القنصل العام بجدة يأمر بالتحفظ على المستشار محمد ادم الضي

Quote: فصل اولي لازم اولا تبادي وانت داخل على الصالة بلاقيك البوخ طالع ... ويديك إشارة طوالي ... بانو انت حر ، اخير ليك جو، ولا برا ... والقرار عندك ... بالداخل كان الطقس يغلي، برغم وجود اكثر من مكيف لتبريد الجو ... ولكن لا يوجد مكان لأخذ النفس ... الحكاية كلها مجابدة ... على طريقة انا اقدر منك ... وانت اقدر مني ... المهم حصلت على الملفات المطلوبة ... وقمت بتعبئتها وفق المتبع ... خلاص كدة ... باقي ليك شباك السداد ... امشي الشباك داك ... كم يا سعادتك ... كم جواز معاك ... تجديد تلاتة ... وجنسية وجواز جديد ... دفعت الفيها النصيب ... خودك ملف الجنسية والجواز الجديد ... امشي الضابط للتحري ... الجوازات التلاتة ... تمشي البدرون ... يكون جهزن وتستلمهم بعد ساعة كدة ... وذهبت للضابط المسئول ... كانت المدافرة معركة حقيقة لكي تصل اليه، عمة شنو جلابية شنو ، وقيافة شنو ... أدفر بس، الحمد الله زولك ما كان لابس شبط، ولا مؤاخذة ... استلمت الشباك، السلام عليكم سعادتك ... يستلم الملف ، وعليكم السلام ... ينظر فيه بسرعة ... لأنو دي شغلتو وعارف داير شنو، وبلقاهو وين في الورق ... الضابط : وين الاصل بتاع جواز الأم ؟ ... مشى التجديد ، سعاتدك ... لا زم تجيبو بعد تستلمو ، لأنو ما حنسلمك الجنسية الآ بأصل الجواز ، عشان بفصلو منو البنت ويتختم ... حاضر ... عند ورقة ناقصة ... شنو دي؟ امشي جيب صورة تانية من شاهدة ميلاد البنت ... لا اله الا الله ... رحت السيارة ، قلبك قلبك، فتش فتش، الحمد الله لقيت صورة مختومة بختم اصلي بانها مطابقة للأصل جبناها من ملف المدرسة... طبعا المرة دي ما تقيف في الصف ... الحكاية زي العيادة كان الدكتور قال ليك امشي سوي الفحص دا، بتسوي وبتجي راجع ... وبتدخل طوالي ، ما عشان الملف جوا ... يا اخي ناقصة ورقة، وكملناها ... وناس كتار زي حالتي دي... وصلت الشباك ... سعادتك ... الضابط: جبت الصورة ؟... أيو ... يستلم ، خلاص، بس قدامك ملفات ... امشي اجلس ... لما تسمع اسمك بالمكرفون ... جيب البت وتعال ...