نصيحة أخوية: لا تضع صورتك أو اسمك في الواتس أب (تجارب شخصية)

والكلام ده للناس البهتموا بالخصوصية، وعشان (صورتك الخايف عليها) والكلام ده للذكور ولبنات حواء خاصة

لللأسباب التالية:

1- ممكن كل من هب ودب عبر إضافة رقمك عشوائيا يعرف شكلك وإنت منو واسمك كمان (للناس البتكتب اسمها الحقيقي في واتس أب) ..
2- ممكن الزول ده يضيفك ويفتح محادثة معاك (بتظهر حتى لو ما كتب شي) وياخد برنت سكرين ويظهر كأنو كان بتواصل معاك ويضيف الحوار الهو عاوزو (باستعمال برامج تعديل الصور وما أكثرها) ..( بالمناسبة ممكن هو يضيفك ويعمل العملية دي كلها وانت ما جايب خبر) لأنو الواتس أب ما بديك إشعار إنو في زول أضافك ولا بديك خيار قبول الإضافة من عدمه زي معظم برامج الشات البتعتمد على الإيميل، الواتس أب وتانجو وفايبر وإخوانهم بيعتمدوا على رقم الهاتف.
3- ممكن تكون بتتواصل مع زول بالهاتف برضاك، لكنك ما عايزو يعرف شكلك أو يعرف معلومة عنك .. يقوم يدخل رقمك في النصيبة دي وتظهر ليهو بعض المعلومات عنك في حين إنك ما جايب خبرو ( ممكن الزول ده يكون بينكم مشكلة ما ما أو قضية).
4- ممكن تكون بتتواصل مع زول لكن ما بتربطك بيهو صلة شخصية: موظف بنك - عميل لشركتك - معقب - مندوب برضو حدك معاهو حد العمل .. برضو لو أضافك بطريقة آلية ويوم زهجة ساي قلب الواتس اب بتاعو حيشوف خلقتك.

تجارب شخصية:
1- حصل إني أعرف شخصية المتصل بي عبر إضافة اسمه (لمصلحة التواصل).
2- حصل إني أعرف شخصيات بعض المزعجين الذين يمسكلون ولا يردون، أو يحاول يعمل ليك حركات (لكن على منو .. صحي مطاوعة لكن مفتحين :)).
3- حصل إني ختيت صورتي ونسيتا وبعد مدة غيرتها بصورة منظر طبيعي فأحد أصدقائي قال لي ليه غيرت صورتك فانتبهت إنو صورتي كانت في وقت ما متاحة للجميع، عشان كده خلي بالك ممكن تخت الصورة وتنساها وممكن تحذف الواتس اب ذاتو وصورتك تكون موجودة.
4- أحد أصدقائي عليه رحمة الله توفي في شهر فبراير الماضي ولا زال حسابه وصورته موجودة وتاريخ آخر ظهور هو تاريخ وفاته (( شيء مؤلم للغاية)).
5- تحذير: لو كنت مشترك في الواتس برقم هاتف وغيرتو .. اعمل حذف حساب للرقم القديم قبلما تغيره، والسبب: 1- حسابك حيظل مفتوح وحتتلقى فيه رسايل وانت ما مفعلو لكنه بظهر للناس وممكن الناس يراسلوك ويشموك ويفتكروك ما داير ترد عليهم.
2- ممكن الرقم ده يتلغي بسبب عدم الاستعمال وشركة الاتصالات تديهو لزول تاني ويظل يتلقى رسائلك (زي ما حصل لي كنت براسل صديقي ورد علي شخص أنه الرقم معه حاليا)
3- ممكن الشخص البيستعمل الرقم الكان ملكك يخت صورة خليعة ويظهر لكل المسجلين رقمك القديم إنو إنت الخاتي الصورة (زي ما حصل لابن الجيران حافظ القرآن ظهر لي فجأة إنو خاتي صورة خليعة وأصابني هم شديد لأنو الولد محافظ على الصلاة في المسجد واحترت كيف أتكلم معاهو .. لحدي ما أخدتو على جنب وبالراحة قلت ليهو يا إبني دي شنو الصورة الانت خاتيها في ملفك دي .. قال لي ياتو صورة قلت ليهو بخجل شديد: صورة بت ... قال لي أنا ما خاتي صورة زي دي .. قلت ليهو مش رقمك ******* قال لي الرقم ده أنا من زماااان كنسلتو!! وكانت خجلة بالنسبة لي).

النجيضة: الهواتف الذكية وبرامج التواصل فيها الكثير من المزالق وتحتاج الكثير من الحذر عند التعامل معها.

ما عارف أعتقد في خيار في برنامج الواتس اب في الآيفون إنو ممكن يصل لرقمك بس الناس المسجلين عندك .. لكني غير متأكد .. هل ممكن أحد يؤكد أو ينفي هذه المعلومة؟؟

ناس المنبر ديل أصلو ما بستاهلو
الواحد يكتب ويكتب ويتعب ويعصر ذهنو
قولة شكرا ساي ما يقولوها
صحي شلليات وناسات
خلي تاني الزول يكتب ذاتو وللا يتعب

يا محمد
غايتو أنا ( النصيبة ) دي ما شغال بيها ، رغم إنو كتير من العملاء عندنا بيستغربو جداً لمن يسالوني عنها ، و أقوم أعتذر
لكن برضو شكراً للمعلومة نيابة عن العندهم

محمد عبد الله تحياتي
نبهتنا لي حاجات غائبة عننا وبالجد الهواتف
الذكية دي مشاكلا كترت ربنا يكفينا شرها
تشكر ياحبيب علي المعلومات المفيدة
تسلم

Quote: ناس المنبر ديل أصلو ما بستاهلو الواحد يكتب ويكتب ويتعب ويعصر ذهنو قولة شكرا ساي ما يقولوها صحي شلليات وناسات خلي تاني الزول يكتب ذاتو وللا يتعب

سلمتك يداك وجعل ما كتبت في ميزان حسناتك وجعله لك صدقة جارية إن شاء الله
قبل ما أقرأ المقتبس أعلاه بالجد كنت أود أن أشكرك على مجهودك .. لكن شكلك تسرعت
وناس المنبر بستاهلوا بس أكيد عندهم أعذارهم

ويا مثبت العقل والدين ..

كتر خيرك يا محمد

بكل امانه نحن دراويش في القصه دي

وانت نبهتنا لي تفاصيل مهمه...

الف شكر ليك

كلام قيم محمد

وأوع تحرد


الباقر موسى

شكرا محمد جلال
نصائح مفيدة ،،،

حذفنا الوتس اب
شكرًا للإفادة يا محمد.

سلام
محمد جلال عبدالله

Quote: ناس المنبر ديل أصلو ما بستاهلو الواحد يكتب ويكتب ويتعب ويعصر ذهنو قولة شكرا ساي ما يقولوها صحي شلليات وناسات خلي تاني الزول يكتب ذاتو وللا يتعب

ياأخي شكرآ كثير علي هذه النصائح القيمة وإنشاءالله في ميزان حسناتك.
وأرجو أن لا تتوقف عن الكتابة حتي اذا لم يرد عليك أحد لأنك أنت توصل الرسالة والأجر من ربنا.
(اكتب حتي اذا لم يرد عليك أحد كما قاله الأخ حرسم في بوست سابق)
تحياتي

يا ابو حميد ..

ازيييييييك ...

عساك بخير

انا شخصيا حصلت لى والحمد لله عندما نزلت على الصفحة

كنت موجود .. وحمدت الله انى لحقت الموضوع

وكانت حاجة بشعة جدا لا تتصورها

.........................

اما ناس المنبر ديل ..؟؟؟؟!!!!!

الله يديك ويدّيهم العافية

... واصل يارجل .. وجزيت خيرا

وبما انك ( مــطــوع ) تعرف ان الدين النصيحة

44

استخدم التقنية بالصورة الصحيحة ولن تُعاني منها


غايتو مطوعين اليومين ديل ما خلو للجماهير حاجة!
واتساب عديل كـدا يا معلم؟؟





_
في حالة بيع الجهاز أو تغييره
.. أعمل ديليت أكاونت وانتهت القصة
مش تحذف البرنامج من الجهاز!!
لكن كان انسرق يبقى قدر الله وقع

الإخوة الأكارم .. جميع المعلقين والقراء ومن الفيس بوك
لكم جزيل الشكر على مروركم وتعليقكم
وأعتذر منكم لانفعالي سابقا - بسبب تكرر المسألة -
ربنا يقدرنا على نشر الخير وبذله للناس أجمعين دونا انتظار جزاء ولا شكور
سأعود بإذن الله لمداخلاتكم وجزاكم الله كل خير

Quote: وأعتذر منكم لانفعالي سابقا - بسبب تكرر المسألة -

اخى محمد جلال عبدالله ..

تحياتى ...

انا عن نفسى اتكيفت منك شديد ..

وات زول سودانى اصيل عشان كدة انفعلت ...\

مشكور على التنبيه واعلامنا حتى لا نسقط فى المحظور ....



مودتى لك .

ما عارف أعتقد في خيار في برنامج الواتس اب في الآيفون إنو ممكن يصل لرقمك بس الناس المسجلين عندك .. لكني غير متأكد .. هل ممكن أحد يؤكد أو ينفي هذه المعلومة؟؟

الأخ محمد.. لك الشكر و التقدير..ما تزعل..بالجد معلومات مفيدة..
ما زال سؤالك قائما لم يجب عليه أحد..
انا ما خبير لكن بفتكر انو دا ما ممكن..

تقدم ملحوظ فى فكر الوهابى محمد جلال
بقيت تمشى وتكتب كمان فى الصفحات المعارضة للنظام ( صفحة احرار السودان فى الفيسبوك )
منذ متى كان الوهابية يقفون مع المعارضة لاى نظام
ما طول تاريخكم انت خلف اى نظام فاسد ولو الهبك ظهور شعبو بالسياط
هذا لو انت اصلا ما لاقط موضوع البوست دة من حتات تانيه

محمد جلال شكرا للنصائح

الواحد كان عاوز يقكر جادي في موضوع

الوتس اب بس خلاص نسينا الفكره

سلام محمد جلال

شكرًا على المعلومة المهمة والغائبة عن الكثيرين !!

فى السودان لقلة استخدام الهواتف الزكية او لغلاء ثمنها بتنحصً المشكلة كلها فى اعداد قليلة لكن يجب على الجميع أيضاً الجزر !!
ممكن فعلا لاى شخص ان يتداخل معك عبر وتساب حتى لو لمن يكن ضمن سجل اسماء خاصتك وأمس حدث معى هذا تداخل معي شخص غير موجود فى سجل اسماء هاتفى !!


ي والصائم والله ترمى جوالك بي وتسابوا تتحير وتعرف عزابو !!!

طيب يعني شنو لو الواحد حفظوا صورته ولا نسخوها ما الصور مالية الفيس وتويتر والهوت ميل والمنتديات والمنابر وغيره

الأخ صالح عبده

Quote: طيب يعني شنو لو الواحد حفظوا صورته ولا نسخوها ما الصور مالية الفيس وتويتر والهوت ميل والمنتديات والمنابر وغيره

أنا قلت فوق إنو الموضوع خاص بالناس البيهتموا بالخصوصية
وما قاعدين يجدعوا صورهم يمين وشمال

الرافضي وليد فتح

Quote: تقدم ملحوظ فى فكر الوهابى محمد جلال بقيت تمشى وتكتب كمان فى الصفحات المعارضة للنظام ( صفحة احرار السودان فى الفيسبوك ) منذ متى كان الوهابية يقفون مع المعارضة لاى نظام ما طول تاريخكم انت خلف اى نظام فاسد ولو الهبك ظهور شعبو بالسياط

ما حصل كتبت في صفحة زي دي
وبعدين انت حارقك في شنو
الملة الخبيثة بتاعتكم دي غير نظام الانقاذ الدخلها البلد شنو؟
ممكن سؤال: ما هو موقف الرافضة السودانيين من النظام؟
هل هم موالون أو معارضون أو بين بين؟
ولو معارضين وينها معارضتهم؟!

Quote: هذا لو انت اصلا ما لاقط موضوع البوست دة من حتات تانيه

(ولا تبخسوا الناس أشياءهم)
أمشي قوقل لو لقيتني سارقو بديك حلاوة كوجاك

الأفاضل الكرام:
kamal omer
عبد الوهاب المليك
الأمين محمد علي
Elbagir Osman
أيمن محمود
محمد يوسف طه
محمد نور عودو
أنور سيد إبراهيم
عمر عبد الله فضل المولى
ود الصايم ^___^
عبد اللطيف شريف علي
عادل سمير
saidahmed shami
علي إبراهيم رفاي
صالح عبده
ومن الفيس بوك: Awad
----------------------
شاكر مروركم الكريم
وأعتذر عن عدم التمكن من الرد المفصل
وسأحاول العودة بإذن الله

up