|
|
 طواقي الخوف...وطواقي أُخر مُزركشات
|
قال القدال :
ما خايف المطر
يتحاشى الضهارى الراجية قولة خيرا
ولا خايف المطر
يمشى على الصحارى تلموا فى بشكيرا
ولا خايف العشم
يتناسى العشامى ونيما ياكل نيرا
ولا خايف النفس
تتذكر نفسها وتنسى يوم حِدّيرا
خوفى على البلد
الطيب جناها وقمنا فى خُديرا
شاحدك يا كريم
لا تحصل خراب لا أرجى يوم ودّيرا
****
وانا ما بجيب سيرة الجنوب
عيال بتسرح للمدارس ..
والفطور نجماً بعيد .
بنوت بتجرى
على الخطاطيب الخطاطيف
البتجرح ..
والعريس نجماً بعيد .
الدكاكين التملا تفضى ،
السماسرة يسمسروا ،
والبسفو الطين ..
يسفو ،
والبحتّوا الراب ..
يحتّو ،
والبناطلين ليها سستم ،
والقوانين ليها سستم ،
البنوك الفيها بستم ،
من سويسرا ولى ماليزيا
بالسفارات
والعمارات
والخبارات
أنا كنت متغطى ..
ومتدفى ،
العمة ملوية ،
والشال على كتفى .
سودان وكان ما كان
سودان على كيفك
السكة ساعة إيد
والأرض مروية
والناس حُنان وظُراف
والرايح يجيك ..
للحول .
وقال لينا بحرقة تحرق الجوف الأصلا" محروق كمان :
والخدمة مظبوطة
مظبوطة مدنية
والدُّنيا حرية
الماشى درب الكار يغور
والتاب من التمباك يتوب ..!
انا مابجيب سيرة الجنوب ،
الغبّو عرفوهو
والعرفو سوّوهو
والسوو بلقوهو ..
**********
أصبحت زى الزول
قادر بوسط السوق
( ..... )
لو العِرق مسروق
أو قلبى نشلوهو
طعم الكضب مسلوق
ماسخ تضوقوهو
لو فمى ما مطلوق
أو كمى غسلوهو
يانى البسوى القوق
قولى البتابوهو
ما عندكم دمى
ما عندهم دمى
من دمى لا لا لا
ما قدروا فصلوهو .
وأنا ما بجيب سيرة الجنوب
قول استقل ..
انا فى صفوف الزوق
واقف مع الواقفين مزنوق بهنِّيهو
ويهنوهو
أو استقال ..
ودا أول الأحزان
أو قالوا باعوهو
ودا ياهو قطِّيع القلوب
انا ما بجيب سيرة الجنوب
فالسيرة كمين ألف عام
لونى المحرق مندكور
وشكلى شكلين
شكل منقة
وشكل تور
دمى المشتت من قبايل نوح وحام
شعرى المقرقد زى حصايا
اتشتت فوق الدروب
كتفى المهدل بالعيوب
وأنا ما بجيب سيرة الجنوب
أصل البقت
من ساس وسايس ويسوس
ياها البقت
خلونا من حرب البسوس
الفاضلة
تكفير الذنوب
الفاضلة لمليم البشاتن
والمعاطن
والخبوب
الباقى
ما يخموكا تانى على
الدفافير والكناتر والحروب
الباقى تعظيم التماسك
فى الخطوب
لا نافع الشِّدة العلوق
ولا نافع المبقوص يحوق
لا بنفعك عَرَق الزنوج
ولا برقعك لبن العروب
إلا الوقوف ألفًا ضكر
واحد براك
فى الشيمة تلفحك الهبوب
الغيمة تديك
للسفاسف
والعواصف
والمطر
برطع مع الأفعال
أدخل على التاريخ
يغلب أجاويدك
من قرقريب عوسك
اخرج من التاريخ
شيخك وعربيدك
لا نافعك التكفير
ولا نافعك التوبيح
فامشيه وحيدك
وامرق على التاريخ
تلقاه فى السهلات
مستنى كمسيدك
لا بيظلم التاريخ
ولا يرحم التاريخ
إياه عوس إيدك
والأرض موقوت القنابل
فى الحدود
والأرض منهبة الثعالب
والطحالب
والجيوش
باليوناميد
واليوناميس
والفُرقة بينات القبايل
والشتايم فى المنصات
والشراكة الفى المكايد
والخناجر فى الحناجر
والمنابر ..
آه من تلك المنابر ،
إنداية كرتلة وبنابر
والجرايد
داقة طارات المدايد
الصَدق فى الناس كذوب
الساسة نِيّام العسل
بين انتباهة
وغفلتين
بين السلاطين والحبوش
والشلاتين
والقرايب
فين حلايب ؟
واللى بنى الأرض كان فى الفرض
سودانى
عينى عليها
اتمزعت
حتة فى قلبى وحتة ف غصتى .. تانى
آدى اسرائيل فى النيل
بكينى ولعبطنى
والنيل أدندانى
إحنا حبايب فى الطيبة والآه ؟
غنيلى ورقصنى ؟
طيب .
بس سمعنى آه الآه فى ودانى ..
|
|
 
|
|
|
|
|
| العنوان |
الكاتب |
Date |
| طواقي الخوف...وطواقي أُخر مُزركشات | أمير محي الدين محمد | 11-18-13, 07:27 PM |
| Re: طواقي الخوف...وطواقي أُخر مُزركشات | أمير محي الدين محمد | 11-18-13, 07:53 PM |
 Re: طواقي الخوف...وطواقي أُخر مُزركشات | محمد البشرى الخضر | 11-18-13, 08:12 PM |
| Re: طواقي الخوف...وطواقي أُخر مُزركشات | أمير محي الدين محمد | 11-18-13, 08:30 PM |
| Re: طواقي الخوف...وطواقي أُخر مُزركشات | محمد إبراهيم علي | 11-18-13, 08:38 PM |
| Re: طواقي الخوف...وطواقي أُخر مُزركشات | أمير محي الدين محمد | 11-18-13, 08:51 PM |
| Re: طواقي الخوف...وطواقي أُخر مُزركشات | أمير محي الدين محمد | 12-29-13, 07:10 AM |
| Re: طواقي الخوف...وطواقي أُخر مُزركشات | أمير محي الدين محمد | 01-02-14, 11:02 AM |
| Re: طواقي الخوف...وطواقي أُخر مُزركشات | د.نجاة محمود | 01-02-14, 11:33 AM |
| Re: طواقي الخوف...وطواقي أُخر مُزركشات | أمير محي الدين محمد | 01-02-14, 12:08 PM |
| Re: طواقي الخوف...وطواقي أُخر مُزركشات | طلحة عبدالله | 01-02-14, 12:12 PM |
| Re: طواقي الخوف...وطواقي أُخر مُزركشات | أمير محي الدين محمد | 01-05-14, 09:06 AM |
| Re: طواقي الخوف...وطواقي أُخر مُزركشات | عبدالعزيز حسين عبدالرحيم | 01-05-14, 09:58 AM |
| Re: طواقي الخوف...وطواقي أُخر مُزركشات | عبدالعزيز حسين عبدالرحيم | 01-06-14, 11:14 AM |
|
| |
فيس بوك
تويتر
انستقرام
يوتيوب
بنتيريست