ماشي وين آ زول أقيف! (في مُقام التِيجّانِي الطيّب بَابِكِّر)
يا رفاقا... الضُراع شِدُوهو، سِّدُوا الفرقة، رقراقاً بجيب الريحْ.... و يا رفيقات........ قُشِّنْ الدّمع البِسيل وشّالُو و الحُزْن النويحْ ) أبو عزة) *ما مات كضّبْ الرادِي المُخاتِل و اتوهمّ (الصايِحَ)* البِصيِّحْ. ) أبو عزة (ما خِدّ ليه غفْوة و إنجمامة لطام دروع ام هول أبوي خاتي الملامة أبوك آ )عزة( شقاهن دروب الريح و ما اتراجف مسك درب السلامة أحمر عينو و أبيض سنو متلفح هموم الناس و متعمم شهامة خلالنا ميراث من مودة و من بسالة و إستقامة و سيرة بين الناس ترفرف زي حمامة و (هسع عِيتي) يجينا طيفو الراسي بي سمْتُو المُريحْ و بإنضباطُو و إحتياطُو يفتح المحضر و يخطط و ينّطِقْ القلم الفصيحْ و يضوِي للناس المسالك العتّمةْ نورالعِرّفة، جدلّ الثورة و الفهم الصحيحْ.
ماشي وين آ زول أقيفْ! ماشي وين؟ و السكة قدامنا بتراري و داك مُشْرَع الحِلم اليَسّاري و مرفأ الأمل الفسيح ماشي وين آ زول أقيفْ! ما لسه بدري على غيابكْ و لسه ما أبت الكُتال في الحق حُرابكْ و لسه مليان بالمعاني الحُرة و الثورات جُرابكْ يا جندي في الصف البقاوِمّْ يا نُصّرة الحق الصريحْ و شعبك الأقسمتا بيهو و وهبتا عمرك كله ليهو عرقو جوا الأرض ثابت زيو زي النخلة ما بتهِزُو ريحْ.
يا (زميل) قوماكا نهتِفّْ و في الصفوف أبقالنا مارق و فوقنا راياتنا بترفَرِفّْ (يلا يا اولاد المشارِق و يا بنات من صُنعِ باكِرّْ أسنِدُو الممكُونْ و صابِر وطيبو الوطن الجريح)
يا رفاقا لو يغيب عن مركز الحِزب (عمّنا) (التيجاني) الكان ضرِاهُو بلِمّنا بالقناديل التشِّع من جبهتُّو و العصافير التّرِكْ في ضحكتُّو و الصّرامة الحانية تِتْخلل حديثُو و نظرتُو و الوصّية الكلمة زيّ النّجمة تلمعْ (خلُو همّ الشعب أولّ ...... خلُو همّ الشعب أولّ.... و يبقى (نادُوس) همّنا).
(يا عمِ طه)* يازميل، (الكِليتُّون)* رغمّ أنف الأمْنِ حالو مُؤمّنةْ عَشَرة باقين عليهو، ودِيعة (المحْجُوب)* عقِيدنا و من (شفِيع)* الطبقة غرسُوا و قِطّعة من (جُوزيّف)* مَهقّد بي وِداعة (عازّه) أمُّو ..... و أُمّنا خَتْوهُو فى عِبّك أمانةْ و نُشّهِدْ الدنيا الوسِيعّةْ... إنك أوفيت للودِيعّةْ..... و بي عرقنا، و خِصّلة العمل المُثابِّر، في المزارع و المصانع و المنابِرّْ مهرُو رُوحنا و دمّنا.
يّلأ إرتاح يا (كبيرنا) و تهجّع النفس الكبيرةْ مع (الرفاقا) الشُهدا يا حادي المسيرةْ و بنقولا ليك بمعزّة بالنبرة الجهِيرةْ نوُمْ قرير العين و مُرْتاح السّريرةْ يا صميم القلبِ نفاذ البصِيرةْ الدرُوبْ للثورة بالثوار مصيرا تلِمّنا و مابنفرّط في نضالاتنا العسيرة... و ما بنبضِعّ في الملايين الفقيرة يا أبُونا و يا رفِيقنا و يا صّديقنا و عَمّنا.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
راشد سيد أحمد الشيخ
فيس بوك
تويتر
انستقرام
يوتيوب
بنتيريست