أجي يابت الحنه في الورك كمان ؟ لا يا خاله دا تاتو !#
طبعا أخر الصحيات في مجتمع الخرطوم العاصمة الان هو الوشم أو التاتو طبعا أخوك سمع حوار تاريخي بين نسيبه وزوجة ولدا تجمعني صلة الجيره بهم أنا كنت نايم والساعة كانت سبعه مع المغرب الباب حق البيت يدق بعصبيه قلت خلاس الجماعة نفذوا التهديد حقهم وجواك أبقي راجل بس مشيت فتحت وأنا صاحي من نومة الاستعداد للمساء والسهرة وأذا بي الحاجة العافية بت الزبير تقول تعال يا ولدي وصل زوجة أخوك لاهلها في المعمورة قلت الحاصل شنو يا حاجة أنشا خير خير بس سوي كلامي دا حاضر لكين بس القصة شنو ليه هي قاعدة معك وأنت براك كدي ألبس وتعال لينا نحن منتظرين في البيت رجعت أستحميت ولبست بسرعة والشمار عامل فيبني عمايل عايز أعرف بأي طريقة الحاصل ليه دي تمشي الان عند أهلها والحاجة مصرة وزعلانه زعل شديد المهم مشيت لحسام المرض يا حسام العربية في الورشة ممكن عربيتك ساعة كدا طبعا رمي لي المفتاح كب البنزين بالله ما في بنزين جري مشيت دقت باب حاجة العافية بيت الزبير وطولي مرقوا معي صمت رهيب زوجة الولد في حالة ذهول بتقول في كلام ما فهمت منو غير أنو أنت يا حاجة ما زوجي وزوجي شاف الحاجة دي وهو قبلان الحاجة في قمة الثورة قبلان ما غشيم ودلوكة ساي في راجل بيقبل بالحاجة الدين قال فيها أنتي في النار قعدت ألطف الجو يا حاجة خلاص حسي ماشة منك الكلمة الطيبة خير خليها مع راجلا أنتي العافية بت الزبير أنت بس أسكت سوق سواقتك يا حاجة أستغفري وبعدين الزولة دي صغيرة أمكن لانها كانت عايشه برأ ما بتعرف طبايعينا الحاجة بنفس نفس حار أنت اللي ماعارف شيء بس أسكت خلاص الموضوع مزعلني شديد أنا ! وهي كمان هاجت والله أنا ما عارفة منو المتزوجي فيكم أنت ولا ولدك ؟ المهم أنا قلت ليهم ياجماعة بالله ما في داعي أنتو أهل سكتوا ووصلنا العروس دخلت بيت أهلها ومعها الحاجة وأنا قلت ما بنزل دي معركة وأمكن يكون في ردود أفعال لا يحمد عافيها وهي الله الحق يقال البت جميلة وصغيره في السن بس متعجفرة شوية وعمر الزواج كلوا أربعة شهور مسكينة منتظرة ترجع هي والنسيبه لبلد العم سام والمهم بعد دقايق جات العافية بت الزبير عشان نرجع أمدرمان وهي أمدرمانية المزج والتعابير والثقافة كمان من الذين يحفظون الحقيبة عن ظهر قليب كتير ومرجع ما بيرجع لهيا الجريق في مسائل أغاني الحقيبة المهم ركبت وقلت لي أسمع أقيف في أول محل للرصيد عشان أشتري كرت كبير دايرة أكلم ولدي الليلة حاضر المهم وقفت في الطرمبة هي مشت لزول الرصيد وأنا قلت يا ود ما تسأل المسالة واضحة زي الشمس حسي !!! مشينا أمدرمان وصلت البيت نزلت طوالي نادت نعال ماشي وين أنت ما ح تشرب معي القهوة حاضر بس أودي العربية لحسام وأرجع ليك لما دخلت بيت الحاجه أظنها مستعجله ما عايزة زوجة ولدا تتكلم معهو قبلها كانت أتصلت وبتحكي في القصة يا أسامة كنت قاعدة مع عروسك بت المعمورة دي كانت بتشيل في جسما بالحلاوة شفت لي رسم في روك البت سألتها يا عفراء أجي يا بتي الحنه في الورك كمان ردت علي لا يا خالة دا تاتو قلت ليها التاتو دا شنو قالت دق الحلبه عندنا في أمدرمان الوشم سكلته طوالي بالبرطوش في وشها وكمان هي بت السود قلة أدب داشنو ولسان عفن (اللي أتزوجتها دي ال_______) أها اسمعني يا ولد دي ما مرتنا طوالي زي دي تمشي أهلها وهي حسي عندهم أتصل بيها وأحسم الموضوع يا نور عيوني أنا عافيا منك يا الهدي الراضي مع السلامة عارفك ما بتكسر بخاطري ودتك الله لا حولا ولا قوة الا بالله العجوز الحاقدة ما طلقت البت شفتو ا نحن بقينا كيف !!!!!!!!!!!!! فذلكة ناريخية عن التاتو أو الوشم في التاريخ العربي البعض يقول إنه جزء من موروثنا لو كنا حلبه المهم ما تزعلوا لو أنتو حلبه ندخل في الموضوع طوالي بل هوإعادة لإنتاج قيم حضاراتنا، وآخرونيقولون إنها بدعة الغرب وغزو ثقافي يرتسم حتى على أجساد شبابنا، بعد أن تم تشويه فكرنا وفضاءنا الجغرافي بأشياء هي بدع مستوردة، انه الوشم القديم الذي تجدد أو الجديد الذي يطرق هواجس أفكار شبابنا، والسؤال هل هي مهنة و فن لمزج الألوان لصور وأشكال تعبر عن ذاتها و رموز تكشف عن نفسها وأخريات تختفي خلف الحروف خوفاً من الصارمة الاجتماعية؟ أم أن الموضوع لا يخرج عن كونه صرعة جديدة لجيل لم يأخذ أدنى حقوقه بحاجة إلى الجديد مهما كان لونه وشكله وحتى درجة الغرابة فيه المهم أن يلفت انتباه الآخرين و يقول أنني موجود بينكم ولست عددا متمما في الإحصاءات وحسب. لمحة تاريخية عن ظاهرة الوشم كان للرسم على جدران الكهوف ولاحقا على الجسد الإنساني وظيفة اجتماعية وإنتاجية في المجتمعات القديمة وبالذات مجتمعات مرحلة الصيد والرعي، فالإنسان يرسم الطريدة التي يخرج لاقتناصها ويهاجم اللوحة بغرض قتل روحها كممارسة وطقس يسبق الفعل، أما على صعيد الجانب الاجتماعي فان إبعاد الروح الشريرة والتوظيف الديني بالتقرب من الإلهات كانت غاية الرسم على الجسد والذي عرف لاحقاً بالوشم. ويمكن اعتبار أن أول من اكتشف الوشم هم قدماء المصريين الذين مارسوا هذا الفن على الجسد الآدمي بين عامي 4000 و2000 قبل الميلاد واعتبروه نوعــــاً من افتداء النفس للآلهة، الوشم أو التاتو في مناطق واضحة في الجسم لسه ما ظهر لينا في الخرطوم لكين داخل أيوة الجسم موجود وخاصة لدي البنات أستغفرالله قالوا ديل في النار حسب كلام الحاجة العافية بت الزبير . (عدل بواسطة زهير عثمان حمد on 09-09-2013, 11:51 PM) (عدل بواسطة زهير عثمان حمد on 09-10-2013, 04:54 PM) (عدل بواسطة زهير عثمان حمد on 09-12-2013, 00:08 AM)

[رد على الموضوع] صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]