أقول ليكم ... كلام عبد الله .. زول الله - شعر هاشم صديق
أقٌول ليكم كلام ءانسان بعز ( نبتا ) وبحب شعبو شرف الكلمه شرف الأمه للحاكم وللداير صلاح أرضو ومعني الوعي في الفكر البقود ضالّينا لي دربو وشأن أشرح واقول الدايرو لي نبتا
ولي ناسا بذكركم بظلم الكهنه يا أهلي وبدور الناس تكون حاسّه تقيس افعالها بالتفكير وما تتبع مهاوي العاده والكُهان تَفَرّق بين عبادْة النَجمْ وبين الخِشيه والايمان .
(أ) جابت ليها ياعبدالله كتَاحه زيطه وعرضه ذكّارا وشكّارا دق نُقاره مدّاحين وطمبارا ....... جرايد شَوفا طشّ وطاش ودنيا غباش صف كورس من الغِربان صبح هِتّيفه في الأعشاش. مسّاحين من الأقلام من الأقزام و.. ترزيه فنانين في قص الكضبة وغنايين ورقاصين ( هنود أفلام ). جزارين محترفين في قطع الرقبه عميانين . حطابين يجزوا هواكْ بضربة فاس . ........ جابت ليها يا عبدالله زَمبارا .. وزُمبارا. كضابين وشمشارا نقازين ونقاشين وسمسارا . ........ شوف الكتمه يا عبدالله قِل المويه موت النسمه دمع البسمه عَدَم الزاد . شوف اوجاعنا كيف صبحت نبيح ومزاد . شوف واعقل باسم الله أيا عبدالله كيف (اتسنسروا ) الآيات وكيف اتباقصت أوراد . ...... ....... قاضي الحِلّة باع أتراحنا يا مولاي واتْلفتّ يا عبدالله زول الله جاي بي جاي لقيت حتي المثل مقلوب - الحدّاس صِبِح سوّاي اتشنقلنا جوه وطنّا اتظلمنا للقاضي شال الباقي واتحاكمنا . راح ( فايل) المظالم ساي ....... نقبّل وين يامولاي ؟!! نّخُش الغابه ولا ّنَبُق حريقه قيامه بي كترابا ولاّ نَمِش نكوس ( حاحاي) ؟! ....... ولاّ نلم لباقي هدومنا نتوسد تلج كندا أو نِنْدَش علي ( بومباي)؟!! .......... عفيت منك وانت ركزت يا عبدالله .......... تقول حاوي في قد الابره ءاتمدّدتَ ما اتكرفست . بنيت في خُرمو قطيه . حرثت زرعت فجريه . صبرت حصدت عصريه . سويت الخُرم أصقاع . وزي عُمده خَلَفْتَ أزاكْ كراع في كراع . ......... يا ممكون بريد ربك وريد ناسك وريد أرضك عفيت منك لا بتبيع ولا بْتِتْباع . لا اتجرست في زنقة . لا خشيت بلاط أحزاب . لا اتقاصرت لي والي لا اتجمّلت زول كضاب . أو غَضيّت شرف طَرْفَك عن الحاصل ولا ذليت ءايدين صبراً جميل ماهل ولا طبلت لي مخلوق ولا باطل . ........ لا زاورت بين أعتاب لا اتمسّحت بي قُبه لا اتْكتفتَ بي كُبه ولا فتّشت لي أرباب . ......... يا عبدالله زول الله . مسكينه البلد بي حالها كان لحسوها كم نصّاب مسكينه الكراسي تهاتي للآفات ناس ( شلضم) تقيل الدم وناس ( سكروتا ) سيد الخم وناس تهتف ( لكسري) الجاي ( وسيدا) الفات و .... مشاطات . .......... مسكين الشِعِر مكسور وكت صِبح ( الوَزِن ) لا فتات . مسكينه الصُحُف سوّت نشاز ( ناس هاكا ) زي ( موازرات) . مسكينه المسارح سيدا بس )عُمدة ) أكان الفن صبح شَنَبات . ويا ( كليه ) ءانتي ضحيه كان قادوكْ سماسرا الزفه والحفلات . ......... عفيت منك حيلك لسه يا عبدالله ماشاالله ما رفسّ وفتْفَت ومات وما أغناكَ بالقرشين والعراقي والسروال وجُغمة روب وكيس تُمباك وما أبهاك وأنت تهاتي وانت تشابي للجايات وما اتحسرت للرايحات . وقول يا زول - ( وحات دمي (1) النزف يوم داك وبلّ الطين أقيف واركز ولا بتهدّ بالكلمات ولا السكين . وشان بلدي وشان الخير يزيد ويدّي أقيف مارد أريد أرضي أعيش فوقها واموت فوقها ومحال يرخص تراب أهلي) . ........ - و( يا قبر أبويا ) (2) المنسي مجدوع في الفيافي وشاهدو موصوف للغلابة قول لي نزيلك أصحا يابا وقول حكايتك للمواليد الجديده وغني للطين والحرابه وصحّي أموات المدينه صحي أموات المدينه .
(ب) مرجعيه الموت غرام . أبجديه الفِعْل ما بصبح كلام . دائريه الجوع قديم . وابجدية الرب عليم . شاعريه الشوف حنين. عنتريه السيف ظلوم مرجعيه الجِرْسه شوم واقعيه الدنيا سور ءالا يوماتي بْتَدور . أبجديه الليل كتوم أقدميه الفجْر نور. واقعيه الزيف صريف الريح تشيلو مع الخريف . أبجديه الحق سَنين. والنغمه بت وحّ الأنين. مقدريه الشعب ناس لابُد يلد ءاقدام راس. ........ أبجديه واقعيه مقدريه ....... ياديوك المغربيه.
(ت) في الدوامه (3) تتبدّل سمانا سواد يموت معني الوطن في زفة الأوغاد. يضيع نبض الوطن في زحمة الأحقاد. يئن شرف الوطن من جزمة الأسياد. يغيب شرف الكلام في بحة المذياع وفي تهويمة التلفاز وتتصادر حروف الحق ويعود معني ( الثقافه ) جناز تقوم الزفه عن اعيادها بالتعيين ويصير عيد الفنون تأبين. ....... متين كان الحرف مصنوع ؟! متين شبت ثقافه الأُمه في صحرا الحصار والجوع ؟! ....... تعيش يا معني كلمة لا تدُك حصن الضلال بي أشرف الأشعار. تعيش يا وطني رغم جروحك المليون ورغم ( المافيا ) والأنصار. تعيش يا شعبي صف مضموم بساعْد العافيه واءلاصرار . .......... أحبك لا بقع في الشين ولا بسكن لوجع الفجعه في جرح العذاب الخاص. أقوم من كل جروحي وأقيف في ساحتك الممهوره بالرُصاص .
(ث)
طَوّلت (4) من قمر التواصل والسلام . ومن مروج زهر الكلام. ومن بروق حُمي المسام ومن صهيل خيل الهوي ومن سهر شدّ اللجام ....... طولت من فرح الزمان ومن سمر قلب الكمان ومن عسل نحل الشفايف ومن جنون وتر اللسان . ومن هسيس بدر الحنان. (ج) تتذكري؟! (5) ثرثرنا عن شوك الدروب ودَرَعْنا قصص احزانَا في كتف الغرابه صَدّقنا اجتزنا المرارة وقْتنا أيام التباعد والحرابه. وغَبينا في شبق الأصابع والشفايف وذروة اللهب البلامس للسحابه. .......... في كلُ ليل نشرد من الزمن المعادي في التلاشي وفي عناقنا وفي انصهارنا وبهجة الخَدَر المعتق بالصبابه وفي كلْ صباح نهبط من الفرح المحلّق ونهوي للدنيا وترابها. (ح ) مواجه بي قلم (6) فاشي ومصلوب في جرايد الشر تقول عقل الوطن ناسي. مناضل قالو لو حزبي وساقط لو ديمقراطي. صحيح صبح الفهم (واطي).
( و ) التهاني كل عام وانتي طيبه وبت مَسَرّه. ........ كل عام وانتي صابره جروحها حُره ........... كل عام انتي عارْفه الحاله مُره إلا ضحكك (ساكْس) يزغرد ألف مره .
باقات ورود ( للعام الجديد )
وردة أولي
صباحك خير صباح الضفة والنخلة صباح المطرة والسهلة صباح الروقه والمهلة صباح الوردة في عِروة صباح القهوة في ضروة صباح الحصة والكرّاس صباح الضحكة بي ءاحساس صباح صدّاح بصوت الناس .
وردة ثانية
مِدّي ءايدك بي حنان تحت الوسادة وفتشّي تلقيني بيتين من شِعِر راجين صوابْعِك للعناق . ........ أو خُتّي خدّك في الوسادة واهمسي تلقيني روح دَلَقَتْ ورد كل الجناين ليك غُنا طول المسا وباست جبينك باشتياق .......... أو عايني في لون الملاية واندهي تلقينى ساكن في الخيوط وأزازي من خوف الفراق
وردة ثالثة
يزدهي الزمن (4) الرمادي تنفتح في عيونّا أكمام المعاني ينزل المطر الملوّن في بساتين الدفاتر ينشرح قلب المنابر في النوادي ونلقا في شفق المغارب كوكب الحرية بادي . ............ نرسم الشمس الجديدة بي عيون ضحكة وقصيدة في الأصابع والأيادي حِنة من شِدَر الشباب . نهدي للصبحية نمّة ندي للضُهرية عِمّة وفي ليالي الشَّدة والشجن البِعافر نفتح اللّمبات نذاكر نحفظ الشارع كتاب ............. يا صديقة بكرة أجمل بكرة أسهل بكرة أنبل . بس نكون صاحبين سوا ما نبيت مع الأمل القوا ماسكين وهج نبض المسرة نتحدي بالوُد المجرّة نعشق وطن أنفاسو حُرة ونغني للناس والسحاب .......... بس أوعديني ما تخلّي وعد البذرة هملان في التُراب هِزّي جذع المطرة في الارض الخراب يطلع الورد البِصَفّق ويشرق الفرح الرضاب ......... أجمل من الحب الصداقة السلام الفي العلاقة والتناغم في بلاغة . ____________________________________________ هامش :- • (1) و(2) و(6) (جواب مسجل للبلد ) المجموعة الشعرية الكاملةالاولي . • (4) و(5) ( ميلاد ) المجموعة الشعرية الكاملة الاولي .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
يحي قباني
فيس بوك
تويتر
انستقرام
يوتيوب
بنتيريست