الخرطوم اليوم سخنت فجأة كدة ـ حتي أحسسنا أننا إنتقلنا للجحيم دون مقدمات ، للأمانة لم يكن الفارق كبيراً ومن حسن حظ القوم السودانيين أنهم تمرنوا وتمرسوا العيش في كافة الظروف .
كانت الشمس أقرب من حبل الوريد يازول سخانة مبالغة ولعت الخرطوم ، صحف البلاد كانت كذلك مولعة هذا الصباح الخرطومي البائس . إذ جاء في الأخبار :
(!) وزير المالية يصرح بأنو ما حيخلو أي زول سرق قرش من قروش الدولة . (!!) وزير العدل لدينا ملفات اربعين (حرامي) وما بين القوسين من عندي (!!!) الانتباهة والرأي العام حتوها قرض مع الحزب الشيوعي السوداني وضيف الشرف أخونا في الله صلاح البندر .
من حسن حظي إنني ابتسم .... ابتسم كيلا وكيلا وكيلا .... يا رجل ماذا نفعل ؟
دوماً أجدهم ... أجد من يعوضون كآبتي وسأمي ... أجد من يجملون هذا السودان بكل خيباته ونكباته وأحزانه المميتة .
في المساء مشيت محل الحلاق .... دايما بمشي لي (بوب) صحبي وهو بالمناسبة من أمهر الحلاقين إضافة لأنه يحمل درجة الماستر في التسويق لكنها البلاد يا بوب مافي شغلانات يا صحبي .
(بوب) لقيتو مافي ولقيت (خالد) اتونسنا وسألتو عن بوب وفي النهاية قلت ليهو ياخ طالما هو ما حيجي أحلق لي انت يا خالد .
لمحت صورة في ورق A1 كان الحوت بذات ابتسامته وذات وسامته متمدداً في الصالون ..... استغربت للصورة خالص اذ اني لم اجد توقيعاً سألت خالد ..... ياخ الصورة دي رسمة ولا صورة ولا شنو بالضبط ؟ أجابني وتسبقه ابتسامته : ده الحوت ياخ أي عرفتو لكن دي صورة ولا رسمة ولا شنو ؟ دي رسمة ياخ
الزول الرسم الحوت ده ليه ما خاتي توقيعو ياخالد ؟ رسمتو انا وما ختيت توقيعك لي شنو ؟ انا ما بحب اخت توقيعي في اللوحات ثم أضاف : الحاجات البختو فيها التواقيع دي حاجات رسمية ياخضر والحوت ده زول شعبي خالص
شكراً خالد علمتني درساً جديداً يا صاحبي .
ـــــــــ ملحوظة ما لم ولن أقرأه في صحف البلاد اعتقال صديقي برنابا تيم ساوث أطلقو سراح القس برنابا
02-26-2013, 08:56 PM
خضر حسين خليل
خضر حسين خليل
تاريخ التسجيل: 12-18-2003
مجموع المشاركات: 15087
وددت يا باخ يا صحبي لو كنت وبكري معي الآن في هذه اللحظة الخرطومية الفاصلة ، هجد الأنام يا باخ بس في فنان عامل كيف كيف يغني : أنا ليكم بقول كلام تصور بغني الكلام ده في عرس ؟ ألم أقل لك مرة أن الجلالات ستتبعنا الي داخل غرف نومنا ـ هاهو عريس بحينا يزف كأجمل ما يكون الجندي لحتفه وما فرقت يا صديقي فالحياة في دولتنا هذه عبارة عن معركة كبيرة . وددت ياخ لو كاويتك هسي بالمهاجم الجديد الأسمو تراوري الجابو الهلال ... ود لعاب وتحس بيهو زميل زميل يا بخاري هههههه تصور المحلات الجمبنا ديك كلها بقت مطاعم إكتشفت بمحض الصدفة أيضاً انو البلد دي عبارة عن مأكلة كبيرة . تأكل وتقش خشمك وحمد الريح يغني وصوني يا حليلو الوصية . باللاهي لو صاح قول عوووك باقي الكاتمو في (جواي كتير متوسد الجوف والعصب) وتحياتي للطبيب الإنسان بكري وقول ليهو كان حيين بنتلاقي وموفق دوماً ياخ .
02-28-2013, 09:22 PM
بخاري عثمان الامين
بخاري عثمان الامين
تاريخ التسجيل: 10-25-2007
مجموع المشاركات: 3456
الإستقطاب يا صحبي انتهي من البلد كلها خليك من الهلال ـ ضحكت والله وأنا بقرأ موضوع الكمبيوترات والله وكستنا الصحي صحي يا زميل في المثقفين الثوريين وفي الناس بتوعين الموقف الطبقي ديل ـ ياخ كارل ماركس زاتو بكون متمحن في قبروا من أفاعيل الناس ديل . الكندو لا زال يضغط الكف بالكف عموماً في راسو في مشاريع كتيرة خالص خالص بس كما تعلم البلد ضيقة خالص خالص (أضيق من سم الخياط) أو أضيق من قد الإبرة . انا بالمناسبة مستغرب في قدة الإبرة الما قدرت تتطور تاريخياً دي .
سهي بتسلم عليكم أجمعين انت ونجلاء والوليدات
02-28-2013, 09:28 PM
قيقراوي
قيقراوي
تاريخ التسجيل: 02-22-2008
مجموع المشاركات: 10380
Quote: الخرطوم اليوم سخنت فجأة كدة ـ حتي أحسسنا أننا إنتقلنا للجحيم دون مقدمات ، للأمانة لم يكن الفارق كبيراً ومن حسن حظ القوم السودانيين أنهم تمرنوا وتمرسوا العيش في كافة الظروف .
مافي مفاجأة في السخانة يا خدر ناس الخرتوم الحارة ديل اهلي
-------
ازيك ياخي
ياخي السودان بلد لزيز عديل كدا
بلد ماشة ساااااي .. عايرة عديييل كدي
الدكتور الاستراتيجي والخبير الدولي، يفكا فيهم انو اليهود بدفعوا قروشم لحملات تنصير اولاد المسلمين السودانيين بالذات .. دا كلام دا عاد!؟ بل تبشيرم بالالحاد ذاتو .. وفرع الحزب في البلد ديك بطل شغلتو وبقى ما قاعد يتعلم من الجماهير ولا حاجة، بس يعلم فيها الكفر وجرائد البلد الغافلة ديك في انتباهة عجيبة -فجأة- كدا التقطت الضلف دا، وانتبهت لمهمتها التاريخية لحماية بيضة الدين من اليهود الملحدين! والله حيرونا في كنكوجنا الخسرانين عليو دا!!
يازول العصفورة جابتو: قالوا الزميل السكرتير السياسي في لندن طلع تكليف لكل الزملاء بفرع لندن يصحوا من دغش فاطنة علي ابوها محمد، ويرددوا الراتب الماركسي على الريق: لا إله .. لا إله .. لا إله (ثلاثاً) .. والحياة مادة!
02-28-2013, 09:35 PM
خضر حسين خليل
خضر حسين خليل
تاريخ التسجيل: 12-18-2003
مجموع المشاركات: 15087
وقيل كاااااااك يا قيقراوي عجبوني والله رفاق لندن وهم برددو لا اله الا الله بعد الحملة الصليبية بتاعت أخونا في الله البندر لا وقال شنو ياقيقا البندر في معرض حديثه لصحيفة السوداني قال فيما معناه : لقد كتبت هذا الكلام في سودانيز اونلاين ثم واصل سيادته مستغرباً انتو ياناس السودان ما قاعدين تخشوا المنبر ولا شنو ؟ ههههههههههه صحافة قال ليك ياقيقراوي
ـ يازول مشتاقين والله وفاقدينك يارجل تعال اجازة عشان تآمن وتعرف أن الله حق
02-28-2013, 09:37 PM
خضر حسين خليل
خضر حسين خليل
تاريخ التسجيل: 12-18-2003
مجموع المشاركات: 15087
يازول مشتاقين والله وفاقدينك يارجل تعال اجازة عشان تآمن وتعرف أن الله حق
وين يا عمك انا تاني اجازتي لندن بس المافي شنو!؟
البمشوا النار ديلاك الكفار يا اخوي!
سمعت نكتة الامريكي والانقليزي والسوداني (يبدو لي انو زميل كان ما اخاف الكضب، حسب الرواية)
---------
سؤال الخبير الاستراتيجي الفلسفي العميق .. او قول تسآلو التعسفي في السوداني، قريتو يا خدر
وبقيت اكرر في سري : الله في .. الله في .. الله في
هو لي رقبتو دي قاعد يقرأ سودانيز اون لاين، ول بجي يلخ فيها ساي .. كما يتفق!؟ ياخ بكري دا ما شكا لطوب الارض عدييييل كدا من موضوع الحجب دا!؟ المسكين صوتو بح عديييل كدا وهو بسعى لتوصيل صوت من لا صوت لهو دا
الله في يازول
02-28-2013, 09:45 PM
بخاري عثمان الامين
بخاري عثمان الامين
تاريخ التسجيل: 10-25-2007
مجموع المشاركات: 3456
أمس مشينا طه بعشر أنا ومعتز لزيارة صديق عزيز ..... شغالين معاه دكاترة طه بعشر بصدق عشان يساعدوه في قصة الإنسحاب الكحولي المهم حكي لي معتز حكاية مبالغة وأخوك مضطر لا بطل حأحكيها ليك عشان تشيف براك أنحنا الحصل لينا ده ما من فراغ :
قال ليك والعدة لمعتز انو مشي مرة بيت زول صحبي نواحي بحري المهم في الشارع لقي ود عم الزول الصاحبو ده ودار بينهما الحوار الآتي : ازيك يا معتز ياخ أهلين يا يا فلان انت شكلك جاي تطشم معانا لا والله انا خليت البتاع ده (معتز) طيب ياخ ما معاك قروش تدعم بيها أخوك ؟ والله ما معاي (معتز)
المهم معتز قال إتفاجأ انو الزول ده طلع (حمامة) من جيبو وقال ليهو : والله انا من الصباح مشرك للحمامة دي ماشي ابيعها وأجيب بيها نص وفول ورغيف
ثم مشي متأبطاً حمامته
ـــــ أنا طبعاً الضحكني انو معتز قال : قدر ما اقنعت الزول ده انو الحمامة دي ما بتجيب ده كلو ابي يقتنع ليهو يا بخاري
حمامة دي ولا ميتين دولار اصلو ياخ
02-28-2013, 10:02 PM
خضر حسين خليل
خضر حسين خليل
تاريخ التسجيل: 12-18-2003
مجموع المشاركات: 15087
يا قيقراوي ياخ والله انت زول لماح ..... قلت لي صحبك بكري يشكي لي طوب الواطة والخبير الاستراتيجي ما ينتبه ههههههههه معادلات صعبة ياخ المهم انت لو قريت قصة الزول الباع الحمامة يمكن تلقي تصريف لي قصة الحجب دي الناس هنا بقي يحجبو الحمام تقول لي سودانيز
أحجب ـ أطبع ـ وزع هاك الخبير الاستراتيجي ده
02-28-2013, 09:59 PM
البدري عبد الله
البدري عبد الله
تاريخ التسجيل: 07-30-2009
مجموع المشاركات: 1911
يا خضر الناشط مشتاقين وكفى ! . . . بي مناسبة السخانة اليومين ديل ..ان شاء الله بقيتوا تشتروا تلج لي موية دكانكم الحارة ديك ؟ ياخ انا اول مرة اشوف لي حافظة مياه مختوتة ديكور ..الم تعلم ايها الناشط ان تلك الحافظة التي رماها حظها العاثر في جب متجركم العامر قد انّت وشكت الى طوب الارض وقطع الغيار من قلة ورود المدعو الثلج الى احضانها ..
. . ياخ الحبشي اصلو ما خاطي عليك
02-28-2013, 10:07 PM
خضر حسين خليل
خضر حسين خليل
تاريخ التسجيل: 12-18-2003
مجموع المشاركات: 15087
هههههههههه والله يا باخ وقيقا أنا عمري ده كلو ماشفت زول من المهجر برسل لي ناس في الخرطوم شكولاتة سوي اخونا البدري ده الزول ده أكبر مخستك الله خلقو في الاسافير رسل لينا انا وحسبو شكولاتة الغريبة حسبو غنج بيها كلها وشبكني اعتذارت
يا البدري الحبشي ما غلط علي الانسان ده عيان كافي البلا وهذا للعلم عيان عديل وربنا يواليهو بالصحة والعافية مشتاقين ياخ
02-28-2013, 10:33 PM
قيقراوي
قيقراوي
تاريخ التسجيل: 02-22-2008
مجموع المشاركات: 10380
أنا طبعاً الضحكني انو معتز قال : قدر ما اقنعت الزول ده انو الحمامة دي ما بتجيب ده كلو ابي يقتنع ليهو يا بخاري
حمامة دي ولا ميتين دولار اصلو ياخ
الدنيا حظوظ ياخي
ناس تغوص عمق البحار، لا تلقى لؤلؤ لا صدف .. ؤ ناس بررررررة في رمل الشواطئ، تلقى اللآلئ بالصدف!
قصة حمامة الطيار دي، بتذكرني قصة جدادتي .. التجارة فيها الربح والخسارة كمان .. دا فيما يخص التجارة عموم القانون العام دا تم اختبارو في معامل الواقع .. لكن تجارة الروح دي فيها الخسارة والخسارة بس مرة -وما كان عندي اي نوايا شرير*- اشتريت لي جدادة بكل الجنيهين الحيلتي. .. ؤاتكاملت بيها عمك حسن جداد ("حسن كاك“ في رواية مجيدة) الوكيل الحصري لتجارة الجداد في كوستي .. جملة ومفرق عمك عصر ليك الجداد من سدرا كدا، ورجعا لي قنعااااان .. ويهو يردد باستغناء وصلف برجوازي عجيب: جدادتك دي ناشفة يا اخوي !
ناشفة كيف يعني ..سجارة هي!؟
يازول حمامة ما بتجيب دا كلو .. ياخي جدادتي الناشفة هذه ما جابت الا جنيه واااااحد .. وبالقديم ذاتو!!!
-------
* دا كان كود (المنكر) لجماعة (التفكير والهجرة) في زمن الجاهلية
02-28-2013, 10:10 PM
محمد حيدر المشرف
محمد حيدر المشرف
تاريخ التسجيل: 06-20-2007
مجموع المشاركات: 20417
أظن ، صاحبك ضحك قال لي : من تمغرب شابكني جبت القنقنر جبت القنقنر ؟ انت قايل اني عندي كمبو .. ما ياهو البنطلون بجيب قزازة والقميص للعشاء
ذكرتني "علي حمودي“ يا باخ ياخ
مرة عزمنا شاي بي لبن في البركس، انا كنت قايلو مجيتو من السفرة ول الكافتيريا ( حلال يعني بفقه الطلبة كما اجمع عليه السلف الصالح) .. لكن اكتشفنا اننا شربنا حرام .. حيث انه تأكد لنا -شرعياً- ؤ بالدليل القاااطع انو لبن حرام سخت .. لانو طلع مجيتو من المصدر مباشرتن .. من الغنماية اتسلف!! طلع حلب ليك غنم ناس بري وما جاورها اللافة في البركس على حل شعرها
--------
ازيك يا باخ كيفكم وكيف كيفكم مشتاقين والله
02-28-2013, 11:01 PM
بخاري عثمان الامين
بخاري عثمان الامين
تاريخ التسجيل: 10-25-2007
مجموع المشاركات: 3456
Quote: كبابى فاضية .. قمصان .. بناطلين .. ياهو ده راس المال يا باخ ؟!! أها قول اشتريتو من الحاجه قيمة العمل .. قيقراوى ده دفع شنو للغنم القاصية ؟!!
ما هو دا وجه الحرمة في الشغلة يا مشرف .. رغم انو المشروب لبن والمنكر بي علاقات الانتاج والتبادل الحفظتا حكمة السودانيين الاثيرة (خميسك لو تبيع قميصك) ببقى حلال
شفت التناقض دا كيف؟
-------
حدثني من لا اشك في صدق حديثه،عن طيار خطير .. بحب الخمر لدرجة انو ما شايف احسن منها في الدنيا دي، انه قال: مسكينة ستي العرقي، نديها (قروش) وهي تدينا العرقي .. عشان تشتري بيها شنو!؟
03-01-2013, 04:11 AM
معاوية الزبير
معاوية الزبير
تاريخ التسجيل: 02-07-2003
مجموع المشاركات: 7893
ثلاثة من الزملاء خفيفو الظل ثقيلو الهم كلٌ في عاصمة تنادوا ليل خميس ليؤانسوا زميلا رابعا بلا عاصمة تقريبا (فقط حضور كثيف للحر والبندر وغياب فاضح للحوت) تبادلوا في رباعية نادرة، بسيطة وعميقة: ون-تو-ثري-فور ثم انصرفوا إلى شئونهم موقنين بأن النصر آت بلا ريب أمتعتونا يا زملاء ننتظركم الخميس الجاي -كان الله حيانا- ومعانا القمصان والكبابي احتياطي المافي شنو ------------------ خضر، على الوعد بخاري، الله المستعان يا زول المشرف، قريب ح نتلاقى، أزمة وعدت قيقا، نتمنى نشوفك في الدوحة ياخ -وما بتندم-
أنا انيقنت من تالاك لا آسف ولا محزون على العمر القضيتو معاك براي باقي الدرب بمشي وخطاي ما تعدم الهدّاي وكان السكّة حارت بيْ وأكان كرّت سموم الصيْ على نسم العشم جوّاي قوافل صبري ماب تضهب وأمان حاديها مو الدوباي خيول قبّال دا ماترّت ولا فرّت من الحوبات ولا حرّت ولا انشدت ولا صدّت سروجه بلاي وأعود من دربك الدردار على شعب اليقان مسنود وأحرس العرسة من تالاي وريح شجن الليالي السود
جانا زمن فيهو محتاج تبرئ نفسك لرفاقك ... الوهدبه سيدة الموقف و يا خضر ... ليس الأمر البندر بل السوس الجوه ... تمدد البندر يوم أُكِل الثور التانى و كان الجمهور بين متفرج و شامت و متواطئ و محايد و عقلانى و ..... و ليس كل ما يُعرف يقال ... حتى اللحظه
03-01-2013, 10:56 PM
خضر حسين خليل
خضر حسين خليل
تاريخ التسجيل: 12-18-2003
مجموع المشاركات: 15087
نحن التعابا البي ختيار صممنا ترتاح الديار و ينجم بال بلداً تعب إحنا الطيابا الصح كتار نحن الغلابه أكبر حزب لا بننغلب لا بننقلب والتابع الصاح ما ضهب يا هرشه نفخة زيف كضب نحي و تموت عرشك خيوط العنكبوت قبال ده هزينا و وقع الأقوى منو بنى وثبوت لا أجدى بنك أمان لا بوت لا غرب لا شرقاً نفع و شرع الله يبرا من الشفوت
ـــــــــــ حميد أنا ماشي راجع لي بيوت
03-01-2013, 10:46 PM
خضر حسين خليل
خضر حسين خليل
تاريخ التسجيل: 12-18-2003
مجموع المشاركات: 15087
Quote: جانا زمن فيهو محتاج تبرئ نفسك لرفاقك ... الوهدبه سيدة الموقف و يا خضر ... ليس الأمر البندر بل السوس الجوه ... تمدد البندر يوم أُكِل الثور التانى و كان الجمهور بين متفرج و شامت و متواطئ و محايد و عقلانى و ..... و ليس كل ما يُعرف يقال ... حتى اللحظه
أما أنا فأنام مرتاحا منذ أن أهلت علي وطني التراب !! البلد دي ماتت زماااان يا عصام جبرالله ... ياخي كان ما ماتت ...صلاح البندر داير يحل الحزب الشيوعي ؟!! ------------ خضر يا وهم ... شوف ليك سكة اتخارج بالله ... سوق سهي و حليم ..طفو الأنوار و إتخارجو ليكم علي بلد يا حبذا لو طيرها عجمي !!! بجيك برواقة كان الله هون !!
03-01-2013, 11:15 PM
خضر حسين خليل
خضر حسين خليل
تاريخ التسجيل: 12-18-2003
مجموع المشاركات: 15087
لأي معركة غبار يا صديقي ـ الا دي يا أمين جاءت ككتاحة هبوب سميهو كيف ما تحب أنا المحيرني إنو أي زول عايز يحل دم الحزب الشيوعي ده يا أمين هو ده دم ولا كركدي أصلو ؟
أنا منتظر جيتك في البوست ده إتخلص من ربقة الرجل الأبيض وتعال لأخوك الذي في ربقة البلاد السجم دي
03-01-2013, 10:51 PM
خضر حسين خليل
خضر حسين خليل
تاريخ التسجيل: 12-18-2003
مجموع المشاركات: 15087
معاوية يا زبير يا صديقي العزيز بالأمس جاوكنا الحياة برفقة الصحاب الليلة جيت مهدود الحيل كل الإتذكرتو حميد حميد والقصايد النارها باقة .... حميد ده كان تقابة وضحي وضل وهيط
باللاهي دي بلد شنو دي زاتها اللا فيها حميد لا فيها وردي لا فيها نقد لا فيها الحوت . بلد زاتها كستبانتها براها يا صديقي
ـــــ بخصوص الوعد خابرك يا صحبي خابرك
03-01-2013, 11:19 PM
بخاري عثمان الامين
بخاري عثمان الامين
تاريخ التسجيل: 10-25-2007
مجموع المشاركات: 3456
يا باخ ياخ لو عندك قدرة نزل لينا الأغنية بتاعت ابو زكري (ايها الراحل في الليل وحيداً) بصوت ابو السيد انت عارف انحنا هنا محرومين من اليوتيوب واليو تو اي حاجة ياخ انحنا محرومين من الاقتباسات زاتو
03-01-2013, 11:26 PM
أمين محمد سليمان
أمين محمد سليمان
تاريخ التسجيل: 08-08-2009
مجموع المشاركات: 8437
Quote: أنا منتظر جيتك في البوست ده إتخلص من ربقة الرجل الأبيض وتعال لأخوك الذي في ربقة البلاد السجم دي
أنا كان جيت بجيك زول ونسة ساي ... الوطن أب دق دا أنا رفعت يدي منو.... ودعتو لي الله ... ولا إنت كمان كافر و ما مؤمن بالله ؟!! بالنسبة للحزب الشيوعي ... حقو تحلو براكم يا خضر ... البلد ذاتها ماتت ... الحزب ما بموت مالو ؟!! يا كمان تواصلو في قصة الزندقة و التنصير دي !! الكلام كتر يا خضر و اخر معلومة جاتني من الوطن الشقيق إنو حسبو حلق صلعة و بقي يلبس صليب !! الكلام دا صحي يا خضر ؟!!
03-01-2013, 11:44 PM
خضر حسين خليل
خضر حسين خليل
تاريخ التسجيل: 12-18-2003
مجموع المشاركات: 15087
غادرت المكان وأسئلة الدنيا والعالمين تلاحقني عن أي ناس هم هؤلاء الشيوعيين السودانيين وأي محبة يحملوها للأرض غادرت وأنا مليئ وممتن لهذا المساء الطيب ولهذا الشعب الجميل الذي يقتل ولايموت . نظرت خلفي لأري العمائم كأشجار التبلدي والنساء كغابات الأبنوس فارعات ماجدات حالمات أنيقات جميعهم يغادرون أرض العلمين بعد أن غرسوا في ترابها أصدق جنين يخلق في أرض الثورات .
يا خضر متذكر الكلام دا ؟!!
03-02-2013, 00:08 AM
خضر حسين خليل
خضر حسين خليل
تاريخ التسجيل: 12-18-2003
مجموع المشاركات: 15087
الكلام ده يا أمين كيفن ما بتذكرو يا صحبي المشهد ده بالتحديد كان حوالي حداشر وربع مساء وأنا مارق من ميدان العلمين في تدشين حملة الأستاذ الراحل المقيم محمد ابراهيم نقد متذكر كويس يا أمين اني جيت البيت بعد اتناشر ونص وقعدت اكتب
ــــ بالله شوف أي رجل فقدنا يا صحبي رجل تلتف حوله العمائم كأشجار التبلدي والنساء كغابات الأبنوس اي حظٍ حظنا يا صديقي الأمين
03-02-2013, 00:02 AM
بخاري عثمان الامين
بخاري عثمان الامين
تاريخ التسجيل: 10-25-2007
مجموع المشاركات: 3456
Quote: يا باخ ياخ لو عندك قدرة نزل لينا الأغنية بتاعت ابو زكري (ايها الراحل في الليل وحيداً) بصوت ابو السيد انت عارف انحنا هنا محرومين من اليوتيوب واليو تو اي حاجة ياخ انحنا محرومين من الاقتباسات زاتو
بكرة يا خدر أوعدك انزلها أو بصراحة أنا ما بعرف لكن نجلاء خبيرة زي ما أنت عارف في المسائل دي ..
عموما عايز أهديك صورة عا########ي لاتنين من أصحابك كلاهما رحل في اتجاه :-
03-02-2013, 00:22 AM
بخاري عثمان الامين
بخاري عثمان الامين
تاريخ التسجيل: 10-25-2007
مجموع المشاركات: 3456
والله يا شباب أكتر حاجة مزعلاني من الزملاء ديل انهم ما قادرين يفهموا إنه كلامهم عن عوالمهم الغنية دي نحن نصيبنا منه الخيال بس...يعني اسع أبو حمامة ده يا خدر نحن نشبهو بي شنو ...يا شباب المساواة في الظلم ماركسية بي الدرب العديل،،،
03-02-2013, 04:08 AM
Afraa Sanad
Afraa Sanad
تاريخ التسجيل: 05-18-2009
مجموع المشاركات: 1751
Quote: والله يا شباب أكتر حاجة مزعلاني من الزملاء ديل انهم ما قادرين يفهموا إنه كلامهم عن عوالمهم الغنية دي نحن نصيبنا منه الخيال بس...يعني اسع أبو حمامة ده يا خدر نحن نشبهو بي شنو ...يا شباب المساواة في الظلم ماركسية بي الدرب العديل،،،
يا عفراء قلت لي عوالم غنية ياخي والله بس نحن غنايا بهذا الغمام علي قول حميد
دي عوالم وعرة الله لا عادا ياخي ... تسلمي علي المرور نيابة عن خضر
03-02-2013, 03:42 PM
منعمشوف
منعمشوف
تاريخ التسجيل: 12-08-2002
مجموع المشاركات: 1423
Quote: الحاجات البختو فيها التواقيع دي حاجات رسمية ياخضر والحوت ده زول شعبي خالص
أسى فى ذمتك كلام شحمان زى دا تروّس بيهو بوستك وتكلمنا بإسهاب عن خالد وبوب وتطمنا إنو البلد لسة بخير ومليانة بالشبيبة فى أحياء المدينة الشعبية عميقى الرؤية ، قارين واقعهم ومتصالحين معاهو كمان، ولا تخت لينا إسم الزول الكيسو فاضى دا وقادينا ليل نهار فى الفارغ والمليان نص نص، الكلام الشوية الكتبتو يا خدر عن خالد وبوب ملأ الناس دى كلها بالتفاؤل وزولك دا بروف فى التثبيط ورمى إيقاع الناس البتحلم بوطن جميل
أمشى تانى أحلق وجيب لينا قصة جديدة تصلح الموود الرميتو دا.
03-02-2013, 07:20 PM
خضر حسين خليل
خضر حسين خليل
تاريخ التسجيل: 12-18-2003
مجموع المشاركات: 15087
مشتاقين وحاتك شديد ـ قلت لي رميت ليكم المود ـ والله المود الإسفيري ده من اساسوا مرمي ومرمي الله كما تعلم براك آ بترفع بأخوي وأخوك خالد ده وأمثالو ياهم المخللنا نتنفس ونحلم باقي أحلامنا ياصحبي الأحلام البجو ناس البندر ديل بهدوها هددك هددك هددك
اها يا منعم اخوك ماش ينوم ونتلاقي ياخ
قبيل يا شوف قريت لي نكتة وين والله ما متذكر المهم :
قيل والعهدة للراوي انو كان في زول من ناس الزمن الجميل لما السودان كان سودان زمن الموية موية يعني قال لي صاحبو : والله مسكينة ياخ ست العرقي دي صاحبو قال ليهو لي شنو : قال : الزولة المسكينة دي انحنا بنديها قروش وهي بتدينا عرقي أنا ماعارف هي حتعمل بالقروش شنو ؟ ـــــــــــــــ
03-02-2013, 07:33 PM
معاوية الزبير
معاوية الزبير
تاريخ التسجيل: 02-07-2003
مجموع المشاركات: 7893
ههههههــ ها يا المشوطن، النكتة كاتبها ليك قيقراوى فى بوستك دا، الصفحة التانية على ما أظن
بالله شفت الزول دا موضوع (القيمة) دا واقع ليو كيف يا منعشوف؟
حولااااا!! ياخي دا من اهل الكشف الماركسي عديل كدي .. شوف متقدم جداً دا!
--------
وكت خدر دا بنسى خلوني احكي ليكم نكتة الامريكي، والانقليزي والسوداني الدخلوا النار .. بدا الانقليزي، عمل اتصال باهلو في البلاد التي تموت حيتانها من البرد، وبرودة اهلها .. ما تم دقيقة ذاتو .. حسابو طلع 1000 جنيه استرليني .. الامريكي ورجغ شوية، وقفل الخط .. حاسبوهو بالفين وخمسمية وخمسطاشر وتلتين سنت .. الفكة دي الضريبة ؤ كدا اها زولنا -ؤ غالباً زميل البخش النار دا- ورجغة السواد واللواد، طلب يسلم على الاحياء والاشياء .. النيل والهلال .. والحلال .. حتى ابراهيم الاطرش ادوهو ليو يكلمو في التلفون! لا اقوليكم ساعة ول ساعتين .. جا يحاسب .. قالو ليو الحساب جنيه سوداني وااااحد .. وبالقديم كمان .. وقبل ما حواجبي الدهشة تنعقد وتتعقد المسالة لمن ما يفرز السمين من الشمال الا بعملية تجميل فكوا ليو العجب: من النار لي النار دي تعتبر مكالمة داخلية ... يا عمك! (وردت هكذا في الرواية الاصلية)
03-03-2013, 00:01 AM
منعمشوف
منعمشوف
تاريخ التسجيل: 12-08-2002
مجموع المشاركات: 1423
من النار للنار يا قيقراوى وبجنيه ! والله غالية ياخى، دى المفروض تكون مجانيه
سمعت بالفردتين البعد ما طشموا فكروا ياكلوا ومالقوا حاجة يلهطوها غير يجازفوا عتود جارهم، واحد منهم تانى يوم إذكر موضوع العتود وضميرو أنّبو وقال لى صاحبة: ياخى والله نحن أمبارح عملنا عملية ما كريمة. صاحبه: ليه ؟ عملنا شنو يا زول ! قال لى: يا خى ما مكن ناكل عتود الراجل المسكين دا، ياخى، ياخى والله ربنا بحاسبنا على العملية السخيفة دى. رد صاحبة: ياخى يوم القيامة مش كوووولنا حنبعث. قال لى: آى صاحبة: وبى العتود المأزمك دا قال لى: آى صاحبة: خلاص، محلولة، نجر العتود من أضانو ونرجعوا ليهو ونعتذر ليهو كمان.
03-03-2013, 00:26 AM
قيقراوي
قيقراوي
تاريخ التسجيل: 02-22-2008
مجموع المشاركات: 10380
انت يا قيقراوي الانقليز والامريكي ديل ما واحد يعني ؟ طيب ليه بقولو عليهم كلهم خواجات ؟
المهم هاكم دي يا فرد ــــ
صاحباً لينا إختلف مرة مع واحد من قضاة النظام العام المهم القاضي أمر بإنزال عقوبة غريبة شوية عليهو عقوبة لم ترد لا في الشريعة الاسلامية لا في الكتب السماوية المهم بعد تنفيذ العقوبة . العسكري ساق صاحبنا ده ومشي بيهو للقاضي عشان يقول ليهو انو تم تنفيذ الحكم صاحبنا عاين للقاضي وقال ليهو : لو سمحت يا مولانا أنا عندي اقتراح القاضي قال ليهو اقتراحك شنو ؟ صاحبنا قلع الشارة بتاعت القاضي وسألو ؟ يامولانا المكتوب هنا ده شنو ؟ القاضي استغرب وقال ليهو : مكتوب قضاء السودان صاحبنا بدون اي تردد قال ليهو :
أنا بقترح يا مولانا تكتبو عليهو قضاء السودان وقدره
03-03-2013, 02:58 PM
خضر حسين خليل
خضر حسين خليل
تاريخ التسجيل: 12-18-2003
مجموع المشاركات: 15087
تم الكشف على البوست 1) لا توجد مواد إلحادية 2) لا توجد مواد تنصيرية 3) لا توجد مواد مسرطنة 4) لا توجد أي شوائب تعكر صفو النسيج الإجتماعي ___ ولكن تُوجد شرزمة من الشيوعيين، قد تُشرع في نشر النقاط أعلاه ؛)
03-03-2013, 03:58 PM
محمد حيدر المشرف
محمد حيدر المشرف
تاريخ التسجيل: 06-20-2007
مجموع المشاركات: 20417
والله شكلكم كلكم زي البندر مفتكرني خاشي سودانيز من بلاد برة طيب ليه ما كلمتوني انو الغنية نزلت والناس استمتعت في داعي لي جنس ده وأنا كل شويتين اشيل وانتظر بخاري ينزل الاغنية
غايتو شكلو كدة الا واحد يجي يغنيها لي فوق سريري ده ويرجع من محل ماجاء سودانيز اونلاين دي يا بندر الا بي برروكسي او الواحد يسافر بروكسل
شفتو كيف ؟
ــــــــــ المهم شكراً يا عفراء وما قصرتي والعاقبة عندكم يحظروكم كده لامين ماتعرفوا الشئ النزل في البوست أغنية ولا مديح ولا رز بي لبن
03-03-2013, 09:58 PM
منعمشوف
منعمشوف
تاريخ التسجيل: 12-08-2002
مجموع المشاركات: 1423
ياخ البندر لا طعم لا رائحة لا لون لسيرته أو ذكره في هكذا مقام الحوت .. شعبي .. وشعبي جداً يا خضر صدق صديقك يا صديقي .. أتذكرت صاحبنا بتاع القضارف قال لما يقيف زيك أو ما يصحصح بيمد يدو للتحسس لو لقى الموضوع قش معناها هو في بيتهم ولو لقاهو أسمنت معناها هو في الحراصة .. شفته كيف!! على سيرة القضارف يا خضر عندك أخبار من ناجي عبدالرازق..
تحياتي يا صديق ..
03-04-2013, 08:23 PM
خضر حسين خليل
خضر حسين خليل
تاريخ التسجيل: 12-18-2003
مجموع المشاركات: 15087
السوباوي وينك يا مان ياخ والله توحشات خليها ساي بس ناجي عبدالرازق بخير ولو ما ناس المكان ممكن يفهموني غلط علي بالأيمان كنت أكرمتك بي نكتة خادشة حبة للحياء العام وعندها علاقة بالقضارف
مشتاقين ياخ وابقي واصل
03-04-2013, 08:46 PM
بخاري عثمان الامين
بخاري عثمان الامين
تاريخ التسجيل: 10-25-2007
مجموع المشاركات: 3456
إنتوا قاعدين تتوسوا في البوست ده متين ؟ توقيت كمبالا ما معانا ولا معترف به عندي نكتة سمعتها قبيل _ ضحكت ومن فرط السعادة بكيت :( وحياة ديني ما حفظتها، والزول الحكاها لي أبى يعيدها تاني
هي خادشة للحياء التام، ولكن بالنسبة لبوست واخد شكل الحمروني _ أعتقد إنها مناسبة جداً
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة