|
من عجائب جمهورية السودان
|
1- عند مدخل الكبري تجد فتحة U-turn
2- يبدأً الكبري بإشارة مرور وينتهي بإشارة تانية
3- يقطع المشاة الشارع علي كيفهم والإشارة خضراء والعربات مااااشة ورجل المرور وااااااقف يعاين كأنه الأمر ما بخصه. ًولو عديت والإشارة باقي فيها 6 ثواني تلحقك المخالفة على الطاير.
4- تجي عصابة نصّٓ النهار تفرتق حديد درابزين الكبري وتشيله والناس تفتكرهم شركة عشان معاهم "صينيين".
5- شركة شاي، تعلن عن منتجها بعبارة: "شاي ..........إحساس بعبر عننا" ، ، والصورة لطفلين بيشربوا (لبن)!!
6- سعر كيلو الطماطم في السوق الشعبي 15 جنية (بالجديد) وعند الفاتح (الراجل المبروك - في الثورة الحارة العاشرة) بي 7 جنية فقط!! وأحسن من حق السوق الشعبي المليان سماد!!
7- شارع ممتد من وإلى ، يتمتع الجزء الواقع عند بيت (مسؤول) بالإنارة ليلاً بينما باقي الشارع يغط في ظلامٍ دامس.
8- الناس بقت تحمد الله لمن هلال مريخ تنتهي بالتعادل خوفاً من جماهير تعبئها أقلام إعلام رياضي أقل ما تستحقه هو أن تُكسر وتُرمي بعيداً يمكن ناس (النفايات) يريحونا منها.
9- فقرة مواعيد رحلات الطيران في التلفزيون تزينها خلفية طائرة سودانير، وهي الوحيدة الخارج الجدول - عليها رحمة الله.
10- ذهبت مع زوجتي لكافي سياحي على ضفاف النيل بالخرطوم ، ، لفينا ربع ساعة داخل المكان بينما ينظر العاملين إلينا دون أن يوجهنا أحد. أخيراً جلسنا برانا، ، وجاءوا لنا بقائمة الطعام ، ، وبعد قرابة نصف الساعة خرجنا لأنه مافي تاني زول سأل فينا ولا هببوا لينا!! التقول حا ندفعهم قروش مش حا ندفع ليهم؟؟؟
11- تصريح لمصطفى عثمان إسماعيل: إمكانات السودان المتاحة تحتاج لسياسة خارجية منفتحة ،،،، طيب ليه قفلتوها من الأول؟؟؟
|
|
|
|
|
|