قالوا تشكلية فريق درجة تانية وكمان فيها أستعجال و فيها قمربوز كتار والهداف الوحيد فيها غندور الباقي كلهم كسار ساي والاسباب هي كدا النايب الاول تاجر عربات مستعمله من أيام المظلات هويه كدا وأستمرت لحدي ما بقت تجارة والان ناس سوق العربات ضبحوا لان خلاس ح يفتح أستيراد العربات المستعمله وخاصة الكوري حسبو النايب التاني دا قالوا شالوا في سنة الفين وعشرة ماكل زي عشرة مليار كدا بالجديدة قروش أغاثة وعون أنساني وسفر بيها أحد أقرب الاقرباء للعلاج بالقروش دي !!!! وكمان وزير المالية دا عندو قضايا كانت منظورة في المحاكم من مستثمرين المشكلة تحويل أرباح الناس ديل بالعمله الصعبة وطلب منهم عمولة وذكر أسمو في قضايا كتيرة أخرها قضية الاسواق الحرة والشركة الجديدة وموضوع كسر الامتياز وتغيير القانون وزير الصناعة كان في الصمغ العربي برضو عندو فساد بس محدود سفر ساي ما أكتر من كدا والمهندس صلاح الدين ونسي محمد خير - دا اكن في الخارجية وزير دولة بس زول عادي ما عندو مهارات حسب كلام ناس الخارجية / المهندس عبد الواحد يوسف إبراهيم - بتاع وزارة الداخلية أمنجي عديل كدا والطيب حسن بدوي دا بس صاحب أولاد العيلة الحاكمة و المهندس مكاوي محمد عوض معروف جدا هو دا بتاع الجمرة الخبيثة كان في السكة حديد ورجع حسي وزير للكهربة ومعتز موسى عبدالله سالم كادر مجاهد غايتو قصتو ما معروفة أحمد محمد محمد صادق الكاروري أمكن يكون ود شيخ الكاروري برضو مغمور جدا الدكتورة سمية محمد أحمد أبو كشوة كانت نائب مدير جامعة الخرطوم مشهور بالصرامة ألله يستر والقمربوز الباقي ما معروفين غير داخل المؤتمر الوطني - / فضل عبدالله فضل - وزير دولة برئاسة الجمهورية / د. الرشيد هارون آدم - وزير دولة برئاسة الجمهورية / جمال محمود إبراهيم - دا أمنجي وزميل معنا في المنبر وزير دولة بمجلس الوزراء / اللواء ركن يحيى محمد خير - وزير دولة بوزارة الدفاع / كمال الدين إسماعيل سعيد دا سفير السودان في يواغندا كان - وزير دولة بالخارجية 6/ ياسر يوسف إبراهيم دا مؤتمر وطني وكان الناطق اللرسمي باسم الحزب الحاكم - وزير دولة بوزارة الإعلام 7/ حاتم أبوالقاسم مختار مجاهد سابق وكادر عنف - وزير دولة بوزارة النفط 8/ د. عبيدالله محمد عبيد الله - وزير دولة بوزارة النفط 9/ جهاد حمزة حامد - وزير دولة بوزارة التجارة 10/ اوشيك محمد طاهر - وزير دولة بوزارة النقل والطرق والجسور 11/ الصادق محمد علي حسب الرسول كان مرشح نايب رئيس دا - وزير دولة بوزارة تنمية الموارد البشرية والعمل 12/ الصادق فضل الله صباح الخير - وزير دولة بوزارة العلوم والاتصالات 13/ محمد أحمد عجب الله وزير دولة بوزارة الصناعة 14/ علي محمد موسى تاور وزير دولة بالمجلس الأعلى للاستثمار. 15\ الدكتور فانوس دا نصيب الاقباط في الحكومة وح يشتغل وزير دولة بالخارجية مع المنظمات والغرب أكاديمي بس زول راقي شوية ما أظن يطول معهم حسي الخارجية ورئاسة الجمهورية فيها أكبر عدد من وزراء الدولة
سجمنا كان دا التقشف
*لكين البلد مصابة بخيبة أمل سياسية كان في المعارضة ولا الحكومة دي المهم جنس زعل وسب وحاجات ما بقدر أكتب هنا دي حكايات الخرطوم عن الزوارة الجديدة متوسط الاعمار فيها 51 سنة بالحساب والله ديل شباب صح تصبحوا علي خير أخوك الراصد والمتابع الكحيان أخو الاخوان زهير بن عثمان
أنا ما نسيت هم زول رئيس البرطمان الجديد عندو كم من المشاكل في محكمة الاسرة أمدرمان الزول دا شاغل يعرس ويطلق ساي خمسة زواجات حسي طلع بأتنين والتالتة ومع المنصب الجديدة وجاهة كدا !!!!!!!!!!!!!!!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير عثمان حمد
فيس بوك
تويتر
انستقرام
يوتيوب
بنتيريست