|
|
 ٍShopping Day!! مهرجان التسوّق العالمي..
|
..
زمااان في الستينات سنة 84 كانت فكرة التسوًق قايمة على المبدأ الطبي العسكري خلييك أون كول On Call ..أمك تكورك ليك يااا ولد تعااال أمشي لي الدكان..تتابع مصدر الصوت لحدي ما تصل المطبخ وتلقى أمك قاعدة في البمبر وقداما الكانون و حلة الملاح تبقبق كما العروس المترترة لمن تسمع قسمة بي دلوكتا بتقول سنك براااقو يسوووي بق .وبق بق بق .. تمد ليك كيس نايلون مكرفس ومعفففص بدقة متناهية عشان يبقى قدر جيبك مع عبارة مكررة أوووعك توقع القروش ولا الكيس مفهوم؟؟؟ وبمناسبة الأكياس دي فانا لحدي أسة ما عارف فلسفة شنو في إنو سيد الدكان ولحدي وقت قريييب كان بيبيع ليك الكيس الح تخت فيهو الحاجات لو ما جبت معاك كيسك من البيت !!! المرسال كانت حاجات محفوظة ..بصل .. يا سكر ..يا ملح ..يا شطة ..يا عيش يا كمان زيت فهد..يااا لها من تسمية زيت فهد؟؟ أول سؤال بيتبادر لذهنك بعد ما أمك تكمل قائمة الطلبات أها يا أمي والباقي ح يكون كم؟؟ والإجابة على السؤال ده ب تحدد مدى سرعة إستجابتك لي قبول المرسال ..فلو طلع في باقي ف جري طيرااان تختف القروش والكيس وقلبك يدق وكرعينك تشيل وتتنطط بي كعوجة غريبة لممن كرعينك زااتهم يحتارو فيك ويقولوا الزول ده مالو!!! أما لو طلعت أمك مفصلة القروش قدر الطلبات تبدا الطنطنة والأعذار الواهية لا يقطعها إلا رصعة في كتفك يا ولد طيير يلا أمشي الدكان ... والمرسال عندي دايماً كان مربوط بي البشتنة وما حصل بتذكر إنو رسلوني وانا في كامل أناقتي فيا شعري منكوش..يا كرعيني مخرخرة من بقايا تراب كورة مع موية ماسورة يا وشي مغببش وجضومي مشققة .. ما بتذكر إنو كان في حاجة إسمها تشتري حاجات لي يوم بكرة ..كللو حق اليوم باليوم ..والتلاجة فقط تستخدم لي الموية الباردة والنشادر ..تلاجة عبارة عن مهرجان للباقات والحلل تتصدرها دون منازع باقة عصير روزانا وسعيد ..ومن خلال الباقة بتقدر تستنتج اخر مرة ناس بيتكم شربو عصير بتين ..فلو كانت الباقة بيضاء تسر الناظرين مع اثار ورقة تتقشر بفعل كرشة الليفة فاعلم إنو الجركانة دي دخلت الخدمة قبل يومين..ولو كانت الباقة لونا بيجي فاعلم إنو العصير ده جابوهو اخر مرة لمن اخوك كان عيان قبل شهرين! والنشادر ما كان إلا عبارة عن موية تلجبت بفعل تواجد كميية من الحلل والجكاكة الألمونيوم ..ما بتذكر شوفت لي حلة في التلاجة فيها ملاح !!! دارت الأيام والعيال كبرت واغتربت ولسة مسلسل المراسيل المكسيكي ده ما إنتهى ..
|
|
  
|
|
|
|
|
|
|
|
Re: ٍShopping Day!! مهرجان التسوّق العالمي.. (Re: عمر الفاروق)
|
. الليلة يوم الشوبينق !!!وروروووك ..ووب علينا .. عبارة مؤرقة جداً هذه ال Shopping Day !! مااا أن تسمعا إلا وقلبك يدق دقة مغايرة تماااماً لي دقة القلب بتاعت مرسال لمن كنت صغييير وبلعب بي التراب دييك الكان فيها بتطلع بي الباقي!! بتجييك خممة نفس كده غريييبة وبتبلع ريقك بدون ما تقصد وغير ما تشعر يدك تتحسس جيبك وتسراااح وشريط الذكريات يمر سريييع ويحوم حول كللل رفوف الموول الكنت فيهو الإسبوع الفات وتتطاير قائمة الأسعار شرراً في عيونك بكسورها وأعدادها الصحيحة قبل وبعد التخفيض .. شوببينق داي معناها إنك ح تجيب حاجات الشهر كلللو ..ما حاجة واحدة ولااا اجات يوم واحد أو إسبوع ..لالالا الشهر كلللو .. يلا تعالوا شوفو كميات التناقض والتضارب البتحصل في شخصيتك قدام مرتك في هذا اليوم العجيب الذي لا اعتقد أن هناك يوم أصعب منو إلا يوم الحشر الأكبر.. معظم الرجال بيكون عامل كاتيقوريز (فئات) لليوم ده ..في شوبيق داي حق الزول الشغال ومرتو ما شغالة ..وفي شوبيق داي حق الزول الشغال ومرتو شغالة لكن ما صرفت لسة ..وفي شوبيق داي حق المرتب إتأخر ..وفي شوبينق داي حق التخفيضات .. نبدا بي الأخير ده ..واللي فيهو بتكتشف المرا إنو راجلا كضاااب كبير..تقول ليهو وديني لي اسواق العثيم عشان نشتري حاجات الشهر ..يقول ليها اسواق العثيم بعييدة خلينا نمشي لي السدحان أهو ده قرييب..الشهر البعدو توووشك توديها اسواق العثيم بدلاً من السدحان والسبب بكل بساااطة إنو وقعت في يدك ورقة دعاية لتخفيضات في اسواق العثيم الكانت بعييدة ديك!!! اها في الشوبينق بتاع تأخر المرتب ده يقوم الراجل يوم كده يتأخر برة البيت وما يرجع في مواعيدو أها تقوم مرتو تضرب ليهو يقوم يرد ليها بي صوت مييت ومرررهق وبيحنن كده و يقول ليها : انا دووب طلعت من الشغل وغشيت السوق أها الناقص ليكم شنو في البيت اجيبو ليكم معاي .. اها من هول المفاجئة وعدم الترتيبات بتقوم مرتك تديك قائمة بي حاجات بسيييطة ..تجييبا ليهم وتقرررض على كده ..ويااا ووويييلا وسهر ليلا لو جاتك بعد كم يوم قالت ليك جيب لينا الحاجة الفلانية دي الدكان ..تجوووط وتتحنفففش وتستأسد عليها وبكل ثقة ترد ليها: يا خ انا أووول امباااارح دي مش سألتك في التلفون الناقص شنو أجيبو معاي؟؟؟ ليي ما قلتي لي؟؟ كممم مرة انا قلت ليك قولي لي حاجاتكم كلها عشان ما ارجع اكتر من مرة ؟؟ خلاااص خليها تاني إلا الشهر الجاي إن شاء الله اجيبا ليكم بس قولي لي من بدري. اها وفي شوبينق داي بيكون من نوع المرا مشغولة بي حاجات البيت من نضافة ومسح وغسيل تقوم فجأة كده تجي خاشي ليها بي وش صاااري وبي نهرة كده تقول ليها أكتبو لي الحاجات العايزنها من برة شنو انا طالع مشوار وفي الرجعة بغشى السوق اجيبا ليكم ..وميزة النوع ده من الشوبينق إنوا لمرا كل ما تتذكر ليها حاجة في راسا وتقول تكتبا يقوم الشيطان يذكرا بي نبرة صوتك وخلقتك لمن قلت ليها اكتبي الورقة فتقوم تلعن ابليس وتطرد فكرة كتابة الحاجة في الورقة لتحصل في النهاية على ورقة مكوناتها جيب لينا معاك مرقة وصلصة وملح وبطاطس وشوية بصل وليمون إضافة لي علبة لبن بودرة وتكب ليك جمبها بين قوسين لو أمكن .. أما الشوبينق مع المرا الما شغالة فده أوووو اخطططر أنواع الشوبينق ..والعجب لو كانت من النسوان القاهرات البتلقاها لااابسة وجااهزة وتجي تصحيك من النوم تقول ليك يلا أرحكاكا الشوبينق !!وتجيك طااابة ليها ورقة في يدها أو في الحقيقة كراس عديييل .. في العربية راسك يودي ويجيب ..يا ربي الورقة دي كاتبة فيها شنو؟؟؟ بالله مننن تخشوا لمول تجر ليها أكبببر عربية ..لممن الدم في عروقك يقررب يقيف..ودخلتكم كده تقول ليك : خلينا نبدا من أوول المول ونخش صف صف عشان ما نتجهجه في الحاجات نفطها !! وعينك تاني ما تشوف إلا النور ..تبدا ليك بي رف ورق المطبخ..ظييطك ظييطك نززل..تخش ليك على رفوف الصابون وررر وررر تنزززل وانت تقول ليها الصابون ده ما ريحتو ما حلوة وهي تشييل وتنزل..وهي تمشي قدامك وانت لااازي العربية تخش بيك لي رف الكريمات والشامبوهات ..إنت جواك تقول لأ لأ لأ إن شاء الله ما تشوف كريم دو فده ..يا الله ما تلاحظ لي الشامبو ده ..وغالباً بتقوم بدون ما تشعر تلللز العربية سرييع في الرف ده وتحاول تختفي من مرتك وتخش في رفوف الشعيرية والمكرونة وتكورك ليها بي صوت حنييين كده ..تعااالي عليك الله شوفي الشعيرية دي عاملين فيها تخفيض رايك فيها شنو ؟؟؟ أما لو جات جمب الرف بتاع الأطفال من بابمرز وحليب فطوالي تضرب ليها في وتر إنو الولد ده كبر والحليب البودرة حق الاطفال ده ما صحي وإنك قريت في تقرير علمي إنو بيأدي لي قلة نمو عقل الطفل إضافة لي إنو البامبرز بيظللط الطفل وضار بي صحتو .. النوع ده من الشوبينق شبيه لي حلقات توم وجيري..المرا تخش بي الرفوف الحمانة البيكون فيها أقل منتج يعادل جغلومية جنيه وإنت تتحاوم في الرفوف بتاعت العدس والفاصوليا .. اغرب ما في هذا النوع من الشوبينق إنو لمن تطلعوا من التسووق ده والعربية مليااانة بي الحاجاتح تكتشف إنوا لكان مكتوب في الورقة الكاتباها مرتك حاجة واللي ختتو في العربية حاجات تانية ما عندها أييي علاقة .. النوع الأخير وهو الأروع والأجمل والأكمممل هو التسووق مع المرأة العاملة !!! يا خده تسووق بيكون فيهو الأعصاب هادئة بشااااكل....براااك تشييل وتوصف ليها شيلي من داااك ..عايني الكريم ده شكلو جديد شيلي منو ..إنتي الجداد واللحمة المفرومة مش خلصوا في البيت؟؟ شيلي إتنين.. اللبن ده كويس خلينا نشيل منو تلاتة علب ....شاي ليبتون معاهو هدية طقم شيلي ليك خمسة علب نكمل بيها الطقم .. اصحابي بكرة عازمهم غدا فكري لينا في تحلية وشيلي الحاجات معاك عليك الله..
| |
|
|
|
|
|
|
|
|
|
Re: ٍShopping Day!! مهرجان التسوّق العالمي.. (Re: عمر الفاروق)
|
حمدالله على السلامة يا عمّك
مسألة التسوّق مع الوليّة حكاية صعبة خلاص
في البداية انجبرناعليها فل تايم, شوية شوية بقت الكنتة انا اودي الأولاد يلعبو وهي تكمّل اللفّة بي راحتها و تضرب ليك تلفون جمب العربية
اها الراحة الجد متين, يوم نجحت في امتحان رخصة السواقة:) التسّوق علاقتنا معاه بقت تضرب ليك تلفون تعال نازل شيل الحاجات
دي طبعا يا ناس السعودية ولا تحلموا بيها
| |
|
|
|
|
|
|
|
|
|
Re: ٍShopping Day!! مهرجان التسوّق العالمي.. (Re: دينا خالد)
|
عمر الفاروق... البركة فيكم في محمود عبدالعزيز... والله انت من الناس الكنا عايزين نعزّيهم شخصياً...
| Quote: دي طبعا يا ناس السعودية ولا تحلموا بيها |
ودالبشري ... في داعي للمطاعنة حسي!!
انا كرهتي في الدنيا السوق، ولما اكون محتاجه ملابس او شي، بقعد أسوّف لما اضطر شديد ... وبمشي محل واحد وبطلع طوالي.. نادر كان بحكي في الكلام ده لجارنا المرته جنّها سوق... قام جارنا قال ليهو، لقيتها وين دي!
سؤال.. دينا خالد دي بتكتب من منازلهم مالها!؟
| |
|
|
|
|
|
|
|
|
|
Re: ٍShopping Day!! مهرجان التسوّق العالمي.. (Re: مريم بنت الحسين)
|
سلام يا فاروق
| Quote: وتكب ليك جمبها بين قوسين لو أمكن |
وطبعا دي بتكون أغلى حاجة دائما
ياخ كلمة (لو أمكن ) دي بتكسر عزيمتي عديل مهما اتحمشن وخصوصا قدام الشفع لأنها بتتقال في شكل وردة
لأنك لو قلت ما ممكن تتفسر إنك ما بتحبها
أو زول مفلس
وفي الحالتين انت الضائع 
| |
|
|
|
|
|
|
|
|
|
Re: ٍShopping Day!! مهرجان التسوّق العالمي.. (Re: عمر الفاروق)
|
الزولة الراقية بت الحسين مريومة :
| Quote: عمر الفاروق... البركة فيكم في محمود عبدالعزيز... والله انت من الناس الكنا عايزين نعزّيهم شخصياً... |
وبما إني على قناعة تامة إنو محمود ده حقنا كلللنا انا وإنتي وداك وديك فالعزاء لكل الناس في الفقد الجلل والما غالي على ربنا ..ربي يرحمو
وزي ما بيقول محمود نفسو في واحدة من أغنياته ..لما الجرح يلمس حدود الإحتمال..
جرح محمود لمس حدود الإحتمال يا مريم ..
| Quote: وبمشي محل واحد وبطلع طوالي.. |
هوووووي !!!!
ياخ ما عندك أخت صغيرة ؟
| |
|
|
|
|
|
|
|
|
|
Re: ٍShopping Day!! مهرجان التسوّق العالمي.. (Re: عمر الفاروق)
|
آيه رأيك يا عمر - انا من الناس البحبو التسوق شديد جدا ،،
بحب اشترى ،،، اشتري ،،، اشتري
عندي ادمان !
بس الحمد لله - لقيت الحل باني ما امشي السوق اساسا !
احب الالكترنيات جدا جدا ،،، أي تكنلوجيا جديدة
------------------------------------
زمااان الوالدة الله يديها الصحة والعافية لما ترسلني لي رز والا عدس ؛ بقول ليها ،،،، الابيض والا ،،،،، الاحمر ؟!!!
| |
|
|
|
|
|
|
|
|
|
Re: ٍShopping Day!! مهرجان التسوّق العالمي.. (Re: عمر الفاروق)
|
عمر الفاروق، حكاية يضربوا لي من السوق يداهموني ب( عاوزين شنو؟) دي بتحصل كتير. لكن أختكم حريفة، لستتي جاهزة طواااالي. لأني بعاني من ألزهايمر، الحجات بكتبها اول بأول.
نحرش مريوم علي أخونا نادر.....
اجي يا مريوم؟؟؟؟ كيف يعني تدخلي السوق و تمرقي طوالي؟؟ السوق اهم شيء فيه الحوامة!!! بالجد. الحوامة طبعا فلسفتها ( عندي) فلسفة محددة. أنا بتحاوم في السوق عشان الأفكار. حتي السوبر ماركت، بعد ما اشتري حجات الأسبوع ( او الشهر) بقعد احوم أشوف الجديد شنو. مثلا قبل كم أسبوع بعد ما شلتى حاجاتي كلها اتحاومتا شوية لقيت ناس جبنة فيلادلفيا طلعوا جبنة جديدة في علبة، الجبنة مطعمة ببهارات و أعشاب عشان تنجضي الدجاج علي خفيف بعد داك تضيفي الجبنة و ينطبخوا مع بعض شوية و يكون عندك دجاج بصوص خرافي. تغيير ظريف جدا و أكلة سريعة. شلتا نوعين من الجبنة و جربتهم، ناس البيت كانوا ح يأكلوا الصحون ذاتها. مرة حايمة ساي كده لقيت 10 أنواع صوص بتاعة هنود جاااهزة. تنجطي الدجاج او اللحمة او الخضار او السمك و تبقي عندك آكلات الهنود اللي فيها مليون حاجه ديك ناس تكا مسالا و كده.
أما المولات فالحوامة فيها برضو بتديك أفكار للهدوم و تعرفي الموضة الحاصل فيها شنو.
انا مثلا بكره عفش ايكيا. لكن بمشي عشان اتفرج في غرف العرض و أشوف حبة أفكار. ممكن اقضي 3 ساعات حايمة سااااي في ايكيا.
حومي يا مريوم يا أخي في السوق.
----------------
معليش يا نادر :)
| |
|
|
|
|
|
|
|
|
|
Re: ٍShopping Day!! مهرجان التسوّق العالمي.. (Re: smart_ana2001)
|
إسمارت يا إنتي..
الحي بيك ..
عارفة مهما كانت اللستة الجاهزة فنحن كمان ردنا بيكون جاهز من شاكلة سقط سهواً وما ركزت في التلفون ومرق من بااالي ..
بالنسبة لي إيكيا فياخ انا جننني وجن الشرا من الحتة البيشترو منها كل الناس حتتى لو كانت غالية وراقية مالم اكون مضطر ..
يعني جني وجن زول يجيك ويعرف إنو حاجتك دي إشتريتا من الحتة الفلانية ويقول ليك اااي والله البتاعة دي شوفنها في إيكيا .. :) :)
تخريمة :
بالنسبة لي الجداد اللي هو الدجاج نديك رقم الفاكس ترسلي لينا سامبل ؟
| |
|
|
|
|
|
|
| |
عمر الفاروق
محمد البشرى الخضر
Maawya Hussein
عبد الله فقير
عمران حسن صالح
دينا خالد
مريم بنت الحسين
حمد عبد الغفار عمر
أيمن محمود
khaleel
smart_ana2001
فيس بوك
تويتر
انستقرام
يوتيوب
بنتيريست