|
Re: الاصلاح والشعبي ضد الوطني (Re: khaleel)
|
التفلُتات البتحصل في كيان الإنقاذ والمؤتمر الوطني مِن وقت لآخر (الإصلاحِيين/السائحون/المُذكِرات التحذيرِية/المُحاولة الإنْقِلابِية الأخير -قوش/ود إبراهيم-)، دي زي ما الواحِد فينا يتزاعل مع أخوهو في البيت، بيت واحِد وأخوان أخوان، يعني مثلاً د. غازي صلاح الدين العتباني، صنفوه ناسو (الإنقاذ/المؤتمر الوطني/المُنْتفِعين) كمُصْلِح أو إصْلاحي، ده تصنيف في نِطاق دائِرة الإنقاذ والمؤتمر الوطني.. تصنيف مِن قِبل مَن قَوضوا الديمُقْراطِية بلَيْل ومَن مارس أعمال القتل والسرقة والنهب والتعذيب والرفد لِصالح مُنْتسبيهم. التصنيفات دي زي ما جماعة يِسْرِقو ليهُم بنك، ويِقومو يتشاكلو في الأنْصِبه أو إعْتِراض البعض السراريق على طريقة إسْتثمارو، ولو حصل ضرب بيناتُم، المهزوم ما حقو نصفِق ليهو ونعتبِرو بطل ومُناضِل وكان دمث الأخلاق ودايمًا مُبْتسِم وطوااالي بيجي ياكُل معنا بوش، لأننا أثناء التصفيق حننسى إنو الزول البنصفِق ليهو ده مِن ضمن شِله الحرامِية (السراريق)، وتصفيقنا ده بوري برضو مدى حماقتنا (الحماقة = وضع الشئ في غَير مَوْضعه مع العلم بقبحه) أو نِفاقنا وبِالضرورة سذاجة عقولِنا، وبجاوِب بطريقة عملِية -أي تصفيقنا- على سؤال الطَيِب صالِح [مِن أين أتى هؤلاء]! مِنا يا سيدي.. أتوا مِنا نحنا ديل ما مِن غيرنا!
ما بِهِم كتير تصنيفات الكيزان البمنحوها لِبعضهم البعض، ده مُفكِر.. ده مُصْلِح.. ده إصْلاحي.. ده نظيف اليد.. ده عفيف.. هذا شئ فيما بينهُم غير مُلْزِم البتة لعم عبدالرحيم وأولادو، وما بشفع لأي قاتِل/سارِق/مُعذِب/هاتِك/ساكِت عن الحق لمنفعة شخصِية.
التملْمُل الداخلي مؤشِر كُوَيِس على بِداية " نزع المُلْك " وده ما بنفع معاي البتة.. لييييه يا عزام فرح ما بنفع معاك؟ أقول ليك.. شوف يا سيدي.. الإنقاذ دي.. الشيييينه دي.. الحرامِية.. البتقتُل فينا الصباح الصباح.. المُهمِشانا مِن 24 سنة مِما نعِد، الإنقاذ دي لو سقطت، بتسْتلِما عنصُرِية وجهوِية "الجبهة الثورِية لِتحرير السودان" ناس مالِك عقار وعبدالعزيز الحلو ومني أركو مناوي، وديل ماااا بنفعو معاي تااااب أنا أخوك، علشان كَدي أنا "تكْتيكِيًا" كَدي مع الإنقاذ وسير سير يا البشير.. سير سير يا البشير.. مُش برضو مَوقِف.. طبعًا إنتو ديمُقُرطِيين وتتقبلوا الرأي الآخر وكِده (وأمْسك بطنه وأخذ يتدردق مِن الضِحِك)
|
|
|
|
|
|
|
|
|