بدالدين الأمير.. والله يا ود الأمير الكلام الكتبتو إنت بِفوق ده أجمل كلام قريتو مِن مُدة.. كلام مُتناسِق.. شفيف.. حِلو ساااي كَدي.. ووصلني تاااب.. وصل قلبي تمامًا.. بِالله إنت لو بتعرِف تكتُب جِنِس ده ليه حارمنا منو.. النور عُثمان أبَكر كانت بتجي سيرتو في ونستي مع زُهاء الطاهِر.. بس النور عُثمان أبكر والطَيِب صالِح كان نصيبي -وهو نصيب كبير- أجيب ليهُم صينية الشاي في ديوان حسن فرح.. زُهاء الطاهِر لأنو قِمة كان بتكلم عن النور والطَيِب صالِح كأنو كان أمبارِح بيلعب معاهُم كونكان.. كان غالِب وقتي البقضيهو في صَوْمعة زُهاء الطاهر التي في الوكرة، كُنت مُسْتمِع، إن تحدثت، أتحدث بِترهات، أتحدث فقط لأُلفِت إنتِباءه إلى وجودي معه.. ما قُلت ليك زول درويش..
مره سألتو: [آخر مره أكلت بِتين؟]. قال لي: [ما بتذكر!.. ليه؟] قُلت ليهو: [إنت البتسَوق ليك منو.. أكلك البِجيبو ليك منو]. قال لي: [ما بتذكر أتسوق.. الأكِل بِيجي.. بِيجي ياخ.. ما عارِف منو البِجيبو.. أها ده أكِل قِدامك الجابو منو هسِع.. أُكُل.. عليك الله أُكُل] ولاحِظ الأكِل البِقول عليهو ده أنا داخِل بيهو بيتو وهو بِكون إتناولو مني قبل ربع ساعة بس.. درويش.. زول الله وفي الله ولـ الله. ههههه سألتو مره عن أبوي -كانت مُجازفة مني ساي يعلم الله-قال لي: [مُش أب نظارات القِصَير أب شنب داك]. طبعًا ما رديت عليهو بِنعم أو لا.. خُفْت يِقول شيتًا ماااا ياهو، لأنو بِقول أي حاجة ولا يأبه لِشئ أو لأحد.. درويش..
بِالله يا ود الأمير إسْتكْتِب الناس السمحين الذكرتهُم.. أنا والقُراء حنعتبِرو وعد مِنك وإن كان إتْ زاتك درويش
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عزام حسن فرح
فيس بوك
تويتر
انستقرام
يوتيوب
بنتيريست