|
وإن طال السفر
|
وان طااااال السفر / محمد عبد الماجد
كلمات إسماعيل حسن..لحن محمد وردي..أداء جمعة جينارو الاثنين 24 مارس 2014
< الزول وقت يطول من الكتابة بشوف حرف (اللام) زي قفة الطماطم. < رغم ان (الروس) عندهم نظرية راسخة وثابتة منذ قديم الزمان انو ما في أي علاقة بين (اللام) وقفة الطماطم.
< يلا الجماعة ديل يكونوا جابوا ليهم (فهم) براهم.
< بعملوها.
< طيب عندكم الاحساس دا.
< انتوا مرات ما بتشعروا انو حرف (الجيم) دا زي صفيحة الجبنة.
< الزول وقت يكون جيعان ..بشوف ليك شاحن الموبايل ..فرخة محمرة ..فرخة محمرة.
< وبشوف ليك (اللمبة) كيلو باسطة ..كيلو باسطة.
< الاحساس دا انتوا ما بحوم عليكم.
< مرة في (قندران) دخل ليه في (برينسة).
< تتخيلوا نحن سبعة يوم ..نتغالط في (البرينسة) دي ...ناس يقولوا دي (علبة هندسة)...وناس تانى بقولوا دي (صفيحة) وقعت من برج حمام.
< انت (الصفايح) المساكها لينا الايامات دي شنو؟.
< هسع تلقاكم قلتوا الزول دا واقف ليه عشرة يوم من الكتابة عشان يجي يتكلم لينا عن (القندران).
< اعمل ليكم شنو؟.
< انتوا قايلين الكلام عن (القندران) كعب.
< والله لو اتمعنتوا (القندران) دا ..تلقوا فيه (قصص) كتيرة خلاص.
< الروس ذاتهم ..ما تستهتروا بيهم.
< الروس ذاتهم ما ساهلين.
< وانا وقت الهلال يطلع بي نتيجة (جيدة)..بجيب ليكم (الروس) ديل زي الطوب الآلي.
< عاوزين ..تغالطوا ..وتقعدوا تنظروا لي .. اكلمكم عن (الطوب الآلي) دا لمن الواطة تمغرب.
< طوبة ..طوبة.
< هسع تلقاكم قلتوا الزول دا واقف من الكتابة عشرة ايام ..عشان يكلمنا عن (الطوب الآلي).
< كمان (الطوب الآلي) عاوز ليه عمود صحفي.
< اعمل ليكم شنو؟.
< فتحت المروحة.
< اشغلها في اربعة.
< اجي القاها رجعت لي اتنين.
< تاني افتحها في اربعة.
< ترجع تاني لي (اتنين).
< اربعة.
< اتنين.
< اربعة.
< اتنين.
< قلت دا شنو دا؟.
< معقول (تعادل) الهلال عمل كدا في (المروحة) الحاقدة دي.
< نحن (الحقد) في المراوح بنعرفو.
< قعدت (افكر).
< ما افكر كمان؟.
< لقيت ليك في زيادة حصلت في (الكهربة)..عشان كدا اربعة بقت تساوي (اتنين) عند ناس الكهربة.
< ديل بعملوها.
< زي واحد كدا ...مسافر.
< مسافر زي اي زول.
< السفر دا كمان فيه حاجة...(تقالعو في عيونكم زي علب الحلاوة).
< مشى مطار الخرطوم ..قالوا ليه تدفع رسوم المغادرة (35) جنيه.
< قال ليهم ..ادفع رسوم مغادرة (35) جنيه ليه؟..انا اصلي ماشي (هولندا).
< زولكم بي صراحة كدا ..عقدتو كانت (هولندا).
< قالوا ليه ..لو ماشي (الصالة التانية) تدفع (35) جنيه.
< لو (مغادر) غرفتكم في بيتكم ..تدفع رسوم مغادرة.
< قلت ليه يا ابو الشباب ما تستغرب ..ديل لو ماشي (الحمام) بقطعوك (تذكرة)..عاوز تسافر عديل كدا ..وما يدفعوك (رسوم).
< ليه؟.
< هي سايبة.
< غايتو وقت الهلال يتعادل...الكلام بتلخبط علينا جنس لخبطة.
< بشوف ليك (الواو) ..زي لوري الحطب.
< ما عارف ليه؟.
< يمكن سوستة (الفرحة) عندي حلجت ..عشان كدا اول (تعادل) ايجابي للهلال بدفق فيه فرح كدا.
< بتلخبط.
< اكون عاوز افتح روتانا سينما ..افتح ليك التلفزيون القومي.
< اقعد اتابع في (النشرة).
< النشرة حقتنا (المسيخة) دي...واتخيل ليكم النشرة ...(فيلم عربي).
< اقعد اضحك ..لمن تستغربوا.
< بتلخبط.
< بفتح الدولاب ..بتخيل نفسي فتحت الباب الكبير ..وعاوز ادخل (العربية) كمان.
< بتحصل.
< الفرحة دي حلجت شعورنا.
< اكون عاوز اركب الموبايل في الشاحن ..بلقى نفسى بدون ما اشعر نزلت الحلة من النار.
< ممكن.
< جابوا لي قالب حلو.
< قالب بتاع (كستر).
< الكستر العادي دا.
< ساعة ونص بضرب في (فتة فول)..مفتكرها قالب حلو.
< الباب ضرب.
< بدل ما افتح الباب ..فتحت الموبايل.
< عاوز ادخل (البطيخة) في التلاجة.
< دخلت (السرير).
< دي شنو (اللخبطة) دي؟.
< تعادل الهلال خلانا (نتبسط) شديد.
< ندفق للشارع التاني.
< البوش بقينا نستطعموا ليكم قالب حلو.
< عاد ما بالغت.
< لو الموضوع بي ايدي ..اقول ليكم كلام اخطر من كدا.
< افتحوا (قوس).
< اقفلوا (القوس) فاضي.
< ما عاوز اقول أي شيء.
< وإلّا اقول؟.
< خلوه فاضي كدا (.....).
< بشه دا ..مفروض طوالي يمشي (عقد الجلاد).
< يمشي طوالي لي ناس طارق جويلي وشمت وشريف شرحبيل.
< يبقى عضو في الفرقة.
< يبقى واحد فيها زي انور عبدالرحمن وحمزة وسليمان والخير.
< الزول دا يا طارق جويلي خلوه يغني معاكم ..والله قاعد (يطربنا) جنس طرب.
< شقق جروفنا من الطرب.
< نزار الصاقعة ..طوالي يمشي اوركسترا الاذاعة ..يمسك ليه على الاقل كدا (كمان).
< الشيء البعمل فيه نزار الصاقعة دا ..ما شيتن بتاع نصاح.
< بعدين اوركسترا الاذاعة ذاتها محتاجة لي دعم بعد علي ميرغني وعلاء الدين حمزة.
< الفراغات دي ما بسدها إلّا نزار حامد.
< الشيء العاوز اسأل منو من قبل عشرة يوم ..وما لاقي لي طريقة.
< انتوا (ضربة الجزاء) بتعمل عشراقة.
< بتعمل (ابوالشهيق).
< اقصد لو الزول صد ليه ضربة جزاء ...بتعمل ليها (عشراقة).
< في واحد جنبنا من تجيب ليه سيرة ( ضربة الجزاء) يقعد يتعشرق فينا.
< ونحن ما بنكضب بنلحقو ليك بالموية.
< وهو يتعشرق.
< اخر حاجة اكتشفنا ليكم الزول ..طلع (مريخابي).
< اتاريهو موضوع ضربات الجزاء دا عامل ليه (عقدة).
< جايب ليه (حمضيات) في الرقبة.
< عامل ليه (تقرحات) في الكبد.
< جمعة جينارو ما شاء الله تقول قاري كلية علوم صد ضربات الجزاء.
< معقولة يا جمعة.
< دا شغل (جامعة)...دا لا شغل (النابي) ولا حاجة.
< ناس المريخ ديل جابوا ليهم حارس عمرو (44) سنة ..ما خلى ليه بطولة دولية في مصر ما شالها مع المنتخب.
< فاز بجائزة افضل حارس في افريقيا تلات مرات.
< كبوا ليه قروش الجن.
< تتخيلوا برضوا ما كان بقدر يعمل البعمل فيه جمعة جينارو دا.
< حكمة الله.
< وسبحان الله.
< امام ليوبار الموسم قبل الماضي ..اهدى عصام الحضري الفريق الكنغولي هدف (هدية).
< ليوبار سجل الموسم الماضي في اخر دقائق المباراة هدفاً بعد سقوط الكورة من يد عصام الحضري.
< هسع جمعة جينارو جاء اخد لينا (تارنا).
< اخد ليكم تاركم يا ناس المريخ.
< جمعة جينارو دا في الدقيقة (90) اتمكن من صد ضربة جزاء لصالح فريق ليوبار.
< عليكم الله لو الحضري رجعوه عشرين سنة لي ورا ..بقدر يعملها.
< جمعة عملها.
< اها متل الحاجات دي عليكم الله ما بتعمل (نفسيات).
< غايتو انا لو كنت مريخابي ..كان جاتني (نفسيات) عديل كدا ..من البعملوا فيه ناس الهلال دا.
< كنت خليت البلد.
< كنت طلعت منها.
< تلقاكم قلتوا الزول دا غايب من الكتابة عشرة ايام عشان يكتب لينا عن ضربات الجزاء.
< اعمل ليكم شنو عاد؟.
< جمعة يصد في ضربات الجزاء زي (التسالي).
< تقول بيأكل ليه في (قنقر).
< زي اللبن لمن يفور..يا ترفع (غطاية) الحلة ..يا تنزل الحلة من النار.
< اها جمعة طبق النظريتين...رفع الغطاية ونزل الحلة.
< تلقاكم هسع قلتوا الزول دا واقف من الكتابة عشرة يوم ..عشان يتكلم لينا عن غطاء حلة اللبن.
< يا جماعة غطاء حلة اللبن ما تابوه.
< الكلام دا ما كعب.
< جمعة ضربات الجزاء عندو زي اغنية محمد وردي (لو بهمسة).
< مية مرة يقولوا ليكم الكلام دا.
< لو بهمسة ...كلمات الشاعر الراحل اسماعيل حسن ..والحان الفنان الراحل محمد وردي ...واداء جمعة جينارو.
< معليش ..دا الحصل.
< الزول دا بقى في كل مباراة يصد ليه ضربة جزاء..لمن نحن ذاتو (فترنا).
< غطاس.
< تلاتة تسعات.
< دا ما حارس ..دا كونسلتو حرّاس.
< زي واحد كدا شالوه للدكتور.
< الدكتور قال ليه بتشعر بي شنو؟.
< صاحبكم قال للدكتور ..يا دكتور والله ما بشعر بي حاجة ...لكن دائماً عندي احساس (الشعبة) حقت السقف دي ح تقع في رأسي.
< الدكتور عرفو..قال ليه (الشعبة) بس.
< زولكم قال ليه الشعبة ...وجمعة جينارو.
< الشغل دا شغل (علم) عديل كدا.
< انتوا ما بتفهموا لينا بالساهل يا مريخاب.
< تفهموا لينا كيف؟..وانتوا بتطلعوا من دور الـ (64).
< ديل ناس (تمهيدي) ساكت.
< تمهيدي صر.
< تمهيدي جت.
< قاعدين في (الصقيعة).
< ضاربهم الهوا.
< اها عشان نكون واضحين معاكم يا ناس المريخ.
< الهلال دا لمن يدخل المجموعات ان شاء الله (اطباقكم) دي ما بتجيبوا ليكم.
< يعني حكاية خالد الاعيسر ..البقول ليكم فيها حولوا الطبق 26 درجة نحو الشرق ..مع الهلال في (المجموعات) ما بتقسم.
< طبقكم دا بعد (التحويل)...ممكن يجيب ليكم النسور المريخ.
< المريخ واهلي شندي.
< الامل عطبرة والنيل الحصاحيصا.
< مريخ الفاشر واهلي الخرطوم.
< دي الحاجات البقدر عليها (طبقكم) المحدود دا.
< لو عاوزين تشوفوا الهلال إلا تشتركوا في قناة بن سبورت الرياضية.
< الهلال تشوفو مع البرسا والريال واليوفي وتشيلسي.
< طبقكم دا ..والله (رديف) الهلال ما بجيبو ليكم.
< لو بالغ كدا ..طبقكم بتاع (النيلين) دا ممكن يجيب ليكم اللجنة الشعبية بتاعة الكلاكلة.
< اكتر من كدا ..ولا تعشموا.
< ولا تغشوا نفسكم.
< تلقاكم هسع قلتوا الزول دا غايب من الكتابة عشرة يوم ..عشان يتكلم لينا عن (الطبق).
< اعمل ليكم شنو؟.
< كلام الطبق ما كعب يا جماعة.
< تاني الهلال بي اطباقكم الكحيانة دي لا يمكن الوصول اليه.
< هذا المشترك بيلعب في مرحلة المجموعات.
< الموضوع دا صعب عليكم.
< تشتركوا في بن سبورت..وتقعدوا ساي..ما تلخبطوا البيت.
< نحن خلاص اتشفرنا.
< الطريف في الامر ..امس قالوا لي مباراة الهلال منقولة اذاعياً برعاية (الخندقاوي).
< قلت يا جماعة الزول (المدفق) لينا في وسائط الاعلام دا ..عمل ليه (طبق) براهو زي خالد الاعيسر.
< كيف يعني المباراة بي رعاية الخندقاوي؟.
< دي مباراة ولاّ ملاريا.
< قدر ما حاولت افهمها ..ما وقعت لي.
< اخر حاجة قلت المباراة بي رعاية الخندقاوي ..الفاول معاه (جلاكسي) يعني.
< اشرحها ليكم.
< الكورنر معاها (بطارية) موبايل.
< الجدعة معاها (شاحن).
< يا جماعة الزول دا مالو (مشرور) كدا.
< اذاعة يفترض ان تكون (قومية)..وهي بتمثل السودان ..معقولة تقبل بأن تنقل مباراة للهلال (سيد البلد) برعاية الخندقاوي.
< كان احسن ما تنقلوها.
< ان شاء الله نسمع بي نتيجة المباراة تالت يوم.
< انتوا عارفين المباراة دي لو كانت منقولة بدون رعاية، الهلال كان غلب فيها.
< كنا غلبنا عديل كدا.
< اوضحها ليكم.
< عشان ما تقعدوا تتعقدوا لينا ساكت.
< يا مريخاب ..المجموعات دي زي الجامعة.
< الموضوع دا كبير ..اوي ..اوي ..اوي.
< عشان تبقوا فاهمين.
< (يا احمد الحاج والله الكلام طار من رأسي ...خلاص عاوز امشي على مباراة الريال وبرشلونة).
< بقيت ما مركز.
< تلقاكم قلتوا الزول دا واقف من الكتابة عشرة ايام عشان يتكلم لينا عن مباراة الريال وبرشلونة.
< يا مريخاب ..يقولوا ليكم الكلام مية مرة.
< يعيدوا ليكم الحكاية ألف مرة.
< مع ذلك ..ما بتقع ليكم.
< المجموعات دي ..زي الزول البقرأ طب.
< يعني الموضوع ما ساهل.
< نحن تاني ما في حاجة بتلمنا معاكم.
< انتوا من طريق ونحن من طريق.
< الناس البطلعوا من دور الـ (64) ...ديل (دبلومة) ما يعشموا فيها.
< غايتو يا هيثم مصطفى اتمقلبت جنس مقلب مع الجماعة ديل.
< طلعوا بيك من التمهيدي ..خربوا ليك سمعتك ..بعد كدا لو قلت انك كنت بتلعب في الهلال ما في زول بصدقك.
< 17 سنة يا هيثم ..حصل طلعت من (التمهيدي).
< تطلع من التمهيدي ..وتلعبوا مع النسور.
< المريخ يكمل جاهزيته لمواجهة النسور.
< مالو ما فيها حاجة.
< تراوري يسجل في شباك الاهلي شندي.
< اجدع زول.
< بلة جابر يحجز موقعه في تشكيلة المريخ للنسور.
< يا شماتة بايرن ميونخ فيكم.
< بايرن ميونخ لو عارفكم ح تلعبوا معاه عشان تلعبوا مع (النسور) كان جاتو (نفسيات).
< امير كمال يغيب عن مباراة النسور.
< شفتوا (الطموح).
< باسيرو يغيب عن استعدادات المريخ للنسور.
< يا جماعة ..الناس على بعد خطوات من المجموعات ..وانتوا قاعدين لي هنا.
< جمال الوالي زعلان ..وعصام الحاج يفتح النار.
< انت يا عصام الحاج لو زعلان شديد كدا ..امشي الموردة.
< فش زعلك دا في الدرجة الاولى وتعال طالع الموسم القادم.
< زولكم عاوز ينشق من الزعل.
< واكيد الهلال لمن يصل لمرحلة المجموعات بإذن الله وتوفيقه ..عصام الحاج دا ..(النيل) شندي ما بمسكو ليكم.
< خلاص الفيه بتكون اتعرفت.
< اتصفت.
< هسع تلقاكم قلتوا الزول دا غايب من الكتابة عشرة ايام عشان يتكلم لينا عن عصام الحاج.
< انتوا قايلين الكلام عن عصام الحاج كعب.
< زي واحد كدا كسلان كسل شديد.
< زولكم دا هجم عليه (اسد).
< الحلة كلها بتكورك ليه..يا زول قوم ..يا زول قوم ..يا زول قوم ...(الاسد) ماشي عليك.
< وزولكم راقد.
< يا زول قوم.
< وزولكم راقد.
< الاسد ...الاسد.
< صاحبكم رفع رأسو شوية كدا من الواطة والاسد على بعد خطوات منو..ورجع رقد تاني ..وقال ليهم الاسد دا لمن يصلني يحلها ألف حلال.
< ملحوظة : انتوا اقعدوا قولوا لي كدا ..يحلها ألف حلال ، لمن الاسد يهجم عليكم.
هوامش
< شكرًا لكل الذين افتقدتهم في هذه المساحة ..وكان سؤالهم الدائم عني.
< شكرًا لكل الذين ذهبوا ابعد من ذلك سؤالاً ..وبحثاً.
< لكم كل الود ..وارجو ان اكون على قدر هذا الاهتمام والسؤال.
< دائماً بيني وبينكم الكثير من الود والحب والاحترام والقضية.
< وجدت منهم ...اكثر مما كنت اتوقع أو اتخيل.
< حقيقة عاجز عن شكرهم.
< جمعة جينارو اذا كان في كل مباراة بصد ليه (ضربة جزاء) ..المباراة القادمة عاوزين عمر بخيت باعتباره قائدًا للهلال يعمل ضربة جزاء ضد الهلال.
< بقينا ولا بنخاف.
< ولا عندنا مشكلة.
< في حارس مرمى في الدنيا بصد ليه (ضربة جزاء) في الدقيقة (45) من الشوط التاني.
< ما طالبني حليفة ..لكن لو كان مرمى الهلال بتقيف فيه (فرقة عقد الجلاد) كلها ..ما كانت بتقدر تصد ضربة الجزاء تلك.
< مباراة الاهلي شندي والمريخ ...فاتني التعليق عليها.
< قالوا ليك ابراهومة ...دخل الملعب اكتر من (النقالة).
< بعدين اتوفيستر دا ما تسوقوه معاكم الولايات ..وقت بنوم.
< الظاهر صاحبكم بقى ينوم من سبعة.
< قالوا ليك المريخ وقت كان عاوز يستبدل احمد الباشا ..رشوا ليك اتوفيستر بالموية عشان يصحى.
< اتوفيستر افتكر صحوه عشان (العشا)...لقاهم صحوه عشان الاستبدال.
< امير كمال طردوه من الشوط الاول ..واتوفيستر بين الشوطين نازل ليك (نصائح) وارشادات في امير كمال ..تطلع مع الهجمة ...وتنزل معاها.
< طبعاً ساعة الطردة زولكم كان شايلاه (نومة).
< وقت الاهلي شندي جاب ليه قون ...اتوفيستر استيقظ ..قال ليهم الحاصل شنو؟.
< قالوا ليه الاهلي شندي اتعادل مع المريخ.
< قال ليهم مريخ الفاشر؟.
< زولكم نايم ...ما جايب خبر.
< تاني يوم اتوفيستر سمع بالنتيجة في الجرايد.
< قال ليهم : انتوا ناس الجرايد ديل بكتبوا ساكت...(الكلام دا حصل وين؟).
< اتوفيستر ما براهو.
< رمضان عجب برضو كان نايم في المباراة.
< انتوا (النوم) الحايم عليكم الايامات دي شنو؟.
< ....
< عاجل : شكلكم كدا ..المريخ ح ينتظر (النابي) عشر سنوات عشان يجيبوه مدير فني للمريخ.
|
|
|
|
|
|