|
|
 ست الدار فى زمن اخر ... ( اعاده )
|
بسم الله الرحمن الرحيم
ست الدار فى زمن اخر
رسالة اولى :
ست الدار بت احمد جابر
كيف احوالك
مشتاق ليك
كيف الصحة والاولاد
راشد بقرا
ولا بزوغ من مدرستو
وكيف احوالن التومات
ربى يكونن لى طيبات
اما احوالى فربك يستر
يظهر انو بدأ المشوار
فى يوم الخدمة
جانا مديرنا
وديه حصل فى خميساً فات
قبال شهرين
سلم ورحب
هلل .. وكبر
وقرأ ايتين
قال المصنع ماشى تمام
وزاد انتاجنا الطاق طاقين
وجابلو كلاماً ما مهضوم
جهاداً ضارى
وبعث حضارى
وبلا متضارى
وخرم سب الامريكان
واخر الجلسة يا ريتو ما قال
قال المصنع راح يتخصخص
بره جلسنا فى ايدنا الشاى
كنا حداشر ..
لسه حداشر ..
زايد واحد .. اريت لو كان النوباوية
كنا نناقش فى الاحوال
مصنع بنتج كيف يتخصخص
مصنع بربح كيف يتخصخص
والله عجاب .. والله عجاب
وخضنا كمان فى الامريكان
هوى يا مطرطش مالك ومال الامريكان
بلدك كل شبرين فى ايد
وماشى تناطح الامريكان
مالك ومال الامريكان
تخطب ود البنك الدولى
وتمشى تسب الامريكان
مالك ومال الامريكان
سلاحك دوشكا وجوز هليكوبتر
وماشى تناطح الامريكان
مالك ومال الامريكان
وخضنا كمان فى بره المصنع
عن .. وعن .. وعن
وصلو قولنا مدير المصنع
وزولك ابداً تب ما قصر
وصل قولنا كلاب ال ...
وتانى المشهد ذاتو اتكرر
تتذكرى جعفر ..
تارى الراجل
رغم قساوتو
كان وحياتك الطف وارحم
بدل النقطة وكف العسكر
ضقنا عمايل
شفنا هوايل
وربك اكبر
وبعد الشهر اتطاول وعدى
وشفنا خلالو الذل والويل
كنا حداشر زول مرفود
والواحد اترقى ..
ما تشيلى هموم
ربك قادر وما بنسانا
والارزاق ما هى المصنع
الا وحاتك وبترجاك
راشد .. راشد .. والتومات
لازم ينجحو .. لازم ينجحو
وبختم ليك بى شوقى وودى
ودعوة ربى يغطى سماك
ملحوظة :
مرسل ليك مع صالح مية
يمكن اطول لى شهرين
مدى رجولك قدر لحافك
واوعك تطرى دروب الدين
الزين ود حامد
رساله ثانيه
سيد الناس الزين ود حامد
علك طيب ..
جانى جوابك من يومين
شالنى الخاطر ساقنى بعيد
لى زمناً اغبر
لا تتكدر ..
وزى ماقلت الخالق قادر
وبكره الحال لازم يتغير
لو بالاحسان لازم يتغير
لو كان عصيان لازم يتغير
ولو ملو كمان لازم يتغير
ما زعلانه على الرفديه
ولا زعلانه على الماهيه
الا عليهو البلد الصابر
شايل جرحو النازف طول
شادى الحيل من زمناً أول
وحاضن حلماً يوم بتأول
وأه من حال البلد الصامد
متين يرتاح ترحل احزانو
متين ينجم يتلم كيانو
أول البارح جبت الراديو
يمكن فيهو تجينا بشاره
من اخبارو فى ديك الجمعه
ابداً تب ما جابلو عديل
نحنح فيهو مذيعو وبرطم
جانا بلاغ من قايد الجيش
جيشنا الباسل وديمه جسور
حرر فشلا والبيبور
والحلال طلعوبا مسيره
ساحة المولد فى حلتنا
دفسوها خلق ..
عمالنا وطلبه ..
حرووم وصبين ..
ميرى وملكى ..
دفاع .. وعساكر
وشيخ الحله اب كرشاً زير
جانا معاهو افندى وزير
سلم ورحب ..
هلل وكبر ..
وقرا ايتين ..
تارى مديركم ماهو وحيد
والبلد الصامد بين نارين
نار من مدفع شايلو مجاهد
ونار من مدفع شايلو معارض
والله وكيل ..
الله وكيل ..
حكم الجور مابروح بى طلقه
الاستبداد ما تغيرو دوشكا
صوت الشارع اقوى وابلغ
من مية مدفع
ومن ترسانه
من العسكر ودباباتو
وصوت جبخانه
ومن زنزانه
ارمو سلاحكم يلا تعالو
نملا الشارع نملا سجونم
فى الخرطوم .. والبقعه .. وبحرى
ارض نضالنا .. وديه بكانا
ايد على ايد
الخوف يتبدد
ايد على ايد
الامل يتجدد
ايد على ايد
الغضب يتمدد
وصوت الواحد يبقى الف
الله معاك يا لصادق ودغرى
واصل دربك وما تتردد
مهما سواد الليل غطانا
بكره خيوط النور راح تطلع
والحريه تعود من تانى
بعد كفاح الشاب والشفع
عقابك زين ما تشيلو هموم
فيهو أم راشد والتومات
امانه على ارعاهم واسهر
وما يحتاجو غريب لا قريب
حتى الغمة تفوتنا وترحل
تعود تملالننا البيت ضحكات
ست الدار بت احمد جابر
رسالة ثالثه
ست الدار بت احمد جابر
شوق وسلام ..
زى ما عرفتك ديمه اصيله
وبلد اجدادك فى عينيك
همك خيرو
وعزة ناسو
وديمه همومو تساهر بيك
قولك غسل الحزن الكامن
وزاد القلب ثبات وسكينه
وبكره حا يملا الشارع صوتنا
نفجر غضباً كامن فينا
الطغيان بت احمد جابر
مهما اتطاول ليهو نهايه
وزى ما ضاق النصر فى يوم
بكره بلوك المر وهزيمه
وزى ما ملابنا بيوت اشباح
بكره يكون الحسره سجينا
ده التاريخ ما بتنسى دفاترو
ارجعى فتشى فى ماضينا
نحن كفاحنا بأيداً فاضيه
وقلب ملان ايمان وعزيمه
وصدرنا فاتح بسترو الله
هو معانا
وهو البحمينا
نحن سلاحنا الصوت الهادر
صوت الحق النصرو بجينا
وفجر الثورة الغابت شمسو
بكره يشابى ويطلع لينا
نورو يضوى طريقنا الغاتم
يهزم فينا سواد الليل
يرقص رمل الشارع فرحة
يشيل شبال من شجرو النيل
تمسح مدناً باكيه عيونا
تجر النم .. تقولو نشيدا
تقلع توب حداداً طال
تفش العتمه بى ايده
وتمرق لى صباح اجمل
تضم احضانو يوم عيده
الزين ود حامد
*****
ارتيقه مصطفى جيلانى
الطائف
يوليو 1998
|
|
 
|
|
|
|
|
|
|
|
Re: ست الدار فى زمن اخر ... ( اعاده ) (Re: Artiga Gilani)
|
عزيزى ارتيقا ..
عفوا ان كان كلامى لم يجد هوىً فى نفسك , حميد لا يجاريه الا حميد ..
تمنيت أن تكون القصيدة بعيدةً عن مضارب حميد ..
فهو حامى حمى الشعر ..
لا تحاول أن تكون حميد اخر بل كن ارتيقا
وسيكون لك شئواً اخر
قواسيب مودنى
| |
|
|
|
|
|
| |
Artiga Gilani
الصادق سيكا
فيس بوك
تويتر
انستقرام
يوتيوب
بنتيريست