بتلاقيهن في الدنيا: الدروب الخاويات. حجاج التداخل ، ما بين اليناعة و النضج ، في دروب الدرس... االحياة... الأسافير.. و الوجوه التي تخبطك بروعتها في واقع الحياة..ثم تمضي في حالها...!!!
هي رسالة المحبة...
محمد الحسن سليمان (الحبشي) سوف يهز راسه و يمضى...
شهاب كرار (شهاب الكافر)... سيفهم كثيرا و لكن سيستعين بحجة امامنا العظيم النفرى و يقول ليك (كلما اتسعت الرؤيا ، ضاقت العبارة.. ياااااخ!!!)... اشراقة مصطفى...و مواهب ادريس... ليكم الجنان كلها.. لو ظفرتن بهيئة المراقب..!!! بدر الدين موسى.. الضحك ح يشرطك...و ليكن..!!! سيدنا بشاشا ، قدس الله سره في الأعالي، سيفهم أي شعب ظلم بهرطقاته...!!! استاذتي الجميلين: احمد الأمين ، فضيلي جماع ، الفاتح ميرغني ، الطيب شيقوق.. اشهدوا يا هلنا... الشهادة كمان بتغلبكم..؟!!!!!
امينة عيسى ، اختى الصغنونة ، افتقدتك كثيرا...ياااااخ..
كبر
04-03-2013, 08:42 AM
Kabar Kabar
تاريخ التسجيل: 11-26-2002
مجموع المشاركات: 18547
عارفة ، امينة ، في واحد من تجلياته ، تلك التي لا يفهمها شعب السودان العظيم ، قال صديقي الجميل ، ابكر ادم اسماعيل ، ان كان هناك من يفهمني في هذه الحياة و يشرحني بدقة ، هو هذا البقاري الحمــــار ، و اشار نحو شخصي الضعيف..!!!!
و يا ريتك يا امينة بتعرفي ابكر ادم اسماعيل هذا...!!! و ما اقساها لحظة يا امينة ، ياااخ تفتقد الجكس النضيف، ولا تقعد تباصر حجج سيدنا ابكر ادم ذاك..؟!!!!
في الفيديو ، يا امينة ، الناس ح تقعد تتابع اللحن الجميل ، و المزيكا الفارهة ، تلك التي لم نستطع ان نقايضها بالحداثة مهما كانت.. أما شخصي ، البقاري الحمــــار ، اصالة عني نفسي و نيابة عن صديقي الجميل أبكر ام اسماعيل ، القاعد في غابات ما انزل الله بها من سلطان ، فاننا نقتنص اللحظة المفارقة و نشوف الشوف الماقادرة نخبة دار ام سودان تشوفو..!!!
و يا ريتك ، يا رحيمة ، بتعرفي دار ام سودان كويس ، شفتي يا امينة.. نفس الدلو.. القاعدات ينشلن فيهو بنات ابا من دار النيجر العظيمة.. بيكون نشلو قريبك كبر أو ابكر ادام..!!!
الموية ، يا امينة.. ، هي سر الحياة..و باستعجب كتير لمن اشوف الناشطين و الناشطات يقولوا ليك : و الله دايرين تنمية..و موية شرب نقية...!!!
اها يا امينة ، يتخيل لي.. لو زول أو زولة ما جرب ينشل موية بالدلو..من بير عضلها دابك اخضر (الله يستر يا امينة ما يجينا مثقف ولا مثقفة يقول لينا عضل البير ده شنو..!!!!)..ما بيقدر يعرف بالضبط شنو معنى الناس تكون دايرة موية شرب نقية.. عشان يتوافق مع اخر جاكات المرشد أو دليل التنمية.. كما ساقته سيدتنا الأمم المتحدة ، قدس الله سرها..!!!
نفس البير يا امينة ، لو ظهرت معاك في الفيديو المرفق ، ح تلقيها في دار ام سودان.. في الأقاصي البعيدة...و البير هناك يا امينة.. ماها مشرع لموية الشراب و بس.. نفس البير ممكن يتلاقا فيها الشباب...بنات و اولاد.. الحبان يا امينة ..و مين عارف.. لو القسمة قسمت معاك .. ممكن تلاقي النصيب في ذات نفسو... و الله صحي..!!!!!
في اول الفيديو..بتظهر ..بت ابا المغنية فاتنو (فاطنة)...و دي يا امينة بنشوف فيها حاجات عجيبة.. النقرابي درب الطير...نفس النقرابي القاعد يجهجهني ..و يجهجه صاحبي الجميل ابكر ادم اسماعيل..و ناس كتيرة صابرة ساكت...نقرابي بنات البرنو يا امينة... ياخي ده نقرابي لو شفتيهو على الطبيعة يجهجهك انتي ذاتك في حنانك.. خليك من قرايبي احمد الأمين..و فضيلي جماع...!!!
ده واقع ، يا امينة ، لا ح تقول ليك عنو.. الجبهة الثورية..ولا حركات السودان للتحرير ، تلك التي تفوق غنم ابليس عددا..ولا ناس الجبهة الإسلامية..ولا الطائفية.. ياخي شفتي نحن الشعب السوداني ، ده ياهم المعذبون في الأرض ، الذين كتب عنهم اخونا دكتور طه حسين.. او بالعدم ، ول ابا المارتينك..فرانز فانون..!!! (ده راندوك مثقافتية يا امينة ، و ما تشتغلي بيهو كتير..).. Cinkon Hadiza\
ديل ( فــولبي ) يا امينة ، و ليهم مشتقات كتيرة تانية... شفتهم لمن كنت زمان قاعد اسرح في نواحي البيحير ، غرب لقاوة، ناس بقارة ساكت..و انتي عارفة أول بقرة البقارة سعوهوا كانت هية من جد الوفلبي ديل ..!!! لمن شفتهم ، شعب فيهو حاجات غريبة خلاص.. يعني كل الفريق ما بتلقى فيهو كلــــب...و قاعدين يخلوا اللبن في قرعات كبيرة.. في الليل.. معرض لضو النجوم...و فكرتهم.. انو لو جا ضيف يلقى لبن بارد مبذول كده لله ..و يشرب ما استطاع اليه سبيلا...!!!! نفس الضفاير...و الناس ديل..الرجال و النسوان.. كلهم قاعجين يعملوا ضفاير.. و اكسسوار.. ملابس بالوان زاهية.. سكسك.. خنانيق.. تلاليل...و الفريق.. الخيام.. الرواكيب..!!! البقر بتاعتهم.. كنا بنقول عليها (كوري ، عجيلة فلاتة).. تتميز بالقرون الطويلة..و هي نفس النوع الذ يسعيه اهلنا الدينكا في جنوب السودان..!!!!..و الجمال ( في النيجر الناس بتصنف بعض منهم انهم طوارق)..)!!!..
سمعت يا امينة ، مزيكا التكنو ، كثيرا و لم تعجبني ، و لكن التطبيق هنا جعلني اعمل استثناء...و المغنية اسمها فاطنة..و بيني و نفسي قاعج اسمها قاطنة الصغيرة تمييزا ليهو عن فاطنة بتاعة المجموعة الصابقة (صوغه)..الأغنية هنا هي عبارة عن اهزودة.. يعني ممكن تقولي عليها مدحة..و اسمها (قرمه)...و فسرتها بانها تعني (وا شوقا)..و الليلة لو مشيتي فرقنان البقارة في الدلنج.. ممكن تلاقي زول/ة يقول ليك (قرمانين)..و تعني مشتاقين..!!! من الحاجات الممكن نعاين ليها بحنية شديد.. حكاية الناس القاعدة في قيف البحر و بتغسل في الهدوم..و نفس المشهد ممكن يلاقيك في الفراشاية (شمال الدلنج ، نفس البلدة التي درس فها اخونا ابكر ادم اسماعيل المرحلة المتوسطة)..و ممكن تلاقي ناس بتنده للشيخ ابوبكر ثاني..!!!! و نفس البنات,.. بلوزة حمراء.. اسكيرت (تنورة) جينز ازرق.. أو كندكات مزركشة...!!!!
ياااخ انا الدخلني في الحكاوي دي شنو؟..
امينة ن مشتاقين يااااخ..و افتقدتك يا صديقة... و ح اهديك حاجة قاعد اسمعها كتير...!!!
كبر
04-03-2013, 10:11 AM
Kabar Kabar
تاريخ التسجيل: 11-26-2002
مجموع المشاركات: 18547
ده يا امينة ، قريبي عمر المختار بامبينو من طوارق جمهورية النيجر..و الكونسيرت ده كان في سنة 2010 في لبدة أغاديس في شمال جمهورية النيجر..وكت داك حصلت حاجة كده زي اتفاقية نيفاشا في السودان.زو عمر كان في المعارضة..و بعد السلام قاموا .. من باب تهدئة الأجواء و ابراز حسن النية.. انو سمحوا ليهو يعمل حفلة في باحة المسجد العتيق في اغاديس...و المسجد ده من عجايب الدنيا السبعة,,و عمرو زي ألف و ميتين سنة..و هو لغاية الآن موجود.. الفكرة..التسامح النادر أن يسمح لمغني معارض أن يقيم حفل في المسجد العتيق..!!! طبعا ، بعد داك موضوع السلام طرشق في النيحر..و ناس عمر بقوا زي حكاية قطاع الشمال و حكرة مني اركوى مناوي في السودان ، و الجماعة تاني دخلوا الغابة..و عمر المختار اخر اخبارو انو لاجئ في بوركينا فاسو..!!!! و عمر المختار.. اصبح زول عالمي يعني قاعد يعمل حفلات في باريس.. بلجيكا.. سويسرا..الخ..و هو عندي اشبه بالمرحوم محمود عبد العزيز.. بس الفرق أنو عمر فنان عالمي..و الحوت فنان اقليمي (السودان ، ارتريا.. اثيوبيا.. الصومال)..! ما يعجبني في هذا الفيديو .. ليس المزيكا فقط..و انما طريقة لبس اللناس.. أي و الله..! ف سنة 1996 ..و هي اخر سنة مشيت فيها فرقان البقارة في ضواحي ابوزبد في غرب كردفان... كنت لابس نفس اللبس.. عراقي بلوبلين لبني فاتح (ناس احمد امين ممكن يشرحوا للجماهير قماش البوبلين ده شنو)..و كنت لابس معاهو ســــرول لبني...و ورامي العمة البيضا بنفس الطريقة.. ( في دار المسيرية قاعدين نسميها صبي شاف بنات..و يتخيل لي ناس عمر المختار بتكون عندهم نفس الفكرة..!!!)...و بعدين اهم حاجة.. الجزلان يكون في الجيب...و ظاهر كمان..الفرق بين و بين عمر المختار .. الجيتار.. لأنو أن كنت شايل حاجة تانية خالص .. الله لا وراك ليها..يااااااخ....!!! بعدين نفس الزول اللابس ليهو جلابية وفوق عليها صديري داكن.. ممكن تلاقيهو في الدلنج.. الفرشاية.. ابوزبد..نيالا... الفاشر.. الخ..! و اكتر حاجة بتعجب حكاية الهدوم االلونها اشبه بلون الكركدي..و برضك موجودة في تلك النواحي من السوداني..!!!
اما الرقيص.. فاسكتي ساكت خليهو..!!!! يااااخ ده شو ق ليك يا امينة ، ولا انثروبولوجيا عدييييل...!!!!
المهم ، فاقدك شديد ، يا اخية ، و ياريتك تظهري ياخ.. و لو النقة الفوق دي ما جابتك.. ح نقوم نكب ليك شوق بالسوداني لمن تآمني ذاتو..!!!!
كبر
04-03-2013, 10:13 AM
Kabar Kabar
تاريخ التسجيل: 11-26-2002
مجموع المشاركات: 18547
بت عيسى مسكت تب باب الكعبة وباب بيت النبي (صلى الله عليه وسلم) وهي حالياً تجول حافية ببيوت التواصل والمحبة تتساقى أنخابها والأحباب هنا في جدة وقد زارت الرياض أيضاً والتقت الأحباب وعما قريب -بإذن الله- ستعود إلى البلاد التي هناك بعد أن امتلأت جيداً بالرضا والطمأنينة لتترك قلوبنا نازفة لفراقها
أخت رجال البنية والله مافي كلام أخت رجال بحق وحقيقة ومنذ الآن قرمانين ليها
يا كبر تكتب سطر وتفط سطور ممتلئ أنت يا صاحبي بالأبعاد والجمال والفرادة...
حفظكم الله بهذا الفيض المستند إلى الأصالة والاستشراف
تحية ومحبة دائمة
04-04-2013, 08:18 AM
عباس الدسيس عباس الدسيس
تاريخ التسجيل: 10-11-2012
مجموع المشاركات: 3404
سلام حبيبنا كبر تلك المرأة الجريئة التي ليست ككل النساء كما يقول عنها اصدقائها ومن يختلف معها . امرأة تحب المواجهة، ولا تجد ذاتها إلا حين تناضل من اجل حقوق المرأة لانتزاع حقوقهن عنوة. لديها قضايا للتحاور وإن دعي للتشاجر من اجلها لا رغبة في الصدام، ولكن لأن لها مبادئ لا تحيد عن الدفاع عنها. صادقة في احاسيسها صادقة في وطنيتها صادقة في نضالها صادقة في كفاحها المتواصل من اجل حقوق المراة.......... غادرت الرياض فجر اليوم ربنا اوصلها بالسلامة
04-04-2013, 08:25 AM
هيثم طه هيثم طه
تاريخ التسجيل: 08-30-2011
مجموع المشاركات: 1153
هيثم..حبابك يا صديق كتر خيرك على المرور.. فكرة البوست..افتقاد زميلة المنبر الصديقة امينة عيسى..و اخر مداخلة قريتها ليها كانت بتشكي..و خفت عدييل يا قريبي... لكن كتر خير الأصدقاء بله و عباس..جابو النجيضة.. لم التقي امينة في حياتي..و اتمنى أن التقيها.. لكن اهلنا قالوا الجواب يكفيك عنوانو.و من بعض كتاباتها في الأسافير..و حضورها في البوستات التي اكتب فيها..ادتني احساس زولة ممكن تكون بتعرفها من زمن.. عشان كده عملنا البساط احمدي و قعدنا نتونس معاها.. ونسة فيها شوية انثروبولوجيا..و طريقتنا في التعامل مع مادة الفيديو كخطاب شامل فيهو المزيكا و عرض الثقافات بصورة حميمة للغاية..و كالعادة تستغرقني مزيكا ناس غرب افريقيا.. مالي.. النيجر..الطوارق.. جمهورية الصحراء (بتاعة ناس البولساريو)..
مجموعة (صوغه).. من جمهورية النيجر..و ما عارف العجبك العمل الأول ولا الثاني؟.. المهم في العمل الثاني.. اشارة مهمة نسيت اذكرها في المداخلات السابقة.. انو الزول البيظهر و هو بيعزف الجيتار واقف.. هو دكتور محمد... مؤسس المجموعة.. شفت المحن دي كيف؟.. الناس بتعرض المزيكا بتاعتها من دكتور و انت ماشي..عشان كده اعمالهم دايما مجيهة و العالم قاعد يتوقف فيها كتير و يتجاوب معاها.. اضافة لحرصهم و معاهم ناس مالي.. انو يعرضوا الاتهم المحلية بتاعة المزيكا..
العمل التاني.. هو اهزوجة عن تأريخ شعوب الفلاتة..و الفكرة دي افادتني كتير.. لأنو زمان كنت مفتكر الفلاتا في السودان و نيجيريا..و لكن العمل بيوضح ليك انهم شعب سواح للغاية..تونس.. غانا.. النيجر..مالي.. كاميرون..و فوطا..و ديل ياهم اهلنا الموجودين في السودان..و عاصمتهم في دارفور اسمها تــُولس..و المثل بيقول (بنات تـــــُولس.. سمحات و مــُلس).. اتمنى انو الفكرة تكون وقعت ليك..و حبابك طوالي يا هيثم.. كبر
04-04-2013, 08:54 AM
Kabar Kabar
تاريخ التسجيل: 11-26-2002
مجموع المشاركات: 18547
Quote: سلام حبيبنا كبر تلك المرأة الجريئة التي ليست ككل النساء كما يقول عنها اصدقائها ومن يختلف معها . امرأة تحب المواجهة، ولا تجد ذاتها إلا حين تناضل من اجل حقوق المرأة لانتزاع حقوقهن عنوة. لديها قضايا للتحاور وإن دعي للتشاجر من اجلها لا رغبة في الصدام، ولكن لأن لها مبادئ لا تحيد عن الدفاع عنها. صادقة في احاسيسها صادقة في وطنيتها صادقة في نضالها صادقة في كفاحها المتواصل من اجل حقوق المراة.......... غادرت الرياض فجر اليوم ربنا اوصلها بالسلامة
عباس..حبابك يا صديق كتر خيرك على المرور..و قاعد اتابع كتابتك بصمت.. الواحد كان قايلك يا عباس من النشيشبة و غادي..و اهو على الأقل اتأكدنا من حكاية بعض الظن اٍثم.. كتر خيرك على تطميننا على صديقتنا امينة عيسى..و اهو عرفنا بعض الجوانب من شخصيتها و تجربتها.. ربنا يرجعها بالسلامة .. مع انو البلد الماشة ليها اليومين ديل بردها يسقط حجر الحوت ذاتو.. خليك من البشر.. لكن اكيد قريبتي ح تكون شالت معاها حمو من الصحراء و كده.. كتر خيرك يا عباس.. كبر
04-04-2013, 09:08 AM
Kabar Kabar
تاريخ التسجيل: 11-26-2002
مجموع المشاركات: 18547
Quote: أخت رجال البنية والله مافي كلام أخت رجال بحق وحقيقة ومنذ الآن قرمانين ليها
صديقي الشفيف.. بله..حبابك كتر خيرك على المرور من هنا.. و سعيد على تطمينك لينا عن احوال الصديقة امينة.. زمان يا بله..اهلنا البقارة في السنجكاية.. شمال مدينة الدلنج.. عندهم زول قام ماشي الحج.. اها الناس تشيل و تودع..واحد قريبنا متضايق شديد ويشيل و يزحف لمن بقى وجها لوجه مع الحاج المسافر..و قال ليهو: ربنا يعدل طريقك.. لكن يوم تخت ايديك في الشباك.. قول لي ابو فاطني.. لو بقيامتك قومها لينا .. نحن ديل اتضايقنا تب..!!! و لو كنا نعلم انو امينة ماشة هناك ..كان وصيناها بنفس الوصية.. الحالة سعبة خلاس..!!! ربنا يوصلها بالسلامة.. لكن البرد لسع قاعد..
ياريت نشوفك طوالي يا صديقي..
كبر
04-04-2013, 10:01 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
Quote: فكرة البوست..افتقاد زميلة المنبر الصديقة امينة عيسى..و اخر مداخلة قريتها ليها كانت بتشكي..و خفت عدييل يا قريبي... لكن كتر خير الأصدقاء بله و عباس..جابو النجيضة.. لم التقي امينة في حياتي..و اتمنى أن التقيها.. لكن اهلنا قالوا الجواب يكفيك عنوانو.و من بعض كتاباتها في الأسافير..و حضورها في البوستات التي اكتب فيها..ادتني احساس زولة ممكن تكون بتعرفها من زمن.. عشان كده عملنا البساط احمدي و قعدنا نتونس معاها.. ونسة فيها شوية انثروبولوجيا..و طريقتنا في التعامل مع مادة الفيديو كخطاب شامل فيهو المزيكا و عرض الثقافات بصورة حميمة للغاية..و كالعادة تستغرقني مزيكا ناس غرب افريقيا.. مالي.. النيجر..الطوارق.. جمهورية الصحراء (بتاعة ناس البولساريو)..
مجموعة (صوغه).. من جمهورية النيجر..و ما عارف العجبك العمل الأول ولا الثاني؟.. المهم في العمل الثاني.. اشارة مهمة نسيت اذكرها في المداخلات السابقة.. انو الزول البيظهر و هو بيعزف الجيتار واقف.. هو دكتور محمد... مؤسس المجموعة.. شفت المحن دي كيف؟.. الناس بتعرض المزيكا بتاعتها من دكتور و انت ماشي..عشان كده اعمالهم دايما مجيهة و العالم قاعد يتوقف فيها كتير و يتجاوب معاها.. اضافة لحرصهم و معاهم ناس مالي.. انو يعرضوا الاتهم المحلية بتاعة المزيكا..
العمل التاني.. هو اهزوجة عن تأريخ شعوب الفلاتة..و الفكرة دي افادتني كتير.. لأنو زمان كنت مفتكر الفلاتا في السودان و نيجيريا..و لكن العمل بيوضح ليك انهم شعب سواح للغاية..تونس.. غانا.. النيجر..مالي.. كاميرون..و فوطا..و ديل ياهم اهلنا الموجودين في السودان..و عاصمتهم في دارفور اسمها تــُولس..و المثل بيقول (بنات تـــــُولس.. سمحات و مــُلس)..
يا صديقي انا كنت ببحث عن دى من زمان
كتر خيرك على شرح الفكرة وربنا يلم شمل الاقلام التي ادارت ظهورها عن هذا المنتدى
04-05-2013, 08:34 AM
الفاتح ميرغني الفاتح ميرغني
تاريخ التسجيل: 03-01-2007
مجموع المشاركات: 7488
حبيبنا كبر تحياتي قرأت البوست اكثر من مرة، وفي كل مرة اشعر بأن المحتفى بها في هذا السرد الجمالي الثقافي العميق، لأبد وأن تكون إنسانة إستثنائية، وأظن أن ما كتبه الزميل عباس الدسيس عن سيرتها العطرة، مقرؤا او مقرونا مع ما كتبته بحقها يؤكد جدارتها بالحفاوة والتقدير. لي عودة للسرديات.
محبتي
04-05-2013, 03:15 PM
الصادق اسماعيل الصادق اسماعيل
تاريخ التسجيل: 01-14-2005
مجموع المشاركات: 8620
يا خي دا كلام عجيب (طبعاً) قاصد كلام الموسيقى الفوق، بعد نحمد الله إنك اطمنت على اختك امينه عيسى، اها نرجع للموسيقى الفوق دي، كدي (إنداح) لينا شويه عن الفلاتة وموسيقتم ودلالتها الاجتماعية.
طبعاً نقاشات الموسيقى الزى دي بتذكرني طوالي بي صديقنا ابكر (قدس الله سره)، لأنو كان بيبحت وراء المزازيك دي وبيشوف ابعادها الاجتماعية بطريقة غريبة.
يا خي تعال واصل هنا خلينا (الننجم9 شوية من ساس يسوس الضيعت بلدنا دي.
04-07-2013, 07:56 PM
امينة عيسى امينة عيسى
تاريخ التسجيل: 11-20-2010
مجموع المشاركات: 619
بسم الله الرحمن الرحيم كبر ليتها تاخرت قليلاً اخيتك امينة فى الرد حتى تكتب .. وتكتب .. وتدمى الاحرف شوقاً .. لاخية لم تراها .. فكان شوقاً نبيلاً احرف حببتنا فيها من روعة صياغتها وانتقائها ليتها تاخرت قليلاً .. ولكن عسى ان يكون حضورها باكراً .. مقدمة لسجال احس بمقدمه وطعمه .. ليعوضنا انقطاع سيل حرف الشوق
كم انت جميل حرفاً ومعنىً
ارتيقا
04-07-2013, 10:07 PM
امينة عيسى امينة عيسى
تاريخ التسجيل: 11-20-2010
مجموع المشاركات: 619
ارتيقا يا اخى العزيز والله انا قريت البوست سطر سطر واتمعنت فى كل كلمة وبينى وبينك حسدت روحى عدييييييييييل وياريت لو اتاخرت لكن ولض امى كبر نا عارفة وواثقة انه عندو الكثير المثير
كتابة تشرح القلب وحروف تطرب حد الوجع
الله يخليك يا كبر والله رغم سعادتى باول زيارة لبيت الله لكن الشهادة لله سعدت وفرحت وطفرت الدمعة من عينى عند ما قرأت هذا البوست وانا فى الترانزيت فى مطار شارل ديغول وانتابنى شعور غريب عندما سمعت من الاخ عباس الرشيف انه فى زول بيسال منى فى سودانيزاونلاين صحيح الحباييب كوتار يا كبر لكنك اجملهم واقربهم الى نفسى ربنا يديك لما يرضيك وساعود كما وعدتك للتعليق على هداياك شوية تعب وانفلونزا تغيير الجو والبرد لكنى بخير والحمد لله حتى يحين الوقت لك منى الشكر جله والتقدير كله والاحترام عن اخره
04-08-2013, 03:47 AM
Kabar Kabar
تاريخ التسجيل: 11-26-2002
مجموع المشاركات: 18547
Quote: ارتيقا يا اخى العزيز والله انا قريت البوست سطر سطر واتمعنت فى كل كلمة وبينى وبينك حسدت روحى عدييييييييييل وياريت لو اتاخرت لكن ولض امى كبر نا عارفة وواثقة انه عندو الكثير المثير
كتابة تشرح القلب وحروف تطرب حد الوجع
حقيقة كنت اقرأ واستمتع بالقراءة واتمنى ان لا تنتهى الكتابة .. ففيها تحسين ( بحنية ) تتقطر .. وتربطك باماكن تتمنين رؤيتها لفرط تأثير ما كتبه عنها ..
ول ابا كبر مالك بخلت علينا بالطلة
( طبعاً انا زى اخونا داك ما كنت عارف معنى ول ابا بالتحديد ولكنى كنت احس بغايتها من سياق الاستخدام )
ارتيقا
04-10-2013, 07:07 AM
Kabar Kabar
تاريخ التسجيل: 11-26-2002
مجموع المشاركات: 18547
و يا ارتيقا ، يا صديقي ـ عذبتنا اااااخ..!!! هل جربت يا صديقي أ أن تحوم في نص ثقافة الدوت كوم... و تمرق عليك وجوه.. تختبر فيك مدى العمق ( يا ارتيقا ، لست وحدي ، و ان كنت ترغب ، ذكرني يوما ما)..!!! ناس يا ارتيقا.. ما تعرقهم من وين: هايتي ، جاميكا ، جزر الراس الأخضر (ذكرني يا صدق، هي بقاع مشى ليها قرايبك صلاح احمد ابراهيم ، و محمد المكي ابراهيم ، اوعك تقول لي ما سمعت بيهم..!!!!) ... هو شريط ا ارتيقا ، نوبة ...عفر.. ارمو...بقارة.. نيجر.. فولبي (تقرا فلاتة)...بولوساريو.. بامبينو... سيدي دوشكا..!! عارف يا اريتقيا ، هي امور مافي زول ولا في دار ام سوداني ح يقول ليك عنها....!!!
عارف يا ارتيقا ن صديقات من جاميكا ، البراب\وس.. الراس الأخضر... مالي ، النجير..غانا... يقولوا ليك نحب السودان ، و لمن تجيب ليك خريطة عالم ، وتقول ليهم وروني اتو سودان قاصدين؟ ياخ تلقى نفس الوههم.ز شريط واحد من مورتانيا لغاية جيبوتي...بما يحتوي جماهير دار ام سودان...!! حزن يا صديقي ، بالجد محزن.. تقول ليهم اا ارتيغا... يقوموا يقولوا ليك انت وين من السودان الجدي؟.. سودان جديد بتاع عينكم يا مواهيم ياحناكيش زمن الغفلة..!!! مينالوي الجاميكية.. تقول ليك ممكلة كوش...و قبال ما ترفع راس:: تقوم تلاقيك ميشيل (من الباردوس ) و تقول ليك حاجة ولا كوش...!!!! و شعبك يا ارتيقا... لسع=ه بيسأل شنو يعني معارضة المعارضة؟؟؟؟؟ ، يا راااااااجل...!!!!!! يااخي..وين الشهداء...امثال عبد الحفيظبابكر ،الذي سبق وائل غنيم ، بي سبعة و عشرين سنة..!!!! لم تقتلنا ، يا ارتيقا ، خيانة اهلنا ، و لكن قتلنا ان لا يرى اهلنا بعد من ارنبة انوفهم....!!!!!
عودي يا امينة ، حتا ، يكون الموضوع انثروبولجي و كده..!!!
حزن ، و ما اقساك حزن..!!! أمينة ، تعالي اكتبي ، حتى ينحصر الأمر: في رمادي و شنو كده ماعارف...!!! و على قول ول ابا الفبيتوري: الحزن الأكبر ، لا يقال..!!!!! ما عليك. حااحضرها حفلة: في الصومال ، جيبوتي ، تشاد ، النيجر ، مالي ، تنزانيا ، غانا ، ساحل العاج..الخ.......!!!!
كبر
04-10-2013, 06:37 PM
امينة عيسى امينة عيسى
تاريخ التسجيل: 11-20-2010
مجموع المشاركات: 619
كبر يا صديقى الجميل كعادتك دائما تضغط على مواطن الالم بجمال.. لك المحبة والاحترام الذى تستحق انت وضيوفك جهلى بتقنيات هذا المنتدى تقف حاجز بينى وبين اشراككم مواطن جمال تستحقونها تجولت مع ابناء عمومتى وهم يرحلون خلف ابقارهم فى رحلة اراد الله ان تتكلل بالنجاح ووقتها كنت بالثانوى ولكنها عالقة بكل تفاصيلها وجمالها لم ولن تمحيها الايام والسنون ..كتابتك يا صديقى اعادتنى لتلك الايام الخوالى وانا استمع الان لبابا سعدو فى احد روائعه اردت ان اشركك وضيوفك الكرام وعلى راسهم الاخ أرتيقا ومتى ما سمح وقتى لاستنشق جمال حروفك ساعود
بسم الله الرحمن الرحيم ول ابا كبر ياخى انت الجننتنا ورديت فينا الروح عارف يا كبر الحاجة الشدتنى للبوست ده اكتر من طريقتك واسلوبك انى بحس فيهو احساس الونسة ( الالفة ) الحنينة .. بتخيلك وانت فى كامل مزاجك وبتونس فينا بلغة ما محتاجة تفسير او شرح .. والاجمل من كده انها بتخش القلب توشك زى مناجاة الحبيب .. وبرضو لسبب تانى .. كان عندى هواية وولع بالسفر وانا صغير .. بشتغل فى الميناء يا كبر وانا لسه فى سادس ابتدائى بداية الاجازة الصيفية لمدة شهر و بالحصيلة بقضى الشهرين الباقيين سفر .. وكان نفسى ازور كردفان وحتى الان تمور بداخلى هذه ( النفسى ) .. اشوف اهلك البقارة وغيرهم على الطبيعة .. وازور دارفور .. الناس يا كبر هناك بتمتعو بالحياة لان حياتهم بسيطة .. لا فيها تعقيدات ولا احلام مستحيلة .. عشان كده تلقاهم اصحاء بدن وبال .. ودار ام سودان يا كبر لو ما افسدتها السياسة كان حا تكون لوحة عجيبة من التعايش كما كانت فى السابق .. وده برجعنى لى ايام الطفولة والتوليفة العجيبة من الجيران وقتها حتى وانك بتحس بانو الحى ده سودان مصغر قاتل الله السياسة وقاتل الله فاقد تربوى السياسة السلطهم رب العباد علينا
عارف انى ما حا اقدر اجاريك بس حبيت اتونس واطلع شوية من الجواى وراجى رجعتك .. بس ما تطول
امينة عارفة لو كبر دا واصل يكتب ليك بالصورة دى حا تلقى نفسك دخلتى البقرو البوست ده كلهم بدون استئذان .. واريتو يواصل
ارتيقا
04-11-2013, 09:42 AM
امينة عيسى امينة عيسى
تاريخ التسجيل: 11-20-2010
مجموع المشاركات: 619
العزيز ارتيقا الونسة ما بتحلو الا مع من تحب ..والما عندو محبة ما عندو الحبة كردفان الصيد فوق قويزو..الغرة ام خيرن جوة وبرة ليتك تفعل وليتك تزور كردفان وجنوب كردفان ..رغم بؤس السياسة وفجور الساسة لكنها ديار المحنة والقليب الراسمو حنة ..لو زرتها لوجدتها فى تمام البهاء وكامل النور وصديقى الجميل كبر رويان محنة فهو ابن البقارة وناس (درى) بكسر الدال والراء فهم يدرون اى يمنحون بلا توقف ويعطون بلا مقابل ليته ياتى كل يوم ولا يتوقف فقد فتح نوافذ من الصعب اغلاقها بعد ان شممت عبير العافية وردت فينى الروح لك وله وللضيوف الكرام فردا فردا كل المحبة وكامل التقدير
امينة
04-13-2013, 08:51 AM
Kabar Kabar
تاريخ التسجيل: 11-26-2002
مجموع المشاركات: 18547
بت ابا امينة.. حبابك يا صديقة.. اللهم اجعلها زكاة جلد ساكت ، و ربنا يبلاك بالعافية يا اخية.. و حباب خلان الوفا و سمار الصفا من يتابعون هذا الخيط..نساءا و رجالا..
ياريت يا بت ابا.. تقولي عن الرحلة ، بتاعة الثانوي العالي تبعك ، كانت بي وين.. يعنى نظام المرحال وين.. عشان نعيد الرحلة و نسير معاك من تاني..
كتر خيرك على غنية بابا سعدو..و زي ما قلت ، يا امينة ،..و قاعد اقول طوالي.. شريط الفيديو ما عاد حاجة فقط للتطريب..و انما هو رسالة ثقافية متكاملة.. بس محتاجة تركيز في الشوف.. عشان المشاهد يكتشف التفاصيل الدقيقة..و سبحان الله.. كلما ما اتفرج في مثل الفيديوهات دي.. بلقاها ، انو كل حاجة فيها موضوعة في محلها عشان توصل فكرة معينة..و هنا يا بت ابا الكلام ح يكون كبير خلاص..لأنو لمن تقارن ثقافة و حضارة الغرب.. بتكون محتاج تؤلف ليك مجلدات (يعني حاجة معتمد على الكلمة).. بينما ثقافة افريقيا و حضاراتها بتعتمد اكتر على البصر..و عارفين انو الشوف ممكن يؤدي اغراض اكتر و اشمل تنوعا من مجرد الكلمة..و دي حتة دايرة ليها دماغ كبير ينـّـظر فيها..و نحن ما قدر الدماغ ده..و احتمال البعدنا يكون فيهم ناس ممكن تقدر تعاين للحاجات دي و تديها حقها الكامل..
مثلا يا امينة.. الفيديو بتاع بابا سعدو..و فيديوهات كتيرة من غرب افريقيا بتحمل نفس المضمون.. يعني لمن اعاين ليهو..بلقي نفسي بدون ما اشعر قاعد احتفل بالجماعية..يعني الغنا جماعي..و الرقص جماعي.. ياخي حتى البقر العارضنها بتكون في شكل مراح.. يعني جماعية برضك..و هنا بحس بالفخر.. و انو كانسان من افريقيا.. بحس بالتميز في مواجهة الآخر الحضاري.. تحديدا الغرب (بتاع الحداثة و ما بعد الحداثة..و الذي منو).. لأنو ثقافة الغرب بتقوم على تمجيد الفرد..و انو الفرد طوالي مفروض ياكل نارو براهو.. تغني براك.. تعمل قروش براك.. تعيش حياتك براك..تدخل في مشاكلك و تمرق منها ما تلقى البطايبك و يجبر بخاطرك..كل حاجة يقول امشي السستم و بيحلها ليك..و ده عكس الحال عندنا في افريقيا.. كذات حضارية و ثقافية.. يعني لو رجعتي اتفرجتي في فيديو بابا سعدو.. ح تلقي احتفال بحالة بتشكل تفصيلة صغيرة في الحضور.. لكنها كبيرة في المعني و الدلالة.. حكاية الزول القاعد في طرف الفريق و في نص القش..و هي تعبير عن حال انو الزول ده حردان و زعلان من حاجة ما..و مش مهم نعرف هو زعلان.. لكن بنلاحظ أنو في زو ل تاني جا و طايبو..و قال ليهو قوم ارحكاكا.. يعني نظام تفاوض (أي و الله يا بت ابا تفاوض عديل.. هو التفاوض الإ تكون فيهو حركة شعبية و مؤتمر وطني يعني؟!!!)..و ترضية..و اصرار انو الزول ده يرجع للمجموعة..و نفس المشهد ممكن يحدث في كردفان..دارفور..بحر ازرق.. هضاب اثيوبيا.. لغاية جبيوتي و الصومال..و دي الحتة الفايتة علينا كنخب في تلك المناطق..!
البقر يا امينة..نفس الحوض..و هو حوض صناعي.. في كردفان في مناطق المسيرية اسمو الباطــية..و في الزمن القديم بيصنع من الخشب..و بعد دخول الحداثة (نظام الدوانكي و كده) اصبح يصنع من الحديد..اما البقر..بتشبه بقر بقارة دارفور و كردفان في قرونها القصيرة..و بتختلف عنها في الألوان..و نفس الوان البقر دي .. في السودان الناس بتقول عليها بقر كنانة..و كلها تتميز بالقرون القصيرة..عكس بقر اهلنا امبررو و التي تشبه بقر اهلنا الدينكا و الناس بتسميها كوري عجيلة فلاتة..و في مناطق المسيرية في غرب كردفان قاعدين يقولوا عليها كوري الزرقا.. لأنو ، و سبحان الله الوانها يا سوداء داكنة .. يا عسلية غامقة..ام البقر العندها قرون قصار.. لمن الوانها تكون داكنة (حمراء.. صفراء.. عسلية.. سوداء) فهي تسمى (المجوك/المدوك)..و بقارة بيقول عليهن (بنات مجوك الفضة ام صوف)..و الفضة معدن نفيس..و من اغرب الطرائف أنو بقارة كردفان بتجمد الفضة اكثر من الذهب..!!! الأكسسوار..و ادوات الزينة برضك حاجة مهمة..و بت ابا اللابسة الفستان الأبيض (الدقيقة 2:49)..و هي يتخيل لي لبسة بتشبه لبس ملكات النوبة القديمة ..و قامت لطشتها قريبتنا كليوباترا..و لو لقيتي رسومات لبقليس ملكة سبأ.. برضك بتكون لابسة نفس اللبسة..و اللبسة منتشرة في اثيوبيا ..اضافة لحكاية الخناق (عقد) المربوط في الرأس.. لكن اهم حاجة ، و في نفس الوكت اغرب حاجة ، و شفتها في بنات البقارة في كردفان.. حكاية الأساور القاعدين يربطوها أو يضعوها في الضراع(المسافة بين المرفق و الكتف)..و دي حتة يتخيل لي في كل العالم مافي زولة بتضع فيها اساور و زينة الإ في افريقيا..طبعا ناس نورث امريكا حاولوا يقلدوا الشغلانة دي..و قاموا بدل أساور بيعملوا وشم ( Tattoos زيادة فوق ده.. حكاية مبدأ تقسيم العمل (مبدأ قال بيهو ابو السيوسيولوجيا سيدنا اميل دوركايهم..طيب الله ثراه)..بتلاحظ انو الغنا..البنيات بيكونن من اعمار محددة..يعني نظام (15-30 سنة)..و دي مسألة مربوطة بالثقافات هناك..و في كردفان.. الزولة اول ما تتزوج.. بتقوم تبطل المردوم و النقارة.. يعني لو كترت بتكون سنة اولى زواج و أقصى حاجة تانية زواج.. !!!! النوستالوجيا ، يا بت ابا ، و ممكن نسميها الحنين الغارق في التأمل ، حاجة ما عندها حدود..و ممكن تتورها ابسط الحاجات التي لا تنتبه ليها ثقافة الإستهلاك..
عساك طيبة يااااخ..و ربنا يشفيك من النزلات..و الوقفات الصغنونة..و و على قول اهلك البقارة : اللهم اجعلها زكاة جلد ساكت..!!
من عبرك ، تحية لكل الوجوه ن الحميمة ، التي مليناها فقر لمن آمنت..و من عجب بتقول ليك: هل من مزيد..!!!
يا سلام يا كبر .. أنت مبدع حقاً .. أمثالك من يجمع كل السودان يوحد هذه الامة بمشتركات لا يأتي بها إلا أمثالكم .. هذا العمق ايجاد التواصل بين الناس .. واظهار الجمال والمكنون من الفنون والممارسات هو الذي يجمع الوطن في بوتقه واحدة .. بهذه الطريقة تستطيع ان تخلق تواصل لا حدود له بين فئات هذا الشعب الجميل .. أنا في البوست داك قلت ( اننا قبل مجموعة فناني كردفان عبدالرحمن عبدالله ، وابراهيم موسى ، عبدالقادر سالم كنا نجهل الكثير ونحن في اقصى الشمال ) .. بعد داك عرفنا كل جميل عن كردفان وتعلقنا به رغم عدم زيارتنا لكردفان .. هؤلاء اوصلوا رسالة لم يوصلها لنا تاريخ المهدية كلها .. ( غزال فوق القويز .. كلام غزل معسول لذيذ .. الخ شال القليب في كردفان ) ومفردات مثل شقيش وقدريشن .. الخ
يا كبر بالله كده شوف واحدة من القنوات الكثيرة دي وحاول تقدم شيء بنفس طريقة سردك كمان واصل في البوست الثاني داك .. ( ولد ابا ) ..
04-13-2013, 09:27 AM
Kabar Kabar
تاريخ التسجيل: 11-26-2002
مجموع المشاركات: 18547
ول ابا ارتيقا..حبابك كتر خيرك على المثابرة على الحضور هنا.. عارف يا ارتيقا.. العالم ده مافيهو حاجة مجانية كده لله في الله..يعني أي حاجة لازمن يكون ليها تمن..! طريقة الونسة دي يا ارتيقا ما جات بأخوي و اخوك..و انما هي شغلانة مكابدة و تأمل لزمن طويل..! مثلا.. انا احب الشعر يا صديقي..و لمن كنت في مرحلة الشباب كنت معجب بشعراء الستينات.. تحديدا ناس صلاح احمد ابراهيم و محمد المكي ابراهيم..و غيرهم..و كنت قاعد اقيف كتير في قصيدة صلاح و الإسمها (مريا)..و قام غناها حمد الريح.. اها القصيدة دي احتمال الناس بتعاين لبنية الشعر و الجزالة و التطريب..و انا كنت بأستغرب من حاجة عجيبة.. أنو القصيدة بتحفل باسماء الهة المثيولوجيا الإغريقية.. ناس عمك باخوس (اله الخمر).. أو عمك فدياس ( اله الرسم ولا النحب مش عارف)..و برومثيوس..و اكتر حتة قاعدة تفصمني.. حكاية الجلوس على قمة ألأولمب.. فكنت بقول ليه يعني قمم الجبال من عدمها يعني في السودان؟.. و ليه الزول ما يمشى الزنقور..ولا جبل الدلنج..ولا جبل الضباب (جنوب غرب مدينة الرهد اب دكنة في شرق كردفان)..و لا جبال كادقلي..!!!
الفكرة يا صديقي ، انفصام الثقافي عن واقعو و تفاصيلو.. عشان كده لمن نتفرج في شرائط الفيديو (و كتر خير عمك اليوتوب..و لعلمك واحد من الشباب الأربعة الإخترعوا اليوتوب.. زول مسلم من اصول بنغلاديشية..و في نفس الوكت فكرة ناطحات السحاب الحايمة في امريكا اخترعها مهندس مسلم من بنغلاديش..و عندو مدرسة فلسفية في الهندسة و اسمها مدرسة شيكاغو..و قال استوحي الشغلانة من عمارة اليمن الجنوبي.. بتاعة بلقيس ملكة سبأ..و دي رجعوا اصولها لعمارة مروي و كوش في السودان..!!!!!!!)..خصوصا الشرائط من غرب افريقيا.. بنحس باتصال روحي بيها اكتر من غنية امدرمان (طبعا الناس ح تجيك و تشبكك حقد طبقي..و صراع هامش و مركز..و شنو كده ما عارف)..لأنها بتلامس الواقع (حتى لو كان ذكريات) العشتو و مريت بيهو في حياتك..واقع الخلا.. الريف.. التفاصيل التي تغيب عن عيون البندر و ثقافته..!!
بنفس القدر يا ارتيقا.. ليه ما تكون الونسة متبادلة..صحيح انتا ما شفتا كردفان أو دارفور.. لكن ليه ما تحكي لينا عن فكرة الرقيص عند انسان شرق السودان.. شنو يعني الناس تشيل سيف؟.. شنو يعني الرجال يلبسوا صديري و سروال؟.. شنو يعني حكاية الشعر الكثيف المجعد ( بالمناسبة هي نفس الفكرة الشغالين بيها اهلك في جامايكا ، و معروفة عالميا بتسريحة الراسطا ، و هي عندي مسروقة من تسريحة الهدندوة في شرق السودان..!!!)..؟؟...شنو يعني حكاية الراقصات من البنات في ثفافات شرق السودان ، بليبسن لبس طويل لكن الرأس بيكون مكشوف؟.. الرقص في ثقافات جنوب كردفان (نوبة و بقارة ) عبارة عن حوار مؤسس..و بيتم فيه استخدام تعابير الجسد.. اها الرقص في شرق السودان ، اكيد بيكون فيهو حوار ، اها تفاصيل الحوار ده شنو؟.. عارف يا ارتيقا ، لمن كنت ايام الحياة الطلابية في جامعة الخرطوم..لاحظت حاجة غريبة.. كانن الزميلات لمن يكونن ، الواحدة فيهن دايرة تمشي ليها مشوار.. بتقوم تفتشك..و تنهزك من من نومة العصرية اللذيذة ديك..و يرسلن ليك زول يصحيك عشان تمشى معاهن (نظام تحرسهن و كده).. أها مرة زهجت و سألت زميلة من بنات مدني حي بنات..و قلت ليها اشمعنا نحن ياااخ ، ما ياهو البركس (داخلية الأولاد في الوكت داك)..مليان اشناب؟..و قالت لي كلام غريب..: فرق كبير يا اخينا بين الرجل القيم و الرجل الذكر (بمفهوم بيولوجي بحت)...!!!!
الفكرة يا صديقي ، و هي محكات تقاطع ثقافات و منحيات و مطبات قاسية خلاس ، هي مشكلة الثقة..و الثقة قيم اجتماعية و ثقافية.. يعني نحن البتقوم بتثق فينا بنات جامعة الخرتوم ديل.. الحاجة دي ما قاطعنها من راسنا.. يعني انا كنت بسأل عمك الحاج النور كبر..و بقول ليهو احكي لي عن شبابك.. و كنت بأستغرب.. و الرجل انصاري .. يقول لي .. نحن كنا بنسير مع البنات..و الواحدة فيهن ما عندها حاجة بتسترها غير رحطها..و لاحظ الزولة دي بتكون اسرتها الممكن يكون فيها اخوان و ابهات.. يقوموا يفكوها معاك لفترة يمكن تلحق تلاتة اربعة شهور..و طبعا عمك طوالي قاعد يشتغلن و يقول لينا: بتقدروا على الشغلانة؟!!!.. و كنا بنقول ليهو برحط مافي طريقة للمقاومة يا عمك..و كان بيزعل و بيقول لينا: تبقوا انتو تربية بندر ساكت..!!! ثقافة العيب يا ارتيقا..و مربوط بالغنا و الرقص و المزيكا الأصيلة..و دي حاجة غايبة عن الكثيرين و الكثيرات مننا..و السبب التشبه بناس ثقافة الفرد و قيمة الفرد و الإنتهازية..! اشمعنا يا ارتيقا ، لو كنت زول مدينة من بورتسودان ، تمرق مسافة تلاتة كيلو ميتر من البندر (أي مدينة كانت في السودان) بتلقى حياة مختلفة.. فيها بتكون المرأة مستقلة و عاملة نشطة.. بتسرح سواءا ببقر أو ابل..و تحوم الخلا من حدود لي حدو مافي زول بيقول ليها عينك في رأسك..!!!... عارف ليه؟ لأنو أي قوالة ممكن توديك في ستين الف داهية و تضر بيك انتا قبال ما تضر بالزولة المعنية..!!!.. اها ده كلام .. يا ارتيقا.. لا المدرسة..و لا الحزب..ولا المدينة.. ما قاعدين يعلمونا ليهو؟.. شفت نحنا ضايعين قدر شنو..!!!!!!
قضيت واحد و عشرين سنة في التعليم النظامي في دار ام سودان ، و لم يعلمني هذا النهج التعليمي حكاية المحنة..و الزول يكون حنون و بسيط في طريقة تعاملو مع الناس...و الحتة دي اتعلمتها من مدرسة الحبوبة.. حبوباتي ( ام سماح ام عسكرية بت نصر السكران/ ام والدتي ، و حبوبتي دوه الكلودو.. بت على الجيك ولد ماهل / ام والدي)..و من درب ديل.. ياهو الزول بيلقى نفسو متصالح..مع شعوب كتيرة خلاس..جيبوتي.. الصومال.. اثيوبيا .. ارتريا.. السودان .. تشاد.. افريقيا الوسطى.. النيجر.. جنوب الجزائر.. جنوب المغرب.. الصحراء الغربية.. مورتنايا..مالي.. نيجيريا.. بوركينا فاسو.. السنغال.. غانا.. ساحل العاج..
يااا ده ما كان شوف لصديقتنا من السودان الشقيق ، أمينة عيسى..!!!
دمت طيبا يا ارتيقا ، و نشوفك طوالي...
كبر
04-13-2013, 10:53 AM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12500
استاذي كبر رائع ما اوردته .. كتبت في منتديات دنقلا عن حميد وقربه من قلوب الناس .. واتيت ببعض المعاني الغريبة للشعراء صلاح احمد ابراهيم ومحمد عبدالحي .. استاذي كبر نفس المعاني ونفس الاسماء .. وكأننا كنا نفكر بمهنج و احد .. وكنت اعتمد في قراءاتي على حمزة الملك طميل الشاعر والناقد السوداني عندما كان انتقد الشعراء السودانيين الذين كانوا يقلدون المصريين واراد ان يكون هناك شعر سوداني برموز ومعاني سودانية .. وقد نقلت جزء من تلك المقالة : (( والحق يقال ان حميد اذا ذهب في مراحل تعليمية متقدمة ربما .. اننا كنا قد لا نجد حميد الحالي ولوجدنا شخصاً آخر غارق في المصطلحات العلمية والفلسفية تماماً كما كان الحال مع بعض اشعار صلاح احمد ابراهيم وكل اشعار محمد الحي وما ساروا على نهجهم أو من يسمونهم بشعراء النخبة إلا صلاح احمد ابراهيم فقد نبغ في الحالتين فهو شامل وله المقدرة في التطرق الى مختلف الانواع ( الطير المهاجر .. مريا .. ) مع ذلك فإنه احياناً كان يغرق شعره ببعض المصطلحات ( باخوس .. هيلين .. اولمبيا .. الخ ) ثم تراه في بعضه ابن امدرمان المشبع بكل المعاني والكلمات .. وقد ذكرت مرة ان صلاح لم ينس ابداً مقاصر قريته الرابضة في ريفي دنقلا .. وأكد ذلك عندما اتى بالطير المهاجر من الشمال في عبارته ( على نيل بلادنا سلام .. ونخيل بلادنا سلام ) ولكن استاذنا محمد عبدالحي لم يكن له نصيب عند عامة الناس وهكذا كان التيجاني يوسف بشير ولكن لا مقارنة لأن تيجاني ظاهرة لن تتكرر ابداً في مجال الشعر النخبوي اذا جاز التعبير .. وشاعرنا حميد وتحت نظرية ( رب ضارة نافعة ) توقف تعليمه عند خط الثانوية .. ولكن مداركه ومواهبه وكيفية توظيف ادواته هو عالم واسع أرحب من مدرجات الجامعات ومراكز البحث المحدودة الاطار .. واحسب انه اوصل رسالة الى الشعب والوطن كان لا يمكن توصيلها بمئات المحاضر من رسائل الدكتواره والنظريات العقيمة المعقدة التي تموت داخل الاروقة الاكاديمية في الجامعات ومراكز الابحاث .. فالطبقة التي يخطابها حميد هي الغالب الاعم وهي المؤثرة والمحركة لعجلة التاريخ والجغرافيا واهمها في تغيير الحراك السياسي والاجتماعي .. فقد تيقنت أن الغوص في اغوار الاكاديميات والنظريات يحد من مقدرة استخدام بعض الادوات المحلية المؤثرة مثل الامكنة والشخوص والممارسات والحكم والامثال والاسماء ذات الدلالة مما يفقد شعر هؤلاء العمق واللحن والتأثير والموسيقى ولا فائدة لشعر لم يتناقله الجمهور وعامة الناس .. وما كان سوق عكاظ إلا منبر لعامة الناس في ذلك الزمان لنشر الشعر عن طريق الرواية شفاهة جيلاً بعد جيل وإن لم يكن ذلك الشعر مموسق ومقفى ومغنى لما وصل الينا بكامل هيئته وكلماته .. وما امرؤ القيس وابن كلثوم وغيرهم الا من امثال حميد يستخدمون لغة العامة بطريقة مموسقة ومنمقة وبهذه الروح والقيمة تسنموا ذرى المجد وخلدهم التاريخ وذهب شعر غيرهم الى اطار البحث الاكاديمي الضيق .. ))
ولد ابا علي عبد الوهاب.. حبابك يا صديقي.. كتر خيرك على المرور من هنا..و المشاركة في احتفاءنا بصديقتنا بت ابا امينة.. و التحية لسمار الصفا و خلان الوفا من يتابعنا في هذا الخيط..
فكرة القنوات يا علي سمحة تب..و ممكن تضيف ليك الصوت و تعابير الوش.. عشان توضح شكل التفاعل مع المادة البتتكلم عنها.. لكن البعد (نحن يا اخوي ما تشوف فصاحتنا دي في بلد طيرها عجمي ، و بنــقاوم فيها التصحر الثقافي و الوجداني بالمؤانسة هنا.. عشان ما نصل مرحلة نسيان ذاتنا الثقافية)..هو العامل الأساسي في عدم التعامل مع القنوات..لكن برضك ناس القنوات ما مقصرين..و بعض الحاجات اتطرقنا ليها هنا..ووجدت بعض المهتمين و قاموا مشوا تابعوها و طلعوا منها حاجات و اتعرضت في القنوات السودانية..
قرأت نقد حمزة الملك طمبل في فترة مبكرة من حياتي..و اهتميت بيهو لبعض الوكت.. ثم انصرفت لمشارب تانية..و في تقديري الشعر السوداني مشى حتات كويسة.. يعني ناس التسعينات ناس عاطف خيري.. عثمان البشرى.. ابكر ادم اسماعيل.. امين صديق..محمد حسين بهنس..و غيرهم كثر.. قاموا انتبهوا لحتة انشطار المثقف بين الأفق الجمالي المجرد..و الأفق الجمالي الواقعي..و حاولوا يقاربوا الحتة دي و نجحوا الى حد ما..و يا ريت نفس الشعر ما يقيف في دار ام سودان لأن جزء من الذاكرة الإنسانيية هناك..!
بالنسبة للشباب فناني كردفان (ابراهيم موسى ابا .. عبد القادر سالم .. عبد الرحمن عبد الله.. و صديق عباس)..ياخي ديل اجتهدوا جنس اجتهاد واحد..و كتر خيرهم مرقوا التراث الكردفاني لغاية ما ناس البندر سمعوا بيهو و قاموا اتفاعلوا معاهو..و الإجتهاد بيجي في حتة انو التراث الكردفاني (كجزء من الحزام المشغولين بيهو هنا و في مواقع تانية)..هو تراث جماعي.. يعني الرقص جماعي.. الغنا جماعي.. النفير جماعي.. الفزع جماعي..و هكذا..و الغنا تحديدا لمن تمرقوا من حتة الجماعية لحتة الفردية (كأن يقوم بادائه فنان واحد) الشغلانة بتكون صعبة شديد.. لأنك ما ح تقدر تقدموا بصورتو الأصلية..عشان كده الشباب ديل ركزوا في الملامح العامة: الريتم (الإيقاع) ، اساسيات اللحن ، و المفردة..و يتخيل لي ناس البندر اهتموا بهكذا نموذج لأنو قدم حاجة مختلفة عن السائد..و حرك السؤال بتاع الكلام ده جاي من وين بالتحديد..!
و عشان تشوف الفرق..نرفق هنا شريط فيديو من تراث اهلنا الحمر في كردفان..و طبيعة معاشهم انهم ناس ابالة (حكاية ابالة دي مهمة شديد يا علي ، عشان تقرب ليك الصورة لاحقا)..و بنفس الطريقة بتلاحظ الجماعية..و الأهم.. انو هناك في كردفان.. ما عندنا حاجة دي اسمها امرأة و ده راجل.. في حتة الغنا و الرقص بتتساوى الكتوف..و الناس بتشارك من غير تعقيدات و برتكولات رقيب اخلاقي و الذي منو..
الشريط فيهو عملين.. الأولاني ممكن نسميهو (البلوم)..و التاني ممكن نسميهو (جــُمال الشيل)..و الغنية الأولانية بتقوم بادائها السيدات (فوكال/صوت نسائي)..و في نفس الوكت الريتم (الإيقاع).. هو الصفقة ..و صفقة النساء عندها اتجاه خط معين..و بتكون صفقة الرجال تنويع على الخط ده..اضافة للصفقة بتلاحظ الكرير (فوكال/رجالي)..و هو اشبه بصوت ديك (ذكر) طائر الحمام..!
اصوات النساء فيها تبادل في التنغيم..و عشان تشوف الجماعية كويس.. انو صوت الزولة الأولانية بيمرق و بتجي بعدو اصوات المجموعة (شيالات)..و بعد خط معين بيمرق صوت زولة تانية (و الله يا علي السيدات ديل لا قرن مزيكا ولا فصول مزيكا ..لكن بالفطرة.. كل واحدة بتعرف كيف تضبط الزمن و تخش في الوكت المناسب..مافي بروفات..مافي مدير انتاج.. مافي مخرج.. مافي قائد اوركسترا..!!).. و لمن تعاين لطريقة الصفقة..و الصوت ..و حركات الرقص.. ح تقوم تتذكر حكاية انو الناس ديل ابالة.. لأنو الشغلانة كلها مرتبطة بحركة مشي الإبل ..هادية في المشي بصورة ممكن تسميه راسية (طبعا ده عكس اهلك البقارة.. رقصهم و غناهم حركتو سريعة شوية.. لأنو البقر حركتها اسرع من الإبل في المشي..و الله صحي..!!!!).. بعد داك بيظهر شكل الحوار في الرقص.. بتقوم تمرق زولة (لاحظ فكرة المبادرة ، ياعم لا مفاوضات ولا جندر.. زولة بتقلع حق التعبير عن الذات بي ضراعها..!!)..و بتلحقها زولة تانية..و بتخش الدارة و وجها على الرجال (نظام عيني في عينكم..و كده)..و الفكرة انها مفروض تصل صف الرجال و تختار من يراقصها (عن طريق رمية الشبال)..لكن في الفيديو بتقوم تتحرك خطوات (ما برضك الناس ممكن تتلاعب على السستم بتاع التأصيل ولا شنو كده ما عارف ..و تقوم تخلق رموزها الخاصة..!)..و بيقوم الشباب يخشوا الدارة.. يعني نظام عارفين منو التم اختيارو..و بعد داك بيخش واحد تاني (نظام مواجبة و مرافقة لزميله)..!!!
في النموذج التاني.. المرة دي الفوكال/الصوتي.. بيكون رجالي..و لاحظ قوة اصوات العالم دي.. ياخي لا ساوند سستم..ولا الساوند فارق..و هنا الريتم (الإيقاع ) بتدخل فيهو حكاية النقارة (الدلوكة)..و ممكن تلاحظ حكاية تقسيم العمل.. يعني العزف على الطبل بتقوم بيهو زولة..و الأغرب شوف وضع الدلوكة.. بتكون شايلاها في كتفها (فتش ثقافات العالم.. نادر تلقى طبل بتشال على الكتف..و يعزفوا عليهو بنغم.. المجموعة كلها منتظراها..!!..ياخي ديل ياهم الناس الأجمل مننا بي سنوات ضوئية عديييل..!!)..! برضك الرقيص.. بتقوم البنات تمرق في شكل مجموعة..و هنا.. بتظهر حكاية مشي الإبل بصورة واضحة شديد..المفارقة.. في النموذج الأول.. الزولة ممكن تغني و برضك تشارك في الرقص.. لكن في النوذج التاني الشباب بيكون مجتهد في الغنا و بس..!!!
شكل الغنا ده ، يا علي ، من تراث حمر..و حكاية الكرير..اول مرة ظهرت بصورة جماعية في المشهد السوداني.. لمن ناس عقد الجلاد التفتوا للجماعية في التراث السوداني..و غنوا عمل اسمو (ليبيا ان شاء الله تعقري و تعدمي الشيك الخدري)..و المرة التانية.. تجربة نانسي عجاج لمن غنت اغنية اسمها (اندريا).. اها يا على..الفيديو ده مصور في منطقة خماس الدونكي..شمال مدينة ابي زبد في غرب كردفان..و منو جات غنية اندريا..(كن ما كلام الناس يا اندريا ، بنسكن معاك خماس يا اندريا)..!!!
و نشوفك يا صديقي كبر
04-14-2013, 04:09 AM
Kabar Kabar
تاريخ التسجيل: 11-26-2002
مجموع المشاركات: 18547
يا سلام يا رائع .. هذا بوست مدرسة وطن .. شكراً لهذا العمق .. سرد رائع وسلس .. ومشبع بالمعرفة والعمق .. إنت كبير يا كبر .. غزارة في المعرفة وعمق وروعة في الطرح .. يا شباب خلو البوست ده فوق ..
04-14-2013, 09:39 AM
Artiga Gilani Artiga Gilani
تاريخ التسجيل: 02-16-2013
مجموع المشاركات: 1073
بسم الله الرحمن الرحيم ول ابا كبر دخلتنى مدرسة ياااخ صعب انى اطلع منها عارف يا كبر ميزة البوست ده ولا زلت اكرر وساكرر ما دام هذا البوست مفتوحاً انو كل البتكتب فيهو غير انو معلومة وقيمة ثقافية ومعرفة بمناطق من بلدنا .. انو الكلام من المونيتر وللقلب مباشرةً .. ما قادر القى وصف دقيق لحالتى وانا بقرأ كلامك .. ولا اظن بأنى حا اقدر اديك وصف دقيق .. ولكن اقرب تصور انى بحس بالكلام ده بحس بيهو بعمق معنى الكلمة ودى بعيدة عن موضوع انك تقرأ كلام وتفهمو .. وطبعاً فى فرق بين انك تقرأ كلام وتفهمو وبين انك تقرأهو وتحسو .. تتفاعل معاهو حتى وانى اعتقد بأنو اى زول يقرأ الكلام ده بيحس بأنو هو المخاطب .. وده كان اول احساس لى وانت بتخاطب الاخت / امينة .. بجيك راجع لى الشرق وناسو .. لى التفه والخلال .. ومع انى زول مدينة ساى وحرمت نعمة التمتع بحياة الطبيعة الا اننى سوف اجتهد واحاول انقل ولو صورة مصغرة عن الامر ..
Quote: دخلتنى مدرسة ياااخ صعب انى اطلع منها عارف يا كبر ميزة البوست ده ولا زلت اكرر وساكرر ما دام هذا البوست مفتوحاً انو كل البتكتب فيهو غير انو معلومة وقيمة ثقافية ومعرفة بمناطق من بلدنا .. انو الكلام من المونيتر وللقلب مباشرةً .. ما قادر القى وصف دقيق لحالتى وانا بقرأ كلامك .. ولا اظن بأنى حا اقدر اديك وصف دقيق .. ولكن اقرب تصور انى بحس بالكلام ده بحس بيهو بعمق معنى الكلمة ودى بعيدة عن موضوع انك تقرأ كلام وتفهمو .. وطبعاً فى فرق بين انك تقرأ كلام وتفهمو وبين انك تقرأهو وتحسو .. تتفاعل معاهو حتى وانى اعتقد بأنو اى زول يقرأ الكلام ده بيحس بأنو هو المخاطب .. وده كان اول احساس لى وانت بتخاطب الاخت / امينة .. بجيك راجع لى الشرق وناسو .. لى التفه والخلال .. ومع انى زول مدينة ساى وحرمت نعمة التمتع بحياة الطبيعة الا اننى سوف اجتهد واحاول انقل ولو صورة مصغرة عن الامر ..
>>>>>>>> ارتيقا جيلاني سبقني وكتب هذا الكلام وكأنه خطف هذا الرد الفني الرفيع من خشمي .. فهو عبر عن ما كنا نريد ان نقوله بالضبط . واعتبرني قلت الكلام ده قبله .. لكن برضه كلامي جاي... عشان فعلا البوست ده بقي مدرسة .. مدرسة في الونسة السودانية الراقية وونسة في الثقافة الرفيعة وونسة في المشاعر النبيلة وونسة في المعرفة البدون حدود.. ارتيقا جيلاني.. الله يديك العافية .. فإنت قرأت ما بخواطرنا وعكسته هنا.. والله يديك العافية..
اما المحظوظة اخيتي امينة عيسى.. فقد قرأت ردودها فوجدت انها تنثر الدرر النفيسة في هذا البوست .. فكلماتها أنوار تلألئ وحروفها وكأنها المسك والعنبر .. فكيف لا تكون هكذا وقد قيل فيها كل هذا الابداع وكل هذا الشلال من الكلمات الوضيئة .. شعرت ان اللغة في اناملها طيعة سلسلة ولا شك انك اخيتي امينة عيسى أديبة وشاعرة ولكنك لا تحبين الأضواء.. وحجة مباركة .. ودعواتك والله يديك العافية
04-15-2013, 08:23 AM
Artiga Gilani Artiga Gilani
تاريخ التسجيل: 02-16-2013
مجموع المشاركات: 1073
بسم الله الرحمن الرحيم اميرة السيد تسلمى يا ستى .. وحقيقة الكلام بخاطب الوجدان ومن اول قراءة للبوست احسست بهذاالاحساس ولا زال يتملكنى كل ما دخلته .. لذلك اعتقد بأنه احساس كل من يقرأ ما سطر بهذا البوست بغض النظر عن مشاركته فيه من عدمها .. والحمدلله القدرت اعبر عنك بهذه الصورة .. مع انى اعتقد بأن لغتى واحرفى كانت عاجزة عن مجاراة الرائع كبر فيما يسطره هنا .. ولكن كان لابد من المشاركة لنقل هذه المشاعر التى اعتبرها فى الاصل كلمات امتنان وشكر لاخونا كبر ان اتحفنا بمثل هذا البوست الراقى حرفاً ومعنىً .. حتى يواصل فى امتاعنا بونسته هذى .. تسلمى اختى مرة اخرى ..
فوق
فوق
فوق
ارتيقا
04-16-2013, 11:12 AM
امينة عيسى امينة عيسى
تاريخ التسجيل: 11-20-2010
مجموع المشاركات: 619
كبر يا صديقى الجميل لك وللحضور الباهى الف تحية ومحبة تعلمونها واخرى الله وحده يعلم بها اعتذر للغياب ولكن ساعود باذن الله كنت اريد التحدث عن رحلتى مع البقارة من (مرلا )جنوب الضعين ولكنك يا كبر بسيرة الطمبور والجرارى صحيت حاجات صعب تخطيها خلينى اجى واحكى ليك عن اجمل ايام عشتها فى كردفان وفى ضواحى كردفان وحلاوة الطمبور فى ابو حراز والمريكب والساعاتات كلهن خلينى يا كبر احكى ليك كيف كنت مجيدة( للكرير)وكنت نجمة الطمبور والجرارى فى المسابقات المدرسية يا الله يا كبر ما عندى غير اقول عافية تخصك فى المصارين برجع ليك برواقة واقول ليك عن اجمل ايام العمر فى كردفان
حتى حينه لك وللضيوف الكرام وعلى راسهم العزيزة اميرة السيد محبتى واحترامى الشديد
04-16-2013, 02:34 PM
ibrahim fadlalla ibrahim fadlalla
تاريخ التسجيل: 06-09-2007
مجموع المشاركات: 2585
صديقي ابراهيم..حبابك كتر خيرك على شرح حشرة الكعوك في بوست اخونا على دفع الله عن الدلنج..و صدقني يا ابراهيم عشنا لمن حضرنا الزمن البيقولوا لينا فيهو بعض من اصدقائنا: دايرين نشوف شدرة السمسم..و هو السمسم شجرة؟.. مندري..و بعد
القــُجــة.. و كما ذكر صديقنا ول ابا ارتيقا عابرا (التــفه)..و هي تفاصيلنا الصغيرة التي تعبرنا..و لمن نعيشها بنعيشها كما هي في تفاصيل دهرنا المعاصرنو.. لكن لمن نعاين ليها الليلة (بعد مرور سنوات).. بتبقى حاجة تانية..لمحة من تأريخ شخصي.. لا تقدر تقول عليهو جمالي..ولا تقدر تقول عليهو ثقافي..و لكنها لحظات كانت..
و الليلة يا ابراهيم لمن اعاين ليها..باستغرب..و ماهي التصاريف و المبررات لحكاية الزول يعمل قجة في ذاك الزمان البعيد .. غير انو الواحد كان عايش لحظتو و الموضة وكتها..لكن حينما اراجعها.. بتكون الأسئلة جديدة تب.. استايل الشعر و تسريحات الشعر و الحلاقة نفسها..و الغريبة.. الكائن السوداني اصلا ما قاعد يعاين للحاجة دي..
قرأت بعض الكتب..و بعضها مصور.. قامت بتصويرو باحثة المانية عن شعوب الكاونارو في اقصى الجنوب الشرقي من جبال نوبة..و كان الكلام ده في بداية سبعينات القرن الماضي..و بالمعاينات البسيطة بتلقى انو معظم استايل الشعر في نورث امريكا في التسعينات مثلا.. كان مارق من تسريحات و حلاقة شباب الكاونارو لشعورهم.. يعني نحن يا ابراهيم بنشيل القــُجة (و كان اسمها الخــُنفس في زمانا داك) منهم..و بعد جيل جيلين بنقلي ناس نورث امريكا شالوا حقنا بتاع الجبال داك و صار عندهم موضة.. طبعا هم غتيتين ما بيقولوا ليك هذا تشبها بشباب شعب الكاونارو في جبال نوبة في افريكا..لكن بالنسبة لي ما قاعد ازعل عشان في زول حنكني ثقافيا و كده.. بالعكس قاعد افرح كتير ..و اشعر باني انسان عندو قيمة..و انو ممكن يعمل حاجة تقوم تعجب ليها شعب درجة اولى (على الأقل حضاريا بالمعيار المايل اياهو)..الكلام ده يا ابراهيم غايب على المين استريم كلشر في دار ا مسودان.. Totally absent in main stream culture in Sudan ليه؟..ده المجننا و عامل لينا سافوتا..و حروبات عيييك و عااك.. مع انو الناس دي لو قعدت مع بعض ممكن تعمل حاجات تذهل العالم.. و هنا.. نحن نحتفل بصديقتنا امينة عيسى..و في جوانا ان هناك جماعية ستظهر..واهو الجماعية ظهرت..و قلنا نقرب المسافات..و نفتش عن الجماعية دي في حاجات كتيرة ماشة فينا.. بتلاقينا في واقعنا اليومي..و بتشكل زمنا الثقافي و الحضاري الخاص.. لكن نحن ما قاعدين نتلفت ليها..
ذكرنا في سابق حديثنا.. لمن جبنا مادة من تراث اهلنا الحمر في منطقة خماس الدونكي..اثبتنا الجماعية..و لكنا ذكرنا عابرا.. انو طريقة اداء الرقص عند الحمر بتشبه مشي الإبل.. هادي راسي..و عرضا..برضك قلنا الحكاية دي بتختلف عن طريقة الرقص عند البقارة..و قلنا هنا الحكاية الريتم (الإيقاع) فيها بيكون سريع شويه لأنو بيشبه مشي البقر و هو البقر سريعة بطبعها.. معليش الفيديو المرفق الكوالتي بتاعتو شوية تعبانة..و هو تصوير هاوي و عن طريق كمرة موبايل (محلات ز ي دي ، طبعا ، القنوات و التلفزيونات يا علي يا قريبي ما بتعرف عنها التكتح)..و اصرارنا عليهو انو اورجينال (اصلي)..و فيهو التقاط لحظة ثقافية كما تحدث في بيئتها هناك..و الحكاية دي بتظهر اكتر لمن تقارن بين مردوم الأستديوهات في القنوات الرسمية (بالمناسبة القنوات قاعد تعرض مردوم الستينات و السبعينات.. والله صحي)..و المردوم الطبيعي..طريقة اللبس.. الأكسسوار..و فكرت التعبير عن الذات في وسط ثقافة ليهو قوانينها الخاصة.. و الشريط فيهو نفس الثيمة القاعدين نتكلم عنها هنا.. ثيمة الجماعية..و البنيات بيشاركنا بالغنا و حفظ الإيقاع عن طريق الصفقة..و الأولى بيقوموا بأداء الرقص..و بيحفظوا الريتم (الأيقاع) بالضرب على الأرض و احداث صوت الكرير..و لو الناس ركزت شوية.. ح تلاحظ حكاية كرير الشباب في الفيديو ده مطابق تماما لطريقة الكرير في الفيديو الأثيوبي الذي ارفقناه سابقا في احد مؤانساتنا مع صديقنا ارتيقا..و ايضا ممكن الناس تلاحظ حضور العصا (في العملين ، و انها خاصة بالآولاد..و الشريط الثقافي القاعدين نتكلم عنو هنا.. فيهو حاجة مدهشة أنو المرأة ما قاعدة تشيل عكاز..ولا أي نوع من الأسلحة.زطبعا عندنا في بيئتنا العكاز سلاح ..!!)..الحاجة التانية فكرة الأكسسوار و الزينة..و في العمليين بتلاحظ فكرة عقود البنات..و هي ممكن تكون شفّ،نـُقــّار.. او خناق(عقد من احجار كريمة)..و تمائم (بتاعة حرير زائد حجبات.. أي و الله حجبات عديييل)..و اساور فضية (مثل سوار الجبيرة)..اضافة لريش النعام.. النقطة المهمة.. حكاية البنات (في اثيوبيا..دار بقارة.. لغاية جمهورية مالي) بيرقصن و هن كاشفات الرؤوس..!!!
في فيديو المردوم (و هو من منطقة المسيرية في غرب كردفان).. في واحد قاعد يقول : يأ اخوانا مــُرة..و الزول ده قاصد رقصة بهذا الإسم.. فالمردوم قد يبدو لناس البندر حاجة واحدة.. لكن لناس الخلا هناك..كل زول بيعمل اضافة صغنونة..و الحكاية بتظهر في طريقة تسمية الرقصات..و كل رقصة لها اسم معين..و ريتم معين..و الشغلانة دي ، بعد ما كبرنا و اتغربنا.. لقيناها بتشبه حكاية الفكر في الحضارة الغربية.. يعني كل واحد داير يضيف حاجة.. أول حاجة بيقوم يقول ليك سقراط قال.. و بعداك بيقوم يضيف حاجتو..و بنفس الفكرة.. ناس المردوم.. عارفين أن الريتم الأساسي شنو بالضبط.. لكن بيقوموا كل واحد بينجر ليهو حاجة صغيرة و يضيفها..!!
الناس المهتمة بامر الثقافات و التنوع و حقوق الإنسان.. ممكن نقول ليهم مجتمعات المسيرية (منها الفيديو المرفق) مجتمعات محافظة للغاية.. لكن في المردوم بتلقى الناس تشارك مع بعض..رجال و نساء..و كل زول/ة بيعبر عن ذاتو بمطلق الحرية..نفس الطريقة سايدة في ثقافات الحمر و الكبابيش في شمال كردفان..و النوبة و الحوازمة و الكنانة في جنوب كردفان..في اقصى الشمال..و في دارفور..و في الشرق.. بس لمن نجي مثلث حمدي.. الحكاية بتقلب خالص ..ليه؟ لأنو حاجة مصنوعة ..!!!!
كتر خيرك على المرور يا ابراهيم.. و نشوفك طوالي ياعم..
كبر ـــــــــــــــــــــ
التعديل لحذف صورة تظهر فيها القــُجة..و سوف نحاول اضافتها مرة اخرى..كبر
هيا ترى كي يا بت ابا ، المراحيل هي المراحيل..و حاولنا ذات مرة ندافع عنها..و نمرقها من الورطة الدخلت فيها بسبب نخبة الخراطيم.. حيث غدت المراحيل ، و بفعل فاعل سياسي ، مجرد مليشيا تقاتل في صالح النظام..وا سقاط كامل لتصورها كمثولوجيا ثقافية ليها تفاصيل عميقة خلاص..!!... المهم..!
السعاتات..ياااااااه.. يا امينة ، دي كانت حد المسار بالنسبة لينا..و مرات بنصل اب حراز في جنوب غرب مدينة الأبيض..و السعاتات جملة.. منها السعاتة برتلة.. السعاتة بخاري.. السعاتة البيضا.. السعاتة الزرقة..و السعاتة كن ما اخاف الكضب اسم شدرة..و اكتر زول كتب عن السعاتات بصورة لطيفة هو صديقنا عبد الماجد محمد عبد الماجد في منبر سودان فور اوول..بس عبد الماجد كتابتو اعمق شوية.. لأنها تأريخية اكتر مما تكون ثقافية مباشرة.. يعني حكاية يقول ليك الشدرة الفلانية و الطاحونة..و البقارة جونا بالرووب و شنو كده ما عارف.. الشغلات ديل هناك مافي في كتابة عبد الماجد..!!!
اهو العرفة وقعت يا بت ابا.. نفس الديار التي عفرتها خطاك بالشذى و الرياحين.. جينا نحن وراك و عفرناها ليك بالغبار و بعر البقر و المردوم..!
لو سمعت يا امينة.. قريب من السعاتات..حتة اسمها قليصة..و قليصة دي قرية عجيبة خلاص(ناسها دقوا الترابي قبال دقة كندا و ذلك في سنة 1986..!!!).. اذكر كان عندي عمي فقير كلس اسمو زكريا جلال الدين..و كنت قاعد اتونس معاهو في التسعينات لمن كنت طالب في جامعة الخرتوم..و عم زكريا وكتها كان في الدلنج.. و من حكاويهو العجيبة.. كان بيقول لي انو في قليصة دي عاش فيها اخر ضابط في حركة اللواء الأبيض بتاعة ناس على عبد اللطيف..و اسمو على كباشي..!!! و من حكاوي عم زكريا ده.. قال لي.. و هم شباب في سنة 1923 قام زارهم في ابوزبد المرين.. خواجة طويل .. عيونو خــُُُخخخخضر...و عندو شعراية طويلة..عارفة الخواجة ده منو يا امينة؟.. ياهو عمك السير لي استاك..و شكلو من ما رجع من زيارة ابوزبد .. أول ما وصل القاهرة ، قاموا الجماعة لحسوهو ليك زي الماحصل شي..!!!!
سنة 1923..تقريبا ياها نفس السنة التم فيها اختيار ابونا الناظر حميدة (ناظر المسيرية الزرق)..و بعدو جا ولدو ابونا الناظر عز الدين حميدة.. لغاية ما نظارة المسيرية وصلت عمنا الناظر الحريكة عز الدين حميدة ( عمك الحريكة عز الدين حميدة ، و عمك فضل الله برمة ناصر و عمك الحاج النور كبر معلا.. كانوا دفعة في مدرسة لقاوة الغربية..!!)..!!!
المهم.. قريب من قليصة..قرية وسيمة اسمها ام عشوش..و منها شريط الفيديو المرفق..و هو مردوم..و الفكرة هي معاينة الجماعية في الأداء و الرقص و التعبير عن الذات بصورة ثقافية مبالغ فيها..!!! ملاحظة بسيطة ، و دايراين الناس تخلي بالها منها..اذا كان رقيص اهلنا الحمر بيشبه مشي الإبل(بطئ)..و رقيص اهلنا المسيرية بيشبه مشي البقر (سريع).. في مردوم قرية ام عشوش.. هناك حاجة طريفة..و هي أن القرية اخدت اسمها من شجرة تبلدي كبيرة..و الشدرة دي فيها اعشاش طيور كتيرة خلاص.. اها مردوم ناس ام عشوش قام عمل عملية عجيبة.. فالمعروف في المردوم انو الفوكال الغنائي بيكون اصوات النساء..اضافة للصفقة.. ريتم ارجل الشباب..و كرير الشباب..و في مردوم ام عشوش (حاجة نادرة و جميلة) اختفي صوت النساء..و انما هناك كرير من الشباب اشبه باصوات طيور عديدة (نفس صوت الطيور الحقيقي في اعشاشها في التلبدية التي اخذت القرية اسمها منها)..مش حاجة غريبة..!!!! و للناس البتحب المقارنة في التفاصيل.. المردوم بتا ع ام عشوش مودرن خالص(يوينو2011.زبعد شهر من بداية الحرب في جنوب كردفان..!!)..و هو مردوم حوازمة و كنانة..و ديل مردومهم بيختلف عن مردوم المسيرية في انو الريتم تقيل شوية..و الأسطورة بتقول انو المسيرية اتعلموا المردوم من الحوازمة..و الحوازمة اتعلموا الشغلانة من ناس تلودي... أما تلودي دي.. هي اخر بقعة في السودان.. لسع فيها مزيكا البلوز (صوتية اكنر).. و عندها شغل مميز هو شغل الدرملي (اصول الغناء الكروالي في السودان..) ..و ده داير ليهو جكة خاصة..لو ربنا حيانا نرجع نفاكر فيها الناس ..!
امينة ، ما تستعجلي يا بت ابا ، و نحن اهو بنتونس هنا..و مافي مشكلة تب.. الونسة مفتوحة.. و من أي حتة وصلتي ممكن تتونس عادي..! امنياتي بالصحة الجميلة يا امينة..و العافية كنز ياااااااااخ..!
ونشوفكم جميعا..
كبر
04-17-2013, 07:51 AM
Kabar Kabar
تاريخ التسجيل: 11-26-2002
مجموع المشاركات: 18547
جميل حد الترف .... كبر يا كبير .... الكلام في بوست زي ده صعب جدا على واحد زي كدا .. المشاهده والقراءة أفضل لحفظ البوست ... مودتي ومعزتي لك ولضيفتك الكريمة ...تأثرني كتاباتك وتجذبني بعيدا .. .وعلى قول أرتقيا كمية من الحنان والمحبة .... سلمت سلمت
كتر خيرك يا مامون.. وربنا يقدرنا نكون طوالي عند حسن الظن..
و تحية خصوصية لولد ابا ضيف الله المنا من الفيس بوك.. منكم يا صديقاتي و اصدقائي يكون مثل هذا النزيف المشرق ...
كبر
04-17-2013, 08:02 AM
Kabar Kabar
تاريخ التسجيل: 11-26-2002
مجموع المشاركات: 18547
كبر وضيوفه الاعزاء لكم مني الف تحية ياسلام على هذه السياحة و ياسلام على هذا السرد المدعم بكل شئ ..انتقلنا معك عبر كل هذه الصفحات و لم نشعر بملل او اطالة لاول مرة يقع لي كلام انو الاستقرار في بلد ما يولد الابداع و يفجره و في حال العدم سيصرف الوقت و المال في اشياء اخرى كالحديث في السياسة و الله حرام ان يتوارى كل هذا الجمال الذي انت فيه و الابداع الذي تنقله لنا باريحية اراحت اعصابنا من توترات السياسة واعباء الدنيا الاخرى دمتم و دامت ايامكم
عزيزي محمد زكريا انا عاوزة ارد ليك نيابة عن الأستاذ كبر لغاية ما يجيك ويرد ليك بنفسه.. وعاوزة اقلد طريقته في الترحيب ومتمنية اكتب بشئ قليل من اسلوبه الذي يرد الروح كما تقول..
"مرحبا حبابك صديقي ود زكريا .. بل انت الرائع لطلتك علينا ومرورك هنا اسعدني وياريت تكتر مرورك وتدخل لجوه ،، مع قواسيب من الود والمحبة..
أها رايك شنو يا ود زكريا .. ما قربت؟؟؟ والله يديك العافية
Quote: انتقلنا معك عبر كل هذه الصفحات و لم نشعر بملل او اطالة لاول مرة يقع لي كلام انو الاستقرار في بلد ما يولد الابداع و يفجره و في حال العدم سيصرف الوقت و المال في اشياء اخرى كالحديث في السياسة و الله حرام ان يتوارى كل هذا الجمال الذي انت فيه و الابداع الذي تنقله لنا باريحية اراحت اعصابنا من توترات السياسة واعباء الدنيا الاخرى دمتم و دامت ايامكم
>>>>>>>>>>>>>> معليش يا استاذ كبر .. احتلينا مكانك لغاية ما تجينا صادي بهنا .. يمكن تكون شاغلاك مشاغل الدنيا الما بتنتهي.. بس قاعدة ادرب على اسلوبك السلس الرائع في الردود التي ترد الروح كما يقول ود زكريا.. والله يديك العافية.. .. صديقي العزيز عبد الكريم بكلماتك الرائعة والتي اشعر باني لا استحقها يمكن دائما ان نقاوم التصحر الثقافي والوجداني . فمع مثلك يمكن ان يستمر الابداع والجمال .. ونعكس جمال ربوع بلدنا المليانة بالروائع والكنوز ونبرز هذا الجمال المتواري ,, والله يديم الاستقرار .. مع خالص الود والمحبة..
دي تجربة ثانية .. وكده كفاية ,, فأسلوب الاستاذ كبر مدرسة بحد ذاته .. لأنه يسقي هذا المنبر بالورود والرياحين والكلمة الطيبة والله يديكم العافية
[QUOTEياريت يا بت ابا.. تقولي عن الرحلة ، بتاعة الثانوي العالي تبعك ، كانت بي وين.. يعنى نظام المرحال وين.. عشان نعيد الرحلة و نسير معاك من تاني..
كتر خيرك على غنية بابا سعدو..و زي ما قلت ، يا امينة ،..و قاعد اقول طوالي.. شريط الفيديو ما عاد حاجة فقط للتطريب..و انما هو رسالة ثقافية متكاملة.. بس محتاجة تركيز في الشوف.. عشان المشاهد يكتشف التفاصيل الدقيقة..و سبحان الله.. كلما ما اتفرج في مثل الفيديوهات دي.. بلقاها ، انو كل حاجة فيها موضوعة في محلها عشان توصل فكرة معينة..و هنا يا بت ابا الكلام ح يكون كبير خلاص..لأنو لمن تقارن ثقافة و حضارة الغرب.. بتكون محتاج تؤلف ليك مجلدات (يعني حاجة معتمد على الكلمة).. بينما ثقافة افريقيا و حضاراتها بتعتمد اكتر على البصر..و عارفين انو الشوف ممكن يؤدي اغراض اكتر و اشمل تنوعا من مجرد الكلمة..و دي حتة دايرة ليها دماغ كبير ينـّـظر فيها..و نحن ما قدر الدماغ ده..و احتمال البعدنا يكون فيهم ناس ممكن تقدر تعاين للحاجات دي و تديها حقها الكامل..
مثلا يا امينة.. الفيديو بتاع بابا سعدو..و فيديوهات كتيرة من غرب افريقيا بتحمل نفس المضمون.. يعني لمن اعاين ليهو..بلقي نفسي بدون ما اشعر قاعد احتفل بالجماعية..يعني الغنا جماعي..و الرقص جماعي.. ياخي حتى البقر العارضنها بتكون في شكل مراح.. يعني جماعية برضك..و هنا بحس بالفخر.. و انو كانسان من افريقيا.. بحس بالتميز في مواجهة الآخر الحضاري.. تحديدا الغرب (بتاع الحداثة و ما بعد الحداثة..و الذي منو).. لأنو ثقافة الغرب بتقوم على تمجيد الفرد..و انو الفرد طوالي مفروض ياكل نارو براهو.. تغني براك.. تعمل قروش براك.. تعيش حياتك براك..تدخل في مشاكلك و تمرق منها ما تلقى البطايبك و يجبر بخاطرك..كل حاجة يقول امشي السستم و بيحلها ليك..و ده عكس الحال عندنا في افريقيا.. كذات حضارية و ثقافية.. يعني لو رجعتي اتفرجتي في فيديو بابا سعدو.. ح تلقي احتفال بحالة بتشكل تفصيلة صغيرة في الحضور.. لكنها كبيرة في المعني و الدلالة.. حكاية الزول القاعد في طرف الفريق و في نص القش..و هي تعبير عن حال انو الزول ده حردان و زعلان من حاجة ما..و مش مهم نعرف هو زعلان.. لكن بنلاحظ أنو في زو ل تاني جا و طايبو..و قال ليهو قوم ارحكاكا.. يعني نظام تفاوض (أي و الله يا بت ابا تفاوض عديل.. هو التفاوض الإ تكون فيهو حركة شعبية و مؤتمر وطني يعني؟!!!)..و ترضية..و اصرار انو الزول ده يرجع للمجموعة..و نفس المشهد ممكن يحدث في كردفان..دارفور..بحر ازرق.. هضاب اثيوبيا.. لغاية جبيوتي و الصومال..و دي الحتة الفايتة علينا كنخب في تلك المناطق..!
البقر يا امينة..نفس الحوض..و هو حوض صناعي.. في كردفان في مناطق المسيرية اسمو الباطــية..و في الزمن القديم بيصنع من الخشب..و بعد دخول الحداثة (نظام الدوانكي و كده) اصبح يصنع من الحديد..اما البقر..بتشبه بقر بقارة دارفور و كردفان في قرونها القصيرة..و بتختلف عنها في الألوان..و نفس الوان البقر دي .. في السودان الناس بتقول عليها بقر كنانة..و كلها تتميز بالقرون القصيرة..عكس بقر اهلنا امبررو و التي تشبه بقر اهلنا الدينكا و الناس بتسميها كوري عجيلة فلاتة..و في مناطق المسيرية في غرب كردفان قاعدين يقولوا عليها كوري الزرقا.. لأنو ، و سبحان الله الوانها يا سوداء داكنة .. يا عسلية غامقة..ام البقر العندها قرون قصار.. لمن الوانها تكون داكنة (حمراء.. صفراء.. عسلية.. سوداء) فهي تسمى (المجوك/المدوك)..و بقارة بيقول عليهن (بنات مجوك الفضة ام صوف)..و الفضة معدن نفيس..و من اغرب الطرائف أنو بقارة كردفان بتجمد الفضة اكثر من الذهب..!!! الأكسسوار..و ادوات الزينة برضك حاجة مهمة..و بت ابا اللابسة الفستان الأبيض (الدقيقة 2:49)..و هي يتخيل لي لبسة بتشبه لبس ملكات النوبة القديمة ..و قامت لطشتها قريبتنا كليوباترا..و لو لقيتي رسومات لبقليس ملكة سبأ.. برضك بتكون لابسة نفس اللبسة..و اللبسة منتشرة في اثيوبيا ..اضافة لحكاية الخناق (عقد) المربوط في الرأس.. لكن اهم حاجة ، و في نفس الوكت اغرب حاجة ، و شفتها في بنات البقارة في كردفان.. حكاية الأساور القاعدين يربطوها أو يضعوها في الضراع(المسافة بين المرفق و الكتف)..و دي حتة يتخيل لي في كل العالم مافي زولة بتضع فيها اساور و زينة الإ في افريقيا..طبعا ناس نورث امريكا حاولوا يقلدوا الشغلانة دي..و قاموا بدل أساور بيعملوا وشم ( Tattoos زيادة فوق ده.. حكاية مبدأ تقسيم العمل (مبدأ قال بيهو ابو السيوسيولوجيا سيدنا اميل دوركايهم..طيب الله ثراه)..بتلاحظ انو الغنا..البنيات بيكونن من اعمار محددة..يعني نظام (15-30 سنة)..و دي مسألة مربوطة بالثقافات هناك..و في كردفان.. الزولة اول ما تتزوج.. بتقوم تبطل المردوم و النقارة.. يعني لو كترت بتكون سنة اولى زواج و أقصى حاجة تانية زواج.. !!!! النوستالوجيا ، يا بت ابا ، و ممكن نسميها الحنين الغارق في التأمل ، حاجة ما عندها حدود..و ممكن تتورها ابسط الحاجات التي لا تنتبه ليها ثقافة الإستهلاك..
>>>>>>>>>>>>>>>>>>>>>>>>>>>>>>> فلنتزود من مثل هذه الثقافة المتدفقة كشلالات فكتوريا .. وتوضيح المعاني والدلالات بهذا الأسلوب الأدبي الرفيع المستوى.. ويا ريت يا كبر كان قرينا ليك كتاب كامل .. والله يديك العافية
05-16-2013, 06:59 PM
محمد زكريا محمد زكريا
تاريخ التسجيل: 09-01-2009
مجموع المشاركات: 4909
Quote: عزيزي محمد زكريا انا عاوزة ارد ليك نيابة عن الأستاذ كبر لغاية ما يجيك ويرد ليك بنفسه.. وعاوزة اقلد طريقته في الترحيب ومتمنية اكتب بشئ قليل من اسلوبه الذي يرد الروح كما تقول..
"مرحبا حبابك صديقي ود زكريا .. بل انت الرائع لطلتك علينا ومرورك هنا اسعدني وياريت تكتر مرورك وتدخل لجوه ،، مع قواسيب من الود والمحبة..
أها رايك شنو يا ود زكريا .. ما قربت؟؟؟ والله يديك العافية
الصديقة العزيزة اميرة السيد بعد السلام والتحايا سعدت بردك واشكرك على الترحيب والكلام الطيب واقول غلبنى , غلبتونى وكمل الكلام عندى وبقيت ما بعرف غير اعاين فيه واتامل هذا الكلام والكم الكافى من الروعة والالق و الابداع والمشاعر النبيله والناس البتحس بالجمال وتحب الابداع والروائع اقول شنو وابدا بى منو بس يا اميرتنا لا املك الا ان اقول لكم حبى وودى واحترامى وكل المشاعر الجميله وليظل وليتواصل الابداع بكم
========= تحياتى
05-18-2013, 05:49 AM
Kabar Kabar
تاريخ التسجيل: 11-26-2002
مجموع المشاركات: 18547
في زمن ما ، في مكان ما ، كان يسمى مكتبة البشير الريح في امدرمان ، كانت جلسة لطيفة ، مسروقة من عيون عسس الجبهة الإسلامية و تزمت الأحاد الصمدية ، ذاك الذي لا يرضى ان يسمع غير صوته ، ولا حتى للأخرين ان يسمعوا غير صوته ، كانت جلسة فيها صديقي و استاذي المرحوم بهاء الطاهر ، و صديقي و استاذي يحي فضل الله ، تحدثوا احاديث قمينة بان تخلق التماسك في اجيال كل الذي تتمناه ان تراهم عيانا بيانا ، و من شقاوتي ، كنت احد الحضور ، فقلت كلام كثيرا.. قد يكون خارم بارم ، و لكن عبارة واحدة من كلامي ظلت تزن في رأسي و هي : اننا اولاد و بنات الزمن المــُر في دار ام سودان ..!!!
فنحن لعنة.. و اولاد و بنات لعنة ذاتو.. لم يسمح لنا الزمان ان نعيش طفولة مستقرة.. مراهقة مستقرة..شباب مستقر.. ثم كهولة مستقرة حتى..يطاردنا الزمان بالحزن و العثرات و الأشياء الغريبة..!!
تحدثت الى اختى الصغنونة امينة عيسى..و كدت ارى دمعتها ، رغم المسافات.. فهي لم تكن مهمومة باشياءها الخاصة.. و انما بالهم الكبير الذي وجدنا انفسنا ، و دون خيارنا ، في عمقه.. نحسه.. نلمسه.. ثم نسعى بقدر الجهد لمقاومته..تحدثت معي امينة.. ولكنها ، دابها ، كداب أي سوداني/ة مطرطشة.. دايما الحاجات المهمة.. بتكون في اخر الكلام..ياخي زولة تتونس معاك زمن طويل..و اخر حاجة تقول ليك بعد يومين انا ماشة غرفة العمليات..!!.. و لمن ترجع لأسافير السودان العريضة.. تلقى روحك في زحمة.ز الجبهة الثورية دخلت ام روابة.. الجبهة الثورية مرقت من ام روابة.. الحكومة بتجييش في الشعب عشان يكاتل في شانها..وبي عدلك تلقي نفسك نسيت حكاية غرفة العمليات الماشة ليها امينة..!!
و دمعة امينة..في شان حاجات السودان ، خصوصا شئون الزولة السودانية المنكوبة بافات ما انزل الله بها من سلطان ، هي عندي ، مثل دمعة ..العميقة لحد الرهق استيلا قاتينو ، مشاعر سعيد فضل الله ، اقبال الياس ، انتصار احمد دم ، امتثال الشيخ مختار ، انتصار الباهي..اميرة السيد ، مواهب السيد ، حنان علي يعقوب ، ليلي محمد علي ، منال اسماعيل ، و غيرهن كثر و كثر..و تقوم تسأل روحك: هل فعلا نحن سيئين هكذا؟.. لماذا نحرص بتشفي غريب على اسالة الدمعة في خد بناتنا..؟.. الحكمة الوحيدة التي خرجت بها ، ان الزولة السودانية ، ليس الشاكوش فقط ما يبكيها ، و انما هناك اشياء اكثر عمقا و ابعد معنى..!!
امنياتي لكم بالعافية ، و امنياتي الصادقة لصديقتي امينة.. بكل العافية..!!
ول ابا محمد زكريا.. حبابك يا صديق كتر خيرك على المرور من هنا..و كتر خير بت ابا صديقتي اميرة السيد التي قامت بالمواجبة نيابة عنا (و يا اميرة ، ياخي انتي بقيتي كبر عديل ، مع انو دي حال تب ما بتمناها ليك..و على قول قريبنا الما عارف يقول عدس ياخ..!!.. انتي زولة متفاءلة و سمحة و ضاحكة..و ناس عمك كبر ديل غير الغم و الحزن ما عندهم التكتح.. ياخي ديل لو اتهردم مصنع في بنغلاديش.. يقوموا يلوموا نفسهم و يدخلو في حتة ضيقة خلاص..!!)..المهم.. عارف يا محمد ، صعب تطايب ناس الفن..ياخي ديل ناس متعبين بي شكل..!! مزيكا افريقيا.. خصوصا الحزام اياه.. تأسرني برسائلها الجميلة العميقة..و كنت ساهديك بعض منها.. لكن اخترت حاجة يا ريت تعجبك..و هي مزيكا افريقيا لمن تمشي تعرض عالميا..و بعد داك تقوم تخلق في ذهن المتلقى/ة اسئلة كثيفة و متشابكة.. من شاكلة وين الجذور؟.. وين المعاني؟..و هكذا..
تجربة الفا بلوندي (تحدثت عنها من قبل في هذا المنتدى)..تاسرني بانها غنية و عميقة..و في هذا المختار..يهمني فيها التسامح.. تسامح الإنسان الأفريقي العادي..الممكن يغني ليك بالعبري ، العربي ، الإنجليزي ، الفرنسي ، و اللغات المحلية.. بس عشان يقول ليك انا عندي حاجة مهمة ممكن تسمعها..و كل العالم محتاج يسمعها..!!! لمن اعاين لتجربة ولد ابا الفا بلوندي ، بعاين لعذابات الصوفي العادي ، زيو و زي درويش قادرية في الشكينيبة ولا الشيخ الياقوت ولا ازرق طيبة..وهو يبتدع التصالح مع الكون ، ليس ليقعنا نحن جمهرة المتلقيين ، و انما ليقنع ذاته ، و صدقني حينما يقنع الصوفي ذاته بالتصالح و التسامح ، فهذا يعني اقناع ملايين الناس ، دون أن يدري هو..!!
كان هناك وعد سابق لصديقنا عصام دهب ، أي و الله عصام دهب الواحد ده ، ان نتحدث عن جانب من اشارات وردت في تجربة الفا بلوندي.. مثل تخليده لذكرى توماس سانكرا..و هذا التوماس هو الأب الفعلي لدويلة افريقية ناهضة (زيها و وزي دويلة قطر في العالم العربي الإسلامي) و هي دويلة بوركينا فاسو..و كان توماس.. اصغر رئيس افريقي..و لكن الملفت في تجربة حياته.. انو لمن مات مقتولا ، وكان رئيس دولة ، كانت تركته عبارة عن جيتار اكوسيتك..و عجلة رالي..و بعض من اللوحات..!!!..يعني زول فنان..!!..و اكتر من كده.. توماس.. هو اول افريقي..كرئيس يقوم يحرش النسوان عشان يعملن اضراب من الأعمال المنزلية لمدة يوم..عشان الرجل الأفريقي يحس بقيمة اعمال المرأة الأفريقية و اهمية تلك الأعمال..!!!
اخر حاتجة يا محمد.. عمر البشير قاعد يجوعر ليك بانو كومباوري (رئيس بوركينا فاسو)..هو صديقو..!! اما نحن بنقول ليهو .زلعمر البشير.. فلتذهب الى الجحيم انت و كومباري..!!..ليه؟.. لأنو كومباري ، كان نائب توماس سانكرا ، و قام بتصفيتو في عملية جـــبانة للغاية.. لأنو كومباري هو امتداد الكولونيال الفرنسي المطيع..!! (بالمناسبة يا محمد ، توماس سانكرا ، هو الرئيس الوحيد على ظهر هذا الكوكب من قام بالإستخفاف بالرئيس الفرنسي قرانسوا ميتران..زي السلامو عليكم..!!)..
المهم.. خلينا في المزيكا..و اجزم .. انك قاعد تسمع ولد ابا الفا بلوندي..!!
السودان ده فيهو ، محن عجيبة خلاص..!!! الناس ممكن تعرف ليك: عازف الكمان الشهير يوسف عبد الجبار (بتاع نجوم الغد ) ، ( الملحن يوسف القديل ) ، (الفنان ، محمود تاور).. لكن في نفس الوكت ما بتعرف عباس عبدو الحسب و عبد الكريم الأحمر..!!!)...
Well عباس عبدو، فنا ن تشكيلي من مدينة نائية اسمها الدلنج..و هو تشكليلي في المقام الأول. ثم مغني في المقام الثاني..!! عباس هذا ، اول من التقط اغاني الحواري في مدينة الدلنج ، ثم قدمها الى المشهد الموسيقي السوداني ، فكانت اغنيات مثل ( ام كحيل يا النسيم الماري بالليل) فغنتها لأول مرة فرقة ساورا ، ثم اغنية الجنزير التقيل... و قدمها لأول مرة الجيتارست العظيم احمد تاور ( شقيق الفنان محمود تاور )، ثم غناها محمود عبد العزيز..!! كبر
05-18-2013, 08:51 AM
Kabar Kabar
تاريخ التسجيل: 11-26-2002
مجموع المشاركات: 18547
صديقي الجميل..ولد ابا عبد الكريم الأحمر..حبابك كتر خيرك على المرور من هنا..و بعد.. دخولك هنا حزن ، يا عبد الكريم الأحمر ، يا حزن ما ، لو تعلم..!!! هي ترا كي يا الدكريم..ياهو زمن ا مسودان ال###### للغاية ، ياخي زمن ما تقدر تحتفي فيهو بالأصفياء..هنا يا صديقي ، في هذا المنبر.. لا نستطيع ان نحتفي باقربائنا.. اصفيائنا.. الذين كانوا لنا منارات نهتدي بيها في هذا الزمان الغيهب.. لا نستطيع ان نحتفى بخلائق مثل بشير نوار.. ضيين نوار.. حوة البهرة.. زينب حامد.. عبد الكريم الأحمر.. ماجد محمد حامد النو.. و الضحاك الجميل ، اجمل الخلائق ضحكة.. احمد محمد حامد النو.. أما الترير.. أي و الله الترير الواحد الكان صديق شخصي لكائن اسمو خالد شوقي الأسلامبولي.. فهو الآخر لا نستطيع ان نحتفي بهم..!!.. عارف ليه؟.. عشان عيون الترصد المسمومة..تلك التي تطاردنا ، حتى في ضحكتنا البريئة..حتى في مطايبتنا لأهلنا.. هي مأساة يا صديقي..و في هذا المنبر ، ابن عم لي..دم و لحم..و لا استطيع ان اقول له السلامو عليكم.. لأنو الخوف من مغبة الإساءة ليهو لأنو قريب كبر..شفتا المحنة دي قدر كيف يا عبد الكريم؟!!..
السانية ، الجنب مدرسة الدلنج الأميرية بنات..و التي يقبع قربها مسكن شاعر الدلنج العظيم ..و صديقنا الأجمل حامد جاجا الضاي..و هو الذي يدمع كالطفل من منظر بائعة الشاي النوباوية الدلنجاوية حواية..و يخلدها بنص شعري جميل ، و في نفس الوقت.. يقرأ جابريييل قارسيا ماركيز.. و جاك دريدا..و ميشيل فوكو..و الهايف ليفي شتراوس..و قد تجد في معيته..محمد خليل الدومة.. الكوز الفالت.. الذي لا يتورع عن سماع بوب مارلي..و يكتب ذاكرة المدينة خواطر تحرج اميل دوركايم ، ابو علم السيولوجيا في كوكب الأرض..و يقول لك بكل فصاحة (حتى القرى لا تخلو من المساحيق)..!!..هذه الكائنات.. يا صديقي الجميل لا محل لها من الإعراب في المشهد الثقافي في دار ام سودان ، تماما كما كتب الفصيح ابكر ادم اسماعيل عن كوال..اي الله يا عبد الكريم ، كوال الذي يتحدث عنه ابكر ادم كان في مدرسة هبيلا المتوسطة ، تلك التي حرقت مبانيها ، فلم يكن لطلابها غير مشاركة ناس الأميرية في فصولهم..!!!
زرت الدلنج يا عبد الكريم .. قبل ثلاثة أو اربعة اشهر.. هل تصدق لم اعرف فيها غير عمك النور كبر و عادل اسماعيل و محجوب على عثمان و عبد الرحمن بليا و السيد منوفل ..و سميرة ابراهيم (ست عيشة) ..!!! الدلنج يا صديقي ، هي الأخرى.. لم تخلو من تمجيد الإنسان..هي التي كانت في حواريها نطرب و نردد اغنيات جماعية من شاكلة (الجنزير التقيل) ، و (ام كحيل النسيم المرأ بالليل) ، و اغنيات العظيم جمعة عبد الله ، الذي كان يردد الأغاني بلغة اهلنا الألمان ( النمانج)...و ناس امثال حسن حملون كليس ، السيد منوفل.. خالد حسب النبي ، عبد الرحمن شنتو.. عازفي الكمان في تلك المدينة الجميلة الحزينة..لكن لمن يظهر ناس زي ناس يوسف عبد الجبار (عازف الكمان في برنامج نجوم الغد ) ، و يوسف القديل (عازف كمان مشهور و ملحن ) ، ناس السودان بيقولوا ليك و الله ديل ناس مبدعين..!!.. و لمن يقوم قريبي عباس عبدو الحسب يغني ( يا ام كحيل النسيم المرا بالليل) مافي زول بيشتغل بيهو.. لكن لمن يقوم يغنيها محمود عبد العزيز.. بتلاقي العميان شايل المكسر..!!!
فليفرحوا هم ، رجالا و نساءا بمحمود عبد العزيز ، و لنفرح نحن بذاكرتنا الطيبة.. حي اسمه ..حي المطار في مدينة نائية و غريبة اسمها الدلنج..!! هنا ، ولد ابا الفنان السوداني ، محمود الكردفاني ، و هل تصدق يا عبد الكريم ، أول من عرفني بمحمود هذا ، وزيارته في منزله ، هي بت ابا صديقتنا و استاذتنا الجميلة يسرية اسماعيل المحامي ، طبعا عادل اسماعيل ( مراسل الدلنج في الإذاعة القومية السودانية ) سيقتله الحنق ، و شاعرنا الجميل دكتور عبد الله اسماعيل..سيضحك كثيرا حينما يعجز اهل ا مسودان من التعر على الأغاني التي اثرى بها وجدان الأمة هناك..!!!
هههههه.. يا عبد الكريم .. الدلنج ، البقاري القح السيد منوفل ( و كان بعث عربي قومي اشتراكي ) لا يتورع ان يعرف فيها ذاته كحركة شعبية شمال..و لقد حدثني أحد الأصدقاء هنا في المدينة التي اسكنها ، انه شاهد السيد منوفل في حلقة تلفزيونية ، يتحدث فيها عن تاريخ ، المزيكا في الدلنج ..!!.. أي و الله يا عبد الكريم.. الدلنج ، الفيها الفلاتي يوسف بادكو بعث عربي اشتراكي ، و الفيها ، الجلابي محمد اسماعين ابو دقن بعث عربي اشتراكي..و الفيها النوباوي الدلنجاوي نصر اللازم بعث عربي اشتراكي ، و الفيها المرحومة فاطنة طراماي ، بعث عربي اشتراكي..و الفيها مريم قمر .زبعث عربي اشتراكيز..و حتما سيضحك كثيرا صديقنا النوباوي الكاركاوي.. حماد يونس.. تونس الخضراء يا عبد اكريم..من كل هذا النزيف ..!! لماذا جئت هنا يا صديقي؟!!! السانية ، يا عبد الكريم ، كتنبناها ، في عمل نشر في هذا المنبر ، و فيهو تفاصيل ناس حمدان فضل الله ، وداد وقيع الله ( رحمها الله) ، و اخرين كثر ، و الفكرة التقطتها احد قنوات دار ام سودان التلفزيونية..و حكت عنها..! يا عبد الكريم ، يا اخي.. عليك الله اقعد ساكت يا عم..!!! في اغنية الجنزير التقيل ، يا ناس سودانيز اونلاين ..هوي.. ! هل تصدقوا ، انو عبد الكريم الأحمر القدامكم د بيعرف.. ناس ،.. الجبوري السيليك .. محمد الجمل... و ابكر ول علي ، خال ام كلتوم..!! لأنو ديل اجدادو لزم..!!! و يا عبد الكريم..عذبتنا ياااااااااااخ..!!!
كبر
05-18-2013, 11:22 AM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12500
استاذي الرائع كبر ,.. لا نريد ان نقطع حبل الافكار او زخم الاندياح .. ولكني اول امس في تلفزيون السودان شاهدت برنامج مطول عن التبلدي .. ووجدت ان ما تمثله النخلة لنا في الشمال وتمثله تلك الشجرة .. المفيدة ، ثمارها ، ولحاها ، وفروعها .. ولكن الاغرب ليس خزان المياه ولكن من كان يحفر جوف الشجرة وينقطع للعبادة داخلها .. وهذه وفية وهي صاحبة اثيار والكرم على من حولها تماماً مثل النخلة ، ورغم ان جوفها محفور في خضراء من الاعلى وتؤتي الثمر رغم كل تلك الجراحات .. وهذا ما احسه في انسان المنطقة لأن مثل الرموز تتحول الى قيمة سلوكية عند البشر في المنطقة .. كبر الجميل .. نحن اعلامنا كان مقصر وجزى الله هذا الحوش خيراً .. واصل ولا أريد ان اقطع عليك المسار .. كبير جد .. يا كبر .. صدقني أنا احب تراث الشعوب والامم السودانية .. لنعرف المشترك بيننا .. رقم انني زول تربل اتعلمت العربية في المدرسة بعد ان بلغنا من العمر ثماني سنوات .. لكن هي اللغة المشتركة والجميلة التي نتواصل بها .. كثير تحياتي ليك .. بعدين التبلدي
بت ابا اميرة السيد..حبابك يا صديقة كتر خيرك على المطايبة هنا.. ..و كنتي ذاتي.. بس ناقصك العذاب يا اميرة..!! زي ما قلت هنا..الجماعية هي الفكرة الخلاقة التي ابتدعها اهلنا في التراث الأفريقي..و هنا اهديك تجربة رايدة و جريئة انجزوها اصدقائنا و صديقاتنا في فرقة البالمبو السودانية..و هي عبارة عن فيديو كليب تم تصويرو في جنوب كردفان.. تقريبا في منطقة لقاوة و هي مسقط رأسي..النص عبارة عن اغنية فيها مقاربة لروح تراث المنطقة..و فيها مضامين اجتماعية سائدة هناك.. فكرة التغني بالمحبوبة و صفاتها..و فكرة الزواج..الريتم برضك من المنطقة..ووفقنا لفكرتنا الأساسية انو شريط الفيديو عبارة عن رسالة متكاملة..و تعبير عن الثقافات المحلية عبر حكاية الشوف و المزيكا و الكلمة..
طريقة الإكسسوار..و اللبس بتاعة الزول اللابس ملون و شايل عصا في يد و في التانية سكين كبيرة..هي الصورة القديمة لراقصي المردوم و النقارة في ثقافة المسيرية..و السكين هناك.. زي ما الناس بتفتكر انها سلاح فقط.. في مناطق المسيرية هي عبارة عن اداة زينة للرجل..و بتكون فيها عود اسود (ابنوس)..خصوصا الشباب..اما المتقدمين في العمر فالعود بيكون بني فاتح..و نادر تلقي ليك زول متقدم في العمر شايل ليهو سكين عودها اسود..بيت السكين (جفير/جفر)..بيكون من الجلد..و بيقوم ينسجو حولو خيوط بلاستيك ملونة..و مرات بتكون في خرزة أو خرزتين (السكسك)..نهاية العود بتكون فيها قطعة معدنية اسمها القنطرة..و بتكون من معدن الفضة (هل ذكرت من قبل انو البقارة بيهتموا بالفضة اكتر من الدهب؟)..و في السكين حلقة مصنوعة من الجلد..و اسمها لباس السكين..و هي الجزء البيكون على الذراع..
بقية ادوات الزينة.. ريش النعام..و النعام هناك نوعين: الأنثى (تسمى الربيداء).. و ريشها اخضر او رمادي..و الذكر يسمى الهضليم (اكثف ريشا من الأنثى)..و ريشه اسود اللون..طبعا مرات الناس بتقوم تعمل الوان للريش.ز يكون ابيض..اصفر .. ازرق..و هكذا..في ثقافة البقارة النعامة مشهورة بالخوف و الجـــبن..يعني لو قالوا ليك (امشي يا نعامة).. معناتو انت خواف..!
في كلمات الأغنية.. كلمتين: القيدومة..و السجالي..و القيدومة هو طقس غنائي مصاحب للأفراح (اعراس..طهار..الخ)..و دايما بتكون في المساء..و في ثقافة المسيرية تشارك النساء المتقدمات في العمر في القيدومة (حبوبات..عمات..خالات..)..طبعا زمزومة زولة شابة و الشابة بتشارك في المردوم (غناءا و رقصا)..اما كلمة السجالي.. فلقد تحدثنا عنها في هذا المنتدى اكثر من مرة.. و تعنى الأنداد..او المتقاربين في العمر..و مرات بتعني الصديق..
من الحاجات التانية..و القام العمل انتبه ليها ووثقها..استخدام لغة الإشارات في حديث البقارة..و بتظهر في حكاية الشاب لمن قرب لعمو.. رفع يده مفتوحة ..و هي تحية السلام.. لكن الفكرة اعمق.. يعني ترفع يدك اليمنى مفتوحة فهذا يعني انك ما عندك سلاح..!!.. في نفس الوكت.. لمحة صغيرة من حديث العم..و بتظهر فيها حكاية استخدام الأيادي..و القوة في اظهار الإشارة..و بالرغم من انو مافي حديث ظاهر في الفيديو بين الشاب و العم.. لكن النتيجة محسومة..و هي الرفض البات ..!! زمان في عهدنا لاحظت ان معظم فرق الجاز في السودان.. بيكون الزي قميص احمر و بنطلون اسود..هل لاحظتو الحاجة دي في لبس فرقة البالمبو؟!!
تحية لناس البالمبو..و طريقتهم ممكن تمرق التراث السوداني لمصاف العالمية.. خصوصا حرصهم على استخدام الآلات الموسيقية المحلية..و دهب يخليهم اقرب لجوهر تلك الثقافات و بالتالي القدرة على عكسها بصورة جيدة..
كتر خيرك يا اميرة..
كبر
05-19-2013, 06:47 AM
فيصل محمد خليل فيصل محمد خليل
تاريخ التسجيل: 12-15-2005
مجموع المشاركات: 26041
Quote: بقية ادوات الزينة.. ريش النعام..و النعام هناك نوعين: الأنثى (تسمى الربيداء).. و ريشها اخضر او رمادي..و الذكر يسمى الهضليم (اكثف ريشا من الأنثى)..و ريشه اسود اللون..طبعا مرات الناس بتقوم تعمل الوان للريش.ز يكون ابيض..اصفر .. ازرق..و هكذا..في ثقافة البقارة النعامة مشهورة بالخوف و الجـــبن..يعني لو قالوا ليك (امشي يا نعامة).. معناتو انت خواف..!
في كلمات الأغنية.. كلمتين: القيدومة..و السجالي..و القيدومة هو طقس غنائي مصاحب للأفراح (اعراس..طهار..الخ)..و دايما بتكون في المساء..و في ثقافة المسيرية تشارك النساء المتقدمات في العمر في القيدومة (حبوبات..عمات..خالات..)..طبعا زمزومة زولة شابة و الشابة بتشارك في المردوم (غناءا و رقصا)..اما كلمة السجالي.. فلقد تحدثنا عنها في هذا المنتدى اكثر من مرة.. و تعنى الأنداد..او المتقاربين في العمر..و مرات بتعني الصديق..
................... ود ابا .. ود لقاوة .. الصديق الأديب الأريب كبر هذا مشروع ماجستير جاهز,,, قرأت زميلتي بسمات( اي والله دي اسمها ) مع انها يوما واحد ما لقينها مبتسمة) هذا المقطع وقالت " انا بفتش لموضوع اعمل فيه رسالة ماجستير .. وممكن اختار موضوع زي ده ويساعدني فيه كبر.. لأنه مرجع في مثل هذه الثقافات التي كادت ان تندثر.. وقلت ليها الثقافات دي ما حتندثر ولسع موجودة .. فأنكرت ذلك وقالت مع سرعة وتيرة الحياة وانتقال جميع اهالي الريف للعاصمة جعلتهم ينسون كل هذه الروائع.. ولكني اظن انها لا زالت سائدة .. فهل هي كذلك, وهكذا عودتنا استاذنا كبر .. كل يوم تأتينا جديد ما كان على بال..
>>>>>>>>>>>>>> مسكاقمي فيصل .. ابونينقا قسكو توري...وانقو نايقولي...؟؟ وسوف لن تمل من الجلوس في حضرة الأديب الرائع ود ابا كبر... واسلوبه السلس سيجعلك تتسمر اما م الشاشة البلورية.. وكنا نود ان نستمع له ونحن جلوس في مقهى ادبي او ندوة ادبية والله يديك العافية
05-20-2013, 05:38 AM
Kabar Kabar
تاريخ التسجيل: 11-26-2002
مجموع المشاركات: 18547
ول ابا علي عبد الوهاب..حبابك يا صديقي كتر خيرك على المثابرة في هذا الخيط.. الشدر يا قريبي ليهو حكاوي و حكاوي في ثقافتنا هناك..و شاركنا ببعض من حكاويه في خيط لأخونا النصري..! التبلدي هو عنوان الصبر في ثقافات اهلنا في كردفان..و فعلا انسان الخلا هناك مرات بيخلق الرموزو بيتماهى معاها في سبيل تعريف ذاته و علاقته بالكون .. كجدلية فلسفية عويصة..
كتر خيرك يا علي و هنا هدية صغيرة عن القنقليز..و هو ثمرة التبلدي..
و نشوفك طوالي يا صديقي...
كبر
05-20-2013, 05:39 AM
Kabar Kabar
تاريخ التسجيل: 11-26-2002
مجموع المشاركات: 18547
بت ابا اميرة..حبابك يا صديقة و حباب بت ابا بسمات..و قوليها القبة مافيها فكي تب..!! الثقافات موجودة ..و الأدوات موجودة.. صحيح المنطقة تأثرت كتير.. مش بسبب النزوح للمدن..و انما بعامل الهجرة.. خصوصا دول الخليج..لأن دي الناس بتمشي ليها نضيفة و بترج عبي حاجات كده ما انزل الله بها من سلطان..! اغرب حاجة يا اميرة..عندي اصحاب هنا في المدينة القاعد فيها..و هم من جنسيات مختلفة..و كل ما اعرض شريط مزيكا سوداني بيقولوا لي دي طربقة شن ودي..لكن لم تعرض عليهم حاجات التراث قاعدين يتكيفوا منها شديد..و حجتهم انهم دايما دايرين الحاجات اللسه ما اتلوثت بحاجات المدينة..!! و صديقتنا بسمات .. قول ليها ابشري بالخير.. لو داير النقة ح نقولها ليها.. بس هي تلحق تتمها بدراسة حقلية..مين عارف يمكن تطلع ليها بكم ماجستير..!!
كتر خيركن على المطايبة.. كبر
05-20-2013, 04:47 PM
امينة عيسى امينة عيسى
تاريخ التسجيل: 11-20-2010
مجموع المشاركات: 619
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
أمير محمد ادريس
بله محمد الفاضل
عباس الدسيس
هيثم طه
الطيب شيقوق
الفاتح ميرغني
الصادق اسماعيل
امينة عيسى
Artiga Gilani
Gaafar Ismail
انصاف ابراهيم عبدالعزيز
علي عبدالوهاب عثمان
ibrahim fadlalla
محمد زكريا
عبدالكريم الاحمر
فيصل محمد خليل
فيس بوك
تويتر
انستقرام
يوتيوب
بنتيريست