|
|
 ليه ترتاح يا مواطن اصلا....
|
من الصباح ، تكابس في المواصلات ، مواطن يتشاكل مع الكمساري ، قلت ليك انا ماشي الشهداء تشيل حق تذكرة كاملة ليي؟ ، الكمساري : دي تعريفتا كده
العربية دي ماشة الخرطوم ما بنجي بي الشهداء زاته، نفس الفلم واللؤم مكرر، وقبل ما يخلص الفلم لازم السفينة (قصدي الحافلة) تمر بي رأس الرجاء الصالح
(واحد قالو ليه اضانك وين ههههه مشى هبش التانية) انا محتار في حاجة هو اذا كان وزن البص وحجمه اكبر بكتير من الحافلة ليه ما بخلوا الحافلة تقطع الكوبري
القديم بتاع الحديد؟ لزومها شنو اللفة الطويلة دي،باصات الخضر خضرا وزي سفينة نوح، والزحمة في البص، النفس الكتمة الميتين الحكومة، داك عمك انصاري شايل العلم بدوروا فيه، والبص يشيل ويدفس في الناس، التقول جداد
بص عامل زي السفينة، داير 3 ساعات عشان تصل ، تكره حياتك، تدي الشباك الفوق بنية قوية لفتح التهوية، عشان سيد البص مأجره وقافل التكييف، ياخ انعل ابو دي بلد، سخانة
في الجيب سخانة في الجو ، وآخيرا بعد مشقة تم الوصول للمحطة انتهى فلم وبدا فلم تاني.
يا أخوانا سؤال مواصلات الحتة الفانية وين، إلا تركب الخط الدائري وتمشي شرّووووني شقلبة عجيبة، طاقية دا في راس دا وراس دا في قميص دا وقميص دا في طاقية دا
وهكذا ديرا ديرا... في اللحظة ديك اتذكرت والي في احدى العصور كان قليل العقل جعل ليل العامة نهارهم ونهار العامة ليلهم، وذات مرة كان طائفا في جولة تفقدية واذ اعلن
سيادته (معليش نذكركم بتلفزون السودان شوية) وقد وجد سيادته اسكافيا (جزمجي) يقوم بعمله صباحاً فسأله لماذا تعمل في هذا الوقت فرد عليه الاسكافي انه لم يستطع تكملة
عمله لذلك فهو (يساهر) بالنهار ليكمل ،،،،، وصارت نكته،،،،. نفس الاسلوب تتخذه الانقاذ مع الانسان السوداني، يجب ان يظل مشغولا مغيباً كأنه نائم بالنهار ليله نهار ونهاره ليه
ليختل ايقاعه، يصبح بصورة اقرب للحيوانات كل يوم يتحمل خرمجة الحكومة في الاقتصاد، يتحمل الفساد والسرقات، يدفع الضرائب التي تذهب لجلده في الاحتجاجات، يعني
الفهم شنو ناس عطشانين تجيبو ليهم شرطة وتكتحوهم بي بمبان وهم اساسا ما عندهم موية علي العطش العليهم تزودهم، دا فهم الكوز يضربك واوعا تقول آي او تقول بغم،
معالجات مسكنية لا تحل جذور المشاكل عشان كده مما جو كل ما يمرقوا بي مشكلة بكون حلوها بي انه وضعوا اساس لي مشكلة تانية. وهكذا الشغلانة مستمرة، والمواطن
آه مين البشتغل بيه ، جلداً ما كوز جر بيه الشوك ولا اسلخه وصدره بجيب قروش كويسة.
سأغيب لفترة بسيطة ولي عودة
|
|
 
|
|
|
|
Mutaz Hussien
فيس بوك
تويتر
انستقرام
يوتيوب
بنتيريست