tmbis

Quote: طيييلة عمري ما حضرت لي حفلة العريس من الخرطوم والسيرة جات فرتقت ليها حفلة في امدرمان ..يدوهم صحن العشا يضربو الطعمية والمخلل والبطاطس ويبقو مارقين ..

Quote: اسة الحالة تمبس مدلعكم بي قصص الموردة اللي هي درجة اقل من قصص العباسية وحي الضباط .. بالله يا تمبس حصل شرطة النظام العام جات حايمة بهناك؟؟

.. اييييييييييه .. دنيا ...
كدي عليك الله خلينا في الحتة بتاعت شرطـة النظام دي ..
فرتيق الحفلات دا اديهو صنة شويـة بنرجع ليهو
ايام التسعينات بداية التسعينات والبلد لسة بطنـه طامة وحظر التجول من الساعة عشرة .. الحفلة بتنتهي من النهار .. كان عرس بت خالتنا اتربت معانا .. بتذكر يوم سبعة وعشرين رجب .. يا زول نقاره في السماء الحفلة بي البروف بادي عليه رحمـة الله ، انا (وطلال نجكو) كنا قاعدين للبروف في المسرح وكلما يجي نازل طلال يمسكو ليك من رجلو يقول ليهو .. سييلي الله تنزل من هنا ارميك
يا زول خالاتك ديل سوون البدع .. البروف يغني فريع البانـه:

فريـع البـانة المِـنْ نسمة يـتـمـايل حـاكى المـنقسمة
نار قـلبي بتوقد من وسمه تلـمع فـي خـديدا وفـر بسمه
الفـم الزي خاتم نص قسمة يالـمـاك داريه بَـي الغي قسمة
حـبـوب الفـاطـر دُرّيـة وسـطـك يتـلاعب بـحـريـة
الجـبـهة تـلاصـف بدرية والحـالة البَـيّ مـاها مـدريـة
وسـطـك خـاتم بـي زندو و صـديرك قـايم الديـس جندو
صـديـرك قـلع مـن عندو واكـتـافك فوقو ياروحي بتسندو
زُمـرُّد لـونـك اخــضـرّ دا الـولّـع قـلـبي و آخ ضـرّ
انـا جسمي فـدايتك ما ضرّ لـو كـان اتـدقـق واتـضـرا
الجيـد الوافـر كلـجـامه فـاقـت اعـرابـا و اعـجـاما
كالمـهرة العاصية في لجاما لقـلوبنا لحـاظك ياروحي رجامة
يا ريـل ابـزازك مـا نوعا مـن خـز وعسـجد مـصنوعة
قالـت لي اعطافا المرنوعة هي ثماري ولكن ياحبيبي ممنوعة

.. رقيص رقبـة زي ما الله خلقـو .. وزي ما جا في سفر رقيص السباته عند بتول واخواته ..
الليل ليل يا عمر .. الساعة تجاوزت الحادية عشر بي مراحل والدنيا برد ونقارتنا شغاله ..
آخر حاجة انتهينا زي حداشر ونص .. والناس منتشية .. تعمل شنـو .. ؟
معاي ود عمي يا زول ركبنا ليك الحديد جرينا عمارة الجزلي اولاد معهد الموسيقى والمسرح وقتها ربنا يطراهم بالخير اولاد جاهزين وفرد واولاد بيت ..
دقيقتين بس الجا طالع بي فنلة داخليه البي جلابية .. البوكسي اتملى صناديق سماعات جتارات على كمنجات على عدة نفخ .. قالو لي يللا اركب شارعك نحن بنجي لاحقنك .. بنشاقق بي نص الحلة .. من دربي دا قديت لي عبد الحي .. قالي شيل اي ساوند سستم من عندك ..
جرينا ثواني بس شدينا الساوند جوه البيت الحوش بلينتي بس .. الما لقى ليهو مكان اتشعبط في الحيطـة ..
النقاره من جديد دورت .. طرب لي الصباح .. لحدت ما الشمش طلعت ..
اللذيذة فجأة كدا في عز الطرب .. والباب مفتوح للغاشي والماشي .. نتفاجأ ليك بي طارة جات داخله .. خمسة عساكر مدججين بالسلاح نظام عايزين تصريح الحفلة دي والحنك بتاع ترخو لينا الصوت وإلخ إلخ ..
في ظرف ثواني طلع ليك في وشهم .. ميــة سمير ..اتسلخت ليك كمية سميرات مبالغ فيها شي سمير بي اسم العقيد فلان .. النقيب فرتكان .. الملازم اول فلان .. اصحابك من ما بقو جايين ناس فرتقـه بقو في التخارجم .. والسلاح رطــن شي سلام عظيم .. وشي سلام سلاح .. وإلخ إلخ ..
بعداك اكرمناهم .. اتعشو يا زول عشا حبيبك وفضلة خيرك وحرسو لينا الحفلة لحدت ما الشمش طلعت ..
حسع دي كان بقت حفلة في بري والمعرض .. كان لحدت الآن العريس في (الرج)

(عدل بواسطة tmbis on 06-12-2013, 07:52 AM)