|
|
 Re: خضر ، حافظ ( حسين ) ... اليكم الاتي :- (Re: خضر حسين خليل)
|
Quote: عندي صور من الديم
الشبكة سيئة هسي أدينا بس
حبة زمن يا صاح |
هات يا زمن ..
صور بس ؟؟
ما عندك حبة من ناسه
شوارعه
ترابه
وذكرياتي الهناك ....
بيتنا واخواتي
الشباب واخواني ...
الديم يا خضر عالم غير مختلف مختلف ...
عن الديم .... بقيت أخاف من أحلامي
لا شك أن مدرسة الديوم الحكومية تظل – مرحلة – فارقة في مسيرة كل من درس بها وقد بنيت المدرسة في ( ترب) بلاع ضمن منشآت أخري منها مسجد العجيمي ومركز شباب السجانة الذي امتلك واحد من أقوي فرق الكرة الطائرة بالسودان وبه أفضل الفنانين والعازفين ، ما زلت حائراً في سر تسمية الديامة لمدافن ( بلاع ) بالترب عكس مدافن فاروق الكائنة في الجزء الشمالي الشرقي للديوم الشرقية بـ ( مقابر ) فاروق ؟ عند بناء المدرسة وجدت هياكل عظمية وتم تحويلها لفاروق ، عموماً المدرسة كانت نموذجية وتحصل علي الدرجة الاولي في امتحانات ولاية الخرطوم ولا غرو فنظامها كان صارماً جداً وكل طاقم تعليمها من خارج الخرطوم ما عدا استاذين : حاتم بكري من حي التعائشة يدرس اللغة الانجليزية ، عادل بك وايضاً من حي التعائشة ويدرس اللغة العربية ( ديامة تخصص لغات عشان كده ما تندهش انه الرندوك لغة الشارع مصدرها الديم ) ، صرامة نظام المدرسة تجلت في عدة مظاهر فجدولها قاسي جدا ندخلها باكراً وطابور النظافة يومياً حتي انهم يراجعون منديل الجيب ونبدء الحصص عند السابعة صباحاً ، فسحة الفطور والخروج غير مسموح به ، ينتهي اليوم الصباحي عند الثانية بعد الظهر ويبدء اليوم المسائي عند الرابعة عصراً وينتهي عند التاسعة مساء ، اذا ساعتين فقط لتناول الغداء بالمنزل واستقطاع زمن للراحة ، وهذا البرنامج ينفذ بحذافيره وكان لاحد المعلمين جملة ثابتة يكررها يوميا بدون كلل او نسيان وكأنما يحصل مقابلها علي مرتبه وكانت الجملة ( شوفوا يا ديامة نحن جابونا هنا نأدبكم موش نقريكم ) وكنا نشتهي ونشتاق يوم الخميس والجمعة فالخميس ليس فيه يوم مسائي فقط توصيات الاساتذة بضرورة استغلال عطلة نهاية الاسبوع في التحصيل وصايا لا تستقر في امخاخنا المتعبة دقيقة زمن فالخميس للسينما والجمعة قسمة البيبسي في ميدان الساحة الشعبية وما يتوفر من زمن ندخره لمغامرات مع حبيبات صغيرات في السن أن غابت عين الرقيب ، ايضاً كنا صغار في السن ولكن بداية مراهقتنا فقد درست الديوم بين الاعوام 84 – 86 وتلك من فترة مميزة في تاريخ السودان الحديث فقد دخلت للمدرسة بعد عام من تحكيم قوانين سبتمبر المشينة والتي اعدم بموجبها الاستاذ المفكر محمود محمد طه وشهدنا انتفاضة ابريل ونحن طلاب بالمدرسة ، كما عملنا بحملة الاستاذ محمد ابراهيم نقد المرشح عن الحزب الشيوعي السوداني للدائرة 22 والتي ضمت الديوم الشرقية والعمارات وقد فاز بمقعدها وهتفنا: الديم الديم شيوعيين ، نعود لصرامة نظام المدرسة فقد منع منعاً باتاً الخروج من المدرسة اثناء ساعات الدراسة الا بأذن مكتوب وكنت أحمل اذن للخروج ، للطالب خيارين بالنسبة للفطور : أما ان يكون قد احضره معه أو يتوجه للبوفيه ومعظم الطلاب أن لم يكن كلهم يفضلون البوفيه وكنا ننادي صاحبه بأسم آدم ولم يكن هذا اسمه وغضب في بادي الامر وكبس دين ولكنه تعود علي الاسم فقد اصررنا علي مناداته به ، أنا لم اكن احضر افطاراً ولا اشتري من البوفيه فاذن الخروج الذي معي كان حقيقة لاحضار فطور استاذ حاتم بكري من والدته حاجة الشول وما ان ادفر باب المنزل وانا في عجلة من الامر لان الفسحة زمنها ضيق تناديني ( جيت يا عشاي تعال اكل لك حاجة سريع وشيل فطور اخوك ) وتقدر تقول كنت مدللاً فكثيرا ما يكون الاكل وجبة غير الفول وفتة الفول .
كانت أيامي بالمتوسطة نسخة مكررة فاخرج صباحاً قبال زملائي بعشرة دقائق لتلبية مشاوير عم الزين وهو مرسال واحد ( يلا جري دكان عمك التوم علبة سجائر ناشيونال والباقي ليك انت ، سريع قبل بوخ القهوة دي يروح ) ومرات مع علبة الناشيونال حجار بطارية للراديو الذي لا يصمت البتة .. انتهي من مرسال عم الزين يخرج من هم دفعتي ونترافق للمدرسة ومشوار الفطور والرجعة بتاعت الليل والنوم وهكذا وفي تكرار الاحداث مازال يدهشني امر واحد وهو الاستاذ عبد الرحيم معلم مادة الرياضيات فالرجل يكرهني بدون سبب اعلمه وتظل يجد سبباً كل يوم واعني كل يوم لابراحي جلداً ولقبني لاحقاً بــــ ( التعيس ) ولقبه لم يمشي فاسمي اصلا صعب ويختصره اصدقائي فبخاري تتحول الي : باخ ، بوخ ، بخة وهكذا كما أن لقب ( العب ) سار معي منذ طفولتي ،، عموما احرزت درجة عالية في الامتحانات الي الثانوي والرجل يكرهني وما علينا ، هكذا مرت سنوات دراستي بمدرسة الديوم الحكومية بنين القائمة بترع بلاع الا ان هناك حدث اعتبره الاهم في مسيرتنا بالمدرسة وقد شكل جزء من وعينا لاحقاً فقد كان الطعام المقدم من بوفيه المدرسة ردئ وسعره غالي ولا يتناسب اطلاقاً معه وهكذا اشتكي الطلاب ، ذهبنا لمفاوضة آدم صاحب البوفيه وردعنا بجملة سخيفة : ( العايز يشيل والما عايز يقع البحر ) استعنا باحد المعلمين ولكن مرت الايام دون جدوي وبما اننا كنا نعيش اجواء الديمقراطية والمطالبة بالحقوق وسمعنا عن قاسم أمين والشفيع أحمد الشيخ في دور التحالف الديمقراطي فقد جلسنا نناقش أمر آدم وفي جلسة سريعة حسمنا الأمر وأصدرنا القرار : بكرة مافي زول يشتري من البوفيه، واثناء مداولة القرار وكيفية تنفيذه برز السؤال : الضمان شنو المسألة تنجح ؟ نتقسم سريع علي الفصول ومافي خوف من التوالت ، الخوف بجئ من البرلم بتاعين اولي خلاص بخاري عليك طلبة سنة اولي ، ود الحاج عليك طلبة ناس تانية والباقين كل زول يكلم طلبة تالتة وكانت المدرسة من نهرين عمر وابو بكر ، وقفت في سنة اولي ( اسمعوني يا شباب : فطور آدم دا غالي وكعب وعشان نظبط الموضوع بكرة مافي زول يهوب ناحية البوفيه جيبوا فطوركم معاكم أو صوموا بكرة من الفطور والكلام دا سر ، والبوصل الكلام دا لاي استاذ المدرسة كلها ح تقاطعوا وتاني سلام ساي تاني ما بسلموا عليهو والا يشوف ليهو مدرسة تانية ) وهكذا اوصلنا رسالة المقاطعة لكل الطلاب بالمدرسة ، لم انم ليلتها وجاء صباح اليوم التاني وقرع الجرس لفسحة الفطور ولم يكن خوفنا له اي اساس ، خمسة دقائق مرت والبوفيه خالي ونحن نراقب ومرت عشرة دقائق ولا طالب واحد طلع من فصله ، جن جنون آدم وهرول اتجاه مكاتب المعلمين وانتقلت موجة الجن من آدم الي المعلمين – وعلمنا ان افطار المعلمين مجاني من البوفيه مقابل الايجار ، وآدم بعصر علينا نحن المساكين ويظبط صينية المعلمين التي لم يجلس اليها استاذ حاتم بكري نهائياً – وحضر معلم ثم آخر وانتشروا علي الفصول يسألون سؤال واحد ( ما مشيتوا الفطور ليه ؟ ) ولا احد يجيب ، اختاروا عدد من الطلاب كنت من بينهم واستدعونا الي المكتب كنا عشرة طلاب تقريباً معظمنا من الصف الثالث ، سألني احد الاساتذة بعيون متوعدة : يا بخاري أنت اصلاً ما بتفطر في المدرسة وبتجيب فطور استاذ حاتم ، الليلة المقعدك في المدرسة شنو ؟ وكنت اتكلمت مع حاتم قبل يوم أنني لن استطيع احضار الافطار له قال لي كويس ولم يسألني من سبب ، ولم أجب علي سؤال الاستاذ عن سر وجودي .
كان الامر مكشوفاً واثناء ذهابنا الي المكتب اتفقنا علي طرح الأمر بوضوح في طاولة المفاوضات وان تعرضنا لاي ضرب نتوجه بشكوي لوزارة التربية والتعليم ، سألنا الاساتذة ، اجبنا بوضوح ( آدم قال العايز يشيل والما عايز يقع البحر وكلمنا استاذ وما اشتغل بينا وهسه يا الطرادة بدل ساندوتش تجيب اتنين يا كمان ما دايرين ) بدينا من سقف عالي جدا ووصلنا في نهاية الأمر الي حل مرضي لجميع الاطراف وامر لا انساه مهما حييت فقد ربت احد المعلمين خلسة علي كتفي وعلمت لاحقاً انه ضمن رابطة المعلمين الاشتراكيين ، وكانت اولي معاركي النقابية وخرجت فيها منتصراً وكم كنت متشوقاً ان اعود واحكي بطولتي في الحلة وساهرت مع اصدقائي نحلل المعركة ونخطط لمطالب قادمة ونمت متأخراً بعض الشئ ورأيت حلما مزعجاً ( انني عند وصولي للحلة عشان اشيل فطور استاذ حاتم لقيت صيوان وسألت عن سر الصيوان فعلمت أن عم الزين قد توفي ) صحيت نص الليل منزعج جدا فعم الزين يحبني ويميزني دون اقراني وانتظرت الصباح وخرجت قبل زمني وسرعان ما فتح عم الزين باب بيته ورأني : مالك صاحي بدري كده مضرب علي باقي علبة السجائر ؟ تعال يلا جري امشي دكان عمك التوم جيب علبة سجائر ناشيونال وشيل الباقي ...
فرحت جدا وجلبت علبة السجائر وذهبت للمدرسة وعدت في فسحة الفطور عشان افطر واشيل فطور استاذ حاتم بكري ولكنني رأيت صيوان ينتصب في نص الحلة وسألت زول قاعد قدام دكان كمبال في شارع الصحافة زلط : اسمع الصيوان دا شنو ؟ قال لي البركة فيكم عم الزين اتوفي ..
حيلي برد وقعدت بطولي في الواطة وسندني الرجل وقال لي : جاته ذبحة وقبل ما يصله مركز صحي المايقوما اتوفي .. ثم حكي لي ابنه منعم انه كان كويس وحتي علبة السجائر بتاعته اهندي شرب منها سجارة واحدة لكن جاته ذبحة وكنا عايزين نصل دكتور سيف الدين صالح في مركز المايقوما لكن الحمد لله اسلم الروح ، عم الزين اسلم روحه لله وانا اسلمت روحي لحزن ما ظننه يبارحني طيلة حياتي ، لك الرحمة عم الزين والي جنات الخلد وانا بقيت اخاف من احلامي .
|
|
 
|
|
|
|
|
| العنوان |
الكاتب |
Date |
| خضر ، حافظ ( حسين ) ... اليكم الاتي :- | بخاري عثمان الامين | 10-04-12, 07:19 AM |
| Re: خضر ، حافظ ( حسين ) ... اليكم الاتي :- | بخاري عثمان الامين | 10-04-12, 07:36 AM |
| Re: خضر ، حافظ ( حسين ) ... اليكم الاتي :- | بخاري عثمان الامين | 10-04-12, 07:44 AM |
| Re: خضر ، حافظ ( حسين ) ... اليكم الاتي :- | بخاري عثمان الامين | 10-04-12, 07:51 AM |
| Re: خضر ، حافظ ( حسين ) ... اليكم الاتي :- | خضر حسين خليل | 10-04-12, 11:00 AM |
| Re: خضر ، حافظ ( حسين ) ... اليكم الاتي :- | خضر حسين خليل | 10-04-12, 11:04 AM |
| Re: خضر ، حافظ ( حسين ) ... اليكم الاتي :- | بخاري عثمان الامين | 10-04-12, 12:48 PM |
| Re: خضر ، حافظ ( حسين ) ... اليكم الاتي :- | بشير أحمد | 10-04-12, 01:39 PM |
| Re: خضر ، حافظ ( حسين ) ... اليكم الاتي :- | بخاري عثمان الامين | 10-04-12, 02:05 PM |
| Re: خضر ، حافظ ( حسين ) ... اليكم الاتي :- | بخاري عثمان الامين | 10-04-12, 02:17 PM |
| Re: خضر ، حافظ ( حسين ) ... اليكم الاتي :- | Siham Elmugammar | 10-04-12, 06:32 PM |
| Re: خضر ، حافظ ( حسين ) ... اليكم الاتي :- | بخاري عثمان الامين | 10-05-12, 04:34 AM |
| Re: خضر ، حافظ ( حسين ) ... اليكم الاتي :- | بخاري عثمان الامين | 10-05-12, 04:39 AM |
| Re: خضر ، حافظ ( حسين ) ... اليكم الاتي :- | بخاري عثمان الامين | 10-05-12, 05:09 AM |
| Re: خضر ، حافظ ( حسين ) ... اليكم الاتي :- | بخاري عثمان الامين | 10-05-12, 04:08 PM |
| Re: خضر ، حافظ ( حسين ) ... اليكم الاتي :- | خضر حسين خليل | 10-05-12, 09:04 PM |
| Re: خضر ، حافظ ( حسين ) ... اليكم الاتي :- | بخاري عثمان الامين | 10-06-12, 03:41 AM |
| Re: خضر ، حافظ ( حسين ) ... اليكم الاتي :- | بخاري عثمان الامين | 10-06-12, 03:44 AM |
| Re: خضر ، حافظ ( حسين ) ... اليكم الاتي :- | بخاري عثمان الامين | 10-06-12, 03:48 AM |
| Re: خضر ، حافظ ( حسين ) ... اليكم الاتي :- | بخاري عثمان الامين | 10-06-12, 07:48 AM |
| Re: خضر ، حافظ ( حسين ) ... اليكم الاتي :- | خضر حسين خليل | 10-06-12, 10:59 AM |
|
| |
بخاري عثمان الامين
فيس بوك
تويتر
انستقرام
يوتيوب
بنتيريست