(صوت الفنان وروعة الموسيقى وجمال الرقص فى الفيديو ألأول بالبوست لايقل روعة وجمال عن اى مشهد غنائى شاهدناه بالفضائيات العالمية )
و كدت ان اقول ينصر دينك يا احمد..! دائما اقول.. حاجات اهلنا اجمل حينما تكون على طبيعتها..و هذه الفرقة.. ناوى احدث عنها حكومة السودان ..وزارة الثقافة عدييل يا احمد حتى ترعاها..و تديها فرصة تمرق للمهرجانات العالمية..! و كما تعلم يا صديقي حاجات اهلنا هناك دايما جماعية.. تضامن بصورة حميمة للغاية..و نفس الفيديو استغرقتني فيه الفكرة.. فالرقص في ثقافات جبال نوبة.. هو دايما عبارة عن حوار وجودي تستخدم فيه لغة الجسد و توظف بصورة مدهشة جدا..هل تذكر اهازيج الرعاة و هم يصطادون طائر القطا أو طائر الحلف في جنوب كردفان؟..شفت الحوار في الفيديو..يذهب في نفس المعاني..و بصورة اعمق..و معاني اخرى كثيرة للغاية..!!!
هنا واحدة من حفلات نفس الفرقة في زمن سابق..الألوان اوضح.. المزيكا اوضح .. الرقص اوضح..! الأداء لا يتقيد بالبرتكولات..و لو دققت النظر ح تلقى كل الأعمار/ الأجناس بترقص زي الترتيب ( اطفال اتاث و ذكور.. شباب اناث و ذكور..شيب ..و الزول البعيو ده كوم براهو) شفتا البهجة دي كيف؟.. صوت البيز.. في الأصل تستخدم فيهو البرمة (زي مازمان الجماعة بيعملوا حفلة جالوة و بيقوموا يختوا المسجل في برمة عشان صوتو يعلا و يكون نضيف..!!)..! الباركشن.. اصلا بيكون بخسة مليانة حجار صغيرة..! ولو دققت في الكستيوم.. ح تلاقي البنات الشابات و الأولاد الصبيان لابسين رحاطة.. أي و الله يا احمد الرحط الواحد ده.. شفتا التصالح ده كيف؟ ( الله يقطع طاري ثقافة الجندر الماجيبه خبر لمثل هذا الجمال..!!!)..! و الآلة الــBasic .. هي الربابة..و مضبوطة بصورة حنينة خلاص..!!!
و اضعف الإيمان يا صديقي ان نزكي هذه الفرقة الجميلة و اهلها رجالا و نساءا.. لتكون في المهرجانات العالمية..لو الحكاية ابداع حقيقي اصيل.. الفرقة دي مافيها كلام..و لو الحكاية واسطة.. اهو ح تغطس زي ما نحن نغطس..!!!
و لو الزمن سمح.. ح نرفق مواد اخرى.. كمبلا.. كرنق.. بخسة..! التحية لإنسان جبال النوبة اينما كان..كيفما كان.. و التحية لكل من يتفاعل مع هذا الجمال.. كبر
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة