ما قال وحاتك طق .. تب ما وقف بين بين .. لي موتو اتقدم .. انا ما بجيب الشين .. انا لو سقوني الدم .. قابلتو في جواي .. كل ما سرح خاطر .. وتمتم بي غناك الحي .. جوه الوريد أحي .. نازل كما الجمره .. وتر اللهيب الحب .. يتغنى جوه الجب .. ويغني لي بكرة .. للثورة والاحلام .. او لى بلابل الدوح .. اذا ما نضمك المنضوم شلع في الروح .. مع وردي وحلاوة البوح .. يهدهد في حبيبة الروح .. عيوني في الدمعات وحيله .. أسمحيلا تشوف عيونك أسمحيلا.. سمح الكلام عندك .. كم جانا النشيد منك .. واجمل ما يكون عنك, لما الكلام معقود, بي ناصية الاحلام .. الا ما أجمل الاحلام .. وطن بالفيهو نتساوى .. نحلم, نقرأ, نتداوى .. الا ما أجمل الأحلام .. تحتنا الظلمه تتهاوى .. الا ما أجمل الاحلام .. مكان السجن مستشفى .. مكان المنفى كلية .. مكان الأسرى وردية .. مكان الحسرة أغنية .. مكان الطلقة عصفورة .. تحلق فوق نافورة .. وتمازح شفع الروضة .. و .. حنبنيهو يا محجوب .. هذا الوطن سيكون تماما كما أنت تشتهي وتستطيب .. نم قرير العين مطمئن الفواد .. شيعوك اليوم بشعرك .. حملوك في الاعناق "ماك الوليد العاق .. لا خنت .. لا سراق" .. وكأني بك كنت ترامقهم بابتسام ورضى وطمأنينة .. الست من أشهدتهم عليك .. " أدوني شهادة فقدان وجدان وضمير إتوفى .. لو أني كتبت قصيدة تطقطق أصابع حاكم زلفى" .. حشاك ومليون لا .. حملوك في الاعناق.. ماك الوليد العاق .. لا خنت لا سراق .. قدمت نموذجا متقدما للنضال والوطنية والرسوخ الانساني الضارب في أعماق التراب الوطني والمتشبث به .. شكلت وجدان الملايين من أبناء الشعب السوداني بقصائدك الوطنية من ناحية .. وبالتزامك الإسطوري بقضاياهم من ناحية أخرى.. لا هادنت لا نخيت وحتى آخر نفس ليك في هذه الحياة .. شكرا عم محجوب .. شكرا كثيرا وشكرا جميلا وشكرا جزيلا لكل ما قدمت لنا من جمال انساني و وطني نادر .. شكرا يا عم محجوب على كل ما علمتنا إياه من معاني .. ادركنا بعضها وتقاصرنا عن بعضها .. شكرا عم محجوب بكل ما شكلت به وجداننا فشكل فينا هوية أجمل تتسع لكل أهل السودان وتضمهم جميعا في تفاصيلها الجميلة والاشبه ما تكون بهذا التراب الرحيم .. شكرا عم محجوب لصمودك الاسطوري في زمن الخنوع .. شكرا عم محجوب على نوافذ الأمل التي فتحتها في نفوس الناس .. تلك النوافذ المطلة على سودان أجمل ونضييييف وممكن يكون و سيكون .. حا نبنيهو يا محجوب .. حا نبنيهو البنحلم بيهو يوماتي .. وطن شامخ وطن عاتي .. وطين خًيِر وديمقراطي .. وتماما كما ظللت تؤمن وتغني وتبشر وتقود .. كنت قائدا فذا و ابنا بارا بهذا الشعب و والدا كم كريم .. وداعا وسنكون على العهد صامدين .. نتطلع للثورة ونبشر بالاحلام الوطنية الكبيرة ولن نهادن يوما سارقا لقوت شعبنا أو منتهكا لكرامته او معتديا على مقدراته .. لن نهادن لا بالفعل ولا بالكلمة ولا بالحرف.. هذا ما تعلمناه منك وما الهمتنا اياه .. الف رحمة ونور عليك يا عم محجوب .. وداعا محجوب شريف ..
(عدل بواسطة محمد حيدر المشرف on 04-03-2014, 00:57 AM) (عدل بواسطة محمد حيدر المشرف on 04-03-2014, 07:59 AM) (عدل بواسطة محمد حيدر المشرف on 04-06-2014, 00:41 AM)
|
|
![URL](https://sudaneseonline.com/db/blank.gif) ![Edit](https://sudaneseonline.com/db/icon_edit.gif)
|
|
|
|
|
العنوان |
الكاتب |
Date |
روحك كالحمامة, بترفرف هنااااااك .. وداعاً محجوب شريف | محمد حيدر المشرف | 04-03-14, 00:14 AM |
Re: روحك كالحمامة, بترفرف هنااااااك .. وداعاً محجوب شريف | الفاضل يسن عثمان | 04-03-14, 01:25 AM |
Re: روحك كالحمامة, بترفرف هنااااااك .. وداعاً محجوب شريف | كمال عباس | 04-03-14, 02:31 AM |
Re: روحك كالحمامة, بترفرف هنااااااك .. وداعاً محجوب شريف | محمد حيدر المشرف | 04-03-14, 08:06 AM |
Re: روحك كالحمامة, بترفرف هنااااااك .. وداعاً محجوب شريف | محمد حيدر المشرف | 04-03-14, 08:21 AM |
Re: روحك كالحمامة, بترفرف هنااااااك .. وداعاً محجوب شريف | محمد حيدر المشرف | 04-03-14, 10:45 PM |
Re: روحك كالحمامة, بترفرف هنااااااك .. وداعاً محجوب شريف | محمد حيدر المشرف | 04-03-14, 11:23 PM |
Re: روحك كالحمامة, بترفرف هنااااااك .. وداعاً محجوب شريف | محمد حيدر المشرف | 04-04-14, 06:13 PM |
Re: روحك كالحمامة, بترفرف هنااااااك .. وداعاً محجوب شريف | خالد العبيد | 04-04-14, 09:43 PM |
Re: روحك كالحمامة, بترفرف هنااااااك .. وداعاً محجوب شريف | محمد حيدر المشرف | 04-04-14, 11:49 PM |
Re: روحك كالحمامة, بترفرف هنااااااك .. وداعاً محجوب شريف | bashir kurdufan | 04-05-14, 00:43 AM |
Re: روحك كالحمامة, بترفرف هنااااااك .. وداعاً محجوب شريف | محمد حيدر المشرف | 04-06-14, 00:01 AM |
Re: روحك كالحمامة, بترفرف هنااااااك .. وداعاً محجوب شريف | محمد حيدر المشرف | 04-06-14, 02:17 AM |
|
|
|