|
كلو إلا رأس النيفة ...!
|
لكي تعيش في هذه البلاد تحتاج لحرفنة شديدة ـ حرفنة في كل شئ هو ما تحتاجه يعني مثلاً عشان الكمساري ما يحنكك ويديك باقيك (لبان ماربيلا) من المفترض تكون شايل في جيبك فكة حديد وحديد يلاقي حديد ينبرش (الطرور ويفضل الصندي) أو كما تقول الشفاهة السودانية . الليلة شوف عيني الكمساري رجع لي زول باقيهو ومعاه حبتين لبان ماربيلا القصة دي طبعاً كانت مدخل لشكلة صباحية عظيمة إذ إنو الراكب حلف بالذي نفس محمد بيده إنو ما يشيل لبان ماربيلا وعايز حقوا كاش حق الله بق الله الناس إتدخلت وجوا بتوعين المرور في نص الزحمة والكواريك وقطعوا السواق ايصال (حزام) والأمور جاطت خالص خالص والكمساري يحنس في الراكب والراكب يحلف مايشيل ونحنا نحنس والسواق يلعن أبو اليوم الخلاه يسوق في الخط ده
عادي يعني هكذا الأمور بتمشي في السودان
في العادة وغالباً ما يباصر السودانيين المواضيع العظيمة بإمورٍ أعظم منها لكن بي صراحة الناس ديل بالغوا مع النيفة وفي مقولة أخري بالغوا مع (الباسم) فقبل فترة ليست بالطويلة وحتي بعد إعلان الدولة سياساتها التقشفية كان بمقدور الواحد شراء رأس نيفة بمبلغ وقدره تلاتاشر جنيه ونص النيفة بستة ونص نص النيفة بستة ونص نص النيفة بستة ونص هكذا كانت مكرفونات المطاعم تعلن يتراقص الناس وكل في فلك النيفة يسبحون ... واحدين يشيلو نص وواحدين يشتروا نيفة ونص اليوم وبمحض الصدفة وقفت أمام بائع النيفة قابلني بفتورٍ لم أعهده فيه حق الله بق الله قلت ليهو ياخ عايز لي نص نيفة أجابني بنهرة : يعني عايز كم طلب ولا طلبين حمدت الله في سري ثم أجبت : عايز نص ياخ ثم أضفت : إنت ما متذكرني ولا شنو ؟ أجابني : مافي حاجة إسمها نص النيفة بقت طلبات قول عايز كم طلب نديك ليهو في الحقيقة أنا إندهشت في قصة النيفة البقت طلبات دي ثم ياخوانا هو راس الخروف كلو قدر شنو لامين تقسموه طلبات أجابني بحزم يا ابن الحلال أها عايز كم طلب للمفارقة في زول جاء بعدي طلب راس نيفة كامل وبرضو أبوا يبيعوا ليها وشبكوه ذات الأسئلة الموغلة في التفاصيل ثم ثم إكتشفت إنو إرتفاع الدولار ساهم في إنو رأس النيفة يبقي معدوم وبالتالي من هنا ولي قدام مافي زول يحلم ليهو براس نيفة .... ياخوانا مافي حاجة اسمها راس نيفة في طلبات بتفهموا يعني شنو طلبات
ـــــــــــــــ طلب النيفة بي سبعة جنيه طلب النيفة لا يري بالعين المجردي
يرضيك كده ياريس
|
|
|
|
|
|
|
العنوان |
الكاتب |
Date |
كلو إلا رأس النيفة ...! | خضر حسين خليل | 08-30-12, 09:44 PM |
Re: كلو إلا رأس النيفة ...! | خضر حسين خليل | 08-30-12, 09:50 PM |
Re: كلو إلا رأس النيفة ...! | خضر حسين خليل | 08-30-12, 09:57 PM |
Re: كلو إلا رأس النيفة ...! | خضر حسين خليل | 08-30-12, 10:01 PM |
Re: كلو إلا رأس النيفة ...! | خضر حسين خليل | 08-30-12, 10:04 PM |
Re: كلو إلا رأس النيفة ...! | حسبو عكاشة | 08-30-12, 10:22 PM |
Re: كلو إلا رأس النيفة ...! | خضر حسين خليل | 08-30-12, 10:25 PM |
Re: كلو إلا رأس النيفة ...! | حسبو عكاشة | 08-30-12, 10:30 PM |
Re: كلو إلا رأس النيفة ...! | Yassir Tayfour | 08-30-12, 10:49 PM |
Re: كلو إلا رأس النيفة ...! | خضر حسين خليل | 08-30-12, 10:55 PM |
Re: كلو إلا رأس النيفة ...! | خضر حسين خليل | 08-30-12, 10:58 PM |
Re: كلو إلا رأس النيفة ...! | حسبو عكاشة | 08-30-12, 11:23 PM |
Re: كلو إلا رأس النيفة ...! | مرتضى احمد عبد القادر | 08-31-12, 00:05 AM |
Re: كلو إلا رأس النيفة ...! | abuguta | 08-31-12, 06:34 AM |
Re: كلو إلا رأس النيفة ...! | بخاري عثمان الامين | 08-31-12, 07:00 AM |
Re: كلو إلا رأس النيفة ...! | خضر حسين خليل | 08-31-12, 01:44 PM |
|
|
|