المطرة جات يا ابوي ,, وبيتك مقفول ,, الحوش مترفس لي عينو ,, وينك يا يابا ,, دايرك شديد ,, تلفح شالك وتشيل طوريتك ونحن راقدين في الصالون ولا خصانا ,, من نشوفك شايل طوريتك نجري عليك ,, والمطرة تسوي شوي فوق راسك ,, نقول ليك خش يابا ,, تحلف وتقيف معانا ,, وسع هنا ,, احفر هناك ,, شيل الشلال ده ومراتن تمسك مننا شان كنت تربال زمان ومزارع وينك يابا مشتاق ليك كتير ,, مشتاق ليك ومشتهيك طريتك وماني ناسيك يابا ,, بيتك مضلم ,, ونورو ما كان بنطفي ,,, دارك فاتحة ,, وديوانك لامن مرات ننوم مع النسوان جوة ,, والليلة باب بيتك مسدود شردت من حزني عليك بالكتابة ,, بالكتابة الفوضوية بالتداعي ,, تارني بهرب ليك ومشتهيك شلت نظارتك وسبحتك ,, سبحتك معاي يا بوي ,, اهم حاجة عندك سبحتك جمبك ,, سرقتها يابا ,, سرقتها وانت ما جايب خبر مشتهيك والله ,, وصف لي دربك وبجيك ..
|
|