النساء يتحدثن عن الانتهاكات والتحرشات الجنسية لشرطة النظام العام

Quote: (حريات) نهر دم يربض تحت أقدامنا ولا نراه … نزف الكرامة وجرح الروح، دم الإذلال الحار ينسرب من الهمس المحزون لعشرات النساء اللائى تقدمن بافاداتهن لـ(حريات) حول الإنتهاكات القاسية التى تعرضن لها تحت( النظام العام ) المنفذ عبر شرطة النظام العام (أمن المجتمع). النساء اللائى تم التحرش بهن من قبل عناصر من النظام العام فى الشوارع وداخل الزنزانات بل وتم إغتصاب بعضهن داخل أقسام الشرطة ..الخوف الفاجر جعلهن يصمتن تحت الإبتزاز ب(سترة) تعرت لأجلها كرامتهن قبل اجسادهن. طال التخويف والإنتهاك (43) ألف إمراة فى عام واحد 2008 بولاية الخرطوم وحدها بحسب اقرار الشرطة ، وقال مدير شرطة أمن المجتمع لصحيفة المجهر فى الأول من يوليو الحالى (2013) ان شرطة أمن المجتمع بولاية الخرطوم إستكتبت في العام المنصرم 2012م، (17) ألف فتاة، بتعهدات بعدم لبس الزي (الفاضح)، و اقر العميد عامر عبد الرحمن مدير شرطة أمن المجتمع أن جملة التعهدات التي استكتبتها إدارته لعدة مخالفات بلغت (51) ألف تعهد خلال العام الماضي!!! وتخضع النساء للمساومات القذرة من قبل منسوبى النظام العام ويتم تقنين هذه الخطوة عبر إدارة الشرطة نفسها ، اذ قال مدير شرطة أمن المجتمع لجريدة المجهر إن إدارته كثيراً ما تلجأ للتعهدات حفاظاً على (قيم المجتمع) ولا تتسرع في فتح البلاغات ضد الفتيات اللائي يضبطن بلبس زي فاضح !!! وكأنما التعهد ليس إقرار بجريمة ويرتب عقوبة ان لم يتم الإلتزام به ، وهكذا تحول بعض عناصر النظام العام بقلة معارفهم ومحدودية تعليمهم وعدم كفاءتهم المهنية والأخلاقية الى مشرعين وقضاة ومنفذين. وفى مناخ السلطات غير المحدودة انفتح باب الإبتزاز والتحرش على مصراعيه . وان القوانين القمعية تجاه المرأة وعلى رأسها قانون “النظام العام” تجسيد واقعي للمشاريع (الحضارية) التي تعميها ظلامية موقفها من تبين انه ما من مشروع حضاري يقوم على إذلال النساء وهدر كرامتهن. ولقد انتهى المشروع (الحضاري) الانقاذى الذي تحميه سياط النظام العام الى عكس ما تمناه، إذ شهدت بلادنا انحطاطاً وتفسخاً أخلاقياً هو الأعلى. وفضلاً عن كونه مشروعاً للتجسس على الحياة الشخصية ولتتبع عورات الخلق ، بما فى ذلك من غمط للحقوق ومفارقة لصحيح الدين والاخلاق والانسانية ، فانه مع غياب الديمقراطية والمساءلة والمراقبة كمناخ يتحدد به النظام العام ويحدده انتهى كذلك الى ان المتجسسين من شرطة النظام العام هم الاكثر تشوهاً وممارسةً للدعارة بادعاءات الطهارة ، فانتهى الى حلقة مفرغة حيث يحتاج المتجسسون انفسهم الى من يتجسس عليهم ! وهكذا يتأكد يومياً ان الكرامة تصان بالحرية لا بالسياط . وقد تحصلت (حريات) على (18) افادة نسائية – شابات ونساء كبيرات السن نسبياً – منهن من اختارت ذكر اسمها ومنهن من فضلن لاسباب مفهومة الاشارة لهن بالحروف الاولى من اسمائهن ، وننشر الافادات يومياً وتباعاً ، وندعو النساء السودانيات خصوصاً فى الخارج حيث الامن النسبى الى توثيق شهاداتهن عن انتهاكات شرطة النظام العام . ويهدف هذا الملف الى الجهر بهمس الاف النساء ، وتحرير صراخهن. والى الدعوة لعتق الروح من الشعور بالوضاعة والخوف الذى يجب ان يستشعره المجرمون واضعو القانون ومنفذوه وحكومتهم. وهو بذات الوقت جرس بصوت حاد لكل قلب نابض للنضال والعمل الفاعل لإيقاف هذه الجريمة التى تنتهك كرامتنا جميعاً كنساء و رجال ومجتمع. ولمزيد من المعلومات عن النظام العام يرجى الاطلاع على الملف بقسم الجندر على الرابط http://www.sudaneseonline.com/?p=118565

Quote: الشهادة الاولى : 1- “ع، ز”: بائعة طعام فى الحراسة إغتصب العساكر النساء جماعياً . زميلتى إغتصبها أربعة فى ليلة واحدة أنا لو عندى ولد قال داير يشتغل فى النظام العام بنفضو وبقول ليهو ماعافية ليك لانه ده ما نظام عام ده انتهاك وإستغلال للسلطة .أنا مطلقة وأم لأربعة أطفال كنت قبل سنة ونصف شغالة طعمية فى سوق الفتيحاب بفرش فى المساء ببيع طعميتى وبيض مسلوق وبجيب عيش لى العاوز سندوتشات وفى الصباح كنت بقرأ بمشى الجامعة بقرأ فى جامعة النيلين. جنبى كان فى ست شاى”ح” من جبال النوبة اتعارفنا واتعاشرنا وبقينا أخوات بنخلص زى الساعة عشرة نرجع سوا هى تركب وانا أقطع الزلط أركب برضو لى بيتى . عساكر النظام العام ديل كانوا طوالى بيجوا يشيلوا مننا من غير قروش انا كنت بصبر عليهم لكن ظهر عسكرى كده كل يوم يتعشى ويشرب الشاى وبعد داك بيتكلم كلام فاضى كتير قررت انا وست الشاى اننا تانى مانديهو لا طعمية لاشاى فجاءنى قال لى أدينى طعمية قلت ليهو جيب قروشك أول فكيف الله يقدرنى وأقول ليهو كده قعد ينبذ ويهدد فينى انه والله مابنخليك تبيعى وكواريك شديدة فانا سكت ما اشتغلت بيهو بقى يجى كل يوم يعاين لى من فوق لى تحت ويعمل لى حركات وسمعت انه بيقول للناس إنى مشيت معاهو أها انا وكت سمعت الكلام ده زعلت شديد وواجهتو قدام الناس قلت ليهو أصلو المافيك ماببقى فيك وانا وكت أمشى أمشى معاك انت البوت لابسو ال###### حارسو حق الصابون ماعندو يغسل شرابو المهم فى لحظتا ديك مشى وجانى تانى يوم مع العربية بتاعت الكشة فى واحد عسكرى كلمنا قال لينا الزول ده مشى يجيب العربية قمنا دسينا حاجاتنا جوه الدكان وقعدنا ساى جاتنا العربية فيها صول قال لينا إنتو مالكم لئيمات مع العساكر مابتيعوا ليهم قلت ليهو انحنا ماعندنا شىء بنبيعو عاين لى وقال للعساكر أرفعوهن انا قلت أصلنا مابنركب عربية الكشة قلنا ليهم انحنا بنمشى وراكم بى ركشة .بعد كلام كتير العسكرى الكلمنا قبيل قال هو بجيبنا بى ركشة والصول وافق فركبنا بالركشة وصلنا القسم لقينا قدامنا 5 او 4 نسوان اول ما الضابط شافنا قال قاعدات فى الشارع وكمان معاها قلة أدب قلت ليهو والله انحنا ماقليلات أدب وأهلنا ربونا..قال لى لو عندكم أهل ما كان مرقتوا الشارع . قلت ليه انت مابتعرف أسرنا ولا بتعرف الظروف المرقتنا قال لى ماعندنا ليكم شىء غير العقاب ياستات الشاى فى النهاية قالوا نكتب تعهد ونمرق انا قلت ليهم انا مابكتب تعهد لانى رزقى فى الشارع وكان قلت ليكم بدى اولادى الجوع أكون كضابة . سألتهم انتو بتتحملوا مسئولية أولادى ؟ المهم فى النهاية طلعونا بالضمان وما دفعونا الغرامة لانه الصول نادانى قال لى انا حأخليكم تمشوا لانه عندى معاك” فهم”عملت عويرة وقلت ليهو خلاص كويس. بعد شهر جانا فى محل بنقعد أنا ما أديتو وش مشى شرب شاى عند “ح” و قال ليها: انتى من النوبة وصاحبتك دى من الجزيرة شنو الجمعكم على بعض. قالت ليهو لمتنا النيران دى ومعيشة وليداتنا. قال ليها ماتكلميها لى أنا دايرها . قالت ليهو الزولة دى صعبة وسكينها فى ضراعا كلمها براك انا مابكلمها. بعد أيام وانحنا راجعات لقيتو واقف لى جنب الزلط قال لى أركبى أوصلك قال لى انا دايرك بيتكم فيهو منو ، خلاص أنا عندى بيت فى مربع “7and#8243; بسوقك ليهو قلت ليهو أمشى بيتك بالحلال ولا الحرام يعنى؟ قال لى انا دايرك راجل ومرا. قلت ليهو نزلنى هنا انا مازولة كلام زى ده . بعد أيام جانا العسكرى الرذيل الزمان مع عربية الكشة خمونا وخموا عدتنا وساقونا لقسم النظام العام فى محطة “6and#8243; دخلونا الحراسة لقينا 3 نسوان قعدنا معاهم وطبعا مافى نوم صاحين لحدى الساعة واحدة صباحاً دخلوا علينا العساكر أربعة وكل واحد مشى على واحدة فى النسوان أنا اتكرفست على الحيطة والعساكر ما اشتغلوا بى النسوان بقوا يتصارعن معاهم .بعد عشرة دقائق كده جاء عسكرى ساقنى تراهم منتظرين بى حضرة الصول دخلونى عليهو قال لى “أبيتى تجى بيتى جبتك فى بيت الحكومة، انتى النوعية المابنفع معاها الا كده. خفت وقررت انى أغشو قلت ليهو انا ماعندى مشكلة بس هنا الحته ما مناسبة جرانى على كنبة قال لى تعالى هنا قلت ليهو انا ذاتى ما مستعدة والناس هنا داخلة ومارقة فى النهاية اقتنع لكن بعد ساعتين وزيادة وقال لى خلاص سوقى صاحبتك وأمشوا رجعت الحراسة عشان أسوق”ح” لقيتها راقدة ماقادرة تتحرك قالت لى : من انتى مشيتى العساكر ديل بيشتغلوا فينا عدلة وقلبة الواحد يفوت يجى أخوهو 4 عساكر رقدوا معاها وقدام بعض اى عسكرى مع واحدة والتانى عينو فيهم جماعى كده.بعد تعب قدرت تقوم . مرقنا بى كرعينا لحدى الشارع الرئيسى لقينا عساكر فى نقطة ارتكاز حكينا ليهم اننا مارقات من الحراسة شافوا حالتنا وبكاء “ح” وصلونا لى شارعنا . ثلاثة يوم “ح” ماكانت بتقدر تقيف على كرعينا، أول مابقت كويسة رجعت الدلنج طوالى كرهت الشغل والشارع . انا قفلت موبايلى وخليت الشغل فى الشارع .جمدت الجامعة ومرقت بتى الكبيرة من المدرسة وقعدت فى البيت أشتغل طواقى واتاجر فى ملايات من شدة الزعل جاتنى غدة بتعالج منها هسى . ماعندى اى مصدر دخل عندى ود أختى بيصرف علينا يوم يجيب حاجة نأكل يوم مابجيب نقعد على الله وربنا كريم. الناس ديل لازم يوقفوهم ديل كأنهم مسلطين على البشر ما لحماية الناس هم أكتر ناس بيقلعوا حق المساكين ربنا ينتقم منهم.

Quote: يبقي السؤال لماذا وصلن الي شرطة النظام العام او ما يسمي امن المجتمع من الاساس هل تم القبض عليهن من منازاهن

Quote: المحليات هم الاساس في كة ستات الشاي ولابد من الاهتمام بالمحليات ووضعهم في القائمة السوداء هم اخطر الشرطة لانهم ملكية يستخدمون صلاحيتهم اكثر من الشرطة ويستخدمون البطش والقهر ولابد من فتح ملفات ضد محليات ولاية الخرطوم

Quote: المحليات هم الاساس في كة ستات الشاي ولابد من الاهتمام بالمحليات ووضعهم في القائمة السوداء هم اخطر الشرطة لانهم ملكية يستخدمون صلاحيتهم اكثر من الشرطة ويستخدمون البطش والقهر ولابد من فتح ملفات ضد محليات ولاية الخرطوم

Quote: يبقي السؤال لماذا وصلن الي شرطة النظام العام او ما يسمي امن المجتمع من الاساس هل تم القبض عليهن من منازاهن

Quote: يبقي السؤال لماذا وصلن الي شرطة النظام العام او ما يسمي امن المجتمع من الاساس هل تم القبض عليهن من منازاهن

Quote: يبقي السؤال لماذا وصلن الي شرطة النظام العام او ما يسمي امن المجتمع من الاساس هل تم القبض عليهن من منازاهن

Quote: الشهادة الثانية (ر،م) موظفة.36 سنة، بحرى الضابط قعد جنبى وقال لى قولى لى اسم الممارسة الجنسية كنت فى تانية جامعة سنة 1998م. وفى يوم كنا ماشين رحلة مع أهل خطيبى كنت مخطوبة رسمى ولابسين دبل . الرحلة عاملينها لى عرسان أقرباؤهم جانى خطيبى بى عربيتو فى البيت وطلعنا مع بعض على أساس انه نمشى من بحرى لى أبو حمامة فى الخرطوم كان يفترض كل الناس تتلاقى هناك وتتحرك سوا لكن انا وهو اتأخرنا والوقت داك الموبايلات كانت محدودة فقررنا نلحقهم برانا فى الطريق العربية سخنت شديد فوقفنا العربية ونزلنا من الزلط جنب شجرة منتظرين العربية تبرد وبنتونس عادى فى شارع رئيسى والوقت حوالى 11 ونص صباحاً .كنت لابسة إسكيرت جينز من النوع السستته قدام على طول الاسكيرت فكنت قاعدة فى حجر والشارع فى ضهرى وخطيبى قدامى، لاحظت انه وشو اتغير فاتلفت لقيت عربية نظام عام بينطوا منها حوالى سبعة عساكر جايين علينا . سألوه بتعملوا شنو قال ليهم العربية سخنت بدوا يسألوهو منى وهم بيعاينوا لى شديد فقال ليهم دى خطيبتى ووراهم دبلتو فى يدو فقعدوا يستهزأوا بينا وأصروا يسوقونا القسم ركبونا البوكس ومشوا بينا مشوار طويل خالص لحدى “القطينة ” دخلونا لى قسم النظام العام هناك، المشكلة وانا نازلة بى الخوف والارتباك وبى علو البوكس حلجت السستة بتاعت الاسكيرت ولقيت روحى بالقنلة الداخلية قدامهم.قعدت أبكى وأبكى ساقونى لى مكتب براى وخطيبى لى مكتب براهو . بقيت أقول ليهم أدونى حاجة اتغطى بيها رفضوا وبقوا يحوموا حوالينى زى الكلاب يقولوا لى أحكى لينا بالتفصيل كنتى بتعملى شنو مع الشاب الانتى معاهو لو حكيتى لينا بنطلعك وكل ما أجى اتكلم أقول ليهم والله مابنعمل حاجة يسكتونى انه خطيبك ذاتو اعترف وقال هو كان بيعمل ليك فى كده وكده والكلام ده بمفردات سوقية شديد. جاء ضابط جاب لى فوطة ولا ملاية ماعارفة وقال لى طلعى الاسكيرت نرسلو لى خياط فى الحلة ونهر العساكر من حولى . حمدت الله انه فى انسان وسط الكلاب ديل قام فاجأنى بى انه جاء قعد جنبى وقال لى بى صوت عمرى ما انساهو لو عملتى لى زى مابتعملى معاهو هسه العربية توصلك لحدى باب بيتكم وكان ماعملتى لى ببيتك هنا فى القسم . بقيت ماقادرة أسكت من البكاء بجعر بى طول حسى. وهو يخوف فينى عشان أسكت فى الآخر قال لى خلاص قولى لى أسم الممارسة الجنسية بالسودانى انا بمرقك بقيت أقفل فى أضنينى من صوتو وأصرخ بعد شوية جانى خطيبى مسكنى وجابوا لى الاسكيرت لبستوا وساقونا بى البوكس بتاعهم لحدى مكان عربيتنا الوقت ده كلو انا ببكى وبرجف. خطيبى كان متوتر شديد وأول ما ركبنا العربية داس على البنزين وبقينا جارين فى الشارع بى أعلى سرعة ما كان قادر يتكلم انا بتذكر انى سألتو مرقونا كيف قال لى انه دفع ليهم قروش كتيرة . بعد فترة فسخت خطوبتى منو كل ما كنت بلاقيهو كنت بتذكر الصوت المقرف داك وكان هو عندو برضو احساس بالذنب والخجل منى رغم انه ماعمل حاجة لكن كرامتو الانهانت انا كنت بذكرو بيها عشان كده ماقدرنا نستمر قلنا لى بعض ولى الاهل أسباب كتيرة لكن انا بعد كبرت كده فهمت انه دى كلها كانت حجج وانه الأساس هو الذلة البقت أكبر من علاقتنا. لما أشوف اى عسكرى بطنى بتقبضنى وبتجينى حالة ممكن اليوم كله ما أقدر أعمل حاجة . بخاف منهم. طبعا القانون ده لازم يتغير لانه قانون مهين للنساء وبيسمح بى انتهاكات فظيعة ليهم.

Quote: الشهادة الثالثة ( س، ا) خريجة جامعة السودان.الخرطوم. الضابط كان بيعاين لى فى صدرى وقال لى: وأنا لو دخلتك الزنزانة دى بعمل فيك الدايرو. فى 2009م كنت أنا وصاحبتى ماشين فى شارع النيل زى الساعة 8 ونص مساء قصاد جامعة الرباط وقفت عربية شرطة النظام العام وسمعت زول بكورك يابت قومى تعالى انا ما اتخيلت انه قاصدنى من شدة ما انا مستبعدة عرفتو قاصدنى لما كورك فينى: اللابسة نضارات انتى تعالى قومى حيلك .. اتحركى..” كنت لابسة بنطلون ومعاهو بلوزة ساترة جدا وطرحة لكن لقيتو بيعنفنى وبقول لى انتى لابسة بنطلون ليه مش عارفة انه ممنوع!!! قلت ليهو ماعارفة قال لى : أركبى عشان تعرفى .قلت ليهم مابركب عربية الشرطة لو عاوزنى امشى القسم بمشى لكن ما بى عربية الكشات دى الناس لو شافونى يقولوا على شنو! ماف زول حيصدق انى عشان لابسة بنطلون سايقنى أصريت أكتر انى ماحأركب فى النهاية نزل وهددنى بالضرب – تنهدت بوجع وهى تتذكر- رفع يده وقال لى بديك كف أكسر ليك نضارتك العاجباك دى فى وشك. انا إنفعلت قلت ليهو بى ياتو حق وياتو قانون بديك حق انك تكفتنى. رد لى انه ده البعلموكم ليه فى الجامعات أنا بالغيظ رديت عليهو قلت والله انحنا ماعارفين سيدنا منو فى البلد دى. هاج زيادة وقال لىهم ركبوها عشان نوريها سيدا منو. العساكر هجموا على يجرجروا فينى عشان يرفعونى انا قلت لى واحد ماتضربنى انت ماعندكم أخوات؟ رد على رد عمرى ما حأنساهو قال لى انحنا أخواتنا ما########ات وانتو الم######ين البلد دى…جاتنى حالة من الهياج والكواريك ورفضت خالص أركب البوكس وبقيت أصرخ لمن اضطروا وقفوا بتاع أمجاد ونزلوا معانا عسكرى ركب معانا فى الامجاد لما وصلنا القسم الضابط المسكنى قال انى انا استفزيتو قمت انا قلت ليهم مع احترامى ليكم ده ما الكلام الحصل وحكيت الحصل بالتفصيل.قام نادى بت من الحراسة انا مابعرفا لكن عرفت انها قبضوها من نفس المكان برضو سألوها عن الحصل فشهدت ضدى وقالت انى رفضت أوامر رجل الشرطة وأبيت أركب البوكس. قام الضابط كتب البيانات وخلانى أطلع بره قام الضابط المسكنى نادانى فى مكتب تانى وكان شايل تلفونى الشالوهو منى أول ما وصلنا القسم وقفنى وهو بيفتش قدامى فى تلفونى قال لى انحنا عندنا حملة ضد المظاهر الفاسدة المتشردين الضاربين السلك والبنات اللابسات بناطلين زيك ولو انتى واصلتى تكونى لئيمة كده خطاب واحد من النظام العام لى جامعتك وحتودعى قراية الجامعة..وأنا لو دخلتك الزنزانة دى أعمل فيك الدايرو لاقانون ولا زول يقدر يحميك. نظراتو كانت ماطبيعية . كان واضح انه صعلوك وبعاين لى فى صدرى ويبتسم وهو بيتكلم. خفت شديد وفكرت انه لو رديت عليهو ممكن ينفذ تهديدو وممكن فعلا يعمل فينى الدايرو. فى الوقت ده صاحبتى كانت اتصلت بى ناس بيتنا وجاء زول قريبنا ضابط وكتبونى تعهد وطلعت حوالى 12 ونص بالليل. الحادثة دى أصلها مافارقتنى بقيت بحس بى طمام ووجع فى بطنى كل ما أشوف اى عسكرى ولا ضابط. وبرضو ما حأنسى موقف البت الشهدت ضدى .صاحبتى قالت لى انو طلعوها مباشرة بعد شهدت ضدى وانها قالت لى صاحبتى : الله يمرقها ساى صاحبتك دى ما اتفاهمت ولا رخت كده ما بطلعوها. لحدى الان انا مستغربة فى موقف الزولة دى وانها طلعت بدون حتى تكتب تعهد !!.

Quote: جنابو هيثم طمبل شكلك كدا وقع ليك ؟ اعمل حساب تانى ما تسال اسائلة بليدة زى دى بقع منك

Quote: الشهادة الرابعة (د، ع) خريجة جامعية . بحرى خلونا من الصباح لى المغرب تحت الشمس وفى بنات خايفات استسلموا لتحرشات من الضباط والعساكر. الكلام ده كان قبل سنة ونص تقريبا كده ، كنا طالعين رحلة لقرية الجزيرة سلانج كان يوم جمعة لما وصلنا لى نقطة تفتيش كان العساكر فى الصلاة وماكان فى زول فى الحته فمشينا طوالى ، كنا حافلة ومعاها 4 عربات صغيرة . جاء ورانا عسكرى ركب فى لورى رملة وحصلنا وقفنا .قال لينا ليه انتو ماوقفتوا؟ قالوا ليهو لقينا الحتة فاضية . شال الرخصة وبعد مناقشات رجعها ليهم وقال خلاص أمشوا وقبل مانتحرك جاتنا عربية النظام العام من قسم كنا واقفين قصادو ساقونا كلنا ودخلونا القسم كان فى بنات لابسات بناطلين غالبهم كانوا لابسين بناطلين انا ذاتى كنت لابسة بنطلون بس بى تونك طويل، دخلنا القسم وقفونا يستهزأوا بينا . كان فى ضابطة سفيهة جدا قعدت تقول لينا انتو أدوكم كم عشان تمشوا مع الأولاد ديل..حسينا بى الفضيحة قدام زملاءنا ..وواصلت تنبذ فينا بى كلمة سفيهة”صمت” كانت بتقول لينا “يا(.........)” ياما نافعات والعساكر يضحكوا والضابط المعاها يضحك . شالوا كل الموبايلات العندنا كان فى بنات ما لابسات طرح جابوا قطع ######انة بتاعت النظافة قالوا ليهم ألبسوها واستهزأوا بينا لساعات . ونزلوا كل الأكل بتاع الرحلة قعدوا يأكلوا فيهو قدامنا ولا كباية موية ماخلونا نشيلها واحد من الآولاد عطش شديد لاننا واقفين فى الحر فمشى المزيرة بتاعتهم شرب فضربوهو ضرب شديد ولمن قاومهم حلقوا ليهو صلعة. فى بنات كتار أغمى عليهم كانوا بجيبوا موية من التلاجة يكبوها فيهم وما بخلونا نمسكهم ولا نساعدهم. منعونا نمشى الحمام انا كنت بحنسهم أنا عندى كلى مابستحمل ما اشرب وما أخش الحمام رجلينى بقت ورمانة الجزمة بقت ضيقة فيهم. كان العساكر والضابط بينادوا البنات كل واحدة براها ومابتعرف حصل شنو واحدات بيجوا باكيات واحدات بيسكتوا ماعرفنا البحصل شنو . “بعد ضغط وإصرار” والله بصراحة عشان المعلومة تمشى مكتملة انا الضابط نادانى قال لى انتى لابسة كويس المطلعك شنو الرحلة دى قلت ليهو البنات التانيات ديل ذاتهم بنات كويسات قال لى فى اشارة بذيئة انتى جاية مع منو قلت ليهو مع فلانة وفلانة وفلان قريبنا من بلدنا قال لى يعنى فلان ده مثبتك ؟ مافهمت سؤاله قلت له يعنى شنو مافهمت قال لى يعنى الصقر بتاعك منو من الأولاد المعاكم ديل ؟ قلت ليهو انا مافاهمة كلامك ده لكن لو بتقصد انى عندى علاقة مع اى زول هنا الكلام ده غلط انا جاية مع صديقاتى؟ قال لى انتى ماخايفة أهلك يعرفوا قلت ليهو ماعندى مشكلة أهلى عارفين أنا وين ووريتوا طوالى رقم خالى ورقم ناس بيتنا قلت ليهو أتصل بيهم كلمهم أو أدينى أكلمهم. المهم طلعت بدون ما يلمسنى لكن البنات المعاى كلهن اتعرضن لى حاجات زى دى من الضباط والعساكر وفى واحدات استسلمن لانهم خايفات من أهلهم البتقول ليك حصل بوس والبتقول ليك مداعبات وحاجات ########ة كتيرة. لحدى العصر فى واحد قدر يهرب لى عربيتو فى الحوش فيها تلفون اتصل بى واحد لواء أبو واحد من الشباب المعانا وأول ما الشاب اتأكد انه أبوهو عرف قام قال لى الضابطة اللئيمة انه انا مابتقدرى تلمسينى انا ولد اللواء فلان الفلانى فارتبكت وبقت بتتصل بى تلفونات. شكلها اتأكدت وعرفت انه اللواء ده عرف فطوالى قالوا لينا أركبوا أمشوا ومافى زول منكم يحكى الحصل شنو فاتحركنا ، فى بنات الا شالوهم عدييل كانوا منهارات .التلفونات السمحة كلها رفضوا يرجعوها لينا ..انا رجعت البيت فى ناس مشوا المستشفى. فترة طويلة كل المجموعة دى بقت بتتجنب بعض . الناس كانت خجلانة من بعض ولا زى تقول شوفة بعض بتذكرنا اليوم الفظيع داك.

Quote: الشهادة الخامسة – موظفة. الخرطوم. اخوى بقول انه خلاص ما حيرجع تانى وانه الذلة الحساها فى البلد دى كرهتو فيها قبل سنتين بالتحديد رمضان قبل الفات فى اخر أيام رمضان كنا بنقضى فى حاجات العيد مشينا أنا وصاحبتى وأخوى الصغير لى سوق أمدرمان الوقت زنق علينا فقلنا نشترى سندوتشات وبارد ونفطر فى شارع النيل وفعلا مشينا هناك وقفنا عربية أخوى”م” وفطرنا جوه عربيتنا . صاحبتى جاها تلفون فطلعت من العربية وقفت فى الترتوار بتاع شارع النيل تتكلم أنا جانى تلفون قام أخوى قعد يهظر معاى قلعو منى بقيت أحاول أشيل منو التلفون وبنضحك عادى فجأة لقينا قدامنا عساكر وقفوا بى عربية النظام العام جنبنا وواحد منهم جاء فتح باب السواق وقال لى أخوى أنزل قام أخوى اتخلع قال ليهو فى شنو؟ نهرو بى أعلى صوت قال ليهو أطلع قلت ليك . قام أخوى طلع وهو بفتح فى الباب العسكرى التانى جانى قال لى أمرقى انتى برضو الضابط من العربية قال لى أمرقى نشوفك يمكن تكونى عريانة قال الكلام ده بى تفاهة شديدة. نزل وجاء على انا كنت خايفة شديد كرعينى بقيت ماقادرة أحركهم قمت نزلت وانا بقول ليهو انا مافاهمة انتو مالكم قام أخوى زعل لمن لقاهم بيتصعلقوا على فقال ليهم أختى دى أشرف منك وكلام زى كده فضربوهو ضرب فظيع انا بقيت أصرخ فضربنى الضابط كف لما كنت دايرة أقع فى الارض قال لى أقيفى بعيد وأرفعى الطرحة فى رأسك هسى بوديك القسم وهناك بعرف أعمل ليك شنو حسيت بى خوف رهيب انه فعلا ممكن يعمل فينى اى حاجة بطالة كان واضح انه زول ما كويس ما وقفوا ضرب أخوى وقعد هو يقول ليهم شوفوا بطاقاتنا حتتأكدوا اننا أخوان فى النهاية شافوا رخصتو وبطاقتى فعرفوا اننا أخوان . تصدقى انه بدل ما يعتذروا لينا واصلوا يشاكلوا فى أخوى انه انت أختك بتوقفا هنا ليه وانتو ربوكم وين تقعدوا تهاظروا أخواتكم فى الشوارع وكلام فارغ كتير فاخوى ركب وقرر انه نمشى نشتكيهم بس صاحبتى كانت داخت لمن بدا الموضوع قالت خافت شديد وماحست بى روحا الا وهى فى الواطة قامت ست الشاى مسكتها ورشتها بالموية لكن لانها كانت صايمة وجاءها هبوط مشينا وديناها المستشفى فعملوا ليها دربات ورجعنا متأخرين البيت فحكينا لى أمى فحلفت أخوى انه ينسى الموضوع وانه مايمشى قسم ولا حاجة قالت ليهو انحنا ماعندنا ضهر يقوموا يعملوا فيك أكعب من كده خليهم لى الله ..أخوى طلع من البلد بعد الكلام ده بى شهرين مشى الأمارات ومارجع تانى وبقول انه خلاص ما حيرجع تانى وانه الذلة الحساها فى البلد دى كرهتوا فيها وما حيرجع تانى اصلو السنة الفاتت رسل لينا مشينا ليهو.أمى حزنانة لى قرارو ده لكن انا قادرة أفهم انه كرامتو اتهانت وأنا برضو لو لقيت طريقة مرقة من البلد دى بطلع طوالى. أيوه انا خفت شديد من الضابط لانه قال لى هسى بوديك القسم وأوريك وكان بعاين لى بطريقة عفنة شديييد وانا سمعت من واحدة انه ساقوها بسبب بنطلون والليل كله كانوا بي########وا عليها فاتخيلت نفسى يحصل لى نفس الشى فخفت شديييد. مرات كتيرة بتذكر الموضوع ده بالليل بلقى روحى ببكى ، ما أظنى حأقدر أنساهو.

Quote: (ت،ب) أستاذة أساس، أمدرمان بلا خجل طلب منى العسكرى ان أجلس فى حجره الحادثة دى حصلت يوم 17 مايو 2011م بتذكر بى وضوح كل التفاصيل. كانت تانى سنة لى فى التدريس وكنت متحمسة خالص مشيت أنا وزميلاتى أتنين للمدرسة فى الخرطوم كنا بنحضر للعام الجديد وكان فى كورس فى المدرسة برضو. على نهاية اليوم طلعنا وصادفنا واحد من أولياء الأمور جاء يسوق طفله فأصر يقدمنا لانه المدرسة بعيدة من المواصلات وفى الاجازة مافى تراحيل. ركبنا معاهو فى بوكس وأصرينا انه لا الولد ولا واحدة من زميلاتنا ماتركب ورا فى البوكس لانه خطر. الطفل شالتو زميلتى فى رجلينها وزميلتى التانية قعدت فى رجلينى أنا…زميلتى دى كانت شعرها مقصوص ولابسة قميص كاروهات عادى وطرحة واسكيرت.. فجأة فى عربية ورانا بدأت تضرب فى بورى والراجل السايقنا مستغرب انهم دايرين شنو فى النهاية أشروا لينا انو يقيف بره الزلط ، اتخلعنا قام وقف. ووقف بتاع العربية قدامنا ونزلوا من بوكس برضو ثلاثة أشخاص السواق ونفرين،قالوا للسواق أنزل يايازول معاك شرطة أمن المجتمع ولاشنو كده الكلام ده كان بى هياج شديد قالوا لينا أنزلوا كلكم. خفنا شديد ونزلنا واحد منهم كان بيعاين لينا شديد وقال: كان فى واحدة شايلة ليها راجل فى كرعينا انا متأكد…لو ما الخوف كنا ضحكنا لانه الظاهر شاف زميلتنا الطرحة واقعة من راسها وشعرها مقصوص من ورا فاتخيلها ولد، لما قلنا ليهو كده قال ليها أكشفى رأسك لما كشفتو حسيناهم شعروا بى غلطتهم لكن بدل ما يعتذروا ويمشوا واحد منهم قال لينا: الزول الراكبين معاهو ده صلتكم بيه شنو؟ قلنا ليهو ده ولى أمر الطفل ده واحنا استاذاتو فى المدرسة. فى الوقت ده والد الطفل السايقنا بدأ يكورك فيهم انتو كنتو حتعملوا لينا حادث تضربوا فى البورى وتطاردونا عشان حاجة انتو ما متأكدين منها وكلام زى ده” الطفل بدأ يبكى لانه الكواريك كانت شديدة وزميلتنا الشعرها مقصوص بدأت تبكى برضو. فانا إتشجعت وبديت اتكلم معاهم قلت ليهم هسى انتو عايزين مننا شنو ؟ قال لى واحد أخرسى ماتتكلمى. اتهجمت من الأسلوب قلت ليهو ليه أخرس أنا والله تخرس انت المستخدم سلطتك للتسلية بى بنزين الحكومة تطارد فى حاجات شوف العين ما متأكد منها وتجى تنهرنا بدون سبب.جاتهم حالة زى الهستيريا وقالوا الا يركبونى البوكس الراجل بقى يحاول يناقشهم رفضوا وقالوا ليهو انت أمشى الطفل بقى يمسك فى أبوهو ويبكى وزميلاتى يكوركوا فقلت لى الزول يمشى عشان الطفل ممكن يحصل ليهو انهيار عصبى من شدة البكاء وطمنتوا انه المشكلة حتتحلا . ركبت البوكسى وزميلاتى برضو ركبوهم معاى..اتحركنا مشوار ثلاثة اربعة دقائق ووقفوا نزلونا والزول الاتشاكل معاى” السواق” نزل والعساكر الاتنين قعدوا فى البوكس ورا قالوا لينا أنزلوا لما نزلنا قال لينا بى طريقة فيها بذاءة كده” تعالوا أركبوا قدام زى ماكنتو راكبات قبيل” فى ضغط على حروف معينة . قلنا ليهو انحنا مرتاحات هنا . غمز لينا عديل وقال: أوعدكم ترتاحوا هنا برضو. وبقى يقول لى تعالى أقعدى هنا ويشير لى لى حجره !!!! فى الحته دى انا فهمت اننا ممكن نستفيد من الحكاية بتاعت الصعلقة دى لاننا كلنا مابنقدر نمشى القسم قلت ليهو انحنا هسه مستعجلات عشان يتخيل انه ده ترتيب مواعيد فعلا نزل طوالى وقال لى خلاص تانى ماتعترضى رجل أمن فى عمله . أدينى تلفونك أديتو تلفونى وأصر يشيل تلفونات الباقيات وعادى ودعنا ومشى. وقفنا قريب نص ساعة نبكى .ما عرفنا نمشى وين فرجعنا المدرسة لقينا والد تلميذنا هناك حسيت بى شعور جارح خلاص والطفل بيسألنى : يا مس البوليس فكاكم !!” طمنت زميلاتنا والمديرة ولحسن الحظ كانوا لسه ما اتصلوا بى أسرنا.. طلعنا الشرائح جدعناها وحاولنا ننسى القصة لكن ما أظنها بتتنسى. انا ناشطة فى قضايا كتيرة لكن أكتر حاجة بتمنى انها تتغير قانون النظام العام السيىء ده البيسمح لى اى واحد يتحرش فى الشارع بى اى بت “.

Quote: الشهادة السابعة (هــ، م) 27 سنة. خريجة كمبيوتر. لما اتذكر الذلة الحسيتها النوم بطير من عينى والله انا مابحب خالص اتكلم عن الموضوع ده لانه للأسف الحدث ده إرتبط بيوم مهم فى حياتى كان فى اليوم المشيت فيهو اخترت الدبل لخطوبتى الكانت تانى يوم طوالى الخطوبة الرسمية والحفلة ولبيس الدبل. مشيت انا وأخوى وصديقتى وزوجى الكان فى الوقت داك خطيبى. الكلام ده شهر اكتوبر الماضى . بعد ما إشترينا الدبل خطيبى عزمنا على العشاء فى مطعم فى الرياض اسمو my place نزلنا قدام المحل كان فى زحمة ماطبيعية وجوطة انا ما انتبهت، أخوى كان بفتش على موقف لى العربية وانا وصديقتى وخطيبى اتحركنا تجاه الباب سمعت واحد بيلفت فينى قال لى انتى داخلة المطعم ده مع منو الزول ده قريبك قلت ليهو ده خطيبى، ليه فى شنو؟ خطيبى قال ليهم دى خطيبتى وبكره خطوبتنا قالوا ليهو لو عندك قسيمة ورينا ليها لو ماعندك قسيمة تسكت بس .. بدأ يجر فينى انى أركب معاهو لما خطيبى بدأ يقول ليهو ما تلمسها نزلوا من البوكس مجموعة وبقوا يقبقبوا فيهو ويدفروا فيهو انا قلت ليهم البوكس ده مابركبوا فنزلوا عسكرى وساقونا لى قسم النظام العام فى أركويت حوالى الساعة 9 ونص. كان أخوى وصديقتى كلموا أهلى. البيت كان مليان خالاتى وجاراتنا وقريباتى بيجهزوا لى الخطوبة فكلهم جوا جارين القسم . الضابط فى القسم كان بيتعامل عادى وكان داير يكتبنا تعهد وخلاص بس أمى لما جات كانت زعلانة شديد فنبذتهم من ضباط القسم لحدى البشير قالت ليهم تكسروا بى خاطر بتى وأهلها ملمومين يقولوا عليها شنو الناس؟ انتو لقيتوها فى شقة ولا فى حته مشبوهة لقيتوها مع خطيبها ومع أخوها وصاحبتا. فقام الضابط قال ليها انحنا قبضناها عشان البنطلون ممنوع. أمى قالت ليهو المنعوا منو انا بتى دى مرقت قدامى بى اللبس ده مستور وعاجبنى انا ولية أمرها انت الدخلك شنو؟ المهم حصلت جوطة شديدة وكواريك . دخلونى لى مكتب والعسكرى الجابنى قال لى نزلى الطرحة من رأسك لما استغربت قال لى انتى لما ناديناك الطرحة كانت واقعة انا داير الضابط يشوف شكلك بالطريقة السقناك بيها. قلت ليهو انا ماكنت كاشفة رأسى وهسى ما بكشفو قام مده يدو داير ينزل الطرحة غصبا عنى فقمت نزلت الطرحة براى عشان هو مايهبشنى قال لى فكى المشبك نشوف شعرك ..قلت ليهو انا ماكنت فاكة شعرى وما حأفكو لو قتلتنى . ودونى الحراسة لحدى ما الضامن يجينى ريحة الحراسة كانت مقرفة- سكتة طويلة جدا- الموضوع ده ذكرتو ساى بتألمنى – سكتة ثانية – المهم وقفونى بره لحد ما جاء ضامن وطلعونى . جاتنى حالة غريبة بقيت ببكى طول الليل وخطيبى ذاتو ماكنت دايرة اتكلم معاهو وقلت ليهم خلاص الخطوبة اتلغت ما كنت دايرة أعمل اى حاجة كنت حاسة بخجل وكنت مجروحة شديد ما كنت قادرة ألبس وأطلع لى الناس . كل أهلى وصاحباتى اتكلموا معاى وحاولوا يخففوا على وفعلا طلعت وتمت الخطوبة لكنى كنت حزنانة شديد وفرحتى ضاعت وفترة طويلة ما كنت قادرة أرجع طبيعية مع خطيبى كنت متأثرة شديد. بعد أربعة أيام كانت جلسة المحكمة فى الشرقى مشينا قاموا رجعونا القسم قالوا يتأكدوا انه دى نفس الهدوم القبضونى وانا لابساهم المحكمة كانت دقائق بس انا كنت خائفة لدرجة ما سمعت ولا استوعبت ولا حاجة وما خلونى قلت ولا كلمة حكمونى بى أربعين جلدة لمن وقفونى للتنفيذ اتضح انه العسكرى البينفذ جارنا فحاول انه مايجلدنى وطلعنى قبل مايتم الأربعين جلدة. لكن رغم كده لما اتذكر الذلة الحسيتها النوم بيطير من عينى..الله ينتقم منهم.

Quote: (هـ،م) :56 سنة الخرطوم. بتى دى فى ضابط طلب منها تفك المشبك بتاع شعرها عشان يتفرج ويتغزل فى شعرها عرفت انه بتى ساقوها فاتخلعت وجريت انا وأخواتى القسم قلت ليهم بتى تسوقوها زى السكارى والمتشردين..بتى لابسة تونك طويل وشعرها مغطى بى طرحتا وطلعت قدامنا انحنا أهلها بالمنظر ده انتو تمسكوها ليه؟ ده دينكم وشريعتكم بقول ليكم تخلوا الناس الجعانة والحاجات الأهم وتمسكوا فى البنات؟ فى زول قريبنا جاء يساعدنا قال انه الضباط قالوا ليهو أمها إتحدتنا وعشان كده الموضوع لازم يأخد مجراهو. قلت ليهم الإستعمار كان أحسن منكم. ورفضت أرجع بدون بتى قلت ليهم: انا عارفاكم بتسوقوا البنات ديل تعملوا فيهم أ###### شغل وانا بتى ما بخليها ليكم. لمن أخدوا الأقوال قلت ليهم انه بتى دى فى ضابط طلب منها تفك المشبك بتاع شعرها عشان يتفرج ويتغزل فى شعرها. القاضى لانه زولهم ولا اهتم بكلامى. مرة ولدى راكب ركشة فى شارع النص عربية البوليس بتاع النظام العام وقفت الركشة وساقت بت كانت راكبة فى الركشة قالوا شافوها بتتشاكل مع بتاع ركشة تانية المهم البت لما اتجرست ولدى اتدخل قاموا شاكلوهو وساقوهو برضو لما حصلتو فى القسم قلت للضابط ولدى الصغير ده ارجل منك لانه شهامتو ما خلتو يشوف بت فى موقف صعب ومايقيف معاها عشان كده هو أرجل منكم كلكم العسكرى كان داير يضربنى ولدى كان داير يتضارب معاهو الا الناس مسكوههم. قلت ليهم انتو ساكين الهايفات شوفو البلد والحروب الفيها أحسن من القصص الهايفة دى. بس فى النهاية الواحد بيحس انه براهو البيواجه وبيعمل كده الناس مابتتكلم والخوف بكم الناس..الواحد بقى يخاف كانما انتى فى بلد تانية ..بقينا غريبين فى بلدنا ياكافى البلاء.لكن ربنا شايف فى حالنا نحنا الضعاف وميزان العدل حيعدل لينا ..ربنا أقوى.

Quote: الشهادة التاسعة (ص، ك) 26 سنة ، خريجة ، الخرطوم لو ماكنت بت لواء أكيد كنت بتجلد رغم انى محجبة كنت على بعد 15 متر من بيتنا رجعت من الجامعة وكنت لسه لابسة هدومى المرقت بيها تونك طويل وبنطلون .هدوم عادية جداً وانا من زمان خالص بلبس كده. وقفت جنب محل الاتصالات شلت الكرت ووقفت فى مصطبة المحل بره منتظرة يرجعوا لى الباقى وكنت بكشط فى الكرت سمعت عربية وقفت وفى زول بيكورك لى يابت هوى..انا عرفتو قاصدنى لكن طريقتو فى مناداتى إستفزتنى فما رديت عليهو بقى يكورك بى طريقتهم البخوفوا بيها الناس ديك فلما لقيتو بكورك شديد رفعت ليهو رأسى قال لى انا مش بناديك الموقفك هنا شنو؟ قلت ليهو انت شايف شنو ده محل بتاع اتصالات حأكون واقفة جنبو لى شنو؟ بقى يكورك فينى قلت ليهو أسمع انت مامن حقك تكورك فينى واذا كوركتا انا صوتى أعلى منك بكورك أكتر منك.قال لى :طيب انا حأوريك وكان واضح انه قاصد يورينى بى ياتو طريقة. قال لى العساكر المعاهو انزلوا أرفعوها.. واحد جا ناطى ومسكنى من يدى يجر فينى ..أنا نبذتو ياحيوان يا######## أوعه تلمسنى . الناس إتلمت وسيد محل الاتصالات ود جيرانا بقى بيساعدنى ويمسكنى منهم وهم بيدفروا فيهو من صدرو ويكوركوا فيهو : انت ذاتك بتترفع، وشباب حلتنا كلهم اتلموا فى لحظات والعساكر نزلوا كلهم وهاجوا زيادة وبقوا مصرين انهم يسوقونى . شباب الحلة قالوا ليهم البت دى أبوها لواء ومابتقدروا تسوقوها وفعلا لما أبوى جاء دقوا ليهو التحية وسألهم الحاصل شنو قالوا ليهو سعادتك انحنا كنا عاملين تمشيط فقال ليهم وطيب بتى دى مالها مامجرمة ومحجبة عديل تسوقوها ليه .. الشباب بقوا يكوركوا والنسوان يهتفوا انه مادايرين تانى عربية بوليس تخش حلتنا قالوا مادايرين زول يذل بناتنا. فى النهاية مشوا لكن رغم انه كل الناس وقفت معاى الا انه ما حأقدر أوصف شعور الألم الإتالمتو والذلة الضقتها.وفكرت انى لو ماكنت بت لواء أكيد كنت حأكون بتجلد وأنا محجبة ولابسة محترم بس لانه فى ضابط صعلوك قرر يعاكسنى..الكلام ده منتشر شديد انهم بيسوقوا البنات ماعشان اى حاجة بس عشان يبتزوهم ويعملوا معاهم حاجات بطالة . مرة فى كوافير فى بت حبشية حكت لينا انها أسبوع مسكوها فى الحراسة بدون اى تهمة بس بيتناوبوا عليها بشكل جماعى طول الليل وفى الاخر طلعوها بدون محاكمة ولا أى شىء. عشان كده القانون ده لازم يتلغى خالص عشان مايبقى وسيلة فى يد ناس نفوسهم ضعيفة.

Quote: الشهادة العاشرة صبهاى يكلن. أثيوبية. 18 سنة.أمدرمان. حبسونى لشهر كامل أنظف الحراسات نهاراً ويغتصبونى ليلاً وصلت صبهاى الى السودان قبل سنتين تقريبا وعملت كبائعة شاى حوالى شهر فى القلابات حيث تعرضت لتحرشات مستمرة من اناس لا يأتون لشرب الشاى والقهوة حسب ماذكرت وانما يأتون لأجلها فقط وعندما ضاقت بالمعاكسات قررت ان تاتى الى العاصمة على ان تتجه للعمل بالمنازل لعله يكون أقل ضررا بها وبالفعل عملت لدى أسرة بمدينة شمبات ببحرى وتكشف لها من الأيام الأولى انها لم تغادر التحرشات كما حلمت اذ ان الزوج ظل يتحرش بها بإلحاح ومنذ اليوم الأول وعندما أصرت على الرفض تفاجأت به ذات يوم يتصل بعسكرى من معارفه من شرطة النظام العام وأخذها العسكرى لحراسة الشرطة حيث لم يتم معها تحقيق ولا اى اجراء وكان يأتيها صاحب المنزل والعسكرى ويتناوبان فى اغتصابها ومن ثم كانت تقوم بنظافة الحراسات نهاراً وتغتصب ليلاً لمدة شهر كامل أحياناً كانت تغتصب من قبل أكثر من شخص فى ذات الليلة. ومن ثم تم إطلاق سراحها . غادرت مدينة بحرى واتجهت للعمل فى مدينة الخرطوم واعتقدت انها ارتاحت من الانتهاكات حتى أوقفتها عربة شرطة النظام العام وهى عائدة من الدكان فى حوالى الساعة التاسعة مساء انتهرها العسكرى وهو يطالبها بابراز الأوراق الثبوتية التى لاتملكها. وامرها بالصعود للعربة فخافت حتى تبولت على ملابسها وأخبرته ان بامكانها الذهاب معه الى أى مكان ولكن ليس القسم وكان بالعربة ثلاثة عساكر تناوبوا عليها باحد المنازل طوال 4 ساعات ومن ثم تركوها. تواصل صبهاى عملها فى السودان حالياً فى مجال بيع الشاى حيث عرفت من البائعات الحبشيات الاقدم منها ان الحماية تكون عبر (صحبة) أحد عساكر النظام العام وهذا ماتقوم به حالياً وهى تبيع الشاى فى أم درمان.

Quote: الشهادة (11) (س، أ) :26 سنة، موظفة/ الخرطوم نحنا الضحايا ونتضاير زى المجرمات. كنا فى رحلة مع ناس الشغل فى جبل أولياء وكانت واحدة من زميلاتنا لابسة بنطلون ، جانا عسكرى براهو لاعربية ولا اى شىء قال لينا انتو الأولاد المعاكم ديل بيقربوا ليكم شنو؟ أهلكم عارفين انكم هنا؟ وكلام زى ده ..زملاءنا الفى الرحلة غضبوا واتشاكلو معاهو لكن فى النهاية هو رجل شرطة ولو اتضاربوا معاهو ممكن يجيب ليهم القسم كله فبقينا نمسك فيهم المهم فى النهاية اتضح انه قصدو انه يهددنا ونديهو قروش انا زعلت شديد وبقيت أقول لى زملاءنا أصلو مابنديهو حاجة ونمشى القسم . قام قال أرح القسم لكن انا بخت ليكم الشايلو فى جيبى ده قصدو انه حيخت لينا “بنقو” ويلفق انه لقاهو معانا. اتحدانا بى وش كريه قال: ونشوف كان تمرقوا منها . وقال لينا انه اللابسة بنطلون دى بتتجلد. زميلتنا اللابسة بنطلون قعدت تبكى وتبكى قالت لينا انا لو قبضونى بنتحر فاضطرت المجموعة انه تديهو عشان ما تعمل ليها مشكلة. انا زعلت شديد ومعاى زميلين مشيت القسم – بدون زميلتنا اللابسة بنطلون- وعملت بلاغ فى العسكرى أديتهم أوصافو وأخدوا أقوالنا لكن ماف زول تانى اتصل بينا ولا عرفنا حاجة.. الكلام ده من سنة بس لحدى الان العبرة بتسد حلقى وكت اتذكر ذلتنا قدام زملاءنا بدون اى سبب غير انه انحنا بنات وبس، المشكلة الناس رجعت من الرحلة وكلهم ما دايرين يتكلموا وكل ما أجى اتكلم يسكتونى انه الناس ما حتصدقنا وحيفتكروا اننا كنا بنعمل فى حاجة غلط. نحنا الضحايا ونتضاير زى المجرمين!!!.

Quote: الشهادة (12) شهادة لبنى أحمد حسين، صحفية، صاحبة الريادة فى مقاومة ورفض قانون النظام العام فى آخر الليل يأتى متعهدوالزواج العرفي للحراسات لإصطياد الشابات الضحايا. التحرش الجنسى البيحصل داخل الحراسات ومن قبل أفراد شرطة النظام العام لايمكن تخيله بتذكر انه واحدة من البنات الكانوا معاي اسمها ما حأذكره لظرفها الأسرى ودي شفت شوف عين واحد من العساكر بينزع منها الطرحة فى تحرش واضح. العسكري الذي فعل ذلك كان احد الشاهدين في محاكمتي. رأيت بعيني اريترية قيل انها ست شاي ترقد في أرضية المكتب الذي به العسكري المناوب ، رأيتها عند الفجر انا و معي بنات قلنا عاوزين نصلي سمح لنا للخروج لهذا المكتب بانتظار الخروج لحوش القسم للوضوء و الصلاة..كانت تتأوه علي ما اذكر. ارجعنا الي الحراسة ولم نخرج للصلاة. بعد منتصف الليل جاء عسكرى الي الحراسة ليبشرنا بان هناك (ضامن)فاعل خير جاء ليضمننا اي “بنات كشة البناطلين “. انتابتني هستريا وصرخت في وجهه و اعلنت باسم الجميع ما عايزين ..فقد تشككت في نوايا فاعل الخير هذا ..and#65275;حقا عرفت ان هناك (متعهدي زواج عرفي ) حتي and#65275; اقول ########ين ..يصطادون الضحايا هكذا ..يقوم باجراءات الضمان لهن ويمنعن من اand#65275;تصال باهلهن ليملي عليهن الشروط and#65275;حقا. وهى شروط لاتجد مهرب من الرضوخ لها و حتي ابوها يوافق منصاعا لو خير فى هذه الزيجة and#65275;ن الخيار اand#65275;خر هو التقدم للمحاكمة وتوابعها من فضيحة مجتمعية. ..عالميا يسمي هذا اتجار بالبشر . في صباح اليوم التالي و بعد طابور التأكد الصباحي بحضور الضابط رأيت بعيني من يأمر بتمييز النساء الي فريقين النسوان الكبار و البنات الصغار.وحدد العمر ب 40 الحقيقة الي اand#65275;ن and#65275; اعرف الهدف من هدا اand#65275;صطفاف حسب العمر.. في نفس الطابور الصباحي هذا الذي كان بمكتب العسكري المناوب تم اختيار اجمل صبية كانت بيننا حبشية وزوجها هندي عرفت لاحقاً ان تهمتها مخالفة قوانين الهجرة وand#65275; اعرف ما شأن شرطة النظام العام بقوانين الهجرة.. المهم..تم اختيارها لتقوم بتنظيف الحراسة التي كنا بها ! و من بالحراسة and#65275; يري من بالمكتب و العكس.. دخلت هذه الفتاة فعلا الي الحراسة للتنظيف لفترة ، رافقها عسكري..and#65275; ادري ربما هو فاعل خير اخر يود مساعدتها..!!! هذا بالإضافة الى اand#65275;حتكاك المتعمد منذ عربة الكشة ..بوكس كنا به حوالي 35 يتم لمسك فيه والاحتكاك بك دون حرج . كذلك طابورعرض اand#65275;زياء الدي توقف به البنات في طابور و يقف رجال الشرطة مع ضابط في طابور اخر للتفرج (لجنة معاينة)..ثم يطلب مباشرة من كل واحدة علي حدة ان تسير مثل عرض اand#65275;زياء بالضبط الفرق ان عرض اand#65275;زياء في خط مستقيم وهنا يطلب منها خطوات للأمام و الخلف او يمين و شمال والتي تقوم بالعرض يقرر بشأنها اما الي الحراسة اذا قرر ان ملابسها فاضحة او إطلاق سراحها.. انا شخصيا رفضت السير في عرض اand#65275;زياء هذا.. فكان ان قرر بشاني ان ملابسي فاضحة. في محكمة النظام العامة بالسجانة الحراسة مختلطة رجاand#65275; و نساء الناس متلاصقة كبص أبو رجيلة القديم .. هنا لم اري بعيني ، ببساطة and#65275;نهم كانوا يجتهدون اand#65275; أري ..and#65275;ن قضيتي أخذت منحي اخر.. لم ادخل غرفة الجلد.. لكن من الحكاوي سمعت ان من تقوم بالجلد امراة..لكن من يمسك بالفتاة حتي and#65275; تتململ رجال..إتنين او عشرة حسب مقاومتها.. يمسكونها من الصدر او العجز او حيثما شاءوا.

Quote: (س،ا) خريجة كانت واقفة فى الشارع الرئيسى قالوا ليها وقعى تعهد انها كانت فى مكان مشبوه زيى كل البنات البكون عندهم عرس لبست انا وأختى وبنات خالتى الاتنين فساتين جميلة نفس الألوان ومشينا من بيت خالتى لى عرس خالى مع زوج خالتى فى عربية البوكس بتاعتو الكلام ده كان فى بداية 2002م تقريبا. كنا فرحانات ومستعجلات متين نحصل عرس خالنا. فجأة لاحظنا انه فى عربية شرطة بتمشى جنبنا والعساكر الفيها زى البيعاكسوا ما انتبهنا ليهم .بقى كل ما زوج خالتى يحاول يبعد منهم تانى يجوا ولاننا مستعجلين افتكرونا بنحاول نزوغ منهم فقفلوا الشارع قدامنا ونزل الضابط سأل راجل خالتى البنات ديل منو وعلاقتك بيهم شنو؟ فقال ليهم ديل اتنين منهم بناتى واتنين بنات خالاتهم قال ليهو وسايقهم وين قال ليهو عندنا مناسبة الضابط طوالى بدأ يزجر فى راجل خالتى انه مالابسات لبس محترم وده زى فاضح وكده الناس نزلوا من عربياتهم والضابط زاد زيادة .أصر انه ينزلونا نركب معاهم بعد تعب زوج خالتى أقنعهم انه نمشى وراهم فوافقوا بشرط انه يركب معانا عسكرى ومشينا لى قسم النظام العام فى الديم..دخلونا القسم وأخواتى وبنات خالاتى بيبكوا بكاء شديد رفضنا ندخل الحراسة بعد شوية كل الأهل الفى العرس كانوا حصلونا والضابط اتوتر شديد فطلعونا بدون محاكمة. الحادثة التانية حصلت لى أختى وبت عمى كانوا فى الشيخ الصائم ديمة يوم الجمعة لابسين طرح كبيرة ومتغطيات كويس خالص وهم راجعين على الخرطوم بت عمى قالت دايرة تصور الغابة فوقفوا جنب الزلط وخلوها تصور بى كمرتا جوهم ناس النظام العام وشتموهم وساقوهم القسم هناك اكتشفوا انه بت عمى عندها جواز سويدى وانها فى اجازة فى السودان الضابط قال ليهم وقعوا على تعهد فرفضوا لانه مكتوب فيه انه لقاهم فى أماكن مشبوهة فقالوا ليهو انت لقيتنا فى شارع زلط وزلط رئيسى على الكوبرى ما بنوقع على كده فالضابط جاب قلم وشطب الحته دى وكتب قبض عليهم فى طريق الكبرى فوقعوا وتم اطلاق سراحهم. تقديرى انه النظام العام لابد يقيف لانه فساد أكثر من الفساد المفروض يحاربو.

Quote: الشهادة (14) ( ب، س) 25 عاماً خريجة محاسبة النيلين: أمدرمان. العسكرى قال لى لو ما مشيتى معاى بخلى العربية تسوقك فى يونيو 2011م كنت فى طريقى لمشوار عمل فى العشرة ولاحظت انه فى واحد فى الحافلة بعاين لى فما اشتغلت بيهو لكن لمن نزلت لقيتو نزل وراى مشيت فى الشارع الترابى سمعتو بى ضهرى بينادينى وقال لى: أقيفى يابت ..فاتلفت ليهو قال لى شنو مابتردى على؟ قلت ليهو ماسمعتك انت داير شنو؟ قال لى انت جاية من وين؟ قلت ليهو من بيتنا انت ليه بتسألنى؟ قال لى انا متابعك من فترة طويلة وانا من شرطة أمن المجتمع وانتى بتمشى لى حتات ماكويسة، لحدى الوقت ده انا خفت وبقيت اعاين فى الشارع . الواطه كانت قريب نص نهار والشارع كان فاضى من بعيد شايفة بتاع دكان وقدامو سيد طعمية بيرمى فيها جنب الدكان..فكرت أتصل بى زميلتى الكنت ماشة عليها عشان عندى شغل طباعة معاها ،بيتهم مابعيد. لكن أول مامسكت الموبايل قلع منى الموبايل من يدى وكورك فينى شديد وقال لى : انا حأضرب لى العربية يجوا يرفعوك هسه وفعلا اتصل بى زول ووصف ليهو مكان حتتنا الكنا واقفين فيها ، سألتو طيب انا تهمتى شنو؟ قال لى انا حأقول انك بتمشى حتات ماكويسة سكت شوية وشافنى مرتبكة وخائفة قام قال لى: لو مشيتى معاى لى بيت فى أمدرمان ما بخلى العربية تسوقك فى اللحظة دى انا حسيت بى إستفزاز شديد وعرفت انه مجرد صعلوك فقلت ليهو أضرب لى حكومتك كلها جيبا لى انا مستحيل أمشى معاك اى حته قال لى : لو مامشيتى حتنفضحى أحسن ليك تمشى معاى من سكات أنا بقيت أبكى وأكورك فيهو قلت ليهو: انت حيوان..ماعندك أخوات انا ما البت البتتكلم عنها وانا مابطلع من بيتنا بدون مايكونوا عارفينى ماشة وين، وودينى محل ماتودينى لكن البتفكر فيهو ده مستحيل..وأصريت على كلامى من شدة الخوف مافكرت أكورك ولا أنادى بتاع الدكان كان صوتى بيرجف وحاسه بى إهانة شديدة خلاص واصل كلامو بى صوت واطى وحاول يقنعنى وقعد يهددنى انه ماحيخلينى وانه حيفضل يتابعنى وأحسن لى انتهى من الحكاية وأمشى معاهو وكلام كتير زى ده..فى النهاية لما عرف انى ماممكن استجيب ليهو أصر يشيل رقم تلفونى وهددنى قال لى انحنا عندنا القدرة نعمل ليك مشكلة من مافى وندخلك السجن. وشال منى رقم أخوى قال لى ادينى رقم أخوك مفتكر انى حأخاف قمت طوالى أديتو ليهو مشى وانا مشيت على بيت زميلتى وصلتها خايفة وببكى شديد حكيت ليها وأتصلنا بى أخوى وحكيت ليهو برضو فقال لى لو راجل يضرب لى ..وطبعا ماضرب تانى لا لى اخوى ولا لى. لحدى الآن انا لما اتذكر الموقف ده بحس بالخوف لحسن الحظ انه بيت زميلتى كان قريب وانها كانت زولة واعية اتصرفت بهدوء وطمنتنى واتصلت بى أخوى وخلتنى أبكى واتجرس بى راحتى ..شعرت بى ذل شديد …لحدى الان انا بخاف لما الشارع يكون فاضى. وكل ما أقابل زول بشبه وش العسكرى ده أحس بى رعب شديد.. لازم القانون ده يقيف لانه بيسمح لى اى زول منحط انه يخوف البنات فى الشارع ويستغلهم.

Quote: الشهادة (15) الناشطة :أميرة عثمان فى الثلاثينيات من العمر- مهندسة كمبيوتر.الخرطوم. العسكرى ادعى انه داير يشيل التلفون من جيبى عشان يلمسنى قلت ليهو أنا حية كده مابتلمسنى وضربتو كنت انا وزميلتى “ع” شغالين فى بحث التخرج فى فبراير 2002م ناس البيت وصلونا لى شارع المطار لى محل بتاع انترنت أسمه قاردن كان عندنا مواعيد مع أستاذ أسمو “أمير الوحش” على أساس انه يساعدنا فى معلومات من النت لى بحثنا، بمجرد نزولنا وقبل ان نصل لباب المحل سمعنا صوت شباب بيعاكسوا معاكسات عادية بعد شوية اتغير الصوت من مشاغلة لى كواريك كانوا بقولوا مثلا: انتى قايلة نفسك شنو أحترمى نفسك أقيفى وردى لى وكلام زى ده. حصلونا ووقفونا وواحد فيهم قال لى : انتو قايلين روحكم وين لابسة بنطلون ومابتردى . رديت ليهو : انت منو ذاتك. فى اللحظة دى اتلموا تلاتة تانين وطوالى قالوا لينا أركبوا وأشروا لى عربية لاندكروزر بيضا مظلله كلها . قلت ليهو مابنركب دى عربية شنو وانت منو؟ قال لى انحنا ناس النظام العام. قلت ليهو أعرف كيف امكن تكونوا دايرين تخطفونا فرد على واحد منهم بسخرية : يخطفوكم هو انت عندكم أهل يخطفوا ليك شنو انتى حايمة ساى.أركبى ولا أشيلك ارميك جوه العربية. قلت ليهو: الدين البخليك تتهمنى بى زى فاضح بيمنعك تلمسنى . قعد يكورك ويقول لى انتى بتعلمينى الدين؟ أصريت على انى أشوف البطاقات فمدوا لى بطاقات قدام عيونى وهم بيدفروا فينى فما شفت أى حاجة لكن اضطريت ركبت لانه كنت قبلها شفت جنب الجامعة – التقانة- شفت بت لابسة بنطلون ما ركبت شالوها بالغصب فى البوكس ورموها ففكرت انو احسن نركب بدون ضرب لما ركبنا ركبت معاى زميلتى”ع” رغم انها ما كانت لابسة بنطلون كانت لابسة اسكيرت وبلوزة وطرحة لكن ماكانت دايرة تخلينى أمشى براى معاهم ركب واحد جنبنا وجاء واحد تانى فقفلت الباب وقلت ليهو مابتركب المقعد الخلفى ده بيشيل تلاتة بس ما أكتر فزعلوا شديد لانهم كانوا دايرين يختونا فى النص ويعصرونا بيناتهم. القاعد جنبنا مال على وهمس لى انتى مالك عنيدة كده مشوا حالكم.فى اشارة بذيئة لمساومة جسدية. وصلنا لى منطقة المقرن مركز شرطة أمن المجتمع فى لحظات دخولنا فكرنا انا وصديقتى انه مانقول أسماءنا الحقيقية وكنا بنسمع انه بيخلوا البنات يكتبوا تعهد انهم ما يلبسوا بناطلين وبخلوهم يمشوا فقررت انى أكتب التعهد البيطلبوهو منى وخلاص . بعد ما العسكرى شال بياناتى قام دخلنا لى المكتب بتاع الضباط طلع انه الزول الكان بيتشاكل معاى فى الشارع برتبة نقيب والضباط التانين بيحيوهو وكده والظاهر انه قرريأدبنا فقال ليهم شوفوا دى الدايرة تعلمنى الدين وقعدوا يستهزأوا بينا ووقفونى فى النص وقعدوا يقولوا لى” أمشى لى قدام، لفى، تعالى بى جاى، حسيت بى العبرة فى حلقى وحسيت بى ذلة شديدة خلاص.بعد ما انتوا منى واحد قال نادوا صاحبتها دى وأفتحوا ليها معاها (157) لانه اسكيرتيها ضيق. لحدى اللحظة دى نحنا فاهمين الحكاية تعهد ففجأة قرروا انه يسوقونا الحراسة فاتخلعنا وقلنا ليهم خلاص خلونا نكلم أهلنا قالوا لينا انتو لوعندكم أهل كنتو بتلبسوا كده . ورفضوا يخلونا نكلم أهلنا انا أصريت انى ما بخش لو ما كلمت أهلى فجاء عسكرى لوى لى يدى ورا ضهرى وقال لى مادايرين قلة أدب ودفرنا لى الحراسة. موبايلى كان فى جيبى فقررت اتصل بى ناس البيت وأول ماطلعتوا شافنى عسكرى قمت دخلتو جوه جيبى فجاء داير يدخل يده جوه جيبى – بكل بساطة داير يلمس جسمى- حسيت انها محاولة تحرش قذرة .. فى اللحظة دى حسيت روحى ماشايفة من الزعل وقعدت أكورك وأضرب فيهو قلت ليهو أنا حية كده مابتلمسنى، جاء الضابط وقعد يشلت فينا بى رجله لحدى ما خلونى أطلع الموبايل وأسلمو..لحسن الحظ صديقتى “ع” قدرت تدس تلفونا فاتصلنا بى ناس البيت وعرفنا فيما بعد انه رغم وجود محامين الا ان النقيب رفض انه يطلعنا وقال ليهم انه لازم نبيت فى الحراسة ونمشى منها للمحكمة بعد ضغط شديد من المحامين تم الافراج عننا حوالى الساعة اتنين صباحا وجابوا لينا هدوم من البيت عشان نخلى الهدوم الكنا لابسينها “معروضات” فى القسم، ما كان فى مكان ممكن نغير فيهو هدومنا اضطرينا نغير هدومنا فى الحراسة كان فيها مرتين بت شابة قبضوها من الشارع مع خطيبها وود خالتها وزوجته ولابسة طرحة لكن بلوزة نص كم، وحكت لينا انه برضو عرضوا عليها انه (تمشى حالها) وانها رفضت . طلعنا البيت والصباح كانت المحكمة فى السجانة مدرسة الخرطوم اتنين ومشينا مع أسرنا والمحامين فقالوا انه مفروض بلاغنا يمشى ليهم لكن القسم سحب البلاغ وحولو لى محكمة صغيرة جنب الشمالى . وصلنا لى محكمة مليانة بى حاجات الكشة دخلونا فى قفص جداد ريحتو بول وارضو رمل ######انة لحدى الساعة 10 دخلنا للقاضى الشهود نفس الناس الساقونا فى الشارع والقاضى ما سألنا اى سؤال وبعد ما قربت المحكمة تنتهى سألنى البنطلون ده واسع ولا ضيق كنت غضبانة شديد فقلت ليهو أجربو ليك؟ حكم علينا بغرامة 200 ج لكل واحدة والسجن لشهر فى حال عدم السداد مالم نكن مطلوبات فى قضية أخرى . رجعونا لى قفص الجداد تانى قاموا نادونا اتضح انه النقيب فتح فينا مادة تانية الادلاء بمعلومات كاذبة وحكموا علينا تانى بى خمسين جنيه . المبالغ دى كانت ضخمة جدا أسرتى حاولت تدبير المبلغ بسرعة أختى قدمت لى سلفية عاجلة فى شركتها وقدروا يسددوا المبلغ ويطلعونا العصر تقريبا. التجربة دى انا بتذكر كل تفاصيلها لانها شعرتنى بى ظلم فظيع ووجع لايمكن تخيله. لحدى ما أموت ما حأنسى شكل القاضى لانه كنت مفتكرة لحدى ما وقفت قدامو انه حأفضح النقيب الصعلوك والضباط المعاهو لكن اتفاجأت انه القاضى كان منحاز وانه القانون كان ضدنا فانكسر جواى اخر شعور بالعدالة. كنا بنبكى لى أيام شعرنا بوجع كبير ما ممكن ينتهى الا القانون ده يتغير. فى التضامن مع لبنى احمد حسين كنت بتضامن مع كل البنات الوطن الجمرة بتاعت القانون ده البنات الشريفات القالن لا لى الإبتزاز والتخويف.