|
حكايات حقيقية من بلاد الخواجات تدل على نبل اخلاقهم و تحضرهم...
|
حكى لي واحد اخونا قبل شويه حكايتين عن خالو الكان في المانيا في بداية التمنينات...الحكايه الاولى بحكيها ليهو خالو دا ذات نفسو قاليهو كان مسافر من مدينة لمدينة في المانيا واثناء انتظارو للطيارة بعد حجز تذاكرو وكل شي قام جا سوداني ماشي نفس المدينة ولمن مشى للموظفة بتاعة الحجز قالت ليهو مافي حجز....اها مشى قعد جنب خال صاحبنا دا...وفي اثناء جلوسهم جو اتنين ألمان وهم بيسمعو كلامهم مع الموظفه وحجزتليهم في نفس الرحلة القالت للزول دا مافيها حجز... صاحبنا دا كان زول عاتي طول وعرض مشى اعترض وعمل جوطه وقاليها عشان انا سوداني يعني تقولي لي مافي...قامت الموظفة بكل برود وبابتسامة قالت ليهو الرحلة اصلا خلاص قفلت وكان فيها اخر مقعدين -زيادة على العدد الطبيعي - وانت من جيت وقفت قدامي قبيل جاني طولك ووزنك في الشاشه العندي وانت بحجمك دا غير مسموح ليك بالركوب في الرحلة لانها اصلا overweight ____________
الحكاية التانية حكاها ليهو خالو دا زاتو وحصلتليهو في سيوبرماركت كبير في المانيا...عايز يشتري دجاج مبرد (الحقيقة انو كان ديك رومي والموسم كان موسم اعياد شم النسيم) وكان في صفين واحد طويل وواحد قصير...وهو كان مستغرب ليه الصفين ديل وكان فاكر انو النوع بتاع الدجاج مختلف...لغاية وصل وسأل الموظف قاليهو الفرق شنو بين الصفين ديل؟ الموظف قاليهو الفرق في السعر وذلك بناءا على دخل الفرد...الصف الطويل الدجاجة كانت ب15 مارك وديل الناس الدخلهم الشهري اكتر من الف مارك ...والصف القصير الدجاجة ب10 مارك مع انها نفس الدجاجة بتاعة الصف التاني...لكن دي للناس الدخلهم اقل من الف مارك في الشهر....والغريبة انو ما بيسالوك عن اثبات دخلك ولا عن اي ورق ...الموضوع بيعتمد على ضميرك فقط...ورغم كدا السعر الاعلى كان هو الصف المزدحم.
|
|
|
|
|
|