|
|
 Re: عن حبيبتي ( أركويت ) بحكي ليكم ... (Re: الرفاعي عبدالعاطي حجر)
|
يا حجر .. قول بسم الله وما تشفق ساي .. يضيق وين ونحنا قاعدين ؟
***
وهاك دي ...
اكتر حاجة كنت بحبها في اركويت ، لما تصب المطرة ، كنت بشعر بحاجة كدا حميمة خلاص ..
وكأن الارض عروس في ذلك اليوم ، وتحتفل بالمطر ...
ارضنا في اركويت كانت ارض طينية خلاص زيها وزي اراضي الجريف وسوبا ،
لما تصب المطر .. بتلاقى الشوارع والازقة كلها مليانة موووية حمرررررا ..
كنت بحب منظر الميدان حق الكورة القدام بيتنا البكون
مليان موية لغاية خشم بيتنا شمالا .. وحتى بيت عم عبد الصادق جنوبا ..
وبيت عم حمزة حسن وناس خالتى سعدة غربا .. والمدرسة حقت البنات شرقاً .. !
كأن البحر قد غادر مكانه واستقر قدام بيتنا ، اي والله ..
الموية دي عالية وفيها موج يعلم الله .. والطراوة تهفهف في ..
الشجيرات القدام حوشنا ، وبعض الاطفال اللذين اغرتهم المياه فخاضوا فيها ..
حتى بلغت المياه اكتافهم ، كنت احرص كل صباح وبعد هطول المطر ،
ان افتح بابنا واتجول ببصري في كل تلك المياه التي اصطفت وحاصرت حلتنا ،
واكثر ما يحزنني فيها انها تعيق زيارتي الاسبوعية لناس رجاء ،
صديقتي التي تعرفت عليها ، ذات صدفة في بيت من بيوت الجيران ،
ووجدت فيها ضالتي ، كنا حينها بسنة سادسة ، او كما تقول هي سنة (ساتتة ) ،
لقائنا كان في مناسبة صغيرة فوصفت لي بيتها ووعدتها بالزيارة ..
ذهبت اليها ، وصرنا نحكي عن همومنا الصغيرة .. وعن امتحان الشهادة ،
وعن مدرستها الخرطوم غرب .. وحكيت لها بالمثل عن مدرستي ..
وعن صديقاتي .. كانت حكاياتنا مليانة بالحيوية والحياة ،
حكيت لها عن ناس بيتنا وعن اخواني ..
وعن اهلي وعن الهوايات الصغيرة التي اقوم بها ..
اصبحنا نزور بعضنا ، كل اسبوع تقريبا ،
فلا يمر اسبوع الا وهي قد تزورني وازورها ،
ولم تكن هي الوحيدة التي جعلتني انجذب اليها ،
فكانت صداقتي مع نهلة اكثر قدما وعمقا في ذلك الوقت ،
اظننا لعبنا انا ونهلة ام الحفر والبروبرة كما كانت تقول عليها ، والكمبليت !
بيت ناس نهلة كان في نفس شارعنا ، كنت القاها في اوقات مختلفة ولاسباب مختلفة ..
في الشارع في بيوت الجيران ، في المواصلات ، صداقتنا نمت دون ان ندري ،
تشابهت اهتمامتنا ، تشابهت ضحكاتنا ، قفشاتنا .. كنا بنذاكر سوا ..
رغم انها لم تكن تدرس معي بمدرسة واحدة ، ولكن جمعنا درس العصر ،
في كثير من المدارس .. اجتماعية هي لحد كبير لذا اتاحت لي الفرصة
لاتعرف على الكثير من صديقاتها .. في مناطق مختلفة من اركويت !
اما رجاء ، فلم نذاكر سويا الا في امتحانات الشهادة ،
لم اكن اناقش معها كثيرا الامور المدرسية الا نادرا ،
عكس نهلة التي كانت تناقشني في كل شيء يخص الدراسة والمدرسة
والمدرسين والمذاكرة .. وكرسات الجامعات،
الحكاوي التي كنا نحكيها كانت جميلة لحد يجعلني اتاخر حتى قريب صلاة العشاء ،
ونسة طاعمة وحلوة بشكل لا يصدق وكنت لا امل من الحديث معها ،
ولغاية يوم الليلة لا زلنا كما نحن رغم الظروف التي تغيرت ..
وهي سكنت مكان وانا في آخر .
ذكرياتي في الطريق الى بيت رجاء لا تعد ولا تحصي ،
الطريق الموازي للميدان من ناحية الغرب ..
خاصة لما يكون الميدان فيهو ( دافوري ) في العصريات ،
وهذا هو الوقت الذي كنت افضله للذهاب لزيارة رجاء .
لذا حين كانت الامطار تملأ الميدان حتى اقصى جوانب الحيطان ،
كنت انتظر يوما او يومين حتى تنحصر المياه قليلا لاعود من جديد
واسلك طريقي المحبب الى بيتها ، وهي بالمثل !
لم نكن نكتفي بالزيارات ، فحين لا نجد للزيارة سبيلا كنا ،
نجري جري ونتكلم بالتلفون ..
رغم التحذيرات والطبل التي تعيق حركة اقراص الهاتف ،
ورغم التشفير وتفاصيل المكالمات فيما بعد ،
كنا نجد في الونسة وتبادل الاخبار ما يجعلنا ننسى روحنا ذاتو ،
رجاء ليست لها اخوات ، فكنت اعتبر نفسي اختها وصديقتها واشاركها في كل ما يخصها ،
كنت استمع لثرثرتها التي لا تنتهي الا لتبدأ ثرثرة جديدة ،
الميدان المليء بالمياه ، كان مصدر دهشة لكل من يدخل الى حلتنا زائرا :
- لا حووووووولا دي كلها موية مطرة ؟
- ايوة دي المطرة الفاتت ّ
- ياخي دا بحر عديل ، في باعوض شديد موش ؟
- باعوض شنو ؟ نحمد الله مافي أي باعوض ولا حاجة !
- سبحان الله
فعلا برغم المياه المطرية التي تحاصر الشوارع ،
فلم نشتكي من البعوض الا قليلا .. !
في بعض الاحيان كانت خالتي تشتكي منه ،
فكنت انكر ذلك درجة ( الغلاط ) فكانت تغتاظ مني جدا وتقول لي :-
- انتي ماجلدك مُر ، عشان كدا ما بعضيك !
- وكنت أرد عليها :
- طيب دي ما نعمة من الله .. !
***
فكي صلي
ما بصلي ..
أجيب السوط ؟
الله أكبر
فكي صلي
ما بصلي
اجيب السوط
الله أكبر
حين كنت اسمع صوت الاطفال ، وهم يلعبون بالجراد الذي بدا في الانتشار في كل مكان ،
بلونه الاخضر الاغبش ، كنت انصت لاسمع اصواتهم الجزلة وهي تصدح في حبور ..
حال كل مطر !
الجراد من فوقنا .. والضفادع في الارض ، والتي تبدأ في الانتشار قليلا قليلا ،
من يرقة صغيرة .. سرعان ما تتحول لضفدعة كبيرة لها شكل قبيح !
واجمل ايامي معها حين عرفت ان حبوبة تخشاها كما لم تخشى المرفعين من قبل ،
تخافها كأنها وحش مفترس او حشرة قاتلة ، وكنت افرح باخافتها ..
في وقت ما .. قبل ان أعي الى أن ذلك قد يصيبها بالاغماء ..
منعتني امي كثيرا عن فعل ذلك حتى لا تقع حبوبة مخشيا عليها ، وكنت استغرب ..
كيف لها ان تخاف ، وقد كانت في نظري شجاعة جدا ..
لا شيء يخيفها بعد ان كانت تذبح الدجاجة والحمام وتعده للأكل ؟!
وتعرف كيف تساعد الغنماية في الولادة واستخراج العتوت من بطنها ،
وانها تعرف كيف تطمع الحمامات الصغيرات ،
والسواسيو التي كانت تضعها في كرتونة لها ثقوب في كل جهة ،
لا شيء يخيف حبوبة سوى المشاهد المرعبة في التلفزيون ..
المشاهد الكاذبة .. التي اخبرتني عنها أمي بانها مجرد تمثيل وليست حقيقية !
سرعان ما تبدد اهتمامي بالضفادع المزعجة التي تدخل حوشنا من فتحة المجري ..
وتظل تتكاثر حتى كنت اخشى ان اطأها بقدمي واقتلها .. !
كنت احرص على لبس سفنجتي .. ذات اللون الازرق لأمرين ،
الاول لاتحاشى ( عفص ) هذه الضفادع ذات الملمس المقزز..
ولاني في اوقات كثيرة كنت افضل ان انتعل شيئا آخر غير السفنجة
حتى لا تكتشف أمي انني وبعض بنات الحلة قد خضنا في مياه المطرة ،
فالسفنجة كانت تفضح جولتنا السرية في المياه .. في الشارع الخلفي ..
لانها كانت ما ان ابتدأ السير بها داخل الماء ، حتى تلتصق بالارض وترفض ان تغادرها ..
فكنت اجذبها بقوة .. فينلخع سيرها .. ويتلف وهذه هو الامر الثاني !
كنت اخبيء الامر عن أمي واستعين بمن لديهم خبره في اصلاح السفنجات ..
من شفع الحلة ، ولكن السفنجة اللعينة سرعان ما تكشف أمري .. وتبدأ امي في العقاب !
جربت يوما ان اخلع السفنجة واخوض المياه حافية ، كما تفعل الكثير من صديقاتي ..
وشفع الحلة ولكن الزجاج اللعين الملقى تحت المياه ، اصاب باطن قدمي بجرح بالغ ،
حتى سال منها الدم .. وألمتني رجلي لفترة طويلة ،
حتى انني لم استطع المشي عليها او وضعها على الارض .
لا ادرى كيف اقلعت عن عادة خوص مياه الامطار ؟
ربما لاجتهاد امي في توصيل استيائها وقرفها مما نفعل نحن الشفع ،
وكيف ان هذه المياه ملوثة وقذره ، وفيها ما فيها من اوساخ !
والدليل على ذلك الزجاج الذي شق قدمي ..
ولكن المتعة التي كنا نجدها في الخوض في لجة تلك المياه كانت تجعلنا ننسى اي تحذير ..
قالت امي ان هذه المياه ملوثة بالبهارسيا ..
وانها ستجعلنا نمرض حتى الموت !
حين كانت المياه تبدأ في الانحصار كانت الضفادع تزداد انتشارا ،
فلا تدخل بيتا الا وتجدها قد جاءت بصحبة كل قبائل الضفادع ..
فكرت ان اتخلص منها كما كنا نفعل مع النمل الذي كانت ينشر في الحيشان ،
بأن نمزج صابون البودرة بالماء .. ونسكبه عليه حتى يفارق الحياة ..
ولكن أبي قال لي ان احسن طريقة لقتل النمل هي حرقه ،
فكان يحمل الجرائد المشتعلة ويمررها فوق النمل فيموت في الحال .
اعجبتي هذه الطريقة في القتل ..
فكنت اهتم دائما بالتخلص من النمل بهذه الطريقة السريعة ،
حتى قالت لي أمي ان الله سيكون غاضبا مني !
فقلت لها :
- وليه ما يغضب من النمل هو ذاتو ، مووش قاعد يقرصنا ؟ !
ولم أستجب لمحاولات امي في ردعي عن قتل النمل حرقاً ،
فكانت تخبيء الكبريت في اعلي الرف !
فكنت حين اطلب منها ان تدعني احرق النمل ..تقول لي :
- لا يحرق بالنار الا رب النار !
تركت حرقهم بالنار ولكني لم انس ابدا تلك القرصات الشهيرة
التي اصابنا بنا النمل على جلدي وجلد اخواني وجعلنا نظل نحك مكان القرصة طوال اليوم ..
فاصبحت اتابع قتلهم بالماء والصابون البودرة .. وصار هناك ماعون مخصص للنمل ..
إحدى علب البوهية التي كان يغلي فيها الصابون لغسيل الملابس ..
فقد قلعتها غصبا عن المرأة التي كانت تأتي لتغسل لنا الملابس !
لذا فكرت ان اقتل الضفادع ايضا بالصابون ،
فصرت امليء العلبة بالكثير من الماء والصابون ما يكفي لقتل الضفادع والنمل ..
مات النمل ولكن الضفادع كانت تهرب وتقفز مني بعيدا ، لم تمت كما توقعت !
وذات يوم اخبرني احدهم ان الملح سيقتلها فورا .. فاخبرت حبوبة بالخبر السار ،
وحملت علبة الملح وركضت خلف كل الضفادع التي بالحوش ، فما ان اضع الملح على ظهرها ..
حتى تذوب الضفدعة وتموت . .. نعم كانت تذوب .. وكان المشهد مروعاً جدا !
وانتهت قصتي مع الضفادع ، تجي وتفوت على كيفها .. !
بس الله قال بقولها لو لقيتها في الحمام حين أهم بالاستحمام ، بطيًن ليها عيشتها !
وامتع من كل ذلك ، حين كان يجف الميدان تماما ، فكنت احاول المشي فوقه ،
ولكن اثار الاقدام التي اصبحت محفورة على الارض كانت تدغدغنا ونحن نمشي عليها ،
فتصبح وكأنك ماشي على طبق بيض ، لا توجد مساحة واحدة تخلو من أثر اقدام ..
وكان لون الميدان يصبح داكنا جدا بعد ان تجف المياه ،
ولكن سرعان ما تجد انه عاد لسابق عهده ..
بعد ان عاد الدافوري من جديد وبعد غيبة !
ولهذا الدافوري قصة طويلة مع ناس بيتنا لا تنتهي ابدا ،
فحين ان الميدان الواقع امام بيتنا تماما من ناحية الجنوب ،
تجد ان ( العراضة ) الشمالية للميدان تقع امام باب بيتنا تماما ..
فمع كل هدف مسجل لفريق الدافوري ، كانت هناك لمبة مكسورة
او زجاج نافذة مهشم .. في حوشنا ، ظلنا نسجل اعتراضا يوميا لما يحدث ،
ونعلن سخطنا كلما نجد الفرصة ،
في الاوقات التي كان اخواني ضمن هؤلاء اللاعبين كانت الاوضاع اكثر استقرارا ،
او ربما كان اخواني يتسترون على الامر ولا نشعر الا بــ أن هناك لمبة محطمة في الحوش !
ذات يوم زارتنا ابنة خالتي .. وحين وقفت امي لتودعها عند الباب هي وطفلها ،
طارت الكورة وضربت الطفل على وجهه حتى وقع على الارض من قوة الضربة ،
وتورمت جبهته .. وبكى لفترة طويلة !
غضبت امي وطلبت ان يجدوا حلا لهذا الميدان المزعج ،
فالعراضة التي تلاصق باب بيتنا اصبحت هاجس ومصدر ازعاج !
فاصبحنا في حالة عداء مستمر مع تلك الكورة التي تأتي داخل حوشنا
والذي اصبح مليء جدا بالكرات التي لا نعيدها لهم ،
كرات من مختلف الاشكال والاحجام والالوان .. !
وكانت دائما ما تنتهي اللعبة بوقوع الكورة في حوشنا ،
لاننا نرفض وبشدة ان نعيدها لهم ..
فكان يتدخل الاجاويد من كل صوب وحدب ..
صار الامر صعبا جدا عليهم خاصة بعد زواج اخواني وبعدهم عن البيت !
فلم يعد لديهم من يتضامن معهم ويطلب منا اعادة الكورة ،
خالتي وحبوبة هما الاكثر تضررا في تلك الاوقات
لان الكورة كثيرا ما كانت تصطدم بشاي العصرية ،
وتكسر الكباية ويروح المزاج والكيف شمار في ضربة كورة !
كنت اشعر ان هؤلاء الاشبان اصحبوا يكرهوننا ،
ونحن بالتالي نكره لعبهم وكرتهم اللعينة
فالخسائر التي كانت تحدث في داخل حوشنا
كانت كفيلة لتجعلنا نكره الرياضة وسنينها .
ولكن طالما لم يجدوا لمبارياتهم اي حلول تكفنا نحن الطرفين شر وجع القلب ،
فلتبقى الكميات الهائلة من الكرات بحوشنا دليلا على حبنا للرياضة !
ويا بخت حمودي وبيبو .. ورناد بلعب الكورة !
ويا بختنا نحن بالمطر الذي يمليء الميدان بالموية،
طوال شهر كامل ننعم فيه بشاي عصرية كاااااااارب ...
هـــهــههــــه .. مع الاعتذار لناس الكورة ... !
| |
  
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: الرفاعي عبدالعاطي حجر)
|
في حوشنا الذي تحول بعد سنوات عديدة من ارض رملية ،
الى ارض ( مضفورة ) .. بالطوب والاسمنت ،
وراحت علينا شرشرة الحوش عصرا بالخرطوش ..
وتلك الطريقة التي كنت استمتع بها في رش الحوش ، لنقوم من بعد ذلك بكنسه ،
او لتركه كما هو ... لننعم بهواء لطيف .. ومنعش .. !
تغيرت ايضا الغرف التي كانت ( مبلطة ) بالمزايكو .. ابيض واسود ..
الى نوع اخر من البلاط .. اكثر لمعاناً ونعومة ..
ثم تطور الامر لنفرش تلك المشمعات التي تغطي ارض الغرفة من اولها وحتى آخرها ،
والصالون الذي كان فيما سبق مجرد حوش تسكنه الاغنام ..
الى صالون جميل .. به تلفزيون .. ملون .. وكراسي وثيرة .. وبعض السراير .. !
فرشنا للصالون ايضا مشمع جميل للغاية من اول الصالون وحتى آخره ،،
ووضعت أمي سجادة جميلة في جزء من المكان ..
وكان قد ارسلها لنا ابي من السعودية ، مع طقم صفرة من النيكل اللامع .. !
في ايام الآحاد حيث نتغيب عن المدرسة حال كل اسبوع ،
كانت امي تطلب منا ان ننظف البيت ونمسح المشمع وخاصة مشمع الصالون ..
وكنا نجد ضالتنا في ذلك .. حيث نترك حبوبة تغيب في مطبخها ما بين حلة المحشي وفرك البامية .. !
كانت تشترك معنا في هذه العملية الخطرة عازة بت جارتنا زينب الشايقية رحمة الله عليها ،
عازة والتي تكبرني بأعوام كانت كاخت وصديقة ..
تسكعنا معنا في ازقة اركويت .. وبواكير الصبا ..
امها كانت خير جارة وصديقة لامي وحبوبة .. ما اقسي ان يرحل الاقربين !
برغم ان سنوات عديدة قد مرت على رحيلها ولكني لا زلت اذكر
وقفتها دائما بالقرب من مطبخنا تحكي لحبوبة ..
الاخبار السريعة التي طرأت على الحي وتحثها للخروج لزيارة فلانة المريضة او حضور جنازة .. !
كانت تاتي الينا في اليوم اكثر من مرة ، ونذهب نحن الى بيتها ..
في اوقات قد تبدو مزعجة الآن فقط ..
لنتبادل صحن الغداء في حال طب علينا ضيوف فجأة !
فكنت احمل لهم صحن البامية ..
لنأخذ اي نوع آخر من الطبيخ ..
فقط لنكرم الضيف الذي أتي دون سابق موعد ..
هذا النهج الجميل اظنه كان سائدا في كل الحلة ، فكثيرا ما كنت ارى الصحون تتناقل ما بعد صلاة الظهر وحتى آذان العصر !
الف رحمة ونور على خالتي زينب .. ام عازة وعوض وعامر
كنا نقوم باخراج جميع العفش الموجود بالصالون ، ونتركه خاويا تماما ..
ونترك المشمع الجميل على ارض الصالون لنحمل اليه جرادل الماء ونسكبها فوقها ..
الجردل تلو الآخر .. فيتحول الصالون فيما بعد الى صالة للتزحلق .. فكنا ..
نتزحلق على الماء الذي يغطي ارضية الصالون والمشمع ..
بعد ان نرتدي ما يساعدنا على التزحلق .. او خلع ما قد يعيق تزحلقنا اذا تطلب الامر .
عملية التزحلق كانت تبدأ بعد الفطور مباشرة ، وبعد ان نخلص من مراسيل حبوبة التي لا تنتهي ..
فكنا نهيص ونلوص في الصالون الخالي .. ونحن نغني ونصرخ ..
ونتزحلق حتى نشعر بالاعياء .. الماء كان يخرج من الصالون ليسيل على الحوش .. ومن ثم الى الشارع !
وما أجمل الحيشان المضفورة التي تشرب الماء سريعا ،
او تبعده عنها الى الخارج دون ان تترك خلفها برك ماء او طين لايق !
حينها كانت الساعة تكون قد اقتربت من منتصف النهار ..
فنجد اننا لا زلنا لم نكتفي باللعب او بالماء الذي كان يشكل عنصرا اساسيا
في جميع صرخات المرح التي نطلقها في اعالي السماء !
فالمظلة التي صنعها ابي لتكون جراج للسيارة ،
وزرع حولها بعض شجر العنب التي جعلها
مناسبة لمقيلنا بعيدا عن ازعاج اي من في البيت ،
بعد ان يخرج ابي للعمل بالسيارة تكون المساحة الخالية مناسبة لجر احد سراير الحوش
ليجلس بعضنا فوقه والبعض الآخر يفترش الارض او اي بنبر او كرسي !
سيارة ابي كان من نوع البيجو 504 والتي كان لها ( بوري ) قوي جدا ومميز ..
الكل يعرفه بصوت ( البوري ) .. في الصباح وقبل ان نذهب للحمام
كان علينا ان نقوم بمسح السيارة يوميا انا واختى هنادي في البدء ..
لان بقية اخوتي كانوا صغارا على ذلك .. فقد خصص لنا ابي قطع ( دلاقين ) لمسح السيارة كل صباح ،
وقبل ان نستعد للذهاب للمدرسة .. او ربما قبل دخول الحمام .. كنت احمل قطعة المسح ..
واقوم بمسح السيارة ، النص الذي يخصني ..
فقد كنا نقسم السيارة الى جزئين وكل واحدة منا مسؤولة عن مسح الجزء الذي يخصها ، وترك الآخر للاخرى .. !
في بعض الاحيان كانت تنتابني لحظات من التمرد كنت اطنش من هذه العملية المرهقة والتي لا ادري لماذا يكلفنا بها ابي ؟
فكنت ادعي ان الوقت ضيق وانني لم اكمل لبسي ، وانني وانني ..
فكان ابي يخرج بالسيارة في ذلك الصباح وهي ممسوحة في جزء وفي الجزء الآخر يعمها الغبار .. !
وحتى هنادي اختى كانت تتمرد وتتمارض اكثر مني .. لتتركها جزءها ليقوم بمسحه ابي بنفسه !
ايضا كانت عملية مسح السيارة التي ( نكلفتها ) سريعا ،
تجعله غاضبا طوال الطريق .. وان الدلاقين غير نظيفة .. واننا بقينا نستهبل .. واننا واننا !
في يوم الآحد ، حيث كنا لا نذهب فيه للمدرسة ، كان ابي يمسح السيارة لوحده خاصة واننا نظل نائمات حتى يخرج !
في اوقات كثيرة كنت ادعي النوم من تحت الغطاء وانا انتظر خروجه سريعا حتى اجري جري الى الحمام !
مظلة العربية كان يظلها الى جانب شجر العنب بعض اوراق اللبلاب .. الخضراء ..
وبعض الازهار التي كانت تضعها امي على جانبي المظلة !
فكنا بعد ان ندخل جميع العفش الذي اخرجناهو من الصالون .. ونعيد نرتيبه كما كان .. !
كنا نملأ الجرادل من جديد ..
لنسكبها بالكوز الكبير فوق المظلة التي يبدأ الماء في التساقط عبر الاغصان المتدلية للعنب واوراق اللبلاب ..
فيصبح المكان كان المطر قد جاء قبل اوانه ..
فكان لكل منا دوره في سكب الماء على المظلة ومن ثم علينا اللذين ترانا نرقص ونغني ..
وندندن بالاناشيد المدرسة .. طوال الوقت !
بلدتي بلدتي بهجة النظر ..
اي منظر فيك لا يسر ؟!
كل ساعة انظر الشجر
انظر الضحى وهو منتشر ..
انظر الربى انظر النهر
***
دجاجي يلقط الحب ..
ويجري وهو فرحان ..
كأنه عيونه خرز ..
له في الشمس ألوانا
حين نشعر بان موعد عودة امي وابي قد حانت ..
نعيد كل شيء الى مكانه وخاصة جرادل الماء ..
لان ابي لديه جردل مخصوص في الحمام يقول لنا ان نتركه دائما ممتليء بالماء منذ وقت باكر حتى يبرد الماء ويكون مناسبا للاستحمام .. !
ثم نعود الى راكوبة حبوبة حيث الراديو التي يذيع الاغاني الجميلة ، وعالم الرياضة والاخوة الرياضيون ..... والى لقاااااااااااااااء !
اها الساعة دي كانت بتكون ساعة ركلسة شديدة ،
كل زول بسوي في حاجة ، في الوقت دا كنت بحب اقرا مجلة ميكي .. او الصبيان !
وفجأة بسمع صوت اقدام اخواني جارين جري نحو المطبخ ،
عشان يمسكوا حلة الكاسترد الفاضية من حبوبة ..
وعشان يلحسو باقي الحلة اللذيذة ..
اجمل مافي الكاسترد والحلو كانت هذه اللحظة حيث نقوم بلحس ( الحلو ) باصابعنا وهو لا زال ساخنا ..
فكان هذا الحلو يعلن لنا عن خاتمة جميلة ليومنا الحافل .. بالمرح !
والى لقااااااااااااااء ..
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: سمرية)
|
وصلني ايميل جميل وراقي من احد شباب اركويت ..
وهو اسامة ويدي .. وهو من سكان مربع 65 .. وجار لــ بهاء الدين عبد القادر ..
ولحسام وهشام شباب جامعة الخرطوم ..
وهو ابن عم هشام وديدي .. جارنا بمربع 56 .. وبابكم كان فاتح على بابنا قبل ما يرحلوا .. من اركويت !
شكرا يا باشمهندس اسامة ... ولكل ناس مربع 65 ..
واسامة ويدي موجود في الصورة ادناه .. بس ما عرفتو ياتو فيهم ؟!
البساعدني اعرفو منو ؟
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: مزمل خيرى)
|
يا مزمل ازيكـــ ؟
شنو الصور بالقطارة كدا .. عاوزين كميات ..
اها مووش تاني في فندقين في الشارع دا برضو .. وبرضو صينيات !
واحد مقابل للفندق الجبتو صورتو دا .. والتاني بجوار مستشفى الشيخ .. .
....
عندي مجموعة من الصور القديمة .. بجتهد انزلها في اقرب فرصة ...
انتظرونا ..
| |
|
|
|
|
|
|
|
|
 Re: عن حبيبتي ( أركويت ) بحكي ليكم ... (Re: سمرية)
|
عملنا ليكم في راسو برج بدل الصلعة
الزول اللعاب اسامة وديدي واحد ابناء
مربع 65 الخلوقين تحياتي للبوست وهو يلج
مربع 65 اخيراً بعد دا برجع ليكم هاهاها.
مرحب سمرية والحضور الانيق .
........................................حجر.
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: الرفاعي عبدالعاطي حجر)
|
Quote: وصلني ايميل جميل وراقي من احد شباب اركويت ..
وهو اسامة ويدي .. وهو من سكان مربع 65 .. وجار لــ بهاء الدين عبد القادر ..
ولحسام وهشام شباب جامعة الخرطوم ..
وهو ابن عم هشام وديدي .. جارنا بمربع 56 .. وبابكم كان فاتح على بابنا قبل ما يرحلوا .. من اركويت !
شكرا يا باشمهندس اسامة ... ولكل ناس مربع 65 ..
واسامة ويدي موجود في الصورة ادناه .. بس ما عرفتو ياتو فيهم ؟!
البساعدني اعرفو منو ؟ |
وكدا سعادتنا اكبر وهاكم المربع الجميل وشبابو الاجمل .
صور بالكوم [email protected]
..............................................................حجر.
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: وجدان جمال)
|
التحية للاخت سمرية وكل اهلنا فى اركويت
في تقديري الخاص اركويت زمان اجمل من الان زمن بصات اللبن اركويت شرق اخر محطة بالقرب من جامع ود البحر
اركويت غرب اخر محطة الجامع وين نحنا هسى من الزمن داك رغم معاناتو كان به ما يميزه على الاقل الناس كانت بتتعارف
كاشباب في ما يجمع الناس المدارس الابتدائية اركويت شمال وجنوب وشرق وغرب وهيرمان ... المتوسطه والتى كانت اهم مرحلة
يلتقى فيها ابناء اركويت في مدرستين فقط اركويت القديمة(مدرسة البيلى) او اركويت الجديدة كانا نمشى من مربع 46 قاطعين 5 مربعات
حتى نصل للمدرسة المتوسطة نلتقى شباب من كل المربعات في اركويت الان المدراس دى انتهت وحلت المدارس الخاصة بعد ما انتهى
التعليم الحكومي للابد .... الرابطة كان بها قرابة ال18 فريق لكرة القدم ودوري الرابطة مسخن اسخن من ليق الخرطوم مرات الدق بعد الكورة
لمن احلو بوليس الشرقي.. فريق اركويت الكان في الثالثة كان اسمو برازيل الليق ده لمن كان كلو نجوم والربطة بتفرخ ناشئين لتدعيم التيم الكبير ..
وين هسي الكلام ده؟؟؟ الميادين انتهت وباعوها الكيزان الضحي الاعلي واتحولت لغابات اسمنت لايعلم الساكن فيها جيرانه في الحي وببيع الميادين
انتهت الرابطة التى طال ميدانها البيع ايضا وبيقى التمرين فيها بالقروش حتى تيم اركويت ما عاد زي زمان.... حليل اركويت زمان علاقات اجتماعية قوية
لى ابعد الحدود وابسط دليل على ذالك اذا سالتم واحد من الشباب الحضرو الزمن داك تجدو بيعرف في اى مربع ما لايقل عن 10 اصدقاء من ناس المدرسة او الرابطة..
وين الكلام ده الان المعاك في المربع ما بتعرفو....ده زمن غابات الاسمنت وانسي الفلم....
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: Solafa Alagib)
|
خلونا برغم زحمة البوستات واضراب الاطباء ان نلج هذا البوست رافعين التهاني للاخ الباشمهندس بهاءالدين عبدالقادر البنية الثالثة ويا وديدي الزول دا بعد دا بقى زول جنة وكدا مليون مبرووووووووووووووووك البنية السكرية يا بهاء والسماية على مستوى جدة واركويت والمرابيع الحاج يوسف ....
أها كدا كيف مش فوق بي مفاجأة .
...........................................حجر.
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: الرفاعي عبدالعاطي حجر)
|
سمريه سلام
اركويت زمااااااااااااااااان
اخر محطه الخيمة
البلابل0الترعه00جنس عوم00
الدكاكيينالشهيرة
دكان برقدمربع 68
احمد ازيرق 45
الكتيابى 66
دكان السرة 66
الرياضيه00اول فريق رابطة لاركويت كان فى رابطة الصحافة01976
انا شخصيا درست الابتدائيه فى حى عبد المنعم الخرطوم 2
المواصلات بكارو عم عبد الرحيم رحمة الله عليه
جينا سكنااركويت فى 18 مارس 1974
رسوم القطعه للحكومه 83 جنيه؟؟؟
جدى عثمان ود الصائم رحمة الله عليه جاء من ام الطيور وقال للوالد دى حتة بعيدة0
وجابت القطعة 90 جنيه
الوالدة دقت جرس وقالت مافى مافى بيع ؟باعت ما لديها من دهيبات0
وتم بناء غرفة ؟جالوص؟ وراكوبة
والقعدة ليوم الليله
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: معاوية عبيد الصائم)
|
سمرية
18مارس 1974
مربع 45
17بيت
الطاحونة فى الصحافة مربع 42
المربع كلو 2 تلفزيون ببطارية
فنانين اركويت
احمدجبر الله 45
الرشيد دقن 47
عادل انجروت 48
سعد الحلفاوى 56
الواثق جانبو 63
عوضية وسلمى ادم 43
اى مناسبة الشباب ديل ناس قدام0زمن مبالغة
كدى برجع تانى
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: مزمل خيرى)
|
هذة الخواطر والصور وصلت بريدى الالكترونى من القارئ عمر عبدالله وهو من ابناء اركويت
___
خواطر من زمن حلو
ينحدر الطريق من آخر محطة المواصلات بأركويت لينحرف فجأة مع اتجاه المسجد لتعود وتترك ميدان الكرة وتستقبل الطريق مرة أخرى.. هذا الشارع لا اذكر كم من مرة سرنا فيه ونحن نتجادل حول من سيهزم الآخر ومن سيفوز بزجاج المشروب المتباري عليه ككاس العالم ولا اذكر كم من مرة سرت عليه في طريقي إلى المدرسة الابتدائية طريق ممل كنت اعتبره كذلك لفترة طويلة واطلقت عليه درب التبانة منذ المرحلة الابتدائية فهو الذي يقود إلى المدرسة والى موقف البصات المتجهة إلى سوق الخرطوم بصات البدفورد الصندوقية دائما تجد معاوية سامبركة منتظرا البص التالى حتى يركب قدام مع السواق .. يقودك الشارع أيضا الى المخبز الذي كنا نضطر للقيام فى الساعة الرابعة صباحا لإحضار الخبز منه فى زمن الفيضانات و هو نفس الشارع الذى ظل عبودى يغنى لنا فيه حبك للناس يوميا صباح ومساء ويقودك الى زرائب الفحم وعمك باكاب وقبل ذلك كان اقسى امر المرور به للذهاب لاحضار الثلج للصائمين فى رمضان قبل ان توجد الكهرباء فى اركويت بزمن طويل كان الناس يجلبون الثلج من كشك عم قدير وكنت تزاحم و تجالد العالمين من اجل ربع لوح من الثلج وربما ذاب ربعه قبل الوصول للمنزل من حرارة الجو .. اذكر مرة أدى بي كسلى إلى أن استمع الى نصيحة أحد الكماسرة بان اجلس واستريح بينما سيجلب هو لى الثلج في مكاني الظليل وجلست انتظر إلى أن ودعتنى الشمس بما تبقى من آخر أشعتها الراحلة .. وتلفت ملتاعا ابحث عن الكمسارى دون اثر .... أيقنت بالخديعة وذهبت الى المنزل بينما كان الحلو مر ينتظر تبرده وكل المشروبات قد تم تجهيزها فدخلت تسبقني دموعي وقلت لأبى بأن قد أعطيت القروش لأحد الكماسرة ليشترى لى لأنني لا أستطيع اللحاق بالنافذة .. وهو قد اختفى بالمبلغ فأخذت نهرة ظل صداها فى اذنى لاكثر من ساعتين .. عرفت فيما بعد ان زهج الصائمون شكول طويل .. وتم اعفائى من المهمة نهائيا .. وقد قابلت الكمسارى فيما بعد ولكن لم اجرؤ على المطالبة بحقى .. فقد ظهرت له العديد من الندوب منذ اخر مقابلة لى معه فعرفت ان قد خاض بعض النزالات مؤخرا وبما انه لايزال حيا فمن المؤكد انه قد كسبها ..
عمر عبدالله
الصورة الاولى كمال عبدالغنى فى احدى مهرجانات رابطة اركويت
الصورة الثانية فريق النجمة الفائز بدورة سلا فى منتصف الثمانينات ..
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: مزمل خيرى)
|
الزول العامل ليهو دايرة بالاحمر دا اسمو اسحاق على ما اظن لعبت ضدو فى رابطة اركويت فى اوائل التسعينات
انا كنت بلعب جناح شمال فى فريق الامل وهو فى الاخوة كان باك يمين ، ماشاء الله عندو كراع تخوف وكان متعود يلعب بدون كدارة لانو ماف
مقاس قدرو .. مرة ادانى جوز دقيت الواطة براسى قربت اخش فى غيبوبة 
من ديك خليت العب جناح شمال لمن نكون لاعبين مع فريق الاخوة ..
اولاد الحلة واصحابى كانوا بيشاغلونى .. اسحاق جاك .. اسحاق جاك
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: مزمل خيرى)
|
Quote: ياحجر والله الناس ديل مابعرف اسماءهم .. بس يتخيل لى محمد عقيد لاعب
الهلال السابق واقف مع الناس الفوق ديل .. دى نستنى ست البوست بتجيب لينا النجيضة
لانو ود حلتهم ... |
مزمل سلامات ..
وسلامات لكل ناس اركويت القاعدين يتابعونا ويراسلونا ... عبر هذا البوست ..
والله حقو نعمل برنامج في النيل الازرق .. كيتا في طارق جبريل . .ونسميهو ما يطلبه ناس اركويت ..
اها يا مزمل اللفي الصورة دا لا محمد عقيد لا حاجة ، اي بشبهو شديد .. لكن ما ياهو ..
مووش انت قاصد الشاب الواقف .. بالدائرة الخضراء ..
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: مزمل خيرى)
|
Quote:
بالنسبة لصورة سلا فهذه هى الاسماء
اسامة محمد عثمان ،عبدالعزيز الصومالى ، عماد تعبان ، محمد حمورى ، امجد ، على فرح ، ياسر رابح ،عامر شنقر ، طارق عباس ، عصام بطوط ،صلاح طه ، الفاتح على بدر
جلوسا: عبدالوهاب السر - دفلى - توح - وليد كتم - جعفر فرح - انس عبدالجليل- محمد عبدالجليل - عيسى حسن طه
وهناك المزيد من الصور والحكايات ان شاء الله
عمر عبدالله
|
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: معاوية عبيد الصائم)
|
Quote: طارق جبريل سلام
كوشة الجبل
يعلم الله كانت مقابل الامتداد
وتحديدا محطة البراميل؟؟
اركويت ؟؟البيوت الواسعة ياناس 340 متر
لت واعجن فى امتدادك ده يا با
وقوم لف |
ايوة كدا .. يا معاوية .. عفيت منكـ
طارق دا داير العين الحمرا .. ( وش شمتان )
..
قال ليكـ تحديدا محطة البراميل .. وراء مدرسة فاطمة عبد الرحيم .. طوالي .. كدا جمب اللساتكـ ..
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: سمرية)
|
معاوية وسمرية
اعصابكم ياخي
عادي ممكن تتجاوزوا كوشة الجبل دي وتعملوا من حيكم حي راقي قريب من الامتداد
تليشة:
اتنين من احب خلق الله الى نفسي كانوا يسكنون اركويت
الراحل ود عمي محمد عوض السيد كنيش
والراحلة الخالة خديجة ابنعوف العطا
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: طارق جبريل)
|
لهم الرحمه ياود جبريل
ولكم الصبر
تليشه؟؟؟
امتداد شنو ؟؟
امتدادك ده يابا؟؟؟
ينفعك؟؟؟؟
طارق جبريل اين اختفت البراميل ؟الزماااااااااااااان كانت محطة؟
وهسه ياخوى كان انتو ولا الناس التانين؟بيبعواوبجو يشتروا؟؟فى كوشة الجبل حقتنا دى؟
يا الكنتو فاتحين على العشش؟
وجنوب على خور الصحافه بتاع الرباطة؟ ؟
وغرب خلاء ساااااااااااااى وبرضو رباطة؟؟
يايابا اركويتنا زينة وناسا حنينة؟؟
اطالب الجهات ؟؟؟
بالتحقيق مع المدعو طارق جبريل
فى مايروج له حول اركويت؟؟؟
ونطالب ناس اركويت برفع عريضة للجهات النافذة؟
ومنع المذكور من دحول جنتنا اركويت؟؟
طارق ؟باقى لي دخان كوشة الجبل الزمااااااااان داك 0بدى يطلع الراس يادوووووووووووب؟؟
قوم لف ؟؟
| |
|
|
|
|
|
|
|
|
 Re: عن حبيبتي ( أركويت ) بحكي ليكم ... (Re: طارق جبريل)
|
تحية وعودة بعد غياب ،،
التحية لكل شعب اركويت ... واتمنى ان تكون اركويت دائما فى الخاطر... غبنا عن الموقع حينا من الزمن ... ولكن لم تغب اركويت عن الذاكرة...وتحية خاصة لمبتدرة البورد الاخت سمرية التى ادلت بدلوها وتركت البرود دونما مدد من قلمها الانيق ... والتحية لابن اركويت مزمل الذى اتحفنا سابقا تصوريا باجمل المعالم من اركويت قلب الخرطوم النابض... اتمنى على الاخوان سمرية ومزمل احتضان هذا البوست ونقل اخبار اركويت اولا باول ... افراحها احزانها ذكرياتها وما يستجد عليها من احداث...وسنعود ما امكننا لنبش المدفون من ذكريات الصبا...
ومليون ورده ندية لابناء اركويت اينما كانوا،،،
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: على محمد الخير)
|
العزيزة سمرية احييك على البوست والصور الواردة منك ومزمل واتمنى زيارة السودان قريباً لاتحفكم بصور 65
عموما محمد عقيد اخونا الصغير واللاعب الموهوب لكن صدقيني نصر الدين عقيد وهو دفعتي في الامتداد 5 الابتدائية
كان لاعب لا يُشق له غبار بس ما اداها وقتو وتقريباً هو الان في اوربا ومحمد عقيد في الرياض والتقيته في جدة زمان
...................................................................حجر.
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: الرفاعي عبدالعاطي حجر)
|
تعرفي اعتقد الاول عائد خضر اللاعب الجميل والزول الراقي ويمكن شبه ,المحترم طارق طبج صديق صاحبي ابوذر الباجوري ... الدوائر اعرفهم شكلاً دون اسماء فمن يمدنا والذاكرة خلااااااااااااااص زهمرت .
............................................................حجر.
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: الرفاعي عبدالعاطي حجر)
|
Quote: ياخي اركويت دي شدة ما قاحلة ما حلص مريت منها لقيت لي ود ابرك (ود دبرك)
حتة ما فيها ود دبرك دي حاجة بطالة خلاص |
ياودجبريل انت في ده والا في ناس عمتي كانوا ساكنين في امن ربهم في الامتداد جنب محطة سبعة ...... قوموا ارحلوا اركويت يازول مشينا بتنا معاهم والصباح قلنا نستكشف الحلة دي نشوف الحاصل
شنو ؟ ياخي تصدق لقينا ثعالب حايمة في الحلة ثعالب عديل fox يعني ....... قلت ليهم انتو متاكدين انو الحتة دي اسمها اركويت ما حديقة الدندر 
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: omer osman)
|
| Quote: شنو ؟ ياخي تصدق لقينا ثعالب حايمة في الحلة ثعالب عديل fox يعني ....... قلت ليهم انتو متاكدين انو الحتة دي اسمها اركويت ما حديقة الدندر |
صاح ..
بس الكلام دا فى اواخر سنة 1950م ..
بالله الزمن داك انت حاضروا .؟
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: الرفاعي عبدالعاطي حجر)
|
كان لابد ان اغيب ، وان اتوقف لبعض الوقت وانا كلما هممت بكتابة هذا الجزء .. اعتراني حزن قاتم ومخيف ..
الحزن الذي لا دواء له ، الذي ينهش في قلوبنا مع كل ذكري وحنين ..
الحزن الذي يظل قائما ، مدى العمر .. كانه طعنة في القلب لا شفاء لها ..
فحين يكون الموت هو سيد الموقف ، ويكون الرحيل الابدي هو النهاية التي تقف عندها الذكريات ولا تخطو للامام ..
كان لابد ان اخشى نفسي قليلا وانا اهم بكتابة هذا الجزء من ذكرياتي .. اخاف ان ياكلني الحزن بلا رحمة ..
ان يفترسني ، كما تفترس الذئاب .. فريستها ..!
هربت كثيرا ، من هذا الجزء .. خوفت علي وعليكم ..
ولكن يبدو انني لن استطيع ان اتجاوز هذا الرحيل مهما حاولت ، مهما هربت ..
سيبقى قائما ، يسرق مني لحظات الذكرى الجميلة ..
**
كانت صديقتي ، لا ادرى كيف صرنا اصدقاء ولكنها اصبحت بين يوم وليلة .. قريبة جدا مني ...
لم تكن جارتي او زميلتي او صديقة مشتركة .. ولكننا كنا نمشي بترحيل واحد ..
حافلة اسامة وهج (63) ، والتي كانت ترحل الكثير من الطالبات ، متوسطة وثانوي .. وطالبات الاحفاد ..
كانت هناك حافلتين عليها من الخلف مكتوب / وهج .. والذي فيما بعد عرفت انها اخت اسامة الصغيرة ..
هذه الحافلة شهدت لنا بايام مدرسية ، جميلة وشقية ، شقاواة الطالبات داخل الحافلة وخارجها ..
غيرة البنات ، الضحكات البريئة ، جنون المراهقات .. يا لها من ايام ..
تعرفت للكثير من بنات اركويت عبر هذا الترحيل ، والذي جعلنا كأسرة واحدة ..
هي كانت واحدة من هؤلاء .. تعرفت علي من خلال الحافلة ثم تطورت العلاقة بيننا .. على مهل ..
ولكنها كانت تنوي تعرفني اكثر، صدفة ما جعلتها تعرفني .. وتعرف اين اسكن ؟!
جات لزيارتي ذات يوم ، وقالت لي : سجلتي في اي كورس ؟!
اخبرتها انني وجدت كل المعاهد التي كنت انوي الالتحاق قد اقفلت سجلاتها ..
واكتفت ..
اخبرتها انني سمعت ان هناك معهد الفارابي بالامتداد ..
قريب من معهد صلاح .. وربما ساسجل به .. تمهيدا لامتحان الشهادة .. طلبت مني ان تذهب معي لنسجل سويا ..
اتفقنا ان نذهب في اليوم التالي ..
جاءتني في البيت .. طلعنا الشارع مرورا بمنزل بيت الشهيد ( عثمان بلول ) .. كان ضمن الضباط اللذين تم اعدامهم في رمضان ..
...
ولم اعرفهم الا بعد حادثة الاعدام الشهيرة ، وذلك بسبب انتقالهم الحديث لهذا المنزل .. المقابل لشارع عبيد ختم ...
كنت دائما انتظر حافلة وهج امام بيتهم ، في تلك الساعة المبكرة من الصباح ..
مررنا بالبيت وانا احكي لها عن قصة هذا الشهيد ، وعن زوجته الارملة وعن اولاده..
وعن الحزن الذي غطى سماء حلتنا تلك الايام ..
ثم عرجنا نحو البلابل .. حيث الطريق المؤدي الى محطة سبعة .. ..
ويا له من موقف للمواصلات .. فليس هناك اي مواصلات نهائيا ، تأخذنا لمحطة سبعة ، لاشيء ..
الركشة لم تكن قد عرفت دقداق الخرطوم بعد ...
.. لاشيء يمكنه ان ياخذنا الى حيث نريد ..
الا ( الملح ) .. لا ادري كيف فجاة اصبح ( يا عم قدام ) .. مركبة مرخص لها للجميع ....
مركبة عامة لا تدفع فيها ولا فلس ، يمكن ان تكون بوكس دوبل كابينة .. او دفار .. او لاندروفر ..
او صالون .. واحذروا هذه الاخيرة ( الان) ..
في هذه المحطة ( الملحية ) يقف الجميع .. نساء ، رجال .. اطفال .. طلبة .. عمال ..
الكل ينتظر من كان له فضل ظهر .. .. اوقات كثيرة كنا ننتظر اللاشيء ..
كنا ننتظر بوكسي لن ياتي .. ثم نقنع من خيرا فيها ونقطعها كداري ...
ايييييك ، ياما مشينا كداري .. من اركويت للامتداد وبالعكس ،
ونسبة لوجود عوائق كثيرة في ذاك الميدان الغريب والذي اصبح الىن بقدرة قادر ..حديقة دولية ..
ورغم المناسبات الكثيرة التي حضرتها فيه ولكنه لا يزال يحتفظ بغموضه القديم ..
لا تعرف له اول ولا آخر .. ميدان حدادي مدادي ..
وقد قيل لنا في تلك الايام ان فيه بعض الرباطية بالليل والنهار .. كمان ..
لذا اصبح شارع البلابل والذي فيه الآن مستشفى القلب ونور العيون ..
هو الشارع الوحيد الذي نسلكه للوصول للصحافات والامتداد .. ..
كنا نصل محطة سبعة بشق الانفس في باديء الامر ولكن سرعان ما اعتدنا على الامر ،
فاصبحنا لا نعول كثيرا على ( الملح )
خاصة لو لم يكن هناك مارة غيرنا ، ..
وكانت ايام كلية الفارابي هي اجمل الايام التي ربطتني بالعالم الخارجي .. لاركويت ..
ناس الصحافة والشجرة .. والديم ..والعشرة ..
والقوز والحلة الجديدة ...
المعهد كان يبدأ من الصباح وينتهي بعد الظهر ، بنفس المعهد كانت هناك فصول لطلاب جامعة الفرع .. كان يضج بالطلبة .. والحماس ..
وفي الايام التي اقترب فيها موعد العودة للمدرسة ، عملوا لينا معسكر يبدأ بعد الظهر وينتهي في المساء ..
كان صعبا علينا نحن ساكنات اركويت ان نرجع ونعود مرة اخرى ..لذا اصبحنا نقيل .. ومعنا بعض سكان المناطق الاخرى ..
البعيدة ، وسلام لناس الشجرة ، الحلوين ،، رشا سالم وايمان عابدين .. كانت ايام لا تنسى ابدا ..
في الفترة التي كانت استراحة لنا ، عملنا كورال جميل .. وبقينا نصدح بالغناء .. ومعاي الجميلة رشا والملهمة ايمان ..
والنبية باشمهندس نبيه .. واخرين .. ولا انسى تلك الصواني التي كانت تاتي الينا محملة بما لذا وطاب من الماكولات ..
وشكرا لاصدقائنا بالامتداد .. اللذين حملوا تلك الصواني اليومية من مطابخهم .. ملاح الخدرة بالقراصة ..
والدمعة والمحشي وسلطة الاسود .. يا الله .. !
ايام تحمل في طياتها الكثير من الفرح الجميل ، الشغف للمعرفة .. والتطلع للمستقبل ..
والمنافسة الشريفة ..
...
ولكن تبقى الذكريات فيها ، ذكريات مؤلمة وموشحة بالسواد ..
لان ما شاركتني لها ، قد رحلت للدار الآخرة ..
رحلت بصمت حزين .. وتركت جرح رحليها غائرا الى يوم الدين ...
ـــــــــــــــــــــــــــ
الف رحمة ونور ..للغالية اخلاص آدم .. .
.التي احبت الحياة ، وقاومتها .. كثيرا ، ولكن في النهاية انتصرت ارادة الله ...
..
...
..
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: سمرية)
|
النبيلة سمرية
شكراً بحق على هذا الوفاء
ربنا يتقبلها ويرحمها وهي
الحياة بين الصعب والسهل
بين الميلاد والرحيل ...
ذكريات مشوقة ومليئة بالشجن
والحنين ... لتلك المشاوير .
.............................حجر.
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: الرفاعي عبدالعاطي حجر)
|
شكرا يا حجر .. على المواساة .. وربنا يجبر بخاطرك دائما ...
ـــــــــــــــ
راسلني قبل ايام احد جيرانكـ باركويت ( جكسا ) ويطلب منكـ ان تسلفنا ذاكرتك ولنحكي بها عن تلك الايام .
عن الجيران ، واركويت مربع 65 .. والناس الحلوين القابعين في اقاصي الذاكرة ... وقال ليك ما تبخل علينا ..
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: سمرية)
|
الاخت سمرية لك خالص التحايا
بسال من شباب مربعكم الرائع اصدقاء زوملاء دراسة كثر
تحديد الاخ الشاذلي محمد عبدالفضل
الصادق صالح طمبل
ابوعبيدة ساكن فى حلة ناس الشاذلي
دينق صمويل ارو
الناس دى وين هسع فى البلد وله طلعو منها اكثر من 15 سنة
الواحد ما قابل الشباب ديل ولا عارف ليهم خبر اتمني ان يكون بخير
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: خـالد سـوميت)
|
ياخالد ، ياسلاااام على الراجل دا .. الصادق دفعتى فى مدرسة اركويت شرق فى مرحلة الاساس ( الابتدائية سابقاً )
وعلى حسب علمى انو الزول دا مقيم فى لبنان منذ سنوات .. اتمنى ان نسمع عنة كل خير ..
___
سمرية .. أحسن الله عزاءكم ، ربنا يرحمها بس اسمها دا ماغريب علًى ..!!
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: مزمل خيرى)
|
Quote: ياودجبريل انت في ده والا في ناس عمتي كانوا ساكنين في امن ربهم في الامتداد جنب محطة سبعة ...... قوموا ارحلوا اركويت يازول مشينا بتنا معاهم والصباح قلنا نستكشف الحلة دي نشوف الحاصل
شنو ؟ ياخي تصدق لقينا ثعالب حايمة في الحلة ثعالب عديل fox يعني ....... قلت ليهم انتو متاكدين انو الحتة دي اسمها اركويت ما حديقة الدندر |
مبالغة يا جنابو
ياخي ريحتني في حناني ذاته
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: طارق جبريل)
|
ود جبريل ؟؟؟
انشاء الله دائما المعلومات المغرضة والاشاعات ؟؟
تريحك يابا ؟؟
انتو ياولاد؟؟ الامتداد 0العملو فيكم دخان كوشة العمارات ؟شوية ؟؟؟
ربنا يشفى؟ ويغطى؟؟
ود جبريل انت ياخوى البراميل الزمااااااااااااان ديك ؟؟ وزعوه ليكم للموية ولا شنو ؟؟
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: معاوية عبيد الصائم)
|
Quote: راسلني قبل ايام احد جيرانكـ باركويت ( جكسا ) ويطلب منكـ ان تسلفنا ذاكرتك ولنحكي بها عن تلك الايام .
عن الجيران ، واركويت مربع 65 .. والناس الحلوين القابعين في اقاصي الذاكرة ... وقال ليك ما تبخل علينا .. |
العزيزة سمرية
شكري ,,,
جكسا ولدنا وثيرباك الزهرة والوحدة بعد داك في اعارة قوية لمساندة فريق الوحدة
بمربع 66 جكسا لو معاك صور ابعث بها وعموما نتحدث عن مربع 65 متى فرغنا من منبر
الهذا المربع الجميل بمعنى الكلمة .
شكراً لجكسا عبدالعزيز احمد بابكر وشكرا لكل مربع 65 ولسمرية التي اسست للمحبة بعنوان
رائع وجميل يحكى عن اركويت الجمال والفن والسماحة .
..................................................................حجر.
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: الرفاعي عبدالعاطي حجر)
|
شكرا للاخ عمر عبدالله على ( بالدائرة الحمراء ) على المساهمة الرائعة وارجو انك تواصل الحكى عن اركويت الجميلة
شرطاً يكون بالصور ..
__
زمان قلت اعمل فيها مكتشف واحاول اكتشاف جدوى زراعة هذه النيمات التسع التى نسقيها اجباريا كل صباح قبل ان نشرب نحن ذاتو وليلا عند انقطاع الموية نهارا .. فقلت بما انو الحمص كويس النشوف الورق لكن لقيتو زى الفروع مر مرارة دواء الملاريا غايتو جاى بجاى ما لقيت موضوع اصلو يستفيدو منو الناس من النيمة دى وطبعا زمان .. زمــــــــــان الضل دا كان راقد وما زى هسى وطبعا زمــــــان اى شى ما زى هسى .. يعنى مافى داعى يزرعو شجر عشان الضل والشمس ذاتو ماكانت حارة زى هسى .. وبما انو انا كنت قصير شوية وما بقدر احصل الحمص بتاع شجراتنا وابوى جننى بحكاية اسقى الشجر .. الشجر يا ود الحنود مرة صحونى من النوم بالليل انا قلت عشان اشرب اللبن حسب الحلم الكنت فيهو لقيت ابوى واقف لى زى حكم المصارعة وبيعد لى عشان اقوم اسقى الشجر .. وانا بخاف اسقى الشجر باليل لانو يوم كبيت الموية فى الشجرة فخرجت كمية من الجنادب والعناكب هاربة من الماء تجرى نحوى فاعتقدت انها تطاردنى وجريت حتى بيت ناس فاطمة الخير .. فقمت دقيت مسمار زنكى فى ساق شجرة واثبت لابوى انى فعلا ود حنود .. فقامت الشجرة ماتت اى انها ماتت قائمة .. واقفة على ارجلها لأن الاشجار تموت واقفة .. فزادونى رهقا وجلدونى جلد السعن الفيهو سمن وقبل داك دبغوه .. فاتتنى واحدة من بنات افكارى بأن استبق النيم الى السقيا فى حرب البقاء الاستباقية يعنى يا انا يا النيم .. فخرجت غضبانا اسفا على ان هذه الفكرة لم تراودنى قبلا .. لانو خرطوش الموية الاسود ( للاسف برضو اتورط فى حكاية جلدنا فى المدرسة ) الذى يمد بيتنا بالموية من كشك الموية كان لديه حتة كده يمرق فيها بره الواطه .. خارج الارض فى محاولة للفرار من ود الاحد دا .. المهم اخترت موقع مناسب بالقرب من احدى النيمات وقمت قعدت تحت النيمة وعامل فيها بحرت فيها واقلب فى الواطة الحواليها بى حديدة كانت سابقا جزء من طورية مصدية وفجأة غرزت الحديدة فى الخرطوش فتدفق الماء ليس بغزارة لكن بمقدار اضعف امدادات المياه الى بيتنا بحيث لا يتوفر فائض للنيم كانت خطة ذكية جدا فالجماعة بقو فى نفسهم .... و الموية جات والموية ضعيفة ويا ولد زح من برميل الموية دا .. جيبو الجركانة البيضا .. وانا ارتحت شوية .. لكن خطتى العجبتنى اصبحت فجأة فى صالح عدوتى النيمة بعد ان كنت اظن انى قد ضربت عصفورين بحجر لكن النيمة التى فجرت الخرطوش جنبها بقت تشرب مباشرة منو .. والشجرة دى سبحان الله بقت فجأة عملاقة خلاص لانو الليل كلو ترضع فى الموية .. لكن وين يا حنين .. ابوى جاب منشار حديد من السجانة ونادانى من الشارع حيث ود ابلنقا فى قمة سخانتها وقال لى - والشمس فى عز الامل – امشى قصقص فروع الشجرة دى من فوق يعنى تطلع فوق ليها وتقص الفروع الفى النص عشان تفرش ضلها ويكبر .. الا لعنة الله على النيم اين اغنام السودان الشرفاء من هذا النيم يا لثارات قريش اولاد الحلة يلعبون سكج بكج ويمرحون وانا اتشعبط فى النيم وتفرغ الذين ينتظرون دورهم فى اللعب لاغاظتى وبقو يضحكو على وان متشعلق فى النيمة بيد واحمل المنشار بيد ويقولو : قرد الطلح .. قرد الطلح فزعلت وبقيت بس دون كيشوت وتخيلته يحارب اشجار النيم بسيفه الخشبى واخذت اضرب يمين شمال فى افرع النيم وابوى من جوه البيت كان بعاين لى ومرات يقرا فى جريدة الكورة .. ومرات يكورك لى يا ود بتكسر المنشار .. يا ود الحرام … كررااك .. كسرت وانكسر المنشار .. فنزلت وتيقنت هلاكى .. مثل اولاد الحلة الذين انتظروا فرجة العمر بإقامة حد المنشار على … وتوقف اللعب النهارى واتخيلت ان الشارع كله وقف فى دقيقة حداد على المنشار لأن كلمة المنشار سمعتها من الجميع واخذت اصدائها تتردد فى المكان ونساء الحلة كلهم فتحو عيونهم فى دهشة لم تصلها حتى حين زواجهم .. وبما ان سور منزلنا بنيماته التسعة كان يعتبر سوق الحلة فهنا يفرش الخضار والحلويات والداندرمة والمقاشيش والدكوة والتسالى والشطة وعجور وهنا ملتقى العرض والطلب انتبهت الى ان هناك اكثر من عشرة نسوان توقفن عن الثرثرة .. حاجة زينب مرة الاستاذ هتفت سجمى يا ولد الليلة ابوك بكتلك .. اهكذا يرد الجميل يا حاجة فكم وكم حملت لك قفة الخضار عند انتهاء السوق الى منزلك .. حاجة حبيبة الصومالية قالت اصلو ما بتخلى ابوى يدقنى .. على النقلتى يمد معرضه فى شجرة النيم مقابل بيتنا .. بتاعت حاجة شريفة لكن دى نيمة كويسة ما ذى نيمنا الفقرى.. على النقلتى توقف عن اصلاح الاحذية.. الجزم المنتظرة الخياطة والتصليح مرصوصة ناعسة مفتوحة الفم قاعدة تبتسم ولا مندهشة ماعارف طيوف واشكال غريبة ظهرت ترقص قدامى شواطين وعفاريت مدت ايدا بالمديدة الحارة .. يعقوب الغسال اخذ يشر هدومه مستعجلا ليتفرغ للفرجة ..او هكذا تخيلت .. تدخل الاجاويد من حاجات ومارين جذبتهم رائحة الخوف المنبعثة حارة منى وتوصلوا مع ابوى لبنود صلح وعفو وذلك بأن اجيب ساطور و اعاود مهمتى فى اسرع فرصة ممكنة ...
عمر عبدالله
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: مزمل خيرى)
|
يا مزمل ... والله عمر عبد الله دا كنز ثمين جدا ..
شكرا يا عمر على هذه الذكريات المتدفقة ، وياريت تكتب لينا المزيد ..
طريقتكـ في السرد ، ممتعة للغاية ولطيفة لابعد الحدود ..
نتوقع منك المزيد ..
ومن كل شباب اركويت ، القاعدين يتابعونا من خارج المنبر ..
البوست دا حقكم كلهم .. اي زول عاوز يرسل لينا ذكرياته في اركويت
مرحب به .. معانا ..
لمراسلتي :
[email protected]
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: على محمد الخير)
|
الاخت سمرية
الاعزاء اهل اركويت
وبتاع كوشة الجبل ودجبرين
سلام ,,, ياود جبرين امانة كدا
اولاد الامتداد في كوشة الجبل كانوا
اكثر من اولاد اركويت يعني نحن كنا
عبر وانتم مقيمين حظكم يااااااااا
واهو دي شهادة زول مشترك بين الامتداد
واركويت وكلاهما حي متفرد وجميل جدا.
* سمرية ارجو مراجعة الماسنجر ستجدين
مراسلة من الاخ ابن مربع 66 حسام عبدالرحيم
وهو يحتاج تصحيح معلومة بخصوص رابطة طلاب جامعة
الخرطوم انذاك مودتي للجميع .
...........................................حجر.
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: الرفاعي عبدالعاطي حجر)
|
Quote: غايتو اخير ليكـ ، هسي بنرسل ليكـ رباطية اركويت ، يفرتقو ليكـ بوست الامتداد .. زقاق زقاق ..
|
يعني معترفين انكم رباطية ما ناس راقين زينا
ياخي انت رباطية وبت خالة اولاد ابراهيم عطا المنان
ما لافقة ياخي
ما تسمعي كلام حجر دة
حجر دة بريد الامتداد زي عيونه
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: الرفاعي عبدالعاطي حجر)
|
يا حجر ..
تحياتي لحسام ... وكل ناس مربع 66
بالله يا حسام نحنا عاوزين ذكرياتك ، اكيد انت بكون عندك قصص مختلفة .. حسب ظني .. ليك وحشة والله !
....
قصة كوشة الجبل دي يا حجر .. ما حتنهي الا نجوط لطارق جبرين .. البوست حقو ..؟
وبعدين ما تنسوا . نحنا عندنا خبرة طويلة في ( فرتيق الحفلات ) ، حيغلبنا بوست .. من ستة ضلف ؟
شباب اركويت جاهزين ..؟
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: سمرية)
|
التحية لكل ابناء اركويت فى كل انحاء الدنيا... ورمضان كريم وكل عام وانتم بالف خير....
بعد محادثة هاتفية مع ابن اركويت وابن مربع 68 الاخ هيثم ابشر...المقيم بالمانياوسؤاله عن احوال اركويت ...نعيد رفع هذا البوست من اجل اجترار الذكريات ... مقرونا معها خالص الدعوات والامنيات الطيبة بمناسبة شهر رمضان المبارك ...
وكل عام والجميع بالف خير،،،
| |
|
|
|
|
|
|
|
|
 Re: عن حبيبتي ( أركويت ) بحكي ليكم ... (Re: على محمد الخير)
|
سلام يا شباب وشابات أركويت القديمة
النذير حجازي من مربع 59
الإبتدائي مدرسة أركويت شرق الإبتدائية بنين - مركز إمتحان الشهادة الإبتدائية مدرسة هيرمن جماينر
المتوسطة مدرسة أركويت القديمة المتوسطة بنين - مدرسة البيلي
بالمناسبة يا هبوية تعرفي مزمل خيري دي دفعتي ومن الشهادة الإبتدائية سنة 86 ما قابلتو إلا في بوستك هذا، يعني 25 سنة ما قالبتو إلا هنا، شوفتي الدنيا دي ضيقة كيف
إن شاء الله سأعود لسرد الذكريات عن أركويت القديمة مدينة الغبش ما الحناكيش الهسا ديل لوووول
تحياتي للجميع ورمضان كريم
ويا مزمل خيري عليك الله ساعدنا بالصور عن مدرسة أركويت شرق ومدرسة البيلي
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: النذير حجازي)
|
أوووة حبيبنا ابوالنيز ... حليلك وحليل ايامنا فى شرق والبيلى
تصدقى ياسمرية الود النذير دا قاعد هنا وماكنت عارف الا كلمنى هشام ود حلتكم .!!
أكثر من 25 سنة ماشفتو ولا شفت اخوهو ابراهيم ...
| Quote: ويا مزمل خيري عليك الله ساعدنا بالصور عن مدرسة أركويت شرق ومدرسة البيلي |
والله ياريت ياالنذير ... كانت عندى صور جماعية لكن محل مشت ماعرفتها !!
لكن لميت فى الصور دى حاول اتذكر لى ديل منو .؟
__
عندك جائزة مالية مقدرة اذا عرفتهم كلهم ...
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: النذير حجازي)
|
Quote: 1) عبد الرازق أحمد حسين
2) طارق بابكر سيد أحمد
3) جعفر
4) متذكر الشكل بس نسيت الاسم
5) مزمل خيري
|
..
ماشاء الله ياالنذير ... ذاكرتك ماشاء الله لسع تمام ..
فعلاً الاول عبدالرازق احمد حسين
والتانى المهندس طارق بابكر والله يا النذير تشوفوا ياهو طارق زاااتو بتاع الابتدائى ...
والثالث جعفر ابراهيم ( ابومركوب ) واشتهر بابومركوب لانو كان عندو مركوب كان لابسو من سنة اولى لحدى سادسة
عشان كدا كنا بنقول ليهو جعفر ابومركوب
الرابع دا اخونا خالد محى الدين محمد بابكر ... اتذكرتو .؟
والخامس ابوتفة دا شخصى الضعيف
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: مزمل خيرى)
|
Quote: ماشاء الله ياالنذير ... ذاكرتك ماشاء الله لسع تمام ..
فعلاً الاول عبدالرازق احمد حسين
والتانى المهندس طارق بابكر والله يا النذير تشوفوا ياهو طارق زاااتو بتاع الابتدائى ...
والثالث جعفر ابراهيم ( ابومركوب ) واشتهر بابومركوب لانو كان عندو مركوب كان لابسو من سنة اولى لحدى سادسة
عشان كدا كنا بنقول ليهو جعفر ابومركوب
الرابع دا اخونا خالد محى الدين محمد بابكر ... اتذكرتو .؟
والخامس ابوتفة دا شخصى الضعيف |
العزيز مزمل عليك الله لقيت أخووك كيف؟! عليك الله ما ختري؟!
عليك الله يا مزمل خليني أتبوبر شوية بذاكرتي الحديدية دي
ياخي إنت نسيت أنا دخلوني المدرسة والله مستمع وجيت الأول؟!
وكان مشترك معاي ود ناس البلابل اسمو طلال بس اسم أبوهو منو ما متذكرو
لأنو درس معانا الفترة الأولى من الصف الأول ونقلوهو مدرسة العمارات
ونحن الشينين قاعدين في مدرسة أركويت شرق
طبعاً ضحكتني بي جعفر أبو مركوب وفعلاً إتذكرت لقبوا كان راجل ظريف
ودمو خفيف، ودائماً بكوي ملابسو لوول، ياخي دي أيام لا تعوض
طبعاً من دفعتنا بتاعت الإبتدائي والذين إنتقلوا لرحمة الله هم:
1) تقي الدين بكري سر الختم مربع 54- توفى في الجنوب برتبة ملازم
2) هثيم مصطفى مربع 63 - توفى في الجنوب برتبة ملازم
3) منتصر تاج السر مربع 63 - توفى غرقاً في بحر الجريف
تحياتي يا مزمل وفي إنتظار مزيد من الصور، وبالمناسبة بتذكر أستاذ السر
لمن قال شجروا المدرسة وكل مجموعة تتصور مع الشجرة التى قامت بزراعتها
بتذكر مجموعة من الصور، و ح أشوف سيف الدين سالم لو عندو صور لينا في الإبتدائي
ح أنزلها في حوش هبوية دي
تحياتي ليك يا ملك
وشكراً يا هبوية على هذه النافذة الطيبة
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: النذير حجازي)
|
Quote: ياخي إنت نسيت أنا دخلوني المدرسة والله مستمع وجيت الأول؟!
وكان مشترك معاي ود ناس البلابل اسمو طلال بس اسم أبوهو منو ما متذكرو |
كيف مابتذكر .!
بتذكر ابراهيم كان بيجى المدرسة وماسكك من ايدك ومتذكر أنك كنت قصييير
طلال ... أيواااة قصدك طلال الفاتح ..!
متذكر طلال لمن جابوهو المدرسة كان جاى من برة السودان ونحن فى المدرسة ماكان عندنا كنب وبنقعد فى التراب فى الواطة
تانى يوم جاء المدرسة وشايل معاهو كرسى وخت الكرسى فى الصف الاول وناس خط 100 غرب ( ناس الصف الاخير ) كانو بيشاكلوهو أنهم ماشايفين السبورة لانو قاعد فى الكرسى ... لحدى ما أمو جات حولتو من المدرسة ..!
Quote: 1) تقي الدين بكري سر الختم مربع 54- توفى في الجنوب برتبة ملازم
2) هثيم مصطفى مربع 63 - توفى في الجنوب برتبة ملازم
3) منتصر تاج السر مربع 63 - توفى غرقاً في بحر الجريف
|
ياخ ماتوجع قلبى بالسيرة دى ياخ .!
هيثم ومنتصر اولاد حلتى واتربيت معاهم فى حلة واحدة
الف رحمة تنزل عليهم
Quote: تحياتي يا مزمل وفي إنتظار مزيد من الصور، وبالمناسبة بتذكر أستاذ السر
لمن قال شجروا المدرسة وكل مجموعة تتصور مع الشجرة التى قامت بزراعتها
بتذكر مجموعة من الصور، و ح أشوف سيف الدين سالم لو عندو صور لينا في الإبتدائي
ح أنزلها في حوش هبوية دي
|
ياريت لو عندى والله ... كدى شوف لينا سيف الدين وانا بشوف هشام ديدى هنا .!
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: مزمل خيرى)
|
سلام يا شباب وشابات اركويت القديمة يا جماعة والله أتلومتو يا مزمل خيري وهبة عبده، ياخي
ولدنا منوت بول لاعب السلة الأمريكي الشهير ومن سكان مربع 49 يتوفى وما في زول فيكم دق خيمة
العزاء ليهو، اللهم أرحمه رحمة واسعة وأسكنه فسيح جناتك مع الصديقين والشهداء وحسن أولئك رفيقاً
وإنا لله وإنا إليه راجعون
| |
|
|
|
|
|
|
|
|
 Re: عن حبيبتي ( أركويت ) بحكي ليكم ... (Re: النذير حجازي)
|
Quote: رحيل نجم كرة السلة الأمريكي السوداني منوت بول بعد مشوار حافل في الملاعب
21 يونيو 2010 - 12:23 صباحامرات المشاهدة : 1004
منوت بول في إحدى مبارياته
القاهرة : سمير بول
رحل نجم ولاعب كرة السلة الأمريكية السوداني الأصل منوت بول عن عمر 47 سنة بمستشفى جامعة فيرجينيا فى شارلوتسفيل حيث كان يعالج من مشاكل في الكلى والجلد .
وقال توم ريشارد المدير التنفيذى لمجموعة "شروق السودان" للأعمال الخيرية :( السودان والعالم فقدا بطلاً ومثالاً لنا جميعا ).
منوت الذي ينحدر من قبيلة دينكا" توج " من منطقة توراليى بقوقريال بولاية البحيرات كان مجرد فتى يافع يرعى الأبقار بمنطقته ولكن طوله البالغ 7 أقدام و7 بوصات - مايعادل المترين ونصف - ووزنه البالغ 102 كيلو ساعده في أن يحترف لعبة كرة السلة بالولايات المتحدة الأمريكية .
يعتبر منوت المولد في 16 أكتوبر عام 1962 أطول لاعب مر على تاريخ الرابطة الوطنية لكرة السلة الأمريكية وهو ابن زعيم القبيلة الذي أعطاه أسم منوت ويعنى "نعمة خاصة " .
بدأ بول لعبة كرة السلة كهواية في عام 1978 ولعب في السودان لسنوات عدة مع فرق في واو والخرطوم. وفى تلك الفترة رآه مدرب كرة السلة من جامعة فيرلى ديكنسون أثناء تواجده في الخرطوم وإقناعه بالحضور إلى الولايات المتحدة الأمريكية للعب ضمن دوري الأبطال المحترفين.
وتقول الكاتبة والناشطة السودانية تراجى مصطفى عن منوت بول قائلة :( منوت بول قامة رياضيه عالميه وسودانيه " لافتة إلي أنه ورغم فقدانه لثروته مؤخرا فقد ظل حريصا يبني المدارس ويحرص على تنمية إنسان بلادنا ... ما أجمله هذا المبدع السوداني وحناجر الشعب الأمريكي و العالم تهتف باسمه في قمة مجده وتتسابق الانديه لتشجيعه)
اما مجدى بوب سودانى مقيم بمصر فيقول (هذا خبر فاجع لكل من التقى منوت بول وكل من أسعده الظرف بمخالطته ومعرفته عن كثب ، لقد عاش بيننا فى مدينة أوكلاند كلاعب فى فريق قولدن ستيت ووريرز فى النصف الثانى من ثمانينات القرن الماضى. وقد كان بحق سودانياً أصيلاً. تجسد فيه كل ما يتمنى الانسان من أخيه الانسان. كان شهماً وكريماً وطيب القلب. وكان منزله العامر فى آلميدا ملتقانا وكان حريصاً على دعوة الجميع بدون فرز. يتولى الدعوة بنفسه ويلحف فى طلب المشاركة حتى يثنيك عن أهم الارتباطات. كان أنيساً ولطيفاً مع الجميع).
وأصدر الاتحاد الرياضى الثقافى لشباب السودان بمصر برقية عزاء إلى أسرة وأصدقاء الراحل منوت بول جاء فيها ( ان منوت كان رجلا عظيما خدم السودان بكل ما يملك ، وفقده خسارة كبيرة لنا في السودان ) ، وقال رئيس الاتحاد كابتن هداف ميوين ان منوت كان لاعبا ذو اخلاق حميدة وكان قد دربه خلال فترة وجوده بالسودان .
وأدخل بول الى المستشفى فى منتصف مايو بعد عودته من السودان حيث شارك فى تأسيس وبناء عدد من المدارس وشارك فى الحملة الانتخابية لرئيس حكومة الجنوب سلفاكير ، ودخل بول المستشفى وخضع لعلاج غسيل الكلى ثلاث مرات ولكن حالته تطور إلى أن أصبحت متلازمة ستيفنز جونسون على جلده وحول الفم ووصل به الأمر إلى انه لم يستطيع أن يتناول الطعام لمدة 11 يوم ، ويعتقد توم ريشارد أن مثل هذه الحالات تحدث نادرا ومرض الجلد أو المتلازمة كانت رد فعل على دواء الكلى الذي كان يتناوله بول خلال وجوده في أفريقيا
|
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: مزمل خيرى)
|
العزيز مزمل خيري تحياتي ورمضان كريم
فعلاً منوت فقد عظيم لأركويت وللوطن.
إتصلت بسيف الدين سالم بالرياض السعودية، ودخل قرأ البوست دا، ووعدني بأنه سيغذيه بالصور عن مشاهير
كرة القدم بأركويت أمثال خالد جوليت وعباس جوليت وهم صغار، وبعض من تلاميذ مدرسة أركويت شرق.
الطريف في الموضوع، إنو قرأ حديثنا عن العزيز طلال البلابل، وقال قابلوا في السعودية مغترب، قال لي عليك الله طلال البلابل بقي يغترب، كان كدا السودان دا إنتهى نهاية بطل
تحياتي
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: النذير حجازي)
|
Quote: العزيز مزمل خيري عرفت الزول (بالدائرة الحمراة) دا؟
كان دفعتنا وزول جنو نضمي لووول
|
...
قصدك رضوان عثمان ..!
ياخ دا راجل حبوب والله ...
رضوان يعمل الآن فى مجال التمريض فى الخرطوم ...
آخر مرة التقيتة قبل سنوات فى مستوصف خاص فى اركويت ..
لا ادرى اين هو الآن .!
____
ماتطنش الايميل بالله ...
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: Dr.Elsadig Abdalla)
|
Quote: قصدك رضوان عثمان ..!
ياخ دا راجل حبوب والله ...
رضوان يعمل الآن فى مجال التمريض فى الخرطوم ...
آخر مرة التقيتة قبل سنوات فى مستوصف خاص فى اركويت ..
لا ادرى اين هو الآن .!
____
ماتطنش الايميل بالله ... |
العزيز أبو جوان (مزمل خيري)، والله ذاكرتك حديد
فعلاً رضوان عثمان راجل حبوب جدا
تعرف يا مزمل من البوست دا أديناك
لقب عمدة أركويت القديمة بقيت زي
الخردة كوستاوي عمدة أمريكا، دا أي
زقاق في أمريكا بعرفوا وبعرف السودانيين
اللي فيه.
بمناسبة إيميلي، والله يامزمل أنا في
هكر تقريباً من أعضاء سودانيز أون لاين
ديل متلحني في إيميلي، كل ما أعمل إيميل
بسرقوا مني لوول
سأرسل لك إيميلي الجديد على المسنجر
تحياتي
| |
|
|
|
|
|
|
|
|
 Re: عن حبيبتي ( أركويت ) بحكي ليكم ... (Re: النذير حجازي)
|
طيب يا مزمل خيري، أعرف لي الزول المعلم بالمربع الأحمر دا؟!
والله دا لو عرفتو ح نديك لقب عمدة أركويت عن جدارة
وأديك تلميحات:
قدامنا في المدرسة بدفعتين
فردة محمد عقيد (البعيو) أربعة وعشرين ساعة مع بعض
الغريبة كبروا برضو ما بتفارقوا، قابلتو مع عقيد سنة 99
في مركز الإعفاء المؤقت من الخدمة الإلزامية وكانوا الإتنين
مسافرين المملكة العربية السعودية.
تحياتي
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: النذير حجازي)
|
من مشاهير أركويت:
1. الفنانة هادية طلسم والبلابل - مربع 56
2. كابتن فريق السودان القومي كمال عبد الغني - مربع 63
3. الوزير عبد الباسط سبدرات - مربع ؟
4. الوزير شرف الدين بانقا - مربع ؟
5. الوزير صموئيل أرو - مربع ؟
6. الوزير بدر الدين طه - مربع 54
7. الوزير الصافي جعفر - مربع 54
8. لاعب كرة القدم عباس جوليت - مربع 59
9. لاعب كرة القدم خالد جوليت - مربع 59
10. الشاعر الكبير إسماعيل حسن - مربع 68
11. لاعب كرة السلة الأمريكي الشهير منوت بول - مربع 49
12. لاعب كرة القدم محمد عقيد(البعيو) - مربع 56
13. سعادة السفير الشاعر سيد أحمد الحردلو - مربع ؟
14. رجل الأعمال عبد الرحمن السلاوي مالك مصانع سلا للحلويات - مربع 61
| |
|
|
|
|
|
|
| |
سمرية
الرفاعي عبدالعاطي حجر
مزمل خيرى
أبو عبيدة البصاص
haroon diyab
وجدان جمال
معاوية عبيد الصائم
طارق جبريل
omer osman
النذير حجازي
Dr.Elsadig Abdalla
فيس بوك
تويتر
انستقرام
يوتيوب
بنتيريست