|
شكراً تاج السر حامد
|
سلام عليكم ياعم دايرين نمشى للبنك لكين نمشى بى وين ** الحبيب الغالى ابو عبد المنعم لك التحية والامنيات الطيبة والشكر اجزله لوقفتك معى وتوصيل حروفى عبرك الى هذا الموقع الانيق يا سيدى تسلم كتير وما عدمناك وما بنقصر إنت بس ادينا خاطرك وشوفنا كان نقدر نقصّر.. تحياتى
|
|
|
|
|
|
|
|
Re: شكراً تاج السر حامد (Re: يوسف الحداد)
|
اهلا بشاعرنا الهمام يوسف الحداد الذى انتظرناه طويلا شرفت المنتدى واهلا بك الدار دارك وفى اقرب عنقريب استريح اهلا بك مرة اخرى وشرفتنا كثير ، ولك مني كل الود والتحايا يامبدع
اتبوبرى يا قمرة ضوى ونورى اتبوبرى يا طعم حالى وسكرى اتعطرى اتمخطرى وحسادك اهريهم هرى
انسى الشقا وعدم اللقا وتعب المشاوير والجرى انسى السهر وعذاب بعادى الكنتى فيه تفكرى اتا دار اطوف بيكى المدن بس انتى روقى واصبرى انادار اسافر بيك بعيد ما بين ذحل والمشترى اتبوبر *** *** يا فرحة العيدين ملامحك ساكنة جوة فى خاطرى لولاكى ما كان الشعر بقى لحن يطرب وينقرى يالانتى دايما فى غنايا وبين حروفى واسطرى ياروعة من خضرة جروفنا وكل يوم بتخدرى *** *** اتبوبر وادينى من نفس الخذاما اسكرينى واسكرى منك يفوح ريحة الدعاش يا غيمة ساعة تمطرى ما تخلى ازهار تانى تذهر اصلو قبال تذهرى طبع الندى من شوقو ديمة يقاذل العشب الطرى *** *** اتبوبر وادينى من فيض الحنين كل مالو زيدى وكترى فنان انا وغناى انا مجنون وشاعر عبقرى رياد انا وحبيب انا وبالحيل اعجبك وفنجرى اتبوبر اتبوبر يا قمرة ضوى ونورى
| |
|
|
|
|
|
|
Re: شكراً تاج السر حامد (Re: مجدي عبدالرحيم فضل)
|
حللت اهلا و نزلت سهلا اخي الشاعر الفذ الاستاذ/يوسف الحداد .. مرحبا بك وبقلمك .. والشكر اجزله للاستاذ/بكري لمنحك الباسورد وللاخ العزيز المساند الاستاذ/ تاج السر محمد حامد وفقنا الله جميعا الى كل خير ..
حافظ فتحي
| |
|
|
|
|
|
|
Re: شكراً تاج السر حامد (Re: خالد حامد الجزولي)
|
حباب شاعرنا الجميل في حوش بكري الماهل
زمن الصبا
كلمات : يوسف الحداد
طاريك يازمانى الكنت فيك صبى صغيرونى ودريفونى وزوين وهدى اشيل الليل مع الشايلنو صباحى خصوصا ان لقيتلى رقيص وحس دلوكة نص الليل تسوى التى أغنى مع البقنو بسط وبالصفيق تموت ايدى افرح من صميم وجدانى انسى شقاى انس البى يطيب خاطرى المكيسير ديمة مما قمت أتاتى جنى طاريك يازمانى الكنت فيك صبى أسوى سبح من الفيق وامل بطينتى منو هو نى واسوى فريق من الحيران سيلة ... وشد ... ومن نطاك واخر جوطة وسط الحى لا هامينا قول الناس ... ولا والله ايها شى ... ولا بنسمع شى من اماتنا غير الزين وقولة سى وعاد لو جاتنا حس دلوكة او حس طار ... وصوت مداح سايقو الليل متابط ضراعو هوى وحس طمبور نغيمو حنين يرن جوانا نسمعو زى ابو التى تى ديك الساعة تلقانا ... نطير بالفرحة طير الجن تقول بنحن ... اوكاتلانا نار القي طاريك يازمانى الكنت فيك صبى وكيف أنساك قولى كيف وكيف ياموجة التحنان وياغيم الصبا الهتان فى عز الصيف الافيك رى حليلك وياحليلى انا حليل الكان يفيضو كرم بى حتة ملاح وحريف ينومو هنا ويقومو غنا وجوهن ديمة تشلع ضي طاريك يازمانى الكنت فيك صبى صغيرونى ودريفونى وزوين وهدي لابهتم بالمعدوم ... ولابسأل على الما فى ... ولا الناقص تمامتو على أملا جيوبى بالبركاوى من ضل نخلة لى نخلة تب ... ما نا قضنى أبدا شي واى درب المسيد كت ديمة أول زول يغادر الحي وزى زولا نعيم بالحيل مصنقر فوق دحيشا لى مدغلم وعاد بطينتى ملانى نجيض نجضا عويدى قوى الا العبرة كان خانقانى وكانت باينة فى عينى ليالى القدرة حردت من بداية ايامى حجبت من عيونى الضي نجيمى رهان رهان ينشاف يغيب مرات ويظهر لى خدارى سقيتو من جدول دمع مليان وجرحى يئن ويقسى علي ماكت عارف الراجينى ولا مهتمى بالانا فيهو ولا فكرت فى الايام ولا فى البكرة بحصل لي صغيرونى وشويفعونى وزوين وهدي مسامح وراضى بالليل الله والمكتوب بينقرى يوم ولا بد انو ايها زول بيلقى نصيبو ان بقى حى
| |
|
|
|
|
|
|
Re: شكراً تاج السر حامد (Re: خالد علي)
|
التحية والتقدير لشاعرنا الفذ يوسف الحداد هذا الشاعر الهامة لك التحية وأنت بيننا فى هذا الحوش الواسع لتنثر لنا إبداعاتك التى تسرى فى العروق كسريان الدم .. أسعد القلوب التى تنبض للآخرين عبقرية الشاعر فى قلبه وقلمه .. لأن القلب يرى أكثر من العين فلك التحية شاعرنا القامة ولا افراد أسرتك الكريمة وتحيتى بلاحدود .. ومرحب بحروفك الزاهية فى هذا الحوش الكبير تاج السر
| |
|
|
|
|
|
|
Re: شكراً تاج السر حامد (Re: يوسف الحداد)
|
دحين ما ياكا ود حداد متبني البشير القائل
ما بثنينا قرار زي ده وما بنهتم وفيه نفاصل سيف العز البيه نبشر بينا وبينك ياهو الفاصل *** ليك كم سنة تتربص بينا عاقد الشينة تصر وتحاول خبت وعبت وجيت بى شيتا لاموجود فينا ولاحاصل والموضوع ما موضوع دار فور لو دار فور كان هين وساهل بس ده مخطط صهيونى مستهدفنا وحتما ذايل ** *** ماك نصيح يالما بتنسما ماك نصيح يا اوكامبو ولا ده كلام زولا عاقل يا مجنون الريح كان عصفت نحن السيل والبرق الشايل والقانون مالاك بنعرفو وعندنا ناسا فيه فطاحل يرتبو ترتيب من تانى ويوضعو ليه مواد ومداخل قرارك بلو واشرب مويتو ظنك اننا بنخاف قايل الحس كوعك وعاين حاجبك وامسك طرف الهوى لو طايل يا صهيونى مزاعمك باطلة وحكمك يا مستهتر باطل كل العالم يشهد انك اكبر مجرم ومدعى فاشل *** وبى ياسين وخواتم البقرة والايات الليها منازل وبى ط س وح م ع المنشار الطالع ونازل وباللالوب سبح الالفية والتهليل المفزع وقاتل وبالصلاح والمداح والساجدين عرقن نتاح يشيلك ريح ويختك ريح وترميك موجة على الساحل يتهد الليل كدى فوق راسك ويمطر فيك رصاص وقنابل فيك تتلمى كبار المرده وكل عفاريت الجن فى بابل يا موهوم بتقبل وين من غضب الله الجاييك نازل هاك من مرنا كب واشرب نحن عدونا بنسقى حناضل والسودان بى طولو وعرضو ارسل ليك بالجملة رسايل اكد ليك بالصوت والصورة حقيقة شعب عريق ومناضل *** اتجاوزت وفت حدودك اطاولت كمان يا جاهل على ريسنا وتاج عزتنا ورمز سيادتنا الباسل ورمز الامة بتفدى عيونا كل الناس شعوب وقبايل نحن فدا الوطن الممتد والماعون الواسع وشايل نحن فدا الوطن الشامخ والتاريخ الناصع وحافل نحن فدا الوطن المتوحد بى راي شعبو ومتكامل نحن فدا الوطن المعروف بسماتو الطيبة وناسو افاضل ونحن فدا العلم البيرفرف فى الافاق وسلامنا الشامل ونحن ونحن الشرف البازخ وعلشان عزة نموت ونقاتل ***
ولا انا غلطانفي حكاية شاعر البلاط دي
| |
|
|
|
|
|
|
|