Quote: بعدين وليد دا زول بعرف كورة وزي ماقال ربنا يستر ناس مسواي ويكونوا في يومهم إن شاء الله وساسا يسجل من بدري
ااي وليد بيعرف كورة .. لكن مع عرفتو دي عندو كمان عدم عرفه .. وعدم العرفة التانية دي حصرية على المريخـاب .. كان خلاها ببقى كويس .. اول حاجة وليد بيقرا لي مزمل ابو القاسم وبابكر سلك .. ودي اكبر مشكلة .. المشكلة ما انك تقرا ليهم .. المشكلة انك تتأثر بي ثقافتم وتعصبم .. مرات مرات وليد قاعدد يطلع النصيحـة وعجبني احقاقو لي حق كابتن هيثم .. لكن في البوست دا تحديدا جانبو الصواب .. إن لم يكن فقد البوصلة .. بي الرش حق امس دا .. اتفق معاهو تماما في انو قال ما مطمـن .. ودا شي طبيعي لي قرايات احتمال هو زاتو ما ذكره .. اهمها .. إنو ريكاردو ما مدرب بتاع بطولات ليس لديه حساسية مثقافة النهائي .. وطريقتو الطير بيها فريق الهلال البتلتل وقتها . جا طبقه بالنوته والكربون في نفس المريخ في مباراة عبور داخل ارضو محتاج لي نقطة واحدة .. فريق المريخ لو كان هو فريق المريخ .. لكان امس الفريق الضيف .. اتفرتق ومشى بلدو بي فضيحة بي جلاجل .. لكـن .. فريق المريخ من فترة طويلة خارج منظومة الفرق العملاقـة .. فرق المنافسات .. اتضح هذا من خلال اول تراجع ليهو في اول مباراة في الدوري الممتاز المستوى متذبذب والمؤشر منخفض .. اعتماد هيرون ريكاردو على نفس الاشخاص ونفس التبديلات المكرورة ، وطريقة اللعب .. انعدام الروح الجماعية التي عرف بها المريخ .. وتأثر المريخ بغياب اللعيبة .. بشكل واضح الحقيقة الواضحة ان وسط المريخ قاعد ساكت .. فالحقيقة الاكبر من ذلك هجوم المريخ الاكثر سلبية في المنافسة .. واذا كان اغتر مشجعي المريخ من النتيجة الكبيرة التي خرج بها المريخ ضد فريق الخرطوم الوطني .. فهي اكبر كارثة وكانت قاصمة الظهر للمريخ .. وكانت عبارة عن تغبيش وكشيح رماد في العيون .. استاسد المريخ ويستأسد دائما ضد الهلال .. وهذا فعل غريزي ـ وندية معروفة كالندية التي تحدث بين البرشا والريال .. والنصر والهلال ... والاهلي والاتحاد إلخ . الهلال افضل مليون مرة من المريخ ولا توجد هناك اي مقارانات ولا احب ان ادخل فيها .. من عدة نواحي لا من ناحية التشكيلة البديلة .. ولا من ناحية المستوى المتطور للافراد والمجموعة .. ولا من ناحية الكثير من الامور .. نصطصحب معانا مشكلة القائد هيثم مصطفى وما فعلته بالفريق .. والمشكلة الادارية ومشكلة المدير الفني غارزيتو .. بالرغم من ذلك وبالرغم من عدم الاستقرار .. تخطى اللعيبة هذه المعضلة .. وتجاوزوا محطة القائد هيثم مصطفى بالرغم من ان هيثم اثبت انه في كل ثانية يكون فيها داخل الميدان .. تصبح مرعبه لكل الخصوم .. واولهم المريخ وبشهادة وليد ذات نفسه .. إلى الان مشكلة هيثم مستمرة .. لكن استطاعت الفرقة ان تتعامل معها بي اصرار شديد .. الاصابات المتلاحقة للاعمدة الخاصة بالفريق علاء الدين يوسف عمر بخيت سادمبا .. غياب المعز محجوب .. والتوليفه التي خرجت لنا بي جمعة جينارو .. ولو لما الثغرة الصغيرة جدا في دفاع الهلال والتي بدأت في المعالجة وظهر ذلك في المباريات الأخيرة بي الثقة الزائدة التي منحها جمعة جينارو لخط الدفاع وفي غيابه للمعز محجوب والذي اصبح يلعب بمسؤولية اكبر مما كان عليه من السابق .. لكان الهلال السوداني له شأن آخر مع كل المباريات .. دفاع المريخ ليس باحسن حالا من خط وسطه .. وجود الحضري اكبر خصم على الفرقة المريخية وهذا ما لم يعرفه البعض او يعرفه البعض ويكابر . الهوة اوم الفجوة او الثغرة التي خلقها الحضري .. الذي جي به لاسمه .. هي التي اندفن فيها دفاع المريخ كله ، واندفن فيها فريق المريخ بكل تاريخـه وتاريخ كل العمالقة الذين مروا عليه ـ واعني بذلك تاريخ البطل حامد بريمــة ـ والهادي سليم .. ففعلت الحضري الذي يعتمد على اسلوب تضييع الزمن ، واستفزاز المهاجمين وهذا ما نوهت له من قبل هذا اسلوب قديم ورجعي وليس له اي علاقة بكرة القدم الحديثة .. فكرة القدم الحديثة لا تعتمد على مقومات لاعب مثل الحضري وخير دليل على ذلك عدم حماية مرماه من اسهل الكرات تلك الكرة التي كانت بحوذته واهداها للمهاجم لتصبح الفرصة التي اخرجت المريخ من الجنة وسقطـه ليس من الكونفدرالية فقط .
11-11-2012, 09:50 AM
Maawya Hussein Maawya Hussein
تاريخ التسجيل: 12-27-2007
مجموع المشاركات: 10136
بعيد عن مستوي الهلال يا تمبس فريق ليوباردز الشفتو امبارح دا افضل من دجولبيا بي مراحل كبيرة ..فريق منظم وبيلعب كورة علي اصولا وظاهره عليهو بصمات التدريب التونسي في الجرأة والشجاعة وكأنو لاعب في بلدو ..صدارة دجولبيا لمجموعه اكتسبا من الـ6 نقاط بتاعت الملعب المالي وما بي افضلية من ليوبردز وعشان كدا مدرب الهلال كان قاري المسالة صاح تمني دجولبيا والمريخ في النهائي وشايل هم ليوباردز ومعاهو حق
11-11-2012, 11:37 AM
tmbis tmbis
تاريخ التسجيل: 10-19-2002
مجموع المشاركات: 24862
Quote: فريق ليوباردز الشفتو امبارح دا افضل من دجولبيا بي مراحل كبيرة ..فريق منظم وبيلعب كورة علي اصولا وظاهره عليهو بصمات التدريب التونسي في الجرأة والشجاعة وكأنو لاعب في بلدو ..صدارة دجولبيا لمجموعه اكتسبا من الـ6 نقاط بتاعت الملعب المالي وما بي افضلية من ليوبردز وعشان كدا مدرب الهلال كان قاري المسالة صاح تمني دجولبيا والمريخ في النهائي وشايل هم ليوباردز ومعاهو حق
اناعكسك تماما يا معاوية: هو مش نفس الفريق الواجهو المريخ في بلدو .. ياخ انا لما جيت لقيت الفريق دا لاعب مع المريخ .. وفي ارضو والنتيجة بالطريقة دي وقبال ما الحضري يملصه .. انا قلته المريخ دا لاعب مع منو ..؟ .. بعد مقارنة بينو وبين ديجوليبا الفرق كبير جدا .. ومخيف ـ بالرغم من انو ديجوليبا اخد اتنين صفر في الخرطوم .. وكان ممكن تتضاعف النتيجة .. يعني الهلال يلعب مع المتصدر للمجموعة الفريق القوي .. ويتماسك معاهو في الخرطوم ويطلع بالنتيجو الجميلة دي .. ويلعب المريخ مع تاني المجموعة يطلع بنتيجة شبه ايجابية في بلدو ويفشل في هدف واحد ونقطة واحدة مع فريق تعبان زي دا ..؟ لا يا معاوية .. عليك الله ارجع للمباراة الاولى تاني مرة وشوف المريخ ضيع فرصة قدر كيف ..؟
11-11-2012, 10:18 AM
tmbis tmbis
تاريخ التسجيل: 10-19-2002
مجموع المشاركات: 24862
لكن الكرة التي تعامل معها الحضري بي استهتار هي رصاصة الرحمة التي يحمد للحضري انه صوبها في صدر جماهير المريخ بعناية تلك الجماهيرالتي احتفلت به للمزيد من المكابرة وللمزيد من الظن الذي فرضته عليهم الميديا الكاذبة .. وفرضه عليهم الحضري بشخصيته والكاريزما التي صنعها لنفسه ونجح في ذلك كثيرا .. فهل كان تسجيل الحضري .. للوقوف ندا قويا للهلال والتصدي لهجوم الهلال في المقام الأول .. إن كان ذلك فهو قد فشل بكل درجات الفشل .. فالحضري تم تجريبه من كل الجهات ومن زوايا مختلفة تظهر ضعف وقوة حارس المرمى وفي الكثير من المناسبات ابتداء من 2007 بالثلاثية في أمدرمان وهو في عز مجدة قبل خمسة سنوات مرورا بي سادومبا في القاهرة ضد الاسماعيلي .. المواجهات التي جمعت بين الهلال والمريخ في الكونفدرالية والممتاز كل نتائجها لا تؤهل الحضري .. مرورا بي هدف (سولي شريف) لاعب الاهلي الخرطومي الذي اظهر ضعف التوقيت لدى الحضري نهائتا بهدفي مهند الطاهر الاسطورة من زوايا مختلفة وهدف لسادومبا من نفس المسافة التي جا منها هدف لمهند تقريبا.. نعم هناك العديد من حراس المرمى لهم ظروف خاصة للمباريات ولهم ايضا امزجة مختلفه . لكن ان تكون الاخطاء هي من ضمن الاخطاء الرئيسية في حراسة المرمى من ناحية التوقيت للخروج والتوقيت في حماية الكرة .. والتوقيت في المتابعة وقراءة الخصم .. فهذا العيب الكبير .. مشكلة الحضري هي المشكلة الكبيرة التي حاولت إدارة المريخ أن تغطي بها على ضعف الفريق .. وظهرت في النهائي كخاتمة او رصاصة رحمة كما اسلفت .. فهل اسلوب الحضري المعروف بإرسال الكرة من المرمى للمرمى هو ما بنى عليه هيرون خطته ..؟ ما تم امس من طريقة لعب لفريق يفترض انه وصل إلى المربع الأخير ويحتاج إلى نقطة يتيمه للعبور .. يتم التعامل بهذه الطريقة هذا يعني ان الفريق ليست له اي خطة واضحة للعب .. أو دخل الفريق لأرضية الملعب ، من أجل ان يلعب كل لاعب من الحداشر بطريقة يعلمها هو فقط .. بعيدا عن تعليمات مدرب وجهاز فني .. فهل ايضا كان الحضري يلعب بفلسفه خاصة به من أجل ان يواصل مسلسل النصر الذاتي له ويكفر عن غلطته التي ذهبت به إلى مزبلة التاريخ .. هل الحضري كان يعتمد على سايكلوجيته الخاصة في التعامل مع جماهير المريخ بارسال الكرة عاليا لتصطدم بقدر ما يحول تجاهها للمرمى هدفا أم يتلقفها احد اشباح الهجوم المريخي ويعالجها بضربه من اجل ان يهتفوا له كما هتفوا له وهو الذي اهدى النصر في دقائق قاتلة خارج ارضه ..فيها يحتاج اي فريق إلى كل غلطة للمضيف ليبني عليها خطته القادمة دفاعية كانت ام هجومية ..؟
التعديل لي : ووين بتاعين المريخ ديل .. الرش بتاع امس دا خلاكم ما بتشوفو .. اقوليكم بشه جاب قوون في الحضري وتمشوها عااادي ..؟ للدرجة دي الحضري خلاص جدعتوهو عضم ..؟ تم التعديل لتعديل قووون بشـه في الحضري قوون بشه كان في اكرم المسكين
نفس خطة اللعب التي انتهجها الحضري بالأمس . وهو الاسلوب المعروف له .. لا ادري كيف استطاع ان يمحي بها دور المدرب هيرون ريكاردو وفاروق جبرة وابراهومه . فليس فقط حارس المرمى خياره الأول ان يرسل الكرة ويعتمد على ارساله الطويل .. فهناك خاصية ابتداء الهجمة الممرحلة من الخلف وهو السبيل الحديث للكرة .. والملاحظ ايضا لفرقة الهلال انها في مناسبات عديدة كانت تستعمل نفس الاسلوب الطويل وكانت كثيرا ما يفشل ويظهر الهلال متهالك وملغية العديد من خطوطـه .. احيانا تنجح خطة اللعب حال ان تكون هناك اطراف سريعة .. ولكن ليس في كل حالات المباراة كما فعل عمر بخيت واستطاع ان يرسل التمريرات الطولية ونجحت .. لكن في حال تكتل دفاع فريق ضيف يبحث عن ربع فرصة فهذه الطريقة لا تنجح وتعطيه المزيد من الزمن والعديد من كسب الثقة وبعض الافضلية في دقائق من المباراة إن لم تكن جلها.. طريقة اللعب للهلال في الفترة الاخيرة التي تميز بها هي طريقة نقل الكرة وابتداء الهجمة من الخلف ومن عمق الدفاع والتجهيز في منطقة الوسط الهلالى الذي يتفوق على وسط المريخ من ثم التجهيز لمنطقة المناورة ثم منطقة ما خلف الدفاعات الخصم والاستفادة من خاصية مهاجمي الهلال كل على حداه .. سانية برأسياته .. كاريكا وسرعته في الارسالات الطويلة المصنوعة ومعروفة والمدرب عليها ـ والتجهيز للتسديدات القوية المحكمة من مهند الطاهـر والذي اصبح اللاعب الذهبي ومفتاح النصر للكتيبة الهلالية وهذه ميزة يتميز بها هجوم ووسط الهلال من هجوم ووسط المريخ. طريقة اللعب المدروسة والمدرب عليها والتي اصبحت اخيرا مهضومة للفرقة الهلالية .. وظهر هذا جليا حتى في المواجهات الافريقية للهلال او المواجهات الاخيرة بين الهلال والند المريخ .. فالمباراة الأخيرة خرج الهلال مهزوما وفق ظروف محددة لكن اجزم تماما ان الجميع كانت به طمأنينه بأن هناك مدرسة ما تتم فيها حياكة مشروع فريق متجانس وقوي .. ليست الروح الهلالية فقط انما على مستوى الافراد كل عرف ماذا يفعل داخل الملعب المباراة التي جمعت بين الهلال والمريخ والتي انتهت بفوز المريخ لاسباب أخرى .. كانت بمثابة فاتحة الشهية وكانت بمثابة البصمات التي بدأت تظهر حيث بالفعل ظهرت في مباراة الهلال وديجوليبا .. الطريقة التي لعب بها الهلال متماسكا وممتعا للقاعدة الجماهيرية بهدف سانية المصنوع التخصصي وهدف كاريكا بالباص الطويل الذي تم تفصيله للاستفادة من سرعة كاريكا تلك الخواص التي تحدثت عنها .. لهو فرق واضح .. ين استراتيجية الهلال وطريقة لعبه التي منحته الافضلية من المريخ على حسب وجهة نظري ..
11-11-2012, 12:35 PM
ismeil abbas ismeil abbas
تاريخ التسجيل: 02-17-2007
مجموع المشاركات: 10789
Quote: ما تم امس من طريقة لعب لفريق يفترض انه وصل إلى المربع الأخير ويحتاج إلى نقطة يتيمه للعبور .. يتم التعامل بهذه الطريقة هذا يعني ان الفريق ليست له اي خطة واضحة للعب .. أو دخل الفريق لأرضية الملعب ، من أجل ان يلعب كل لاعب من الحداشر بطريقة يعلمها هو فقط .. بعيدا عن تعليمات مدرب وجهاز فني
يا أخى إنت بتقراْ من بنات أفكارى.....عجيب والله.. والله يا تمبس محلل وبارع..كدى شوف عندى سكرى؟؟؟!!!
الحضرى غلطتو ما بتنغفر بسهولة... وإنت كنت حارس يا تمبس قبل كده الحارس لما يمسك الكورة مهما كانت داخل خط ستة بلمها على صدرو والجن الأحمر تانى ما بفكها منو..الكلام ده من صقر أفريقيا سبت دودو الله يمد فى أيامو لما كان بدربنا فى فريق الرابطة بحى العرب.
الليلة الله يمرقنا من الشماته..أنا ما كنت شمتان وتمنيت أن يلتقى الهلال والمريخ فى النهائى ولكن ربك ما أراد.نسأل الله أن يوفقنا ونشيل الكاْس.
11-11-2012, 01:19 PM
tmbis tmbis
تاريخ التسجيل: 10-19-2002
مجموع المشاركات: 24862
تبرا من السكري يا سمعــة ياخ شفت ليك هلالابي بتجيه الحاجات دي .. ؟ غايتو امبارح لو كنت فتحت لي معمل جمب الاستاد .. كان بقيت عدنان خاشقجي بالقديم .. خاصة انو ود الصايم قال لو عايز تعمل بولندا جوة الاستاذ بدفعوك وبدوك عينتك في كيس .. اه اي واحد بجي طالع بي عينة برشو ليك طوالي ...
Quote: وإنت كنت حارس يا تمبس قبل كده الحارس لما يمسك الكورة مهما كانت داخل خط ستة بلمها على صدرو والجن الأحمر تانى ما بفكها منو
هههه .. انت يا اسماعيل قايل الملصة دي باااردة يعني لي حارس مرمى ..؟ واللا قايل الحضري دا امبارح بتجاره كدا عشان حباب عيون المريخ ..؟ ياخ الحضري دا امبارح بتجاره عشان يقولو الحضري كفر عن ملصتو .. والناس تنسى الحتة دي .. الملصة دي اصعب حاجة لي حارس المرمى ... لاتو في اجراءات سلامة لي التعامل مع الكورة زي اجراءات السلامة الجوية بتاعتكم البقولوها للزول قبال الطيارة تقوم ويهرشو ليك بيها كل واحد قلبو رهيف .. مرة اايم الرابطة كنا لاعبين في ميدان بانت .. في العراضات الفي الجانب الجنوبي قدام بيت ناس المرحوم نادر خضر .. عارف خلاص المغربية جات .. ونحن غالبين واحد صفر .. ومع الند التقليدي لينـا وضاربين جلده زي ما الله خلقه والفريق مكرب ومليان .. شي هيثم سلمان المدرب الحالي للمنتخب بتا الناشئين .. وشي حموري الصغير الكان بلعب في الهلال وتيم زي الورد .. وكان غلبناك وباقي للكورة تلت ساعة .. إلا تمرق تخلي الميدان يا يكون عندك واحد يشيل ليك الكورة زي زيكو ويطلع بيها لانو بتتضرب خمسمية ستمية باص وبتكون جاري ساكت في نص الميدان .. المهم اثناء ما الكورة بتتمرر .. والباصات ماشة بالشكل الطبيعي مربعات ومثلثات .. قام الاستوبر مرر لي الكورة بالقانون القديم ممكن تمسكه عادي .. اها انا عايز اتفلسف .. وعلى بعد خطوات من خط المرمى .. الكورة ماشه براحه جدا .. قومي دقي في حجر وغير ياتجاهك في اللحظة المادي رجلي عشان اثبت الكورة بي رجلي وامرره للباك وتبدا بيها الهجمة في شكل باصات وتمريرات .. الكورة زيييطك دخلت ليك بين رجليني .. انا مستغرب لحدت الان الخلاها تدخل بالحتات الضيقة دي شنو ..؟ ملصتها عديل كدا .. وحسيت ليك بي هوا باااارد ان لابس شورت مام لابس بنطلون .. نطيت ورا الكورة .. لقيته فاتت هنااااك جوه الشبكة .. عارف ؟؟: الجماعة قعدو يكوركو الشمات ناس ( بييض) (مللصة) وكلهم اولاد الحلة طبعا .. عارف اديتم ضهري وباللفة بتاعت ناس فوزي المرضي .. وبي الخور البودي لي قصر الشباب .. وبي بانت بي فوق .. لي الموردة .. يعني اقيف شان يشبكوني ملصة ويسيروني .. ؟
Quote: فالمباراة الأخيرة خرج الهلال مهزوما وفق ظروف محددة لكن اجزم تماما ان الجميع كانت به طمأنينه بأن هناك مدرسة ما تتم فيها حياكة مشروع فريق متجانس وقوي
كلام مزبوط .
11-11-2012, 01:12 PM
الصادق صديق سلمان الصادق صديق سلمان
تاريخ التسجيل: 07-11-2006
مجموع المشاركات: 4010
في نقطة مهمة جداً يا تمبس وأتمنى ان يجانبني الصواب فيها وفي مدرب فريق ليوبادرس التونسي اعتقد أن المدرب لعب دور كبير في الخروج بهذه النتيجة لمعرفة التوانسة التامة بنفسيات اللاعب السوداني وانتصاراتهم المتكررة علينا..
ثم..
تمنى هذا الرجل عند لقائه سامر العمرابي بعد المباراة لقاء الهلال في النهائي - والذي اتمناه أنا أيضاً اعتقد لو كان المدرب اي جنسية تانية لكان المريخ قد انتصر على الاقل او تعادل ايجابياً او سجل عندما تغلق الفرق التوانسة المنطقة يتعذر على أي فريق سوداني فك هذا الحصار - فعلها سادومبا مع الإفريقي التونسي هنا وهناك
كما أتمنى أن يلقن لاعبينا لو أراد الله لهم التأهل للمباراة النهائية مدرب المنتخب التونسيي درساً لن ينساه وبي أمانة أتمنى أن يأتي الكوكي مدرب اهلي شندي في رأس الجهاز الفني الهلالي - رايكم شنو يا هلالاب ؟؟؟؟
11-11-2012, 01:12 PM
الصادق صديق سلمان الصادق صديق سلمان
تاريخ التسجيل: 07-11-2006
مجموع المشاركات: 4010
في نقطة مهمة جداً يا تمبس وأتمنى ان يجانبني الصواب فيها وفي مدرب فريق ليوبادرس التونسي اعتقد أن المدرب لعب دور كبير في الخروج بهذه النتيجة لمعرفة التوانسة التامة بنفسيات اللاعب السوداني وانتصاراتهم المتكررة علينا..
ثم..
تمنى هذا الرجل عند لقائه سامر العمرابي بعد المباراة لقاء الهلال في النهائي - والذي اتمناه أنا أيضاً اعتقد لو كان المدرب اي جنسية تانية لكان المريخ قد انتصر على الاقل او تعادل ايجابياً او سجل عندما تغلق الفرق التوانسة المنطقة يتعذر على أي فريق سوداني فك هذا الحصار - فعلها سادومبا مع الإفريقي التونسي هنا وهناك
كما أتمنى أن يلقن لاعبينا لو أراد الله لهم التأهل للمباراة النهائية مدرب المنتخب التونسيي درساً لن ينساه وبي أمانة أتمنى أن يأتي الكوكي مدرب اهلي شندي في رأس الجهاز الفني الهلالي - رايكم شنو يا هلالاب ؟؟؟؟
11-11-2012, 01:58 PM
tmbis tmbis
تاريخ التسجيل: 10-19-2002
مجموع المشاركات: 24862
ده الخلاني الفترة الاخيرة ياعمر .. اتابع مباريات الهلال واقعد انتظره في التلفزيون علشان اعرف تحركات اللعيبة .. والبعمل فوقو غارزيتو ودا طبعا بعدما قنعت من خيرا في الكورة كلها .. ..
Quote: لمعرفة التوانسة التامة بنفسيات اللاعب السوداني وانتصاراتهم المتكررة علينا..
والله يا الصادق كورة امس دي ما عايزه كل المجهود دا للتحليل ولا لي نفسيات اللاعب السوداني مع احترامي لي وجهة نظرك .. فريق المريخ متهالك وماف زول بجيب فيهو قوون والطريقة اللعب بيها مستحيل انها تفك شفرة الفريق دا .. مع انو الفريق دا فريق عادي جدا .. وكان من بدري المباراة تتحسم ليهو في بلدو .. والمريخ يجي لاعب على نفسيات اللعيبة .. خاصة نحن في بلدنا وما ح نكون معرضين لي ضغط بالعكس كان ممكن تكون شهيتنا مفتوحة ..
Quote: عندما تغلق الفرق التوانسة المنطقة يتعذر على أي فريق سوداني فك هذا الحصار - فعلها سادومبا مع الإفريقي التونسي هنا وهناك
انا ما عارف لكن .. منتخبات المغرب العربي اصبحت بالنسبة للاتيام السودانية أو للهلال على وجه الخصوص .. عبارة عن كتاب مفتوح .. تسهل قراءته من كل الجوانب .. ضف لذلك ثقافة ان لا يستطع الهلال احراز هدف خارج ارضه دي انعدمت . وثقافة انو الهلال لا يستطع كسر حاجز الارض والجمهور دي برضو الحمد لله قدرنا نتخطاها .. يبقى شي واحد ومهم .. يستوجب على المدرب وضع خطة محكمة .. وعلى اللعيبة الالتزام الشديد وماف واحد يجيب لينا حاجة ما ادونا ليها .. بالرغم من صعوبة المهمة البتواجهنا إلا انو صعوبة الفريق صاحب الارض اصعب مية مرة .. للضغط الشديد من قبل الجمهور .. وخوفو الشديد من الهلال السوداني صاحب الخبرة الطويلة .. صدقني احيانا كتيرة جدا تصريحات المدربين دي بتكون مبنية على ان توجه رسالة ارهاب للفريق الخصم .. ودي طبعا مسؤولية المدرب انو كيف يعرف يتعامل مع تصريحات رديفو ويهيئ الفريق حقو نفسيا وذهينا قبل التأهيل البدني .. إنت ما شايف غارزيتو قال لي ريكاردو ان ادايرك معاي في النهائي .. صاحبك طوالي باع القضية ...؟
11-11-2012, 01:21 PM
Ashraf el-Halabi Ashraf el-Halabi
تاريخ التسجيل: 10-08-2006
مجموع المشاركات: 5508
يا تمبس الهلال ذاتو سجمان لكن الكويسة إنو لاعب في الكونفدرالية (بطولة السجمانين) والبطولة دي زي ما حضرتك عارف ممكن بسجمك تحرزها. بس الهلال يتفوق على المريخ بميزتين مهمتين: الأولى: المدرب صاحب الشخصية البنفذ في خططه من غير ضغط إعلامي يذكر يلخبط ليهو خططو دي التانية: خبرة اللعيبة الاكتسبوها من المشاركات المتوالية في السنين الفاتت والميزة التالتة في الميزتين ديل : سمعة الهلال الأفريقية والرهبة البتخلقها في الخصوم
والرابعة: قروش الهلال ما هندرد بيرسنت حرام
11-11-2012, 02:08 PM
tmbis tmbis
تاريخ التسجيل: 10-19-2002
مجموع المشاركات: 24862
اها يا حلبي شفت الميزة الاخيرة دي .. من اميز الميزات في الميزانية ... عارف كلما لعيبة الهلال يطالبو بي استحقاقاتم .. كنت قاعد اتكيف على الاقل .. شعب الهلال وامة الهلال بلتفو حوالينو والناس بتطلع من جيبه عشان ترقع الاولاد ديل .. لكن يا حلبي شوف ليك زي هملة بتاعت خرتاية بتاعت قروش .. الحضري يشيل ويدخل يدينو الاتنين وكرعينو .. ويجي في النهاية بي كترت القروش دي يملصه .. انا عندي تحفظات كتيرة يا حلبي على الغارزيتو .. لكن العاجبني انو ماشي وفق خطة معروفة ومدروسة والشكل العام بقى واضح وكويس .. والكويسة انو ما بشتغل بي راي اي زول مهما حصل .. بس يخلي بالو في الحتة بتاعت هيثم دي لحدت الان محتاجين لي المكان حقو إن شاء الله نتأهل وعلى اقدامو الخير .. ايوة الميزة بتاعت الاولاد في الخبرة الطويلة ... واللعب الكتير في الطقس المختلف من مكان لي مكان .. الامطار وارضيات الملاعب المختلفة بالاضافة لمعرفة حركات الارهابات حقت الافارقة الكانو بيعملوها لينا زمان ولو ملاحظ في ميزة مهمة تانية ما قلتها: اهم حاجة بقت ماف تصريحات من اللعيبة .. ودي اهم زوول .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
tmbis
Maawya Hussein
ismeil abbas
الصادق صديق سلمان
Ashraf el-Halabi
فيس بوك
تويتر
انستقرام
يوتيوب
بنتيريست