|
|
 أغنيات ســـــــــــــــــــــــــــــــــــــــــــــــــــــــــمراء
|
قالت زوجتي : ياخ ما تعمل ليك قناة تتكلم فيها ، انت كلامك كتير أخير ليك تعمل قناة والله ، واتكلم فيها زي ما داير .. أعمل زي حسين خوجلي دا ، شوفو مش عمل ليهو قناة وبقى يتكلم فيها بي راحتو .. اعمل ليك قناة واتحكّر فيها زي ما داير ..
قلت لها : ياخ أنا كلامي ما كتير ، بس إنتي دايما خاتاني في موقع الاتهام .
قالت : لا حولا ، ياخ والله إنت بتتكلم قدر أي زول تاني عشرة مرات ، الأولاد هاريهم بالكلام ، والضيوف هاريهم بالكلام ، وكان لقيت الجيران في الشارع تقيف تتكلم بالساعات ، والناس البتشتري منهم الله قال بي قولهم ، وجنّك كلام ..
قلت : يمكن إنتي بتقارني كلامي بي صمتك وعشان كده شايفاني بتكلم كتير .
قالت : لا والله ، بس إنت مغطي على أي كلام أنا ممكن أقولو ، وبزيادة كمان ، ولو كنا الاتنين بنتكلم والله الجيران يرحلوا من هنا ، إلا نقعد برانا ..
وأنا أقلّب القنوات السودانية هذا الصباح وقع ريموتي على قناة أم درمان ، وعلى برنامج تكرره وتعيده قناة أم درمان كثيرا ، هو برنامج أغنيات سمراء ، ويبدو أنه نسخة أو نسختين على الأكثر . شاهدت اليوم الجزء الأخير من البرنامج الذي تقدمه مذيعة اسمها داليا الطاهر ، مظهرها طيب ، وتقديمها جيد ... استمعت لأغنية عبد المنعم حسيب ( عيونك ) ، ثم أغنية محمد وردي ( من غير ميعاد ) وتذكرت ما فاتني الاستماع إليه من البرنامج لأنني شاهدته عدة مرات .. والأغنيات التي يتضمنها البرنامج رائعة رغم التكرار ولا أجد أني أملها .. ولو حانت فرصة أخرى لمشاهدة البرنامج لاهتبلتها .. وطبعا بعض الأغاني مسجلة ضمن برامج مختلفة ويظهر بها المذيع حسين خوجلي صاحب القناة ... وتجده يستمع ويتابع باهتمام وطرب .. وحسين يجيد الكلام ويحسّنه ويجمّله أيما تجميل ، ويصطحب معه كمّا هائلا من المعلومات ، ومقدرة كبيرة على التحليل ... لكن زوجتي تقول عني : انت برضك هنا زي حسين خوجلي تهتز لكل الغناء وتطرب ، وكل الغناء عندك جميل ورائع ..
فكرة إنشاء قناة تلفزيونية فكرة رائعة لكنني لن أفعلها ، وذلك لأنني ببساطة لا أستطيع ، ولا أقدر ... وليس هذا جزءا من أهتمامي ولا تخصصي .. ولست صديقا لحسين خوجلي ، ولا يعرفني حسين بالرغم من أني أعرفه .. مش مبارك بشير قال بريدك قبل ما أعرفك ؟
الكلام نوع من البشاشة . والانس الجميل يبقى في ذاكرة الأصدقاء ، وأنا أعشق الحكاية ، ويطربني الغناء ، وأفضله عندي غناء السودانيين ..
لكن أن يحصي الآخر كلامك ، ويقارنه بكلام المتكلمين ، فهذا أمر دفعني إلى الكتابة هذا الصباح ...
|
|
  
|
|
|
|
|
| العنوان |
الكاتب |
Date |
| أغنيات ســـــــــــــــــــــــــــــــــــــــــــــــــــــــــمراء | ودقاسم | 12-23-12, 12:04 PM |
| Re: أغنيات ســـــــــــــــــــــــــــــــــــــــــــــــــــــــــم | عبد الباقي الجيلي | 12-23-12, 12:39 PM |
| Re: أغنيات ســـــــــــــــــــــــــــــــــــــــــــــــــــــــــم | ودقاسم | 12-24-12, 05:45 PM |
| Re: أغنيات ســـــــــــــــــــــــــــــــــــــــــــــــــــــــــم | عبدالمنعم العوض | 12-23-12, 12:45 PM |
| Re: أغنيات ســـــــــــــــــــــــــــــــــــــــــــــــــــــــــم | عبدالله ود البوش | 12-23-12, 01:15 PM |
| Re: أغنيات ســـــــــــــــــــــــــــــــــــــــــــــــــــــــــم | عبدالله ود البوش | 12-23-12, 01:25 PM |
| Re: أغنيات ســـــــــــــــــــــــــــــــــــــــــــــــــــــــــم | ياسر السر | 12-23-12, 02:51 PM |
| Re: أغنيات ســـــــــــــــــــــــــــــــــــــــــــــــــــــــــم | Muna Khugali | 12-24-12, 05:59 PM |
| Re: أغنيات ســـــــــــــــــــــــــــــــــــــــــــــــــــــــــم | ودقاسم | 12-25-12, 06:57 PM |
| Re: أغنيات ســـــــــــــــــــــــــــــــــــــــــــــــــــــــــم | ودقاسم | 12-25-12, 06:49 PM |
| Re: أغنيات ســـــــــــــــــــــــــــــــــــــــــــــــــــــــــم | ودقاسم | 12-25-12, 06:43 PM |
| Re: أغنيات ســـــــــــــــــــــــــــــــــــــــــــــــــــــــــم | ودقاسم | 12-24-12, 06:29 PM |
| Re: أغنيات ســـــــــــــــــــــــــــــــــــــــــــــــــــــــــم | ودقاسم | 12-24-12, 06:15 PM |
| Re: أغنيات ســـــــــــــــــــــــــــــــــــــــــــــــــــــــــم | عاطف عمر | 12-24-12, 06:16 PM |
| Re: أغنيات ســـــــــــــــــــــــــــــــــــــــــــــــــــــــــم | ودقاسم | 12-25-12, 07:09 PM |
|
| |
ودقاسم
فيس بوك
تويتر
انستقرام
يوتيوب
بنتيريست