|
|
 Re: قناة الشروق.. مسرح علي الهواء ...خذو الحكمة من ادروب (Re: عباس الدسيس)
|
رأي واحد من المواطنيين الظاهر عليهو زهجان واخلاقو في نخرتو....
ياخ ما تبالغو مافي مدير في الزمن ده بعمل كده ...شالو منو المكرفون قبل ما استرسل.
في رأي صريح وهذا ما يقصده المواطن أن جميع المدراء حاليا حراميه اولاد لزينه بتاعين رشاوي والواحد وقت انزل معاش بكون شبع لي رقبتو بدل العربية عربيتين وبدل البيت عمارتين وما خفي اعظم.
مواطن تاني:
المدير غلطان كان لازم اعمل ليهو حاجة بعد انزل المعاش تعينو:
اجابة تعني الكثير الانهيار الاقتصادي ومستوي دخل الفرد المتندي وصرف الدولة علي الاجهزة الامنية المبالغ فيهو مما كوع الميزانية وخلاها بجميع الاتجاهات فيها عجز سبب رئيسي في تفشي الرشاوي والفساد.
حتي ست الشاي القاعدة برة المصلحة بقت داخل الملعب مع الجماعة:
ست الشاي (( يا النسيتي ناسك وفقدتي احساسك))
وقف في الصف لاكمال اجراءاته صف طويل وممل يشعر بانه لا يتحرك بعد ان مضت ساعات وصل الشباك
المواطن : السلام عليكم والله يا خوي واقفين لينا ثلاثة ساعات ركبينا ساحت عشان نصل لي الحجر الاسود شباكك ده من بعيد شايفنو صعب المنال لكن التنظيم مريح احسن شيء عجبني في شغلكم كلوا بي الدور.
الموظف: يمسك ملف الأوراق بعدم اهتمام ويقول : عامل فيها دمك خفيف والله ضحكتني ، مالك مستعجل العجلة من الشيطان والتاكسي من الرحمن عشان فيهو مهلة قعاد وصبر معاها ضحكة..... ويختمها... والله مع الصابرين.
المواطن : مستعجلين كده شويه يا ابو الشباب انت عارف مشاغل الدنيا الواحد عايز اخلص كم مشوار كده .
الموظف : طيب وأنت دفعت المصاريف المطلوبة ؟
المواطن : أيوه يا أستاذ ، دفعتهم في الخزنة هاك الإيصال.
الموظف يهمل الإيصال ويقول : بس انت لسه ما دفعته للاستاذه رشيده ... معاها ابتسامه(رشويه)!
المواطن : رشويه دي شنو يا اخوي مكتبا وين وأنا امشي اكمل المصاريف ؟
الموظف : يا الاخو اسمع ما تاخر الناس ديل وراك وما ترفع صوتك انت جديد اول مره تجينا شيل ورقك ده امشي خلص المصاريف بعدين تعال لي ، اسال بره من استاذه رشيده بقولو ليك يلا خلينا نشوف مصالح الناس الثانيه ؟ ....
حاول اسأل الجماعه الخلفو في الصف لم يجد اجابه كل ما اسأل واحد اقول ليهو وراء فضل متابع وراء دي لما وصل اخر الصف بره المكتب عاين يمين عاين شمال شاف ست شاي تحت ضل الحيطه قال امشي اسألا عن مكتب رشيده ....
ست الشاي ما اهتمت بيهو قابلتو بي برود تنفخ في الرماد من المنقد وفي يدها قطعة قماش وكبايه تجلي فيها.
المواطن : معلش ، أصلي لسه اول مره اجي هنا ما عارف الإجراءات .. ممكن تقولي لي الاستاذه رشيده مكتبا وين.
ست الشاي تلز ليهو بنبر بي كراعا وتقول:
في واحد ما بعرف رشيده دي اهم زول في المصلحه دي والله تمام انت جديد.
المواطن : والله حاجه عجيبه انا دفعت الرسوم كلها ادوني الايصالات ... تاني ادفع شنو ما عارف والبدفعو ده بي ايصال ولا ادفع وين ... بعدين الجماعه قالو الرسوم كلها عشره الف وانا دفعتها كلها في شنو تاني. ..
كدي كبي لينا كباية شاي بعدين نشوف رشيده .
ست الشاي: ايواااااااا كده يا دوب عرفته الخط الصاح انا قلته انت زول بتفهما هي طايره بعدين كباية الشاي بصلح ليك راسك تخليك تخلص بي سرعه. ....
بعد ارتشف كباية الشاي دخل يدو في جيبوا طلع قروش كباية الشاي اداها لي ست الشاي.
ست الشاي : أنت عبيط يا استاذ ولا بتستعبط ولا دمك خفيف ده شنو ؟
المواطن : انا عملت شنو عشان تقولي لي كده ؟ يعني عشان اول مره جيت تهزئوني كده القاها منك ولا من الحمار الجوه داك ؟
ست الشاي: أنت شكلك أول مرة تيجي هنا ما فاهم حاجه زي بتاع اصدقاء الشرطه خالي زمان وسواق اللوري.
المواطن : ليه بس ؟ يا اخت والله انا فاهم كل حاجه والفايل بتاعي مظبط ميه ميه والرسوم دافعا... بعدين تعالي اصدقاء الشرطه دي شنو... انتوا بتقولو كلام غريب الشرطه كمان عندها اصدقاء.
ست الشاي: اصدقاء الشرطه ديل زمان كانو الطلبه في الاجازات بتاعين الثانوي بدربوهم يعني زي الكديك تدريب عسكري... كان ما فهمت زي الدفاع الشعبي ... بخلوهم اساعدو ناس الشرطه في الاعمال البسيطه زي ناس شرطة المرور.... خالي انا كان مع اصدقاء الشرطه موقفنو في صينيه مرور ميته كدي جاء واحد من ناس القري شايل ليهو مريض في لوري طوب والمريض تعبان لاحقين بيهو المستشفي وقف اللوري نزل السواق قال ليهو لوريك ده كلو مخالفات.... شغل الاشارات القدام صاحب اللوري قال ليهو ما شغاله..... قال ليهوا طيب شغل الوراء قال ليهو ما شغاله بعدين اعمل العايز تعملوا بس بي سرعه الراجل فوق ده عايز اموت هي مخالفه ولا قطع رقبه....
خالي قال ليهو طيب جرب خطرات الفرامل قاليهو ما شغاله....
طيب تعال معاي سايقو بعيد من اللوري.... سواق اللوري زهج من خالي اصدقاء الشرطه قعد اكورك يا جماعه حلوني من الزول ده ....
خالي قال ليهو والله الليلة تكورك للصباح مافي زول احلك مني كان احلك جيبك الكبير ده.
المواطن : والله خالك ده زول ما بفهم الرشوه بشيلوها كدي .
ست الشاي : ايواااااه ، كويس انت كده جيت في القاطر ، كل سنة وأنت طيب ، دق جيبك للراجل الجوه داك خلي امشي ليك امورك بدل تضيع يومك ساكت .
المواطن : اه ، يعني عايزه اديهو رشوه طيب اديها ليهو كيف مع الزحمه دي الزول ده ما بخاف ولا شنو زي اصدقاء الشرطه خالك انا كده فهمت.
اثناء النقاش جاء المراسله لي ست الشاي قال ليها رشيده قالو ليك اليوم كيف الشاي سكرك حلو ولا مسيخ..
المواطن: بالله .... انتي استاذه رشيده وبدلعوك بي رشويه طيب ما تقولي من الاول يا رشويه كده فهمت الموضوع خلاص....
بس سؤال رشويه ده اسم الدلع ليك انتي و لا اسم الدلع للرشوه..
لسع ما وصلنا ادروب
| |
 
|
|
|
|
عباس الدسيس
فيس بوك
تويتر
انستقرام
يوتيوب
بنتيريست