|
%%% دى براها فايـــــــــدة ( حكاوى طربفة من حلتنا ) %%%
|
لقريتى التكينة كأغلب قرى الجزيرة ظرفاء تنسكب الطرفة من السنتهم وليدة اللحظة بلا تكلف او تصنع كمن يدعون انهم ملوك الفكاهة . كان مولانا المرحوم الشيخ محمد حامد التكينة مندمجا فى ( الدرس ) و الدرس حصة تفسير رمضانية لمعانى القران الكريم يؤمها معظم اهل القرية .. بدأ مولانا يشرح ( من اوتى كتابه بيمينه فهو فى عيشة راضية ) و الشرح طبعا بالعامية .. قال عليه رحمة الله : يا جماعة.. يوم القيامة كُتب اعمالنا بتجى نازلة .. السعيد بنزل ليهو كتابه فى كتفه اليمين ، و الشقى فى كتفه الشمال ( هاكم اقرأوا كتابيا ) كل زول بفتح كتابه و يقرأ اعماله من ولدوهو لامن مات .. هنا انتصب عمنا المرحوم حسن ود الامام قائلا : يا مولانا الزول كان ما بعرف يقرأ ؟ اجابه مولانا : يا حسن اليوم داك كل الناس بتقرأ ... فقال عم حسن : و الله دى براها فايدة .
______ و نواصل ______
|
|
|
|
|
|