|
17 نفر قصاد واحد..والنتيجة 9 - صفر ..الكائن الخرافي!!!
|
ترتب قناة النيل الأزرق لبث سهرة إسمها سكت الرباب يقوم فيها الفاتح حسين بإعادة اداء أغنيات شريط سكت الرباب ترحماً وتكريماً لي الكائن الخرافي والأسطورة الغنائية محمود عبد العزيز رحمة الله تغشاه.. إعادة اغاني الشريط تمت بواسطة كورال معهد الموسيقى والمسرح أو جامعة السودان كلية الموسيقى والدراما سموها زي ما تسموها ..ولمن نقول معهد الموسيقى فمعناها نخبة النخبة والنوتة الموسيقية وما أدراك ما الفايبريشن حقة كيف والزول ده صوتو سوبارنو والحتة دي فيها جملة موسيقية عجيبة والمنطقة دي بيلعب فيها بي مساحات صوتية مهولة و و و . شاهدت مقطع صغييير جابوهو كترويج للسهرة من أغنية سكت الرباب .. سبعطاشر ولا تمنطاشر أو قول طفشطاشر نفر واقفين صفين صفين ما بين أولاد وبنات وزي موحد وموزع موسيقي وفرقة موسيقية كاملة مكملة متأنقة ومشنطة بي الكرفتات والتوزيع في الجلوس.. سمعت مقطع من أغنية سكت الرباب يردده الطفشطاشر دارس وخريج موسيقي متعلم ما بين بكلاريوس وربما العندو ماجستير في علم الصوت ..هالني ما سمعت من أووول لحظة ..وللحقيقة اووول شي خطر في بالي وبي صورة عفوييية جداً مش إنو أشنف وافتش لي سلبيات الفرقة دي لأ أبداً والله ..أووول شي جا في بالي محمود عبد العزيز ربي يرحمو ويغفر ليهو .. لا علم لا دو ري مي لا مسكة عود لا نوتة لا تنظير لا كلام عن المساحات الصوتية لا تصريحات عن أعمال لحنية قدمها عن تجربة لا فلسفة حول مشروعه الفني لا لا لا ..فقط وفقط وفقط جداً حنجرة مع جسم نحيل مع رقبة طويلة مع بنطلون دبل كمر كان يشكه محمود حتى حجابه الحاجز مع فنيلة مخنوقة مع يد تميل شمال ويمين وفوق وتحت وهي تتلاعب بي المايك ..والنتيجة أداء تطريبي عجيييب ..صوت مهووول.. طاقة جبارة...غنا زييي الغنا ..ومتعة مااا بعدها متعة ..وعن نفسي ومن زماااان عندي نظرية كنت بتمنى اقولا لي محمود وجهاً لي وجه إنو واحدة من أورع طبقات محمود الصوتية الغنائية وضعها في أغنية سكت الرباب ..إمكن وحسب سمعي الكتييير لي محمود أكاد أجزم إنها الأغنية الوحييدة اللي غناها محمود من بدايتا لي نهايتا في الرايق ..بدون صرخات محمود وطلعاتو الفي العالي ديك..الأغنية دي تحديييداً كانت درس بالمجان للناس الكانت بتقول محمود بيكورك في الغنا..وفيها أثبت محمود للعالم كلللو إنو في الرايق مااا بتلحق ..انا طبعاً علميا ما بعرف الحاجات دي إسمها شنو لكن واحدة من الحاجات الكانت بتتجلى فيها ظمة محمود لمن يغني في البرااااحة .. أها امبارح لمن جابو ال17 نفر ديل من بنات وأولاد والله أشفقت عليهم ..اااي والله حنننيت عليهم رسسسمي ..وحنيت أكتر على الفاتح حسين وعلى الموزع الموسيقي الود بتاع نمارق داك .. ياخ غلبهم اليسوهو ..مرة في الطالع مرة في النازل مرة صوت البنات مرة صوت الاولاد مرة كوراكا مرة براحة.. والله انا امبارح أول مرة بالجججد كده أعرف إنو محمود كان عندو صوت واداء خرافي خرااافي بمعنى الكلمة وأول مرة بالجججد أقتنع تماااما بي إنو محمود موهبة وهبة ربانية وسر غامض من سرار الطبيعة الكونية .. 17 نفر متعلمين دارسين قضوا سنوات وسنوات ما بين النوتة وكيفية استخدام الحنجرة وما ادراك ما النفس وتوزيعه والاستنشاق والهواء وال وال وال مقابل زول واااحد ضعيفوووني ما عندو علاقة بي العلم ولاااا بي النوتة ولااا حتى اتوقع إنو كان بيتمرن تمارين صوت بي صورة منتظمة والنتيجة كانت وبكل سهولة 9 - صفر لي هذا النحيل..
عزيزي الفاتح حسين ..خلينا نقول ليك شكراً لي محاولة تمجيد محمود عبد العزيز وتأبينه والإحتفاء بيهو بعد موته لكنها نصييحة ليك ..ما كان في داعي الاحتفاء والتكريم يكون بي الطريقة دي ..عايز تعيد إنتاج الشريط عييدو لكن كان الأجدر يكون بي اداء موسيقي فقط بدون ما تحتاج تجيب اصوات ..صدقني كده ح تشوه الصورة الجمييلة الإترسمت ورسخت عن الاعمال دي في ذهن ووجدان كل عاشق لي الكاسيت ده ..
عزيزي كورال كلية الموسيقى والدراما ..طريقة الاداء بتاعتكم بقت روتينية..شاهدت ليكم تلاتة حلقات في تلاتة مناسبات وكلللها كانت طريقة اداء واااحدة مع إنو المناسبات مختلفة ..مرة كانت عن الاستقلال و غنا الخليل ومرة غنا ساااي كده ..طريقة مملة ومحفوظة..القصة ما قصة يوني فورم ورصة كراسي وتوزيع افراد الفرقة ..القصة أكبر من كده.. القصة بإختصااار موهبة فطرية .. اوووعا تاني ول يقول لي الموهبة مطلوبة لكن لو كمان تم تدعيمها بالعلم يكون افضل و و و .. الفن موهبة فطرية ..
تخريمة : محمود عبد العزيز ..عارف إنك زول ما نصيح؟؟؟
|
|
|
|
|
|
|
|
Re: 17 نفر قصاد واحد..والنتيجة 9 - صفر ..الكائن الخرافي!!! (Re: عمر الفاروق)
|
Quote: محمود كان عندو صوت واداء خرافي خرااافي بمعنى الكلمة وأول مرة بالجججد أقتنع تماااما بي إنو محمود موهبة وهبة ربانية وسر غامض من سرار الطبيعة الكونية .. |
كلام سليم 100% قبل كم يوم كنت بسمع في محمود تعرف فكرت في شنو ياعمر ؟ فكرت انو هل الحبال الصوتية والحنجرة بتاعة محمود (طبياً وعلمياً) هل هي زي حقت باقي الناس وال الصوت والقدرة على الغناء زي غناء محمود ده هي بتجي اساساً من وين وهل (الروح) عندها دور في القصة دي !!
| |
|
|
|
|
|
|
Re: 17 نفر قصاد واحد..والنتيجة 9 - صفر ..الكائن الخرافي!!! (Re: omer osman)
|
تعرف يا ابو عمير الحاجة البتحيير بالجد شنو؟ ناس كتيييرة اصواتها جميييلة شديييد وتطريبية للحد البعيييد ومميزة سواء من عمالقة فنانينامرورا بي جيل الوسط ختاما بي الشباب ..لكن صوت محمود ده بتحس بيهو صوت غرييب كده ما بيشبه اصوات الفنانين ..حاجة كده بالجججد انا ما قاعد اقدر اوصفا وده ما صيغة مبالغة أو تحيز لي صوت محمود ابدا والله ..بس حقييقي كده انا صوت محمود ده بحس فيهو سحر كده ولمن اقول سحر برضو ما بقصد الجمال الصوتي لأ بقصد السحر الواااحد ده .. تأكيدا لي كلامك بتاع الحبال الصوتية ده ..حاولت تغني مع حمود وانت بتسمع فيهو؟؟ شوفتو بيجهجهك كيف؟؟؟ كتييير من المرات وانت بتسمع في فنان ممكن تلقى روحك بتغني معاهو ولمن الفنان يسكت انت بتواصل بي نفس طبقة الفنان ده للدرجة البتخليك تتوهم انك زول فنان .لكن كدي حاول جاري محمود..!! ياخ حتتتى الود مصطفى حمزة اللي حاول قلد محمود بي درجة كبييرة غلبو يستحمل يواصل لي مدة سنة واااحدة بس ..حبالو الصوتية تحس بيها اتقطعت وصوتو بقا كعععب بي صورة مخيييفة في فترة وجيييزة...
| |
|
|
|
|
|
|
Re: 17 نفر قصاد واحد..والنتيجة 9 - صفر ..الكائن الخرافي!!! (Re: وليد محمد المبارك)
|
تعرف يا فاروق في نفرين كدا الناس مفروض يخلوهم لينا في حالهم يعني لا يقلدوهم لا يغنو غناهم لا يتبدهلوا ساي النفر الاول زول عملاق كدا واسمه ابو داؤود .... هذا الابو داؤود لو في زول رقبتو شايلة راسو ما مفروض يغني ليهو النفر التاني ياهو الحوت دا .... الحوت يا ابو عمير زول براهو ولا بنقدر لناس معهد الموسيقى ولا معهد الفلك زاتو الناس ديل عندهم امكانيات صوتية ملائكية لا تشبه البشر في شي .... كلامك مريح جدا يا عمك وريح كنكوج ابو حناني كما السلف اخانا ناذر
تحيتي وكامل الود
| |
|
|
|
|
|
|
Re: 17 نفر قصاد واحد..والنتيجة 9 - صفر ..الكائن الخرافي!!! (Re: عمر الفاروق)
|
سلام يا عمر و سلام يا شباب
طبعاً يا الفاروق سبقتني عدييل في القصة دي و واضح انك كنت عايز تخت كلامك قبل ما يبثو الحلقة (ودي فكرة سليمة) انا كنت منتظر البث . بتفق معاك في كل كلمة كتبتها و المصيبة الكبرى أنو محمود (ربنا يرحمو) ح يخت إي زول في حته ضيقه جداً لو الزول أو (الأزول) ديل حاولوا يكرروا اعماله . يا عمر الفاروق أبو دبل كمر و شكه للحجاب الحاجز دا معجزة لن تتكرر كلو كلو . قبل كدا هنا في المنبر دا اتفقنا في قصة الحوت و أبو داؤود و اتفقنا فيها بشكل عجيب و مخيف لانو صراحة النفرين ديل كائنات اكتر من خرافيه و ليهم نفس الملكات الصوتيه و الإجتماعية و اللطف الإجتماعي و اتمتعوا بمحبة كافة البشر بشكل مدهش.
يا عمر الفاروق للأسف طلبة كلية الموسيقى بعقدوا المسأئل و مرات كتيرة جداً بشعر انهم زيهم زي المثقف العايز يوريك انو مثقف داك و يمسكك يمعطك بكمية من المصطلحات و الكلام المقعر المافي ليهو داعي نهائي .
المهم محمود رحل ربي يتقبلو و يجعل مثواهو الجنة و ربنا يدينا نحنا الصبر و طول الباطل في الحايحصل علينا بسبب رحيل الحوت .
ــــــــــــــــــــــــــــــــــــــــــــــــــــــ يا فاروق بوست نانسي فات وين؟ ياخ أنا لسه عندي نضمي.
| |
|
|
|
|
|
|
Re: 17 نفر قصاد واحد..والنتيجة 9 - صفر ..الكائن الخرافي!!! (Re: سفيان بشير نابرى)
|
سلام يا فاروق والضيوف
Quote: لكن واحدة من الحاجات الكانت بتتجلى فيها عظمة محمود لمن يغني في البرااااحة |
أيوااااا
دا الكلام الأنا كنت بغالط فيكم فيهو لمدة أسبوعين وإنتو كنتو ماخدين الكلام ككل
محمود في الوسط والبراحة دي صوتو ما عادي لما يمشي فوق الشغلانة بتجوط (على الأقل بالنسبة لي أنا)
معهد الموسيقى للآن ما قادر يتعافى من أثر الأساتذة الكوريين ياخي ديل (الكوريين) نخشمو الغناء وطلعوه من معناه وخربوا لينا أضانا في الثمانينيات
| |
|
|
|
|
|
|
|