|
|
 قطع الأنترنت مرة في الشهر
|
عمك مقهي في الفيسبوك لغاية ما فيسه بقي زي الشاشة ويضحك مع الفيديوهات والصور فجأتن جات شافعة جارية .. اتعترت في عمك قام شالها وحدق فيها سائلاً:
يا بت انت بت منو؟
البت: انا ما بتك يا بوي
الابو: ما شاء الله كبرتي
المرة فتحت الماسورة في الغسالة وختت الحلة في النار سمعت التلفون يرن رنة واتساب تيتيتيريتي تيتي المعني جاتها محادثة .. صاحبتها رسلت ليها فيديو مضحك وهاك يا ضحك وقهقهة .. قامت ردت عليها بصورة من صور الواتساب العجيبة ديك .. واندمجت صاحبتنا في الواتس وغطست لاضنينها في مجموعة القرقراب وفجأة شمت ريحة شياط الحلة والموية الملت الحوش انقروا الضحك ما شرطها!!!
أما الشافع الما قام من الواطة فهو يمتلك مهارات مذهلة في التعامل مع الجلاكسي 4 ومن لعبة للعبة للعبة .. ولمن يزهج يقوم يصور البيت والشارع .. ويغير النغمة ويحذف الفيديو الما عاجبه .. حكم!!
أما اخونا الذي اندمج مع البلاك بيري اندماج الترلة مع القندران وهو ماشي مكبس مع البلاك في مراسلة مع البريدها قلبه فجأتن طقش ليك عمود النور ابو من غير لمبة وتكومت فوق أم رأسه ورمة 8 قيقا!!
زولنا سايق البرادو فكر يرسل تغريده يبدي فيها رأيه عن خطاب البشير بخصوص التمكين وبدلاً من ان يرسلها لحسابه بتويتر ارسلها للركشة القدامه داقشاً فرد عليها سايق الركشة بتغريده من قاموس السباب أياه.
شوفوا جنس الملاقاة دي.. اسمعي يا هناية بعدين لاقيني في الاسكاي لو ما اشتغل معاك خشي معاي بالفايبر وكلمي تهاني تراسلني في الجات أون .. يللا باي!
زمان كانت حملتك خطابي يا ساعي البريد هسي بقت مسج واي فاي .. حركة لمن غني انت رجع لي رسايلي والصور العندي شيلها شيلها كان مستصعب الحكاية وقتها الآن الموضوع ده بقه مرفقات في الواتس كان رسايل كان صور!
ترباس برسايل زمان غني .. رسلت ليك اجمل خطاب لليلة ردك ما وصل زعلانة ولا شنو الحصل هسي رسالة ترباس دي مع الواي فاي والبرودباند تحولت الي : رسلت اليك احلي مسج لي ساعة ردك ما وصل زعلانة ولا السيرفر فصل!
والكاشف لمن غني حبيبي اكتب لي وانا بكتب ليك بالحاصل بي والحاصل بيك زمن المهلة والورق البنفسجي المعطر والظرف مرسل الي والراسل فلان ويقعد يستني الرد ايام وليالي بالشوق كله .. اصبح الموضوع ده الآن وكتياً في لحظته تنقصه حرارة الأشواق كي بورد وسماعه وكاميرا وب وهاك يا جات!
حياتنا اصبحت افتراضية E-Live .. بدل اللمّة في الحوش قروبات في النت .. بدل الناس تطلع مداعي مسجات عبر الموبايل .. وحجبوه عن عيني الا عن قلبي ما قدروا حجبوه .. الموضوع ده عبر الاسكاي والواي فاي اصبح ساهل ولكنه برضه افتراضي . رايكم شنو انه النت يقطع مرة في الشهر عشان الناس ترجع تاني تعيش حياة حميمية فيها تواصل حقيقي مش تواصل ساي مع الواي فاي .. رأيكم شنو؟
|
|
 
|
|
|
|
|
| |
عمر الفاروق عبد الله الشيخ
فيس بوك
تويتر
انستقرام
يوتيوب
بنتيريست